ದೇಲಂಪುರಿ ಶ್ರೀ ಮಹಾದೇವ ಮಹಾಗಣಪತಿ ಸ್ವಾಮಿಗ್ ಊರುದ ಮಾತ ಭಕ್ತಾದಿಲೆರ್ದ್ ಬೊಂಡದ ಅಭಿಷೇಕ ಸೇವೆ ಮೇ1 ಸೋಮಾರ ಬೊಲ್ಪುಗು ನಡಪರೆ ಉಂಡು.
ಈ ಲೇಸ್ ಗ್ ಮಾತ ಭಕ್ತಾದಿಲು ಪಾಲ್ ಪಡೆದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಅಂಚೆನೆ ಬೊಂಡನ್ ದೇವಲ್ಯಗ್ ಕನತ್ ಕೊರೊಡು ಪಂದ್ ಬಿನ್ನಾಪು ಮಲ್ದೆರ್.
ಮುಲ್ಕಿ: ಸಮಾಜಸೇವಕೆರ್, ಬಿಲ್ಲವ ಸಮಾಜ ಸೇವಾ ಸಂಘ (ರಿ) ಹಳೆಯಂಗಡಿ ನೆತ್ತ ಅಧ್ಯಕ್ಷೆರ್ ಚಂದ್ರಶೇಖರ ನಾನಿಲ್ ಮೆರೆಗ್ ಅರೆನ ಧರ್ಮಪತ್ನಿ ಜಯಶ್ರೀ ಸಮೇತ ಹೊಸ ಅಂಗಣ ಪತ್ರಿಕೆದ ತಿಂಗಳ ಬೆಳಕು ಮಾನಾದಿಗೆ ಲೇಸ್ ಶನಿವಾರ ನಡತ್ಂಡ್.
ಪುನರೂರು ಸ್ವಾಗತ್ ಹೋಟೆ ಲ್ ದ ಚಾವಡಿಡ್ ನಡತಿನ ಈ ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿತ್ತಿನ ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು ಪಾತೆರ್ದ್, ನಮ ಸಂಪಾದನೆ ಮಲ್ತಿನೆಟ್ಟ್ ಒಂಜಿ ಭಾಗೊನು ಸಮಾಜದ ಎಡ್ಡೆಪ್ಪುಗಾದ್ ಕೊರ್ಂಡ ಜೀವನ ಸಾರ್ಥಕ ಆಪುಂಡು. ಸಮಾಜಸೇವೆಡ್ ಚಂದ್ರಶೇಖರ ನಾನಿಲ್ ಮಲ್ಲ ಪುದರ್ ಮಲ್ದಿನಾರ್ ಪಂಡೆರ್.
ಮಾನಾದಿಗೆ ಸ್ವೀಕಾರ ಮಲ್ತ್ ದ್ ಪಾತೆರಿನ ಚಂದ್ರಶೇಖರ ನಾನಿಲ್ , ನಮ ಸಮಾಜೊನು ಪ್ರೀತಿ ಮಲ್ತ್ಂಡ ಸಮಾಜ ನಮನ್ ಪ್ರೀತಿ ಮಲ್ಪುಂಡು. ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಬತ್ತಿನಪಗ ಮಸ್ತ್ ಕಡೆಟ್ಟ್ ಎನನ್ ಮಾನಾದಿಗೆ ಮಲ್ಪುನಗ ಈ ಸಂಗತಿ ಎಂಕ್ ತೆರಿದ್ ಬೈದ್ಂಡ್. ಮಾತೆರ್ಲ ಸಮಾಜದ ಎಡ್ಡೆಪ್ಪುಗಾದ್ ಬೇಲೆ ಮಲ್ಪೊಡು ಪಂಡೆರ್.
