April 27, 2023

ಕದ್ರಿಡ್ ಡಿ ವೇದವ್ಯಾಸ್ ಕಾಮತ್‌ ಪರವಾದ್ ವೋಟು ಕೇಂಡಿನ ಬಿಜೆಪಿ ಕಾರ್ಯಕರ್ತೆರ್

ವಿಧಾನಸಭೆ ವೋಟುದ ಬಗೆಟ್ ಮಹಾ ಅಭಿಯಾನದ ಅಂಗವಾದ್ ಇನಿ 33ನೇ ಕದ್ರಿ ದಕ್ಷಿಣ ವಾರ್ಡ್ ದ ಇಲ್ಲ್ ಲೆಗ್ ಪೋದು ಅಭ್ಯರ್ಥಿ ಡಿ ವೇದವ್ಯಾಸ ಕಾಮತ್ ಮೆರೆನ ಪರವಾದ್ ವೋಟು ಕೇನ್ದ್ ಕರಪತ್ರ ಕೊರಿಯೆರ್.

ಈ ಪೊರ್ತುಡು ವಿಧಾನಪರಿಷತ್ ಮಾಜಿ ಸದಸ್ಯೆರ್ ಮೊನಪ್ಪ ಭಂಡಾರಿ, ಮಂಡಲ ಅಧ್ಯಕ್ಷೆರ್ ವಿಜಯ ಕುಮಾರ್ ಶೆಟ್ಟಿ, ಚುನಾವಣಾ ಕ್ಷೇತ್ರ ಸಂಚಾಲಕೆರ್ ನಿತಿನ್ ಕುಮಾರ್, ಮಂಡಲ ಉಪಾಧ್ಯಕ್ಷೆರ್ ರಮೇಶ್ ಕಂಡೆಟ್ಟು, ಕೈತಲ್ ದ ಮನಪಾ ಸದಸ್ಯೆರ್ ಮನೋಹರ ಶೆಟ್ಟಿ, ಪಕ್ಷದ ಪ್ರಮುಖೆರ್, ಪಕ್ಷದ ಕೈತಲ್ ದ ಮುಖಂಡೆರ್ ಬೊಕ್ಕ ಕಾರ್ಯಕರ್ತೆರ್ ಇತ್ತೆರ್.

ಬೊಡೆದಿನ್ ಬಸ್ ಬರ್ತದ್ ಬೈಕ್ ಡ್ ಬರೊಂದಿತ್ತಿನ ಕಂಡನಿ ಪುನ ಆದ್ ಪತ್ತೆ!

ಕೊಟ್ಟಿಗೆಹಾರ: ಭಾರಿ ಬರ್ಸ ಬತ್ತಿನ ಕಾರಣ ಬೊಡೆದಿನ್ ಬಸ್ ಟ್ಟ್ ಬರ್ತದ್ ಬೈಕ್ ಡ್ ಬರ್ಪೆ ಪಂದ್ ಪಂಡಿನ ಕಂಡನಿ ಹೆಬ್ಬರಿಗೆ ಕೈತಲ್ ಸಂಶಯಾಸ್ಪದವಾದ್ ಪುನ ಆದ್ ಪತ್ತೆ ಆಯಿನ ಘಟನೆ ಬಣಕಲ್ ಪೊಲೀಸ್ ಠಾಣಾ ವ್ಯಾಪ್ತಿದ ಹೆಬ್ಬರಿಗೆಯಡ್ ಬುಧಾರ ನಡಪರೆ ಉಂಡು.

