68ನೇ ಫಿಲ್ಮ್ ಫೇರ್ ಅವಾರ್ಡ್ 2023 ಟ್ಟ್ ರಾಜ್ ಕುಮಾರ್ ರಾವ್ ಅತ್ಯುತ್ತಮ ನಟೆ ಬೊಕ್ಕ ಆಲಿಯಾ ಭಟ್ ಅತ್ಯುತ್ತಮ ನಟಿ ಪ್ರಶಸ್ತಿನ್ ಗೆಂದ್ ದೆರ್.
ಸಂಜಯ್ ಲೀಲಾ ಬನ್ಸಾಲಿ ಮೇರ್ “ಗಂಗೂಬಾಯಿ ಕಥಿವಾಡಿ” ಪಿಕ್ಚರ್ ಗ್ ಅತ್ಯುತ್ತಮ ಪಿಕ್ಚರ್ ಬೊಕ್ಕ ನಿರ್ದೇಶಕೆ ಪ್ರಶಸ್ತಿನ್ ಪಡೆತೆರ್. ಬ್ರಹ್ಮಾಸ್ತ್ರ ಪಿಕ್ಚರ್ ದ ಕೇಸರಿಯಾ ಪದ್ಯಗ್ ಪುಗರ್ತೆದ ಗಾಯಕೆ ಅರ್ಜಿತ್ ಸಿಂಗ್ ಗ್ ಅತ್ಯುತ್ತಮ ಹಿನ್ನೆಲೆ ಗಾಯಕೆ ಪ್ರಶಸ್ತಿ ಬೊಕ್ಕ ಸುದೀಪ್ ಚಟರ್ಜಿಗ್ ಅತ್ಯುತ್ತಮ ಸಿನೆಮಾಟೋಗಫ್ರಿಗಾದ್ ಪ್ರಶಸ್ತಿ ತಿಕ್ ದ್ಂಡ್.
NTPC ಡ್ ಖಾಲಿ ಇಪ್ಪುನ 152 ಮೈನ್ ಓವರ್ ಮ್ಯಾನ್ ಬೇಲೆಗ್ ಅರ್ಜಿ ಪಾಡೊಲಿ.
ಅರ್ಹ ಅಭ್ಯರ್ಥಿಲು ಆನ್ ಲೈನ್ ಡ್ ಪಿಯುಸಿ, ಡಿಪ್ಲೊಮಾಗ್ ಸಂಬಂಧ ಪಟ್ಟಿನ ಬೇಲೆಗ್ ಅನುಗುಣವಾದ್ ಅರ್ಜಿ ಸಂದಾವೊಲಿ.
ಲಿಖಿತ ಪರೀಕ್ಷೆ, ಕೌಶಲ್ಯ ಪರೀಕ್ಷೆದ ಆಧಾರದ ಮಿತ್ತ್ ಅಭ್ಯರ್ಥಿಲೆನ್ ಆಯ್ಕೆ ಮಲ್ಪೆರೆ ಆಪುಂಡು. ಅರ್ಜಿ ಸಂದಾಯೆರೆ ಮೇ 5 ಅಕೇರಿದ ತಾರೀಕ್ ಆತ್ಂಡ್. ಎಚ್ಚಾದ ಪೊಲಬುಗಾದ್ ವೆಬ್ಸೈಟ್: ntpc.co.in ಗ್ ಸಂಪರ್ಕ ಮಲ್ಪೊಲಿ.
ದೇಶದ ಪೂರ್ವ ಭಾಗಡ್ ರಕ್ಷಣಾ ಕಾರ್ಯಡ್ ಇತ್ತಿನ 33 ಸೈನಿಕೆರೆನ್ ಜಿಹಾದಿಲು ಕೆರ್ತೆರ್ ಪಂದ್ ಬರ್ಕಿನಾ ಫಾಸೊ ಸರ್ಕಾರ ತೆರಿಪಾದ್ಂಡ್.
ಈ ಬಗೆಟ್ ಪ್ರಕಟಣೆ ಬುಡುಗಡೆ ಮಲ್ತಿನ ಸೇನೆ, ತೀರ್ ಪೋಯಿನಕುಲು ಅತ್ತಂದೆ, ಬೇತೆ 12 ಸೈನಿಕೆರೆಗ್ ಮಸ್ತ್ ಪೆಟ್ಟಾತ್ಂಡ್. ಪೆಟ್ಟಾಯಿನಕ್ಲೆಗ್ ಚಿಕಿತ್ಸೆ ನಡತೊಂದು ಉಂಡು.
