ಮುಲ್ಕಿ ನಾಲ್ಕು ಪಟ್ಣ, ಮೊಗವೀರ ಸಭಾ(ರಿ) ವತಿರ್ದ್ ಪ್ರತಿಭಾ ಪುರಸ್ಕಾರ ಬೊಕ್ಕ ಯೋಧೆರೆಗ್ ಮಾನಾದಿಗೆ

ಮುಲ್ಕಿ : ಮುಲ್ಕಿ ನಾಲ್ಕುಪಟ್ಣ ಮೊಗವೀರ ಸಭಾ (ರಿ) ವತಿರ್ದ್ 25 ನೇ ವರ್ಷದ ಪ್ರತಿಭಾ ಪುರಸ್ಕಾರ ಬೊಕ್ಕ ಯೋಧೆರೆಗ್ ಮಾನಾದಿಗೆ ಲೇಸ್ ಪುನರೂರು ಟೂರಿಸ್ಟ್ ಹೋಮ್ ದ ಚಾವಡಿಡ್ ಐತಾರ (ಅ.9) ನಡತ್ಂಡ್. ಮಲ್ಲ ಬಿನ್ನೆರಾದ್ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ಟಿ, ನಿವೃತ್ತ ಪ್ರಾಂಶುಪಾಲೆರ್ , ರೊಟೇರಿಯನ್ ವೈ.ಎನ್.ಸಾಲ್ಯಾನ್ ಬತ್ತಿತ್ತೆರ್.

ಅಧ್ಯಕ್ಷೆರ್ ಸುಜಿತ್ ಎಸ್. ಸಾಲ್ಯಾನ್ ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿತ್ತೆರ್. ಮಿತ್ತರ್ಮೆಡ್ ಗೌ.ಪ್ರ.ಕಾರ್ಯದರ್ಶಿ ಶಶಿಕಾಂತ್ ಟಿ.ಕೋಟ್ಯಾನ್, ಕೋಶಾಧಿಕಾರಿ ಸೂರ್ಯ ಪುತ್ರನ್ ಇತ್ತೆರ್. ಸ್ವಾತಂತ್ರ್ಯ ಅಮೃತ ಮಹೋತ್ಸವದ ನಿಲೆಟ್ಟ್ ಸೈನಿಕ ಕಲ್ಯಾಣ ಇಲಾಖೆದ ಜಂಟಿ ನಿರ್ದೇಶಕೆರ್ , ಸುರೂತ್ತ ಮಹಿಳಾ ಕಮಾಂಡರ್ ಡಾ.ಇಂದುಪ್ರಭಾ ಮೆರೆನ ಪರವಾದ್ ಅರೆನ ಪೊಪ್ಪ ಕ್ಯಾಪ್ಟನ್ ವಾಸು ಪುತ್ರನ್, ಸುಬೇದಾರ್ ಮಧುಕರ್ ಜಿ. ಮೇರ್ನ ಪರವಾದ್ ಅಮ್ಮ ಚಂಚಲಾಕ್ಷಿ ಬೊಕ್ಕ ಸೇನಾಧಿಕಾರಿ ಸೋಮನಾಥ ಸಾಲ್ಯಾನ್ ಚಿತ್ರಾಪು ಮೇರ್ನ ಪರವಾದ್ ಅರೆನ ಧರ್ಮಪತ್ನಿ ಆಶಾ ಸೋಮನಾಥ ಸಾಲ್ಯಾನ್ ಮಾನಾದಿಗೆ ದೆತೊಂಡೆರ್.

ವೈದ್ಯಕೀಯ ಕ್ಷೇತ್ರದ ಸಾಧಕಿ ಡಾ.ಹಿತಾಶ್ರೀ ಸಿ.ಶ್ರೀಯಾನ್, ಎಲ್ಯ ಪ್ರಾಯೊಡೆ ಪಿಎಚ್ ಡಿ ಪಡೆಯಿನ ಡಾ.ನತಾಶಾ ಅಗರ್ ವಾಲ್ ಅಂಚೆನೆ ಎಂಜಿನಿಯರಿಂಗ್ ಕ್ಷೇತ್ರದ ಸಾಧಕೆ ಹಿತೇಶ್ ಸಿ. ಶ್ರೀಯಾನ್ ಮೇರ್ನ ಅಮ್ಮ ಕುಸುಮಾ ಶ್ರೀಯಾನ್ ಮಾನಾದಿಗೆ ದೆತೊಂಡೆರ್. ಉಂದುವೇ ಪೊರ್ತುಡು ಎಸ್ಸೆಸ್ಸೆಲ್ಸಿ ಬೊಕ್ಕ ಪಿಯುಸಿಡ್ 2020-21 ಅಂಚೆನೆ 2021-2022 ನೇ ವರ್ಷೊಡು ಎಡ್ಡೆ ಮಾರ್ಕ್ಸ್ ದೈದಿನ ವಿದ್ಯಾರ್ಥಿಲೆಗ್ ಪ್ರತಿಭಾ ಪುರಸ್ಕಾರೊನು ಪಟ್ಟಿಯೆರ್. ಉಪಾಧ್ಯಕ್ಷೆರ್ ಚಂದ್ರಕಾಂತ್ ಶ್ರೀಯಾನ್ ಮಾನಾದಿಗೆ ಪತ್ರ ಓದು ಪಂಡೆರ್.

ಮುಲ್ಕಿ ಲಯನ್ಸ್ ಕ್ಲಬ್ ಅಧ್ಯಕ್ಷೆರ್ ನೀರಜಾಕ್ಷಿ ಅಗರ್ ವಾಲ್, ಸಮಾಜ ಸೇವಕೆ ಗಿರೀಶ್ ಮೆಂಡನ್ ಬೊಕ್ಕ ಮೊಗವೀರ ಸಮಾಜದ ಗಣ್ಯೆರ್, ವಿದ್ಯಾರ್ಥಿಲು ಲೇಸ್ ಡ್ ಪಾಲ್ ಪಡೆದಿತ್ತೆರ್ . ಗುಣವಾಣಿ ಲಚ್ಚಿಲ್ ದೇವೆರೆನ್ ಸುಗಿತೆರ್.