ಮೀರಾಭಾಯಂದರ್ ಬಂಟ್ಸ್ ಪೋರಮ್ ಸಂಸ್ಥೆದ ಮಹಿಳಾ ಸಮಿತಿದ ವರ್ಷದ ಭಜನಾ ಮಂಗಳೋಚ್ಚಯ ಲೇಸ್ ಜ.14 ಐತಾರ ಮೀರಾಭಯಂದರ್ ಅಶ್ವಿನಿ ಪಾರ್ಟಿ ಹಾಲ್ ಡ್ ಗೌಜಿಡ್ ನಡಪರೆ ಉಂಡು.
ಆನಿ ಮಧ್ಯಾಹ್ನ ಶ್ರೀ ಸತ್ಯನಾರಾಯಣ ದೇವೆರೆನ ಪೂಜೆ, ಬಯ್ಯಗ್ ಹಳದಿ ಕುಂಕುಮ, ಭಜನೆ, ನಲಿಕೆ ಭಜನೆ, ಪ್ರಸಾದ ಪಟ್ಟಿಯೆರೆ ಬೊಕ್ಕ ಸಭಾ ಲೇಸ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಪಾಲ್ ಪಡೆದ್, ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಗುರ್ಕಾರೆ ಉದಯ ಎಮ್ ಶೆಟ್ಟಿ ಮಲಾರ್ ಬೂಡು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕಾಯರ್ತಡ್ಕ ಪೌಢ ಶಾಲೆಗ್ ಜ.4 ಕ್ಕ್ ಪೊಸತಾದ್ ಮುಖ್ಯ ಶಿಕ್ಷಕೆರಾದ್ ಬತ್ತಿನ ರಾಷ್ಟ್ರಪತಿ ಪ್ರಶಸ್ತಿ ಪುರಸ್ಕೃತೆರ್ ಯಕೂಬ್ ಎಸ್ ಕೊಯ್ಯುರು ಮೆರೆನ್ ಜೆಸಿಐ ಕೊಕ್ಕಡ ಕಪಿಲದ ಮುತಾಲಿಕೆಡ್ ಶಾಲೆದ ಜೋಕ್ಲೆನ ಬೊಕ್ಕ ಅಧ್ಯಾಪಕೆರೆನ ವೃಂದದ ಸಮ್ಮುಖಡ್ ಸನ್ಮಾನ ಮಲ್ತೆರ್.
ಜೆಸಿ ಜಯರಾಮ ಟಿ ಸಂಗಮನಗರ ಮೇರ್ ಯಕೂಬ್ ಎಸ್ ಮೆರೆನ ಬಗೆಟ್ಟ್ ಪಾತೆರಿಯೆರ್.
ಈ ಪೊರ್ತುಡು ಜೆಸಿಐ ಕೊಕ್ಕಡ ಕಪಿಲ ಘಟಕದ ಗುರ್ಕಾರೆ ಜೆಸಿ ಎಚ್ ಜಿಎಫ್ ಸಂತೋಷ್ ಜೈನ್, ಕಾರ್ಯದರ್ಶಿ ಜೆಸಿ ಅಕ್ಷತ್ ರೈ, ಕಳೆಂಜ ಶ್ರೀ ಸದಾಶಿವೇಶ್ವರ ದೇವಲ್ಯದ ಗುರ್ಕಾರೆ ಜೆಸಿ ಕೆ ಶ್ರೀಧರ್ ರಾವ್, ಗ್ರಾಮಾಭ್ಯುದಯ ಕಾರ್ಯಕ್ರಮ ಅನುಷ್ಠಾನ ಸಮಿತಿ (ರಿ.) ಶಿಬರಾಜೆದ ಗುರ್ಕಾರೆ ಜೆಸಿ ಪಿಟಿ ಸೇಬಸ್ಟನ್ ಬೊಕ್ಕ ಬೆಳ್ಳಾರೆ ಜೆಸಿಐದ ಸದಸ್ಯೆರ್ ಜೆಸಿ ಸೀತಾರಾಮ ರೈ ಪಾಲ್ ಪಡೆದಿತ್ತೆರ್.