ಬಿನ್ನೆರಾದ್ ಸಮಾಜಸೇವಕೆರ್ ಶೇಖರ್ ಕೊಳಚಿಕಂಬಳ, ರೋಟರಿ ಕ್ಲಬ್ ಒತ್ತು ಗವರ್ನರ್ ಎಂ.ನಾರಾಯಣ್ ಮಿತ್ತರ್ಮೆಡ್ ಇತ್ತೆರ್.
ವಾಸು ಪೂಜಾರಿ ಚಿತ್ರಾಪು ದೇವೆರೆನ್ ಸುಗಿತೆರ್. ಹೊಸ ಅಂಗಣ ಸಂಪಾದಕೆರ್ ಡಾ.ಹರಿಶ್ಚಂದ್ರ ಸಾಲ್ಯಾನ್ ಸ್ವಾಗತ ಮಲ್ತೆರ್. ವಿಜಯಕುಮಾರ್ ಕುಬೆವೂರು ಮಾನಾದಿಗೆ ಪತ್ರ ಓದಿಯೆರ್. ರವಿಚಂದ್ರ ಸಭೆ ಸುಧಾರಿಕೆ ಮಲ್ತೆರ್. ವಾಮನ ಕೋಟ್ಯಾನ್ ನಡಿಕುದ್ರು ಸೊಲ್ಮೆ ಸಂದಾಯೆರ್.
ಹಳೆಯಂಗಡಿ : ಬ್ರಹ್ಮಕಲಶ ಉಚ್ಚಯೊಗು ತಯಾರಾದುಪ್ಪುನ ತೋಕೂರು ಶ್ರೀ ಸುಬ್ರಮಣ್ಯ ಮಹಾಗಣಪತಿ ದೇವಸ್ಥಾನದ ಪೊಸ ಧ್ವಜಸ್ತಂಭ ಉದಿಪನದ ಲೇಸ್ ಏ.26 ಕ್ಕ್ ನಡತ್ಂಡ್.
ಶಿಬರೂರು ಗೋಪಾಲಕೃಷ್ಣ ತಂತ್ರಿಲು ಅಂಚೆನೆ ಅರ್ಚಕೆರ್ ಮಧುಸೂದನ ಆಚಾರ್ಯ ಮುತಾಲಿಕೆಡ್ ಧ್ವಜಸ್ತಂಭ ಉದಿಪನ ಪೂರ್ವದ ಪೂಜಾ ವಿಧಿ ಬೊಕ್ಕ ವಿಶೇಷ ಪ್ರಾರ್ಥನೆ ನಡತ್ಂಡ್.
ದೇವಸ್ಥಾನದ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು, ಉಪಾಧ್ಯಕ್ಷೆರ್ ಮೋಹನ್ ದಾಸ್, ಗುರುರಾಜ್ ಎಸ್ ಪೂಜಾರಿ, ರತ್ನಾಕರ ಶೆಟ್ಟಿಗಾರ್, ಸುಗಂಧಿ ಡಿ. ಕೊಂಡಾಣ, ಧಾರ್ಮಿಕ ಪರಿಷತ್ ಸದಸ್ಯೆರ್ ಭುವನಾಭಿರಾಮ ಉಡುಪ, ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್ ಕುಮಾರ್ ಹೆಗ್ಡೆ, ಪ್ರಧಾನ ಕಾರ್ಯದರ್ಶಿ ರಾಮಣ್ಣ ಬಿ. ದೇವಾಡಿಗ, ಕಾರ್ಯದರ್ಶಿ ಪುರುಷೋತ್ತಮ ಕೋಟ್ಯಾನ್, ರಮೇಶ್ ಅಮೀನ್, ವ್ಯವಸ್ಥಾಪನ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್, ಸಮಿತಿ ಸದಸ್ಯೆರಾಯಿನ ವಿಜಯಕುಮಾರ್ ರೈ, ಲೋಕಯ್ಯ ಸಾಲ್ಯಾನ್, ಪುರುಷೋತ್ತಮ ರಾವ್, ವಿಪುಲ ಡಿ. ಶೆಟ್ಟಿಗಾರ್, ಶಾರದಾ ಜಿ. ಬಂಗೇರ , ರಾಮಚಂದ್ರ ನಾಯಕ್ ಕೊಲ್ನಾಡುಗುತ್ತು, ವಿನೋದ್ ಸಾಲ್ಯಾನ್ ಬೆಳ್ಳಾಯರು, ತೋಕೂರು ಮಹಿಳಾ ಮಂಡಲದ ಅಧ್ಯಕ್ಷೆರ್ ಅನುಪಮಾ ರಾವ್, ಹೇಮನಾಥ ಅಮೀನ್, ಧರ್ಮಾನಂದ ಶೆಟ್ಟಿಗಾರ್, ದಿನೇಶ್,ಎಸ್ ಕೆ ಪಿಎ ದ ಮೋಹನ್ ರಾವ್, ದೇವಸ್ಥಾನದ ಸಿಬ್ಬಂದಿಲು, ಊರ ಪರವೂರುದ ಭಕ್ತೆರ್ ಇತ್ತೆರ್ .