ಭಾರತ ಬೊಕ್ಕ ಪಾಕ್ ಗಡಿಟ್ಟ್ ಅಮಲ್ ದ ಸೊತ್ತುಲೆನ ಸಾಗಾಟ ನಡತೊಂದು ಉಂಡು.
ಅತ್ತಂದೆ ಡ್ರೋನ್ ದ ಮುಖೇನ ಪಾಕ್ ಕಡೆರ್ದ್ ಸಾಗಾಟ ಆವೊಂದು ಇತ್ತಿನ ಹೆರಾಯಿನ್ ನ್ ಬಿಎಸ್ಎಫ್ ದ ಪಂಜಾಬ್ ಫ್ರಾಂಟಿಯರ್ ವಶಕ್ಕ್ ಪಡೆತ್ಂಡ್. ಅಮೃತಸರ ವಲಯದ ಬಿಎಸ್ಎಫ್ ಪಡೆರ್ದ್ ಕಾರ್ಯಾಚರಣೆ ನಡತ್ ದ್ಂಡ್. ನೆತ್ತೊಟ್ಟಿಗೆ ಮಂಜಲ್ ಬಣ್ಣದ ಟೇಪ್, ಕರ್ಬದ ಕೊಕ್ಕೆ ಬೊಕ್ಕ ಮಿನ್ಕುನ 8 ಪಟ್ಟಿನ್ ವಶಕ್ಕ್ ಪಡೆತ್ಂಡ್.
ಪುತ್ತೂರ್: ವಿಧಾನ ಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಆಶಾ ತಿಮ್ಮಪ್ಪ ಗೌಡ ಮೆರೆನ ಪರ ವೋಟುದ ಪ್ರಚಾರ ಮಲ್ಪರೆ ರಾಜ್ಯ ಬಿಜೆಪಿ ಚುನಾವಣಾ ಸಹ ಉಸ್ತುವಾರಿ, ತಮಿಳುನಾಡ್ ಬಿಜೆಪಿ ರಾಜ್ಯಾಧ್ಯಕ್ಷೆರ್ ಅಣ್ಣಾಮಲೈ ಮೇರ್ (ಎ.29) ಎಲ್ಲೆ ಪುತ್ತೂರ್ ಗ್ ಬರಿಯೆರೆ ಉಲ್ಲೆರ್.
ಈ ಲೇಸ್ ಎಲ್ಲೆ ಮಧ್ಯಾಹ್ನ 3 ಗಂಟೆಗ್ ಕಾವು ಜನಮಂಗಳ ಸಭಾಭವನಡ್ ನಡಪರೆ ಉಂಡು.
ಕಾಂಗ್ರೆಸ್ ನಾಯಕಿ ಪ್ರಿಯಾಂಕಾ ಗಾಂಧಿನ ಮಿತ್ತ್ ಮೈಸೂರ್ ಡ್ ಬಿಜೆಪಿ ದೂರು ಕೊರ್ತುಂಡು.
ಲಿಂಗಾಯಿತೆರೆನ್ ಬಿಜೆಪಿ ಪಕ್ಷ ಅವಮಾನ ಮಲ್ದ್ಂಡ್ ಪನ್ಪುನ ಹೇಳಿಕೆನ್ ಆರೋಪ ಮಲ್ತ್ ದ್ ಮೈಸೂರ್ ಗ್ರಾಮಾಂತರ ಕಾನೂನು ಘಟಕರ್ದ್ ಚುನಾವಣಾಧಿಕಾರಿಗ್ ದೂರು ಕೊರ್ತುಂಡು.
ಕೆಆರ್ ಪೇಟೆಡ್ ಪ್ರಚಾರದ ಪೊರ್ತುಡು ಪ್ರಿಯಾಂಕಾ ಮೇರ್ ಲಿಂಗಾಯಿತೆರೆಗ್ ಬಿಜೆಪಿ ಅವಮಾನ ಮಲ್ದ್ಂಡ್ ಪಂದ್ ಜಾತಿ, ಧರ್ಮದ ಇಚಾರ ಗಲಸ್ ದ್ ಪ್ರಚಾರ ಮಲ್ದೆರ್ ಪಂದ್ ಆರೋಪ ಮಲ್ದೆರ್. ಅಂಚಾದ್ ಈ ಬಗೆಟ್ ಕ್ರಮ ದೆತೊನೊಡು ಪಂದ್ ಬಿಜೆಪಿ ದೂರುಡ್ ಬಿನ್ನಾಪು ಮಲ್ದ್ಂಡ್.