ಬೊಕ್ಕ ಯಕೂಬ್ ಎಸ್ ಮೆರೆಗ್ ಸನ್ಮಾನ ಮಲ್ತಿನೆಕ್ಕ್ ಆರ್ ಮಾತೆರೆಗ್ಲಾ ಸೊಲ್ಮೆ ಸಂದೈತ ಮಲ್ತೆರ್.
ಕಿನ್ನಿಗೋಳಿ ಶ್ರೀ ಅಯ್ಯಪ್ಪ ಭಕ್ತ ವೃಂದ (ರಿ.) ದ 49ನೇ ವರ್ಷದ ಶ್ರೀ ಅಯ್ಯಪ್ಪ ಸ್ವಾಮಿನ ಮಹಾಪೂಜೆ ಬೊಕ್ಕ ಅನ್ನ ಪ್ರಸಾದ ಸೇವೆ ಜ.6 ಸನಿಯಾರ ಕಿನ್ನಿಗೋಳಿ ಶ್ರೀ ರಾಮಮಂದಿರದ ಕೈತಲ್ ಇಪ್ಪುನ ಶ್ರೀ ಅಯ್ಯಪ್ಪ ಸ್ವಾಮಿ ಶಿಬಿರಡ್ ನಡಪರೆ ಉಂಡು.
ಈ ಲೇಸ್ ಪಳನಿ ಗುರುಸ್ವಾಮಿ ಬೊಕ್ಕ ರವೀಶ್ ಗುರುಸ್ವಾಮಿಲೆನ ಮುತಾಲಿಕೆಡ್ ನಡಪರೆ ಉಂಡು.
ಬೊಲ್ಪುಗು ಗಣಹೋಮ, ಭಜನೆ ಸೇವೆ, ನಲಿಕೆ ಭಜನೆ ಮಧ್ಯಾಹ್ನ ಮಹಾಪೂಜೆ, ಪ್ರಸಾದ ಪಟ್ಟುನ ಲೇಸ್ ಬೊಕ್ಕ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಸಹಕಾರ ಮಲ್ತ್ ದ್ ಶ್ರೀ ಅಯ್ಯಪ್ಪ ಸ್ವಾಮಿನ ಕೃಪೆಗ್ ಪಾತ್ರರಾವೊಡು ಪಂದ್ ಕಿನ್ನಿಗೋಳಿ ಶ್ರೀ ಅಯ್ಯಪ್ಪ ಭಕ್ತ ವೃಂದ (ರಿ.) ದಕುಲು ಲೆಪ್ಪೋಲೆಡ್ ತೆರಿಪಾದೆರ್.
ತುಳಸಿ ಇರೆರ್ದ್ ಸುಮಾರ್ ಪ್ರಯೋಜನ ಉಂಡು. ತುಳಸಿದ ಇರೆನ್ ತೊಡ್ಡೆ ನೆಯಿತ್ತೊಟ್ಟಿಗೆ ಪ್ರತಿದಿನೊಲ ಬೊಲ್ಪುಗು ತಿಂದ್ಂಡ ಭಾರೀ ಎಡ್ಡೆ.
ಉಂದು ದೇಹಗ್ ರೋಗನಿರೋಧಕ ಶಕ್ತಿನ್ ಕೊರಿಯೆರೆ ಸಹಕಾರಿ ಮಲ್ಪುಂಡು. ನೆಟ್ಟ್ ಇಪ್ಪುನ ಜೀವಸತ್ವಲು ಬೊಕ್ಕ ಖನಿಜಲು ದೇಹಡ್ ಇಪ್ಪುನ ಸೀಕ್ ರ್ದ್ ರಕ್ಷಣೆ ಮಲ್ಪುಂಡು.
ಉಂದು ಶೀತ, ತೆಮ್ಮ ಬೊಕ್ಕ ಉಸುಲ್ ದ ಸೀಕ್ ನ್ ಗುಣ ಮಲ್ಪುಂಡು. ಅತ್ತಂದೆ ನಿಕ್ಲೆಗ್ ಕಫ ಗಟ್ಟ್ಂಡ ನೆನ್ ಉಪಯೋಗ ಮಲ್ಪೊಲಿ.