ಕೊರಟಗೆರೆ: ವೋಟು ಕೇನಿಯೆರೆ ಪೋಯಿನ ಪೊರ್ತುಡು ಮಾಜಿ ಡಿಸಿಎಂ ಡಾ.ಜಿ.ಪರಮೇಶ್ವರ್ ಮೆರೆನ ಮಿತ್ತ್ ಕಲ್ಲ್ ದಕ್ಕ್ ದ್, ತರೆಕ್ಕ್ ಮಸ್ತ್ ಪೆಟ್ಟಾಯಿನ ಘಟನೆ ಕೊರಟಗೆರೆ ತಾಲೂಕ್ ದ ಬೈರನಹಳ್ಳಿ ಕ್ರಾಸ್ ದಲ್ಪ ನಡತ್ಂಡ್.
ಮೆರೆನ್ ಕೂಡ್ಲೆ ಅಕ್ಕಿರಾಂಪುರ ಸರ್ಕಾರಿ ಆಸ್ಪತ್ರೆಗ್ ಲೆತೊಂದು ಪೋದು ಸುರುತ್ತ ಚಿಕಿತ್ಸೆ ಕೊರ್ದು, ಬೊಕ್ಕ ಎಚ್ಚದ ಚಿಕಿತ್ಸೆಗ್ ತುಮಕೂರುದ ಕಡೆಕ್ಕ್ ಲೆತೊಂದು ಪೋತೆರ್.
ನೇರ್ದ್ ದುಂಬು ನಾಮಪತ್ರ ಸಂದಾಯೆರೆ ಪೋಯಿನ ಪೊರ್ತುಡ್ಲಾ ಕಲ್ಲ್ ದಕ್ಕ್ ದಿತ್ತೆರ್. ಆಂಡ ಆನಿ ಆ ಕಲ್ಲ್ ಪೊಂಜೋವ್ ಪೊಲೀಸ್ ಪೇದೆಗ್ ಬೂರ್ದಿತ್ಂಡ್. ಇತ್ತೆ ಕುಡೊರ ಇಂಚಿನ ಘಟನೆ ನಡತ್ ದ್ಂಡ್. ನೇರ್ದ್ ಪರಮೇಶ್ವರ್ ಮೆರೆನ ಅಭಿಮಾನಿಲು ಪೋಡಿದೆರ್.
ಕೈವ್ ಸೇರಿನಂಚನೆ ಉಕ್ರೇನ್ ನಗರದ ಮಿತ್ತ್ ರಷ್ಯಾದ ಕ್ಷಿಪಣಿ ದಾಳಿ ನಡತ್ ದ್ಂಡ್.