ಚಿಕ್ಕಮಗಳೂರು ತಾಲೂಕ್ ದ ತೇಗೂರುದ ದಿಲೀಪ್ (40) ತೀರ್ ಪೋಯಿನ ಜನ. ಧರ್ಮಸ್ಥಳಡ್ ಮುಡಿ ದೆಪ್ಪುನ ಬೇಲೆ ಮಲ್ತೊಂದು ಇತ್ತಿನ ದಿಲೀಪ್ ಉಜಿರೆಡ್ ವಾಸ ಇತ್ತೆರ್. ಬೊಡಿದಿನೊಟ್ಟಿಗೆ ತೇಗೂರುಗು ಬತ್ತಿನ ದಿಲೀಪ್ ಬುಧಾರ ಬೈಕ್‌ ಡ್ ಉಜಿರೆಗ್ ಪಿದಾಡ್ ದಿತ್ತೆರ್. ಕೊಟ್ಟಿಗೆಹಾರ ಕೈತಲ್ ಬರೊಂದು ಇತ್ತಿಲೆಕ್ಕನೇ ಬರ್ಸ ಸುರು ಆಯಿನೇರ್ದಾವೆರ ಬೊಡೆದಿನ್ ಬಸ್ಸ್ ಕ್ಕ್ ಬರ್ತದ್ ಉಜಿರೆಗ್ ಪೋಯೆರೆ ಪಂದ್, ಯಾನ್ ಬರ್ಸ ಉಂತಿ ಬೊಕ್ಕ ಬೈಕ್‌ ಡ್ ಬರ್ಪೆ ಪಂದ್ ಪಂದಿತ್ತೆರ್.

ಆಂಡ ಬುಧಾರ ಬಯ್ಯಗ್ ಹೆಬ್ಬರಿಗೆ ಕೈತಲ್ ದ ಮಾರ್ಗ ಬರಿಟ್ಟ್ ಮೆರೆನ ಪುನ ಪತ್ತೆ ಅತ್ಂಡ್. ಈ ಘಟನೆದ ಜಾಗೆಗ್ ಬಣಕಲ್ ಪೊಲೀಸ್ ಠಾಣಾ ಪಿಎಸ್‌ ಐ ಜಂಬೂರಾಜ್ ಮಹಾಜನ್, ಎಎಸ್‌ ಐ ಶಶಿ, ಸಿಬ್ಬಂದಿಲಾಯಿನ ಜಗದೀಶ್ ಭೇಟಿ ಕೊರ್ದು ಪರಿಶೀಲನೆ ನಡಪಾದೆರ್. ಈ ನಗೆಟ್ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ತನಿಖೆ ನಡತೊಂದು ಉಂಡು.

ಬಂಟರ ಸಂಘ ಬಂಟವಾಳ ತಾಲೂಕ್ (ರಿ.)ದ ವಾರ್ಷಿಕ ಉಚ್ಚಯದ ಲೆಕ್ಕೊಡು ಸತ್ಯೋದ ಸಿರಿ ತುಳು ನಾಟಕ

ಬಂಟರ ಸಂಘ ಬಂಟವಾಳ ತಾಲೂಕ್ (ರಿ.) ವಾರ್ಷಿಕ ಉಚ್ಚಯದ ಲೆಕ್ಕೊಡು ಬಂಟ್ವಾಳ ತಾಲೂಕ್ ದ ಪ್ರಬುದ್ಧ ಬಂಟ ಕಲಾವಿದೆರೆರ್ದ್ ಸತ್ಯೋದ ಸಿರಿ ತುಳು ಜಾನಪದ ನಾಟಕ ಎ.23 ಐತಾರ ಬಯ್ಯಗ್ ನಡತ್ಂಡ್.

ಈ ನಾಟಕನ್ ಕದ್ರಿ ನವನೀತ ಶೆಟ್ಟಿ ರಚನೆ, ನಿರ್ದೇಶನ ಮಲ್ದೆರ್.

ಮೇ 9-15: ಉದ್ಯಾವರ ಶ್ರೀ ದೈವೊಲು ಸಾನಿಧ್ಯಡ್ ವರ್ಷಾಧಿದ ಉಚ್ಚಯ, ಬಂಡಿ ಉಚ್ಚಯ

ಮಂಜೇಶ್ವರ: ಉದ್ಯಾವರ ಶ್ರೀ ದೈವೊಲು ಸಾನಿಧ್ಯಡ್ ವರ್ಷಾಧಿದ ಉಚ್ಚಯ ಬೊಕ್ಕ ಐತಿಹಾಸಿಕ ಬಂಡಿ ಉಚ್ಚಯ ಮೇ9-15 ಮುಟ್ಟ ನಡಪರೆ ಉಂಡು.