ರೈಲ್ವೆ ಇಲಾಖೆಡ್ ಖಾಲಿ ಇಪ್ಪುನ 2250 ಬೇಲೆಗ್ ನೇಮಕಾತಿ ನಡಪರೆ ಉಂಡು.
2000 ಕಾನ್ ಸ್ಟೆಬಲ್, 250 ಸಬ್ ಇನ್ ಸ್ಪೆಕ್ಟರ್ ಬೇಲೆಗ್ ಈ ನೇಮಕಾತಿ ನಡಪುಂಡು. ಅಭ್ಯರ್ಥಿಲು ಆನ್ ಲೈನ್ ಡ್ ಮಾತ್ರ ಅರ್ಜಿ ಸಂದಾವೊಡು.
ಅಂಚೆನೆ 10ನೇ ಕ್ಲಾಸ್ ಪಾಸಾಯಿನ ಅಭ್ಯರ್ಥಿಲು ಕಾನ್ಸ್ ಟೇಬಲ್ ಬೇಲೆಗ್ ಅರ್ಜಿ ಸಂದಾವೊಲಿ. ಸಬ್ ಇನ್ ಸ್ಪೆಕ್ಟರ್ ಬೇಲೆಗ್ ಅಭ್ಯರ್ಥಿಲು ಪದವೀಧರೆರಾದಿಪ್ಪೊಡು. ಕಾನ್ಸ್ ಟೇಬಲ್ ಬೇಲೆಗ್ ಅರ್ಜಿ ಸಂದಾವುನ ಅಭ್ಯರ್ಥಿನ ಪ್ರಾಯ 18-25 ವರ್ಷದ ನಡುಟ್ಟ್ ಇಪ್ಪೊಡು.
ಕುಡ್ಲ ಆಕೃತಿ ಆಶಯ ಪ್ರಕಾಶನ ಮೊಕ್ಲೆನ ಮುತಾಲಿಕೆಡ್ ರಘುನಾಥ ಎಂ. ವರ್ಕಾಡಿ ಬರೆಯಿನ “ಸೂರ್ಯೆ ಚಂದ್ರೆ ಸಿರಿ” ತುಳು ಜನಪದ ಕಥೆತ್ತ ಬೂಕು ಬುಡುಗಡೆ ಲೇಸ್ ಜ. 4 ಗುರುವಾರ ಕುಡ್ಲದ ಪತ್ರಿಕಾ ಭವನಡ್ ನಡತ್ಂಡ್.
ಶ್ರೀನಿವಾಸ ವಿಶ್ವವಿದ್ಯಾನಿಲಯ ಮುಕ್ಕದ ಪ್ರೊ.ಎಂ.ಎಸ್.ಕೋಟ್ಯಾನ್ ಅಧ್ಯಕ್ಷತೆಡ್ ಬಂಟ್ವಾಳದ ರಾಣಿ ಅಬ್ಬಕ್ಕ ತುಳು ಅಧ್ಯಯನ ಕೇಂದ್ರದ ಸ್ಥಾಪಕ ಅಧ್ಯಕ್ಷೆರ್ ಡಾ. ತುಕಾರಾಮ ಪೂಜಾರಿ ಕೃತಿ ಲೋಕಾರ್ಪಣೆ ಮಲ್ತೆರ್. ಅವೆರ್ದ್ ಬೊಕ್ಕ ಪಾತೆರಿನ ಆರ್, ಈ ಬೂಕುಡ್ ಸುಮಾರ್ 30 ದಾತ್ ತುಳು ಕಥೆಕ್ಕುಲು ಉಂಡು. ರಘುನಾಥ ಎಂ. ವರ್ಕಾಡಿ ಮೇರ್ ತುಳು ಬಾಸೆದ ಮಲ್ಲ ಅಭಿಮಾನಿ. ಮೆರೆನ ಕಥೆಕ್ಕುಲು ಜನಕ್ಲೆನ ಮನಸ್ಸ್ನ್ ಒಯ್ಪುಂಡು. ನನಾತ್ ತುಳು ಬೂಕುನ್ ಮೇರ್ ಬುಡುಗಡೆ ಮಲ್ಪುಲೆಕ್ಕ ಆವಡ್ ಪಂದ್ ಪಂಡೆರ್.