ಒಂಜೆತ್ತ ಮಿತ್ತ್ ಒಂಜೆತ್ತಲೆಕ್ಕ 23 ಕ್ಷಿಪಣಿನ್ ರಾಪಾದೆರ್. ಉಮಾನ್ ದ ಫ್ಲಾಟ್ ಡ್ ನಡತಿನ ದಾಳಿರ್ದ್ 4 ಜೋಕುಲು ಸೇರ್ದ್ 23 ಜನ ತೀರ್ ಪೋತೆರ್ ಪಂದ್ ಅಧಿಕಾರಿಲು ತೆರಿಪಾದೆರ್. ಕರಿನ 2 ತಿಂಗೊಲ್ಡ್ ರಷ್ಯಾ ನಡಪಾಯಿನ ಮಸ್ತ್ ಮಲ್ಲ ದಾಳಿ ಉಂದಾತ್ಂಡ್.
ಕೆನರಾ ಕಲ್ಚರಲ್ ಅಕಾಡೆಮಿ ಬೊಕ್ಕ ಕಲಾಭಿ ಥಿಯೇಟರ್ ನೆತ್ತ ಒಟ್ಟುಸೇರಿಗೆಡ್ ಏ.16 ಕ್ಕ್ ಸುರು ಆಯಿನ “ಅರಳು 2023” ಪನ್ಪುನ 10 ದಿನತ್ತ ವೃತ್ತಿಪರ ರಂಗಭೂಮಿ ಕಜ್ಜಕೊಟ್ಯದ ಅಕೇರಿದ ದಿನ ಏ.26 ಕ್ಕ್ ಕೆನರಾ ಪದವಿಪೂರ್ವ ಕಾಲೇಜ್ ದ ಬಯಲು ರಂಗಮಂದಿರಡ್ “ಅರಳು ನಾಟಕ ಉಚ್ಚಯ 2023” ಪನ್ಪುನ ಲೇಸ್ ನ್ ಆಯೋಜನೆ ಮಲ್ತ್ ದಿತ್ತೆರ್.
ಈ ಲೇಸ್ ಡ್ 75 ಜೋಕುಲು ಅಕ್ಲೆಗ್ ಕಲ್ಪಾಯಿನ ನಾಟಕನ್ ಮಸ್ತ್ ಪೊರ್ಲುಡು ಮಲ್ತ್ ತೂಜಿಪಾಯೆರ್. ಭುವನ್ ಮಣಿಪಾಲ್ ನಿರ್ದೇಶನದ ಮೊಗ್ಲಿ, ಬಿಂದು ರಕ್ಷಿದಿ ನಿರ್ದೇಶನದ ರಾಜನ ಸವಾಲ್ ಮಕ್ಕಳ ಕಮಾಲ್ ಬೊಕ್ಕ ನವೀನ್ ಸಾಣೇಹಳ್ಳಿ ನಿರ್ದೇಶನದ ಮೃಗ ಬೊಕ್ಕ ಸುಂದರಿ ಈ 3 ನಾಟಕಲು ಪ್ರದರ್ಶನ ಆಂಡ್. ಕೆಲವು ಜೋಕುಲು ಕಜ್ಜಕೊಟ್ಯದ ಬಗೆಟ್ ತನ್ನ ಮನಸ್ಸ್ ದ ಪಾತೆರನ್ ಪಂಡೆರ್.
ಕುಡ್ಲಡ್ ಸುರುತ್ತ ಸರ್ತಿ ಗೌಜಿಡ್ ಆಯಿನ ಈ ಕಜ್ಜಕೊಟ್ಯಡ್ ಜೋಕುಲೆಗ್ ನಟನೆ ಮಾತ್ರ ಅತ್ತಂದೆ ನಾಟಕದ ಬೇತೆ ಬೇತೆ ಅಂಶದ ಜ್ಞಾನನ್ ಕೊರಿಯೆರ್. ಜೋಕುಲೆನ್ ಶಾಲೆದ ಚೌಕಟ್ಟ್ ರ್ದ್ ಪಿದಯಿ ಕನತ್ ದ್ ಅಕ್ಲೆಗ್ ಪೊಸ ಲೋಕನ್ ಪರಿಚಯ ಮಲ್ತೆರ್. ಅಂಚೆನೆ ಉಜ್ವಲ ಯು. ವಿ. ಮೇರ್ ಈ ಕಾರ್ಯಾಗಾರದ ಸಮಸ್ತ ವ್ಯವಸ್ಥೆನ್ ಭಾರೀ ಯಶಸ್ವಿಯಾದ್ ಮಲ್ತೆರ್.