ಮೇ9 ಅಂಗಾರೆ ರಾತ್ರೆ ತಾಲೀಮು ಪ್ರದರ್ಶನ, ಕೊಡಿ ಏರಿಯೆರೆ, ಕಂಚಿಲ್ ಸೇವೆ, ಕಟ್ಟೆ ದೀಪಾರಾಧನೆ ನಡಪರೆ ಉಂಡು.

ಮೇ10 ಬುಧಾರ ಬಯ್ಯಗ್ ಯಕ್ಷಗಾನ ತಾಳಮದ್ದಳೆ, ರಾತ್ರೆ ಸಾಂಸ್ಕೃತಿಕ ಲೇಸ್ ‘ಭಕ್ತಿ ಗಾನಸುಧಾ’, ಕೊಟ್ಯರಾಯನ ಅಣ್ಣ ದೈವೊದ ನೇಮ ಆದ್ ಕೆರೆ ದೀಪಾರಾಧನೆ ನಡಪರೆ ಉಂಡು.

ಮೇ11 ಗುರುವಾರ ಬೊಲ್ಪುಗು ಮೆಗ್ಯೆ ದೈವೊದ ನೇಮ, ಮಧ್ಯಾಹ್ನ ಮಡಸ್ಥಾನ, ಬಯ್ಯಗ್ ಮುಂಡತ್ತಾಯ ದೈವೊದ ನೇಮ, ರಾತ್ರೆ ನಡುಬಂಡಿ ಉಚ್ಚಯ, ಅಣ್ಣ ದೈವೊದ ನೇಮ ನಡಪರೆ ಉಂಡು.

ಮೇ12 ಸುಕ್ರಾರ ಬೊಲ್ಪುಗು ತಮ್ಮ ದೈವೊದ ನೇಮ, ಬಯ್ಯಗ್ ಮುಂಡತ್ತಾಯ ದೈವೊದ ನೇಮ, ಕಡೆಬಂಡಿ ಉಚ್ಚಯ, ತಮ್ಮ ದೈವೊದ ನೇಮ, ಬೆಡಿ ಮಾರ್ದ್ ಪ್ರದರ್ಶನ ನಡಪರೆ ಉಂಡು.

ಮೇ15 ಸೋಮಾರ ರಾತ್ರೆ ಕೊಡಿ ಜಾವೆರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ದೈವೊಲೆನ ಉಚ್ಚಯ ಸಮಿತಿದ ಅಧ್ಯಕ್ಷೆರ್, ಸದಸ್ಯೆರ್, ಆಡಳಿತ ಮಂಡಳಿ ಬೊಕ್ಕ ಕಾರ್ಯ ನಿರ್ವಾಹಣಾಧಿಕಾರಿ ಲೆಪ್ಪೋಲೆಡ್ ತೆರಿಪಾದೆರ್.

ಮುಲ್ಕಿಗ್ ಪ್ರಧಾನಿ ಮೋದಿ ಬರ್ಪಿನೆಕ್ಕ್ ದೊಂಪ ಮೂರ್ತ

ಮುಲ್ಕಿ : ಪ್ರಧಾನಿ ನರೇಂದ್ರ ಮೋದಿ ಉಂದುವೇ ಸುರೂತ್ತ ಸರ್ತಿ ತಾಲೂಕು ಕೇಂದ್ರವಾಯಿನ ಮುಲ್ಕಿ ಗ್ ವೋಟುದ ಪ್ರಚಾರೊಗು ಮೇ 3 ತಾರೀಕ್ ಗ್ ಬರ್ಪಿನ ನಿಲೆಟ್ಟ್ ಮುಲ್ಕಿ ಕೊಲ್ನಾಡ್ ದ ರಾಜಮಾರ್ಗ 66 ಬರಿತ್ತ ಗುಂಡಾಲಗುತ್ತು ಕೈತಲ್ ದೊಂಪ ಮೂರ್ತ ಗುರುವಾರ ಬೊಲ್ಪುಗು ನಡತ್ಂಡ್.