ಈ ಪೊರ್ತುಡು ನಮ್ಮ ಕುಡ್ಲ ಚಾನೆಲ್ದ ನಿರ್ದೇಶಕೆರ್ ಸುರೇಶ್ ಬಿ. ಕರ್ಕೇರ, ಪ್ರಗತಿಪರ ಕೃಷಿಕೆರ್ ಬೊಕ್ಕ ನಾರಾಯಣ ಗುರು ಯುವ ವೇದಿಕೆ ಕುಡ್ಲದ ಸಲಹಾ ನಿರ್ದೇಶಕೆರ್ ನೀಲಯಂ ಯಂ. ಅಗರಿ ಬೊಕ್ಕ ರಘುನಾಥ ಎಂ. ವರ್ಕಾಡಿ ಇತ್ತೆರ್.
ಕುಡ್ಲ: ಕುಡ್ಲ ಪ್ರೆಸ್ ಕ್ಲಬ್ದ ಗೃಹ ಪತ್ರಿಕೆ “ಮಂಗಳೂರು ಪ್ರೆಸ್ ಕ್ಲಬ್ ಸಮಾಚಾರ” ಇ-ಪೇಪರ್ ಬುಡುಗಡೆ ಲೇಸ್ ಜನವರಿ 4 ಕ್ಕ್ ಕುಡ್ಲದ ಪತ್ರಿಕಾ ಭವನಡ್ ನಡತ್ಂಡ್.
ಶಾಸಕೆರ್ ಡಿ.ವೇದವ್ಯಾಸ ಕಾಮತ್ ಈ ಪತ್ರಿಕೆನ್ ಬುಡುಗಡೆ ಮಲ್ತೆರ್. ಅವೆರ್ದ್ ಬೊಕ್ಕ ಪಾತೆರಿನ ಆರ್, ಮಸ್ತ್ ವರ್ಷರ್ದ್ ಕುಡ್ಲ ಪ್ರೆಸ್ ಕ್ಲಬ್ರ್ದ್ ಪತ್ರಕರ್ತೆರ್ ಪೂರ ಸೇರ್ದ್ ಬೇತೆ ಬೇತೆ ಕಾರ್ಯಕ್ರಮದ ಮುಕೇನ ಸಾಧನೆ ಮಲ್ತಿನಕ್ಲೆನ್ ಗುರ್ತಿಸಾವೊಂದು ಬರೊಂದುಲ್ಲೆರ್. ಈ ಮಾತ ಕಾರ್ಯಕ್ರಮ ದಾಖಲೆ ಮಲ್ಪುನ ಅಗತ್ಯತೆ ಉಂಡು. ಉಂದು ಒಂಜಿ ಭಾರೀ ಎಡ್ಡೆ ಬೇಲೆ ಪಂದ್ ಪಂಡೆರ್.
ಮಾಜಿ ಎಂಎಲ್ಸಿ ಕ್ಯಾ.ಗಣೇಶ್ ಕಾರ್ಣಿಕ್ “ಮಂಗಳೂರು ಪ್ರೆಸ್ ಕ್ಲಬ್ ಸಮಾಚಾರ” ಪತ್ರಿಕೆಗ್ ಎಡ್ಡೆಪ್ಪುನು ಬಯಕ್ಯೆರ್.
ಈ ಪೊರ್ತುಡು ಕುಡ್ಲ ಪ್ರೆಸ್ ಕ್ಲಬ್ದ ಅಧ್ಯಕ್ಷೆರ್ ಪಿ.ಬಿ.ಹರೀಶ್ ರೈ, ವಾರ್ತಾ ಇಲಾಖೆದ ಹಿರಿಯ ಸಹಾಯಕ ನಿರ್ದೇಶಕೆರ್ ಖಾದರ್ ಶಾ, ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷೆರ್ ಶ್ರೀನಿವಾಸ ನಾಯಕ್ ಇಂದಾಜೆ, ಪತ್ರಿಕಾ ಭವನ ಟ್ರಸ್ಟ್ ಅಧ್ಯಕ್ಷೆರ್ ರಾಮಕೃಷ್ಣ ಆರ್ ಲೇಸ್ಡ್ ಪಾಲ್ ಪಡೆದ್ ಇತ್ತೆರ್.