ವರದಿ: ಉಜ್ವಲಿ ಯುವಿ
ಕಲಾಭಿ (ರಿ.) ಕಾರ್ಯದರ್ಶಿ
ಅಮೆರಿಕದ ಲೂಸಿಯಾನಾದ 16 ವರ್ಷದ ಆಣ್ ಡೆನ್ನಿಸ್ ಬಾರ್ನ್ಸ್ ಅಪರೂಪದ ಸಾಧನೆ ಮಲ್ದೆರ್.
170 ರ್ದ್ ಎಚ್ಚ ಕಾಲೇಜ್ ಲೆಡ್ ಪ್ರವೇಶಗ್ ಆಯ್ಕೆ ಆಯಿನ ಮೆರೆಗ್ ಶಿಕ್ಷಣ ಸಂಸ್ಥೆರ್ದ್ 73.60 ಕೋಟಿ ರೂ. ಸ್ಕಾಲರ್ ಶಿಪ್ ಆಫರ್ ಬೈದ್ಂಡ್.
ಈ ಬಗೆಟ್ ಆಣ್ ಪಾತೆರ್ದ್, ಎನ್ನ ಪ್ರಾಯಗ್ ಈತ್ ಮಲ್ಲ ಬಿಲೆತ್ತ ಅಡ್ಮಿಶನ್ ಆಫರ್ ಬರ್ಪುಂಡು ಪಂದ್ ನಿರೀಕ್ಷೆ ಮಲ್ದಿಜಿ. ಉಂದು ವಿಶ್ವ ದಾಖಲೆ ಆತ್ಂಡ್. ಗಿನ್ನಿಸ್ ಪುಟಕ್ಕ್ ಸೇರಿಸಾವ ಪಂದ್ ಬಾರ್ನ್ಸ್ ಓದಿನ ಶಾಲೆದ ಆಡಳಿತ ಮಂಡಳಿ ತೆರಿಪಾದ್ಂಡ್.
ಕುಡ್ಲ: ಪಕ್ಕಲಡ್ಕ ಯುವಕ ಮಂಡಲ (ರಿ.)ದ 70ನೇ ವಾರ್ಷಿಕ ಉಚ್ಚಯದ ಲೆಕ್ಕೊಡು ಯುವಕ ಮಂಡಲದ ಪೆರಿಯ ನೇತಾರೆ ಕೊರಗಪ್ಪ ಕೊಟ್ಟಾರಿ ಮೆರೆನ ನೆಂಪುಗಾದ್ ಗ್ರಂಥಾಲಯ ಉದಿಪನ (ಇನಿ) ಎ.29 ಸನಿಯಾರ ಬಯ್ಯಗ್ 7 ಗಂಟೆಗ್ ಪಕ್ಕಲಡ್ಕ ಯುವಕ ಮಂಡಲಡ್ ನಡಪರೆ ಉಂಡು.