ಬಪ್ಪನಾಡ್ ದೇವಸ್ಥಾನದ ಅರ್ಚಕೆರ್ ಶ್ರೀಪತಿ ಭಟ್ ಮೇರ್ ದೊಂಪ ಮೂರ್ತದ ಪೂಜಾ ವಿಧಿ ವಿಧಾನೊಲೆನ್ ಮಲ್ತ್ ದ್ ಪ್ರಾರ್ಥನೆ ಮಲ್ತೆರ್.

ಈ ಪೊರ್ತುಡು ಪಾತೆರಿನ ಮುಲ್ಕಿ ಬೆದ್ರ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ, ಶಾಸಕೆರ್ ಉಮಾನಾಥ ಕೋಟ್ಯಾನ್ , ಪ್ರಧಾನಿ ಮೋದಿ ನಮ್ಮ ಕ್ಷೇತ್ರೊಗು ಬರ್ಪಿನ ಭಾರಿ ಮಲ್ಲ ಪೆರ್ಮೆದ ವಿಚಾರ. ಆರ್ ಬರ್ಪಿನೆಕ್ಕ್ ಮಾತಾ ರೀತಿದ ತಯಾರಿ ನಡತೊಂದುಂಡು. ಪ್ರಧಾನಿ ಬಾಷಣ ಮಲ್ಪುನ ವೇದಿಕೆ ಪಾಡರೆ ಮಣ್ಣ್ ಸಮತಟ್ಟ್ ಮಲ್ಪುನ ಬೇಲೆ ಭಾರಿ ಬಿರ್ಸ್ ಡ್ ಆವೊಂದುಂಡು. ಜರ್ಮನ್ ತಂತ್ರಜ್ಞಾನದ ಮಿತ್ತರ್ಮೆ ಬೊಕ್ಕ ದೊಂಪದ ಬೇಲೆಗ್ ಇನಿ ಚಾಲನೆ ತಿಕ್ ದ್ಂಡ್.ಕಾರ್ನಾಡ್ ದ ಕೃಷಿ ಮೇಳ ಆತಿನ ಜಾಗೆಡ್ ಹೆಲಿಪ್ಯಾಡ್ ನಿರ್ಮಾಣ ಆವೊಂದುಂಡು ಪಂದ್ ಆರ್ ತೆರಿಪಾಯೆರ್.

ದೊಂಪ ಮೂರ್ತದ ಲೇಸ್ ಡ್ ಪಕ್ಷದ ಮುಖಂಡೆರಾಯಿನ ಸುನಿಲ್ ಆಳ್ವ, ಭುವನಾಭಿರಾಮ ಉಡುಪ, ದೇವಪ್ರಸಾದ್ ಪುನರೂರು, ಕಸ್ತೂರಿ ಪಂಜ, ಸುಭಾಷ್ ಶೆಟ್ಟಿ, ಜಿ.ಎಂ.ಹರ್ಷರಾಜ್ ಶೆಟ್ಟಿ, ರಾಧಿಕಾ ಯಾದವ ಕೋಟ್ಯಾನ್, ನರಸಿಂಹ ಪೂಜಾರಿ, ದಯಾವತಿ, ಶೈಲೇಶ್, ವಿನೋದ್ ಸಾಲ್ಯಾನ್ ಬೆಳ್ಳಾಯಿರು, ವಿನೋದ್ ಬೊಳ್ಳೂರು, ವಿಜಯ ಶೆಟ್ಟಿ, ರಂಗನಾಥ ಶೆಟ್ಟಿ ಮೊಕುಲು ಮಾತ ಇತ್ತೆರ್.