ಉಳ್ಳಾಲ: ಒಂಜಿ ಊರುದ ಧಾರ್ಮಿಕ ಕೇಂದ್ರಲು, ಶೈಕ್ಷಣಿಕ ಸಂಸ್ಥೆಲು ಪೊರ್ಲು ಆದಿತ್ತ್ಂಡ, ಆ ಊರು ಪೊರ್ಲಾದ್ ಜನ ಕ್ಷೇಮಡ್ ಇಪ್ಪುವೆರ್ ಪನ್ಪುನ ಪ್ರತೀತಿ. ಈ ದಿಟ್ಟಿಡ್ ಪ್ರತಿಯೊರಿಲ ತನ್ನ ಸಂಪಾದನೆದ ಒಂಜಿ ಭಾಗನ್ ಧಾರ್ಮಿಕ, ಶೈಕ್ಷಣಿಕ ಬೇಲೆಗ್ ಉಪಯೋಗ ಮಲ್ತ್ಂಡ ನಮ್ಮ ಜೀವನಗ್ ಪುಣ್ಯದ ರೂಪಡ್ ತಿಕ್ಕುಂಡು ಪಂದ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಅನುವಂಶಿಕ ಅರ್ಚಕೆರ್ ಲಕ್ಷ್ಮೀನಾರಾಯಣ ಅಸ್ರಣ್ಣ ಪಂಡೆರ್.
ಮೇರ್ ಉಳ್ಳಾಲ ಉಳಿಯದ ಶ್ರೀ ಉಳ್ಳಾಲ್ತಿ ಧರ್ಮರಸು ಕ್ಷೇತ್ರದ ಶ್ರೀ ಉಳ್ಳಾಲ್ತಿ ಅಮ್ಮನ ಮೂಡುಮಾಡಡ್ ಬೊಕ್ಕ ನಾಗಾಲಯಡ್ ಪೊಸತಾದ್ ಶಿಲಾಮಯವಾದ್ ಪುನರ್ ನಿರ್ಮಾಣ ಆಯಿನ ದೈವಸ್ಥಾನದ ಪುನರ್ ಪ್ರತಿಷ್ಠೆ ಬ್ರಹ್ಮಕಲಶ ಉಚ್ಚಯಡ್ ಶ್ರೀ ಉಳ್ಳಾಲ್ತಿ ಧರ್ಮರಸೆರೆನ ಸಿರಿಮುಡಿ ಉಚ್ಚಯದ ಧಾರ್ಮಿಕ ಸಭೆಟ್ಟ್ ಪಾತೆರಿಯೆರ್.
ನಮಕ್ ದೈವ ದೇವೆರ್ ಉಲ್ಲೆರ್ ಪನ್ಪುನ ದೃಢವಾಯಿನ ವಿಶ್ವಾಸ ಅಗತ್ಯ, ಆ ಕ್ಷೇತ್ರಗ್ ನಮ ದಾದ ಮಲ್ಪೊಡು ಪನ್ಪುನೆರ್ದ್, ಅಲ್ಪ ಇಪ್ಪುನ ಕಾರಣಿಕ ಶಕ್ತಿಲು ನಮಡ ಎಡ್ಡೆ ಬೇಲೆನ್ ಮಲ್ಪೆರೆ ಪ್ರೇರೇಪಣೆ ಕೊರ್ಪುಂಡು ಪಂದ್ ಪಂಡೆರ್.
