ಲೋಕಸಭೆ ವೋಟು ಕೈತಡೇ ಬರೊಂದು ಇಪ್ಪುನೆರ್ದಾವರ ಕಾಂಗ್ರೆಸ್ ನಾಯಕೆರ್ ಇನಿ ಡೆಲ್ಲಿಡ್ ಸಭೆ ನಡಪಾಯೆರೆ ಉಲ್ಲೆರ್.
ಕಾಂಗ್ರೆಸ್ ಗುರ್ಕಾರೆ ಮಲ್ಲಿಕಾರ್ಜುನ ಖರ್ಗೆ ಮುತಾಲಿಕೆಡ್ ಈ ಸಭೆ ನಡಪರೆ ಉಂಡು. ಸಾರ್ವತ್ರಿಕ ವೋಟುಡು ಪಕ್ಷ ಮಲ್ಪೊಡಾಯಿನ ಬೇಲೆದ ಬಗೆಟ್ಟ್ ಸಭೆಟ್ಟ್ ಚರ್ಚೆ ಮಲ್ಪೆರೆ ಉಂಡು.
ಇರಾನ್ ದ ರೆವಲ್ಯೂಷನರಿ ಗಾರ್ಡ್ಸ್ ದ ಕಮಾಂಡರ್ ಮೇಜರ್ ಜನರಲ್ ಖಾಸಿಂ ಸುಲೇಮಾನಿ ಕೆರಿನ 4ನೇ ವರ್ಷದ ನೆಂಪುಗಾದ್ ಆಯೋಜನೆ ಮಲ್ತಿನ ಲೇಸ್ ಡ್ 2 ಕಡೆಟ್ಟ್ ಬಾಂಬ್ ಪುಡಾದ್ 103 ಜನ ತೀರ್ ಪೋಯೆರ್.
ಅತ್ತಂದೆ ಈ ಘಟನೆಡ್ 211 ಜನಕ್ಕ್ ಪೆಟ್ಟಾತ್ಂಡ್. ಟೆಹರಾನ್ ರ್ದ್ 820 ಕಿ.ಮೀ ದೂರಡ್ ಇಪ್ಪುನ ಕೆರ್ಮಾನ್ ನಗರಡ್ ಈ ಘಟನೆ ನಡತ್ ದ್ಂಡ್.
ತೆನಸ್ ಡ್ ಸಾಮಾನ್ಯವಾದ್ ಗಲಸುನ ಕೊತ್ತಂಬರಿ ಸೊಪ್ಪುರ್ದ್ ಮೂತ್ರಪಿಂಡದ ಸುಮಾರ್ ಸಮಸ್ಯೆ ನಿವಾರಣೆ ಆಪುಂಡು.
ವನಸ್ ಡ್ ಪರಿಮಳ ಕೊರ್ಪುನ ನೆರ್ದ್ ಮೂತ್ರಪಿಂಡದ ಶುದ್ಧೀಕರಣ ಬೊಕ್ಕ ಎಡ್ಡೆ ಆರೋಗ್ಯಗ್ ಪ್ರಯೋಜನ ಆತ್ಂಡ್. ಉಂದು ಕೆಂಪು ನೆತ್ತೆರ್ ದ ಕಣನ್ ಉತ್ಪಾದನೆ ಮಲ್ಪುನ, ನೆತ್ತೆರ್ ದ ಸಮಸ್ಯೆನ್ ನಿಯಂತ್ರಣ ಮಲ್ಪುನ ಸಾಮರ್ಥ್ಯ ಉಂಡು.
ಮೂತ್ರಪಿಂಡದ ತೊಂದರೆಗ್ ಕಾರಣ ಆಪುನ ಪಾದರಸದ ಕುರುಹುನ್ ದೇಹರ್ದ್ ದೆಪ್ಪೆರೆ ಕೊತ್ತಂಬರಿ ಸಹಕಾರಿ ಆಪುಂಡು. ಈ ಸೊಪ್ಪುಡು ವಿಟಮಿನ್- A,C,E,K,B ಉಂಡು.
ರಾಜ್ಯ ಇಡೀ ಶೀತಗಾಳಿ ಬೀಜುನೆರ್ದಾವರ ಸುಮಾರ್ ಕಡೆಟ್ಟ್ ಮುಗಲ್ ದ ವಾತಾವರಣ ನಿರ್ಮಾಣ ಆದ್ ಕೆಲವು ಕಡೆಟ್ಟ್ ಬರ್ಸ ಬರೊಂದು ಉಂಡು.
ಜ.9-22 ಮುಟ್ಟ ಸುಮಾರ್ ಜಿಲ್ಲೆಡ್ ಬರ್ಸ ಬರ್ಪುಂಡು ಪಂದ್ ಹವಮಾನ ಇಲಾಖೆ ಪಂದಿತ್ತ್ಂಡ್. ಇನಿ ಬೊಲ್ಪುರ್ದ್ ತುಳುನಾಡ್ ಬೊಕ್ಕ ಮಲೆನಾಡ್ ಪ್ರದೇಶಡ್ ಬರ್ಸ ಬರೊಂದು ಉಂಡು.
ದಕ್ಷಿಣ ಕನ್ನಡ, ಒಡಿಪು, ಉತ್ತರ ಕನ್ನಡ ಜಿಲ್ಲೆಡ್ ಬರ್ಸರ್ದಾವರ ಜನಜೀವನ ಅಸ್ತವ್ಯಸ್ತ ಆತ್ಂಡ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಮಧುರಗಾನ ಲೇಸ್ ಜ.4 ಗುರುವಾರ ಬಯ್ಯಗ್ 6.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಶಿಕ್ಷಕೆರ್ ಸಹನಾ ಸುರೇಂದ್ರಕುಮಾರ್ ಪಿಲಾರ್ ಪಾಲ್ ಪಡೆಯೆರೆ ಉಲ್ಲೆರ್. ಜ.5 ಕ್ಕ್ ಮಧ್ಯಾಹ್ನ 2.30ಕ್ಕ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಕೇಟರಿಂಗ್ ಉದ್ಯಮಿ, ಸಮಾಜಸೇವಕೆರ್, ಬರವುಗಾರೆರ್, ಸಂಘಟಕೆರ್, ರಂಗನಟೆ ವಿಶ್ವನಾಥ್ ಶೆಟ್ಟಿ ಪೇತ್ರಿ ಮೆರೆನ ಕಥಾ ಸಂಕಲನ “ತ್ಯಾಂಪರನ ಡೋಲು” ಇತ್ತೆ ಪುಗರ್ತೆದ ಕವಿ, ಬರವುಗಾರ್ತಿ ‘ಅಕ್ಷತಾ ರಾಜ್ ಪೆರ್ಲ’ ಮೆರೆರ್ದ್ “ಗಿಡ್ಡಿ” ಪನ್ಪುನ ತುಳು ನಾಟಕವಾದ್ ಅನುವಾದ ಆದ್ ಜ.12 ಕ್ಕ್