ಮೇ4-8: ಕಣಂತೂರು ಶ್ರೀ ಧರ್ಮರಸು ಶ್ರೀ ತೋಡಕುಕ್ಕಿನಾರ್ ದೈವೊಲ್ಯಡ್ ವರ್ಷಾಧಿದ ಜಾತ್ರೆ

ಬಂಟ್ವಾಳ: ಕಣಂತೂರು ಶ್ರೀ ಧರ್ಮರಸು ಶ್ರೀ ತೋಡಕುಕ್ಕಿನಾರ್ ದೈವೊಲ್ಯಡ್ ವರ್ಷಾಧಿದ ಜಾತ್ರೆ ಮೇ4-8 ಮುಟ್ಟ ನಡಪರೆ ಉಂಡು.

ಈ ಲೇಸ್ ಕ್ಷೇತ್ರದ ತಂತ್ರಿಲಾಯಿನ ರಾಜೇಶ್ ತಾಳಿತ್ತಾಯ ವರ್ಕಾಡಿ ಮೆರೆನ ಮುತಾಲಿಕೆಡ್ ನಡಪರೆ ಉಂಡು.

ಮೇ4 ಗುರುವಾರ ಬೊಲ್ಪುಗು ಬಾಗಂತಮೂಲೆ ಮೂಲಸ್ಥಳಡ್ ತಂಬಿಲ, ಬಯ್ಯಗ್ ಕಳ ಒಪ್ಪಯೆರೆ, ಮಕರ ತೋರಣ ಏರಿಯೆರೆ, ಭಜನೆ ರಾತ್ರೆ ಕೂಟತ್ತಜೆರ್ದ್ ಕಿರುವಾಳು ಬರಿಯೆರೆ, ಕಣಂತೂರು ಭಂಡಾರ ಇಲ್ಲರ್ದ್ ಕಿರುವಾಳು ಪಿದಾಡಿಯೆರೆ, ಕೊಡಿ ಏರಿಯೆರೆ, ಮಹಾಪೂಜೆ, ಕಂಚಿಲ್ ಸೇವೆ ಬೊಕ್ಕ ಮೊಂಟೆಪದವು ಶ್ರೀ ಶಾರದಾಕೃಷ್ಣ ಯಕ್ಷಗಾನ ಸಂಘ ಮೊಕ್ಲೆರ್ದ್ ದಕ್ಷಾದ್ವರ-ಷಣ್ಮುಖ ವಿಜಯ ಆಟ ನಡಪರೆ ಉಂಡು.

ಮೇ5 ಸುಕ್ರಾರ ಕೊಟದಾಯನ ನೇಮ, ಬಯ್ಯಗ್ ವಸಯ, ಮಹಾಪೂಜೆ, ಭಜನೆ ಮೆರವಣಿಗೆ, ರಾತ್ರೆ ದಳಿ, ಕೆರೆ ದೀಪಾರಾಧನೆ, ಶ್ರೀ ತೋಡಕುಕ್ಕಿನಾರ್ ನೇಮ, ಶ್ರೀ ಬಂಟಜಾವದೆ ನೇಮ ಬೊಕ್ಕ ಕೈತಲ್ ದ ಪ್ರತಿಭೆಲೆರ್ದ್ ನೃತ್ಯ ವೈವಿಧ್ಯ ನಡಪರೆ ಉಂಡು.

ಮೇ6 ಸನಿಯಾರ ಬೊಲ್ಪುಗು ಶ್ರೀ ಉಳ್ಳಾಲ್ತಿ ನೇಮ ಬೊಕ್ಕ ಒಲಸರಿ ನೇಮ ನಡಪರೆ ಉಂಡು. ಬೊಕ್ಕ ರಾಘವದಾಸ ಪೂಪಾಡಿಕಲ್ಲ್ ಮೆರೆನ ಸಾರಥ್ಯಡ್ ಚೂಡಾಮಣಿ ಆಟ ನಡಪರೆ ಉಂಡು. ಬಯ್ಯಗ್ ಭಜನೆ, ರಾತ್ರೆ ಶ್ರೀ ತೋಡಕುಕ್ಕಿನಾರ್ ದೈವೊದ ಒಲಸರಿ ನೇಮ ಬೊಕ್ಕ ಶ್ರೀ ವೈದ್ಯನಾಥ ಸೇವಾ ಸಂಘದ ವಾರ್ಷಿಕ ಉಚ್ಚಯ ನಡಪರೆ ಉಂಡು.