ಕ್ಷೇತ್ರದ ಪ್ರಧಾನ ತಂತ್ರಿಲು ಟಿ. ಅನಂತ ಪದ್ಮನಾಭ ಉಪಾಧ್ಯಾಯ, ಶ್ರೀ ಕ್ಷೇತ್ರದ ಧರ್ಮದರ್ಶಿಲು, ದರ್ಶನ ಪಾತ್ರಿ ದೇವು ಮೂಲ್ಯಣ್ಣ ಎಡ್ಡೆಪ್ಪು ಬಯಕಿಯೆರ್.
ಲೇಸ್ ದ ಗುರ್ಕಾರ್ಮೆನ್ ಜೀರ್ಣೋದ್ಧಾರ ಸಮಿತಿದ ಕಾರ್ಯಾಧ್ಯಕ್ಷೆರ್ ಶ್ರೀನಿವಾಸ ಸಪಲ್ಯ ಬೊಂಬೈ ಒಯಿಸ್ ದಿತ್ತೆರ್.
ಮಲ್ಲ ಬಿನ್ನೆರಾದ್ ದ.ಕ ಮೊಗವೀರ ಮಹಾಜನ ಸಂಘ ಉಚ್ಚಿಲದ ಗುರ್ಕಾರೆ ಜಯ ಸಿ ಕೋಟ್ಯಾನ್, ಉಳ್ಳಾಲ ಮೊಗವೀರ ಸಂಘದ ಗುರ್ಕಾರೆ ಮನೋಜ್ ಸಾಲ್ಯಾನ್, ಸೈಂಟ್ ಸೆಬಾಸ್ಟಿಯನ್ ಚರ್ಚ್ ಪೆರ್ಮನ್ನೂರುದ ಗುರ್ಕಾರೆ ವಂ. ಸಿಪ್ರಿಯನ್ ಪಿಂಟೋ, ಉಳ್ಳಾಲ ಪೊಲೀಸ್ ನಿರೀಕ್ಷಕೆರ್ ಬಾಲಕೃಷ್ಣ ಎಚ್ ಎನ್, ಗಾಳದ ಕೊಂಕಣಿ ಅಭ್ಯುದಯ ಸಂಘದ ಗುರ್ಕಾರೆ ನರಸಿಂಹ ನಾಯಕ್ ಹರೇಕಳ, ಉಳ್ಳಾಲ ನಗರಸಭಾ ಸ್ಥಾಯಿ ಸಮಿತಿದ ಗುರ್ಕಾರ್ದಿ ವೀಣಾ ಶಾಂತಿ ಡಿ.ಸೋಜಾ ಪಾಲ್ ಪಡೆದಿತ್ತೆರ್.
ಈ ಪೊರ್ತುಡು ಜೀರ್ಣೋದ್ಧಾರ ಸಮಿತಿದ ಗುರ್ಕಾರೆ ರಮೇಶ್ ಮೆಂಡನ್, ಕಾರ್ಯಾಧ್ಯಕ್ಷೆರ್ ಹರೀಶ್ ಕುತ್ತಾರ್, ವ್ಯವಸ್ಥಾಪನಾ ಸಮಿತಿ ಗುರ್ಕಾರೆ ರಾಜೇಶ್ ಉಳಿಯ ಇತ್ತೆರ್.
ಬ್ರಹ್ಮಕಲಶ ಉಚ್ಚಯ ಸಮಿತಿದ ಗುರ್ಕಾರೆ ಕದ್ರಿ ನವನೀತ ಶೆಟ್ಟಿ ಎದ್ಕೊನಿಯೆರ್. ಪ್ರಧಾನ ಕಾರ್ಯದರ್ಶಿ ರವಿಶಂಕರ್ ಸೋಮೇಶ್ವರ ಸೊಲ್ಮೆ ಸಂದಾಯೆರ್. ಆನಂದ ಶೆಟ್ಟಿ ಭಟ್ನಗರ ಲೇಸ್ ನ್ ಸುಧಾರಿಕೆ ಮಲ್ತೆರ್.
ಥಾಣೆ ಘೋಡ್ ಬಂದರ್ ರೋಡ್ ಅಸೋಸಿಯೇಶನ್ ದ 10ನೇ ವರ್ಷದ ಲೇಸ್ ಜ.6 ಸನಿಯಾರ ಥಾಣೆ ಶ್ರೀ ಕಾಶೀನಾಥ್ ಘನೇಕರ್ ಸಭಾಗ್ರಹಡ್ ನಡಪರೆ ಉಂಡು.