ಪುತ್ತೂರ್: ಪಕ್ಷೇತರ ಅಭ್ಯರ್ಥಿ ಅರುಣ್ ಕುಮಾರ್ ಪುತ್ತಿಲ ಮೇರ್ ಧರ್ಮಸ್ಥಳ ಶ್ರೀ ಮಂಜುನಾಥ ಸ್ವಾಮಿ ಕ್ಷೇತ್ರಗ್ ಭೇಟಿ ಕೊರಿಯೆರ್.
ಬೊಕ್ಕ ಧರ್ಮಾಧಿಕಾರಿ ಡಾ.ಡಿ ವೀರೇಂದ್ರ ಹೆಗ್ಗಡೆ ಮೆರೆನ್ ಭೇಟಿ ಆದ್ ಆಶೀರ್ವಾದ ಪಡೆಯೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ ಡ್ ‘ಕಾವ್ಯಗಾನ-ಸಂಗೀತ ಪಾಠ’ ಲೇಸ್ ದ 5ನೇ ಸಂಚಿಕೆ ಎ.28 ಕ್ಕ್ ಸುಕ್ರಾರ ಬಯ್ಯಗ್ 5.30ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ಪಾಲ್ ಪಡೆಯೆರೆ ಉಲ್ಲೆರ್. ನನ ಎ.29 ಕ್ಕ್ ಸನಿಯಾರ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಉತ್ತರ ಪ್ರದೇಶದ ಅಯಾನ್ ಗುಪ್ತಾ ಪನ್ಪುನ ಆಣ್ 10ನೇ ವರ್ಷಡ್ 10ನೇ ಕ್ಲಾಸ್ ಪರೀಕ್ಷೆಡ್ ಪಾಸಾತೆ.
ಅಯಾನ್ 76.6% ಮಾರ್ಕ್ ಪಡೆತೆ. ಕರಿನ ವರ್ಷ 9ನೇ ಕ್ಲಾಸ್ ಪಾಸಾಯಿನ ಅಯಾನ್ ಈ ವರ್ಷ 10 ನೇ ಕ್ಲಾಸ್ ಪಾಸಾತೆ.
ಲಾಕ್ ಡೌನ್ ಪೊರ್ತುಡು ಅಯಾನ್ ತನ್ನರ್ದ್ ಮಿತ್ತ ಕ್ಲಾಸ್ ದ ಬೂಕುನ್ ಓದೊಂದು ಇತ್ತೆ. ಅಂಚಾದ್ ಈ ಆಣನ ಪ್ರತಿಭೆನ್ ತೂದು 10 ನೇ ಕ್ಲಾಸ್ ಪರೀಕ್ಷೆ ಬರೆಯೆರೆ ಇಸೇಸ ಅನುಮತಿ ದೆತೊಂದ ಪಂದ್ ಶಾಲೆದ ಪ್ರಾಂಶುಪಾಲೆರ್ ಪೊಲಬು ಕೊರ್ತೆರ್.
UPSC ದ CAPF ಡ್ 322 ಸಹಾಯಕ ಕಮಾಂಡೆಂಟ್ ಬೇಲೆಗ್ ಅರ್ಜಿ ಪಾಡೊಲಿ.
ನೆಟ್ಟ್ BSF-86, CRPF-55, CISF-91, ITBP-60 ಬೊಕ್ಕ SSB ಡ್ 30 ಬೇಲೆ ಉಂಡು. ಆಸಕ್ತ ಬೊಕ್ಕ ಅರ್ಹ ಅಭ್ಯರ್ಥಿಲು ವೆಬ್ಸೈಟ್ upsc.nic.in ಗ್ ಭೇಟಿ ಕೊರ್ಪಿನ ಮುಖೇನ ಮೇ 16 ತ್ತ ಉಲಯಿ ಅರ್ಜಿ ಸಂದಾವೊಡು. ಅರ್ಜಿ ಸಂದಾಯೆರೆ ಪದವಿ ಶಿಕ್ಷಣದ ಅರ್ಹತೆ ಇಪ್ಪೊಡು. ಲಿಖಿತ ಪರೀಕ್ಷೆ, ದೈಹಿಕ ಪರೀಕ್ಷೆ ಬೊಕ್ಕ ದಾಖಲೆದ ಪರಿಶೀಲನೆದ ಆಧಾರದ ಮಿತ್ತ್ ಆಯ್ಕೆ ಮಲ್ಪೆರೆ ಆಪುಂಡು ಪಂದ್ ಪ್ರಕಟಣೆ ತೆರಿಪಾದ್ಂಡ್.