ಮೇ7 ಐತಾರ ರಾತ್ರೆ ಶ್ರೀ ದುರ್ಗಾಲಯ ನೇಮ ಬೊಕ್ಕ ಕೂಡ ಐವರ ಬಂಟ್ರ ನೇಮ ನಡಪರೆ ಉಂಡು.

ಮೇ8 ಸೋಮಾರ ರಾತ್ರೆ ಶ್ರೀ ಪಿಲಿಚಾಮುಂಡಿ ನೇಮ, ಕೊಡಿ ಜವೆರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಆಡಳಿತ ಧರ್ಮದರ್ಶಿ, ಅನುವಂಶಿಕ ಮೊಕ್ತೇಸರೆರ್ ನಾರ್ಯಗುತ್ತು ತಿಮ್ಮಪ್ಪ ಕೊಂಡೆ ಯಾನೆ ಮಂಜು ಭಂಡಾರಿ, ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಅಮಿತ್ ಷಾ ಮಿತ್ತ್ ದೂರು ದಾಖಲ್ ಮಲ್ತಿನ ಕಾಂಗ್ರೆಸ್

ಬೆಂಗ್ಲೂರ್: ಕಾಂಗ್ರೆಸ್ ಅಧಿಕಾರಗ್ ಬತ್ತ್ಂಡ ರಾಜ್ಯಡ್ ಹಿಂಸಾಚಾರ ಆಪುಂಡು ಪಂದ್ ರಾಜ್ಯದ ಮತದಾರೆರೆಗ್ ಬೆದರಿಕೆ ಪಾಡ್ದೆರ್ ಪಂದ್ ಆರೋಪ ಮಲ್ತಿನ ಕಾಂಗ್ರೆಸ್ ಕೇಂದ್ರ ಸಚಿವೆರ್ ಅಮಿತ್ ಷಾ ಮೆರೆನ ಮಿತ್ತ್ ಎಫ್ ಐಆರ್ ದಾಖಲ್ ಮಲ್ಪೆರೆ ದೂರು ಸಂದಾದೆರ್.

ಎಐಸಿಸಿ ಪ್ರಧಾನ ಕಾರ್ಯದರ್ಶಿ ರಣದೀಪ್ ಸಿಂಗ್ ಸುರ್ಜೆವಾಲ, ಕೆಪಿಸಿಸಿ ಅಧ್ಯಕ್ಷೆರ್ ಡಿ.ಕೆ ಶಿವಕುಮಾರ್, ಎಐಸಿಸಿ ವಕ್ತಾರೆರ್ ಗೌರವ್ ವಲ್ಲಭ್ ಮೊಕುಲು ಬೆಂಗ್ಲೂರ್ ದ ಹೈ ಗ್ರೌಂಡ್ಸ್ ಪೊಲೀಸೆರೆಗ್ ಗುರುವಾರ ದೂರು ಸಂದಾದೆರ್.

ಸಿನಿಮಾ ನಟಿ ಸಮಂತಾಗ್ ದೇವಲ್ಯ ಕಟ್ಟಾಯಿನ ಅಭಿಮಾನಿ!

ಆಂಧ್ರಪ್ರದೇಶ: ಆಂಧ್ರದ ಅಭಿಮಾನಿಯೊರಿ ತನ್ನ ಇಲ್ಲಲ್‌ ನೆಚ್ಚಿನ ನಟಿ ಸಮಂತಾಗಾದ್ ದೇವಲ್ಯ ಕಟ್ಟಾದೆರ್.

ಇತ್ತೆ ದೇವಲ್ಯಡ್ ಪ್ರತಿಷ್ಠಾಪನೆ ಮಲ್ಪರೆ “ಸ್ಯಾಮ್” ಮೆರೆನ‌ ಮೂರ್ತಿ ಲ ರಡಿ ಆತ್ಂಡ್. ಉಂದುವೇ ಸುಕ್ರಾರ ದೇವಲ್ಯ ಉದಿಪನ ಆವರೆ ಉಂಡು.