ಈ ಲೇಸ್ ದ ಗುರ್ಕಾರ್ಮೆನ್ ಥಾಣೆ ಘೋಡ್ ಬಂದರ್ ರೋಡ್ ಕನ್ನಡ ಎಸೋಸಿಯೇಶನ್ ದ ಗುರ್ಕಾರೆ ಹರೀಶ್ ಡಿ. ಸಾಲಿಯಾನ್ ಒಯಿಸೊನ್ವೆರ್.
ಮಲ್ಲ ಬಿನ್ನೆರಾದ್ ಶಿವರಾಮ್ ಶೆಟ್ಟಿ, ಡಾಕ್ಟರ್ ಅನಘ ಹೇರೂರ್, ಸತ್ಯಹಾಸ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.
10ನೇ ವರ್ಷದ ಈ ಲೇಸ್ ಡ್ ಜೋಕ್ಲೆನ ಎಲ್ಯ ನಾಟಕ “ಈಸೂರು ಸ್ವತಂತ್ರ ಗ್ರಾಮ’ ಪೊಂಜೊವುಲೆನ ಕೂಟದ ನಾಟಕ, ನಾರಾಯಣ ಶೆಟ್ಟಿ ನಂದಳಿಕೆ ಬರೆತಿನ, ಚಂದ್ರಕಾಂತ ಸಾಲಿಯಾನ್ ಸಸಿಹಿತ್ಲು ನಿರ್ದೇಶನದ “ಎನ್ನ ಮರ್ಮಲ್” ನಡಪರೆ ಉಂಡು.
ಅಂಚೆನೆ ಚಂದ್ರಕಾಂತ್ ಸಾಲಿಯಾನ್ ಸಸಿಹಿತ್ಲು ಮೆರೆನ ನಿರ್ದೇಶನದ, ದಿ.ಶ್ರೀನಾಥ್ ಮುಲ್ಕಿ ಬರೆತಿನ 93ನೇ ಪ್ರಾಯೋಗದ ತುಳು ನಾಟಕ “ಊರೇ ಗತಿ” ಬೊಂಬೈ ನವೋದಯ ಕಲಾ ರಂಗದಕ್ಲೆರ್ದ್ ನಡಪರೆ ಉಂಡು. ಅತ್ತಂದೆ ಸಾಂಸ್ಕೃತಿಕ ನೃತ್ಯಲ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆವೊಡು ಪಂದ್ ಕೂಟದ ಮಾತಾ ಪದುಕೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕೃಷಿ ಇಲಾಖೆ ಕರ್ನಾಟಕ ರಾಜ್ಯ ಕೃಷಿ ಉತ್ಪನ್ನಲೆನ ಸಂಸ್ಕರಣೆ ಬೊಕ್ಕ ರಫ್ತು ನಿಗಮ ನಿಯಮಿತ ಸಂಸ್ಥೆದ ಒಟ್ಟುಸೇರಿಗೆಡ್ ಜ.5-7 ಮುಟ್ಟ ಬೆಂಗ್ಲೂರುದ ಅರಮನೆ ಮೈದಾನಡ್ ಸಿರಿಧಾನ್ಯ ಬೊಕ್ಕ ಸಾವಯವ ಅಂತರಾಷ್ಟ್ರೀಯ ವಾಣಿಜ್ಯ ಮೇಳ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಸಿರಿಧಾನ್ಯಲೆನ ಗುಣನ್ ತೆರಿದ್, ಎಡ್ಡೆ ಆರೋಗ್ಯಗಾದ್ ಗಲಸೊಡು. ಸಾವಯವ ಬುಲೆಪಾದ್ ಸಿರಿಧಾನ್ಯ ಕ್ರಾಂತಿ ಮಲ್ಪೊಡು ಪಂದ್ ರಾಜ್ಯ ಸರ್ಕಾರ ತೆರಿಪಾದ್ಂಡ್.
