ಕುಡ್ಲ: ಬೇತೆಕ್ಲೆಲೆನ ಪಾಸ್ಪೋರ್ಟ್ ದೆತೊಂದು ಪಿದಯಿ ದೇಶೊಗು ಪೋಯೆರೆ ತೂಯಿನ ಆರೋಪಿಗ್ ಕುಡ್ಲ ನ್ಯಾಯಾಲಯ ಜೈಲ್ ಶಿಕ್ಷೆ ಕೊರ್ತುಂಡು.ಶಿಕ್ಷೆ ಆಯಿನ ಅಪರಾಧಿ ಬಂಟ್ವಾಳ ಸರಪಾಡಿ ಗ್ರಾಮದ ನಿವಾಸಿ ಬದ್ರುದ್ದೀನ್. 2010 ಫೆ.2 ದಾನಿ ಹಸೈನಾರ್ ಪನ್ಪಿನರೆನ ಪಾಸ್ಪೋರ್ಟ್ ಗಲಸ್ ದ್ ದುಬೈಗ್ ಪೋಯೆರೆ ತೂತೆರ್.
ಈ ಪಾಸ್ಪೋರ್ಟ್ ನ್ ಬಂಟ್ವಾಳ ಮಂಚಿ ಗ್ರಾಮದ ಅಬ್ಬಾಸ್ ಪನ್ಪಿನಾರ್ ಬದ್ರುದ್ದೀನ್ ಗ್ ಕೊರ್ದಿತ್ತೆರ್. ಇಮಿಗ್ರೇಷನ್ ಅಧಿಕಾರಿ ಕೆ.ಎಂ. ಚಂದ್ರಶೇಖರ್ ಕೊರ್ನ ದೂರುದಂಚನೆ ಕೇಸ್ ದಾಖಲ್ ಮಲ್ತ್ ದ್, ತನಿಖೆ ಮಲ್ತಿನ ಬಜಪೆ ಪೊಲೀಸೆರ್ ಕೋರ್ಟುಡು ದೋಷಾರೋಪಣೆ ಪಟ್ಟಿನ್ ಕೊರ್ತೆರ್.
ವಿಚಾರಣೆ ಮಲ್ತಿನ 1ನೇ ಹೆಚ್ಚುವರಿ ಸಿ.ಜೆ.ಎಂ. ಕೋರ್ಟುದ ನ್ಯಾಯಾಧೀಶೆರ್ ಶಿಲ್ಪಾ ಸೆ. 28ದಾನಿ 1ನೇ ಆರೋಪಿ ಬದ್ರುದ್ದೀನ್ಗ್ 1 ವರ್ಷ ಜೈಲ್ ಬೊಕ್ಕ 15 ಸಾವಿರ ರೂ. ದಂಡನ್ ಪಾಡ್ದೆರ್. ಅಂಚನೆ 2ನೇ ಆರೋಪಿ ಅಬ್ಬಾಸ್ ನ್ ಖುಲಾಸೆ ಮಲ್ದೆರ್.
pallavi shetty