ಈ ಲೇಸ್ ದ ಗುರ್ಕಾರ್ಮೆನ್ ಕುಡ್ಲ ಅಸೋಸಿಯೇಶನ್ ಸೌದಿ ಅರೇಬಿಯಾದ ಅಧ್ಯಕ್ಷೆರ್ ಸತೀಶ್ ಕುಮಾರ್ ಬಜಾಲ್ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಉದ್ಯಮಿ ಸುಶಾಂತ್ ಭಂಡಾರಿ, ಬಂಟ್ವಾಳ ಮಾಜಿ ಪುರಸಭೆ ಸದಸ್ಯೆರ್ ಪ್ರವೀಣ್ ಬಂಟ್ವಾಳ, ಕುಡ್ಲ ಮಹಾನಗರ ಪಾಲಿಕೆದ ಸದಸ್ಯೆರ್ ಪ್ರವೀಣ್ ಚಂದ್ರ ಆಳ್ವ, ಕಾರ್ಮಿಕರ ಪರ ಹೋರಾಟಗಾರೆ ಸುನಿಲ್ ಕುಮಾರ್ ಬಜಾಲ್, ಶ್ರೀಕ್ಷೇತ್ರ ಕುದ್ರೋಳಿ ಕೋಶಾಧಿಕಾರಿ, ವಕೀಲೆರ್ ಪದ್ಮರಾಜ್ ಆರ್, ಕುಡ್ಲ ಸಾಮರಸ್ಯ ಕೂಟದ ಸಂಚಾಲಕೆರ್ ಮಂಜುಳಾ ನಾಯಕ್, ಜಪ್ಪಿನಮೊಗೆರ್ ಗ್ರಾಮ ಯುವಕ ಮಂಡಲ (ರಿ.)ದ ಮಾಜಿ ಅಧ್ಯಕ್ಷೆರ್ ಉದಯಚಂದ್ರ ರೈ, ಬಜಾಲ್ ಜನತಾ ವ್ಯಾಯಾಮ ಶಾಲೆದ ಅಧ್ಯಕ್ಷೆರ್ ಕೇಶವ ಭಂಡಾರಿ, ಬಜಾಲ್ ಪಕ್ಕಲಡ್ಕ ಯುವಕ ಮಂಡಲ (ರಿ.) ದ ಅಧ್ಯಕ್ಷೆರ್ ದೀಪಕ್ ಬಜಾಲ್ ಬರಿಯೆರೆ ಉಲ್ಲೆರ್. ಬೊಕ್ಕ ತಮ್ಮನ ಲೇಸ್ ನಡಪರೆ ಉಂಡು. ಅವೆರ್ದ್ ಬೊಕ್ಕ PYM Troups ಮೊಕ್ಲೆರ್ದ್ ವೈವಿಧ್ಯಮಯ ಲೇಸ್, ರಾತ್ರೆ ಸಾಂಸ್ಕೃತಿಕ ಲೇಸ್ ದ ಅಂಗವಾದ್ ವಿದ್ದು ಉಚ್ಚಿಲ್ ನಿರ್ದೇಶನದ ಶೂದ್ರ ಶಿವ ಕನ್ನಡ ನಾಟಕ ನಡಪರೆ ಉಂಡು.
ಬೊಕ್ಕ ಡ್ಯಾನ್ಸ್ ಕ್ಲಾಸ್ ಉದಿಪನ, ಗ್ರಂಥಾಲಯ ಉದಿಪನ, ಮರಣ ಮೀಪಾವುನ ಟೇಬಲ್ ಉದಿಪನ, ಬಜಾಲ್ ಸುತ್ತಮುತ್ತದ ರೋಗಿಲೆನ್ ಲೆತೊಂದು ಪೋಯೆರೆ ದರ್ಮಾರ್ಥ ಆ್ಯಂಬುಲೆನ್ಸ್ ಉದಿಪನ ಆವೆರೆ ಉಂಡು ಪಂದ್ 70ನೇ ವರ್ಷಾಚರಣೆ ಸ್ವಾಗತ ಸಮಿತಿದ ಅಧ್ಯಕ್ಷೆರ್ ಸಂತೋಷ್ ಬಜಾಲ್, ಗೌರವಾಧ್ಯಕ್ಷೆರ್ ಸತೀಶ್ ಕುಮಾರ್ ಬಜಾಲ್, ಪಕ್ಕಲಡ್ಕ ಯುವಕ ಮಂಡಲ (ರಿ.) ದ ಅಧ್ಯಕ್ಷೆರ್ ದೀಪಕ್ ಬಜಾಲ್ ಲೆಪ್ಪೋಲೆಡ್ ತೆರಿಪಾದೆರ್.