ಏಪ್ರಿಲ್ 28 ಕ್ಕ್ ಸಮಂತಾ ಪುಟ್ಟುಪರ್ಬ. ಅಂಚಾದ್ ಮೆರೆಗ್ ಈ ಮುಖೇನ ಇಸೇಸ ಉಡುಗೊರೆ ಕೊರಿಯೆರೆ ಅಭಿಮಾನಿ ದುಂಬಾತೆರ್. ಆತೆ ಅತ್ತಾಂದೆ ಮಯೋಸೈಟಿಸ್ ಸಮಸ್ಯೆರ್ದ್ ನರಲೊಂದು ಇಪ್ಪುನ ಸಮಂತಾ ಬೇಗ ಹುಷಾರ್ ಆವೊಡು ಪಂದ್ ಆ ಅಭಿಮಾನಿ ತೀರ್ಥಕ್ಷೇತ್ರಗ್ ಯಾತ್ರೆ ಮಲ್ಪರೆ ಉಲ್ಲೆರ್.

ಮೇ26-28: ಬೋಳಿಯಾರ್ ಶ್ರೀ ಸತ್ಯ ಮಂತ್ರದೇವತೆ, ಕೊರಗಜ್ಜ, ಮಂತ್ರಗುಳಿಗ ಸಾನಿಧ್ಯಡ್ ವರ್ಷಾಧಿದ ಕೋಲ

ಪಲ್ಲ: ಬೋಳಿಯಾರ್ ಶ್ರೀ ಸತ್ಯ ಮಂತ್ರದೇವತೆ, ಕೊರಗಜ್ಜ, ಮಂತ್ರಗುಳಿಗ ಸಾನಿಧ್ಯಡ್ ವರ್ಷಾಧಿದ ಕೋಲ ಮೇ26-28 ಮುಟ್ಟ ನಡಪರೆ ಉಂಡು.

ಮೇ26 ಕ್ಕ್ ಬೊಲ್ಪುಗು ಗಣಪತಿ ಹೋಮ, ಶ್ರೀ ಸತ್ಯಮಂತ್ರದೇವತೆ, ಕೊರಗಜ್ಜ, ಮಂತ್ರಗುಳಿಗ ದೈವೊಲೆಗ್ ನವಕ ಕಲಶಾಭಿಷೇಕ, ಮಧ್ಯಾಹ್ನ ಅನ್ನಸಂತರ್ಪಣೆ ಬಯ್ಯಗ್ ನಾಗದೇವೆರೆಗ್ ತನುತರ್ಪಣ ಸೇವೆ, ರಾತ್ರೆ ಅನ್ನಸಂತರ್ಪಣೆ ನಡತ್ಂಡ್.

ಮೇ27 ಕ್ಕ್ ಬಯ್ಯಗ್ ಶ್ರೀ ಸತ್ಯಮಂತ್ರದೇವತೆನ ದರ್ಶನ ಸೇವೆ, ರಾತ್ರೆ ಅನ್ನಸಂತರ್ಪಣೆ, ಶ್ರೀ ಸತ್ಯ ಮಂತ್ರದೇವತೆನ ಕೋಲ ನಡಪರೆ ಉಂಡು.

ಮೇ28 ಕ್ಕ್ ಮಧ್ಯಾಹ್ನ ಮಂತ್ರ ಗುಳಿಗನ ಕೋಲ, ಅನ್ನಸಂತರ್ಪಣೆ, ಬಯ್ಯಗ್ ಕೊರಗಜ್ಜನ ಕೋಲ ನಡಪರೆ ಉಂಡು ಪಂದ್ ಆದಿತ್ಯ ಪೂಜಾರಿ ಬೋಳಿಯಾರ್ ಲೆಪ್ಪೋಲೆಡ್ ತೆರಿಪಾದೆರ್.