ರಾಜ್ಯಡ್ ನನದ 5 ದಿನ ಸುಮಾರ್ ಕಡೆಟ್ಟ್ ಭಾರೀ ಬರ್ಸ ಬರ್ಪುಂಡು ಪಂದ್ ಹವಾಮಾನ ಇಲಾಖೆ ತೆರಿಪಾದ್ಂಡ್.
ಬೀದರ್ ಬೊಕ್ಕ ಕಲಬುರಗಿಡ್ ಇನಿ ಭಾರೀ ಬರ್ಸ ಬರ್ಪುನ ಕಾರಣ ಆರೆಂಜ್ ಅಲರ್ಟ್ ಘೋಷಣೆ ಆತ್ಂಡ್. ಕಲಬುರಗಿ, ರಾಯಚೂರು, ವಿಜಯಪುರ, ಯಾದಗಿರಿಟ್ಟ್ ಎಲ್ಲೆ ಬೊಕ್ಕ ಚಿಕ್ಕಮಗಳೂರು, ಚಿತ್ರದುರ್ಗ, ದಾವಣಗೆರೆ, ಕೊಡಗು, ಮೈಸೂರ್ ಡ್ ಎ.30 ಕ್ಕ್ ಯೆಲ್ಲೋ ಅಲರ್ಟ್ ಘೋಷಣೆ ಆತ್ಂಡ್. ಬೆಂಗ್ಲೂರ್ ಬೊಕ್ಕ ಬೆಂ. ಗ್ರಾಮಾಂತರಡ್ ಮೇ2 ಕ್ಕ್ ಯೆಲ್ಲೋ ಅಲರ್ಟ್ ಉಂಡು. ಅಂಚಾದ್ ಭಾರೀ ಬರ್ಸ ಬರ್ಪುನ ಅಂದಾಜಿ ಉಂಡು ಪಂದ್ ಇಲಾಖೆ ತೆರಿಪಾದ್ಂಡ್.
ಪುತ್ತೂರ್: ಮೇ 10 ಕ್ಕ್ ನಡಪರೆ ಇಪ್ಪುನ ವಿಧಾನಸಭೆ ವೋಟುದ ಬಗೆಟ್ ರಾಜಕೀಯ ಪಕ್ಷಲು ತನ್ನ ಅಭ್ಯರ್ಥಿಲೆನ ಪರ ಪ್ರಚಾರ ಮಲ್ಪರೆ ಸುರು ಮಲ್ದ್ಂಡ್.
ಪಕ್ಷದ ಮಲ್ಲ ಮಲ್ಲ ನಾಯಕೆರೆನ್ ಲೆಪುಡಾದ್ ವೋಟುದ ಭಾಷಣ ಮಲ್ತ್ ದ್ ವೋಟು ಕೇನೊಂದುಲ್ಲೆರ್. ಅಂಚೆನೆ ಮೇ 6 ಕ್ಕ್ ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಮೇರ್ ಪುತ್ತೂರ್ ಗ್ ಬತ್ತ್ ದ್ ಬಿಜೆಪಿ ಪ್ರಚಾರ ಸಭೆಟ್ಟ್ ಪಾಲ್ ಪಡೆಯೆರೆ ಉಲ್ಲೆರ್. ಈ ಲೇಸ್ ನಡಪುನ ಜಾಗೆ ನನಾತೆ ನಿಗಂಘ ಆವೊಡು ಪಂದ್ ಬಿಜೆಪಿ ಮೂಲ ತೆರಿಪಾದ್ಂಡ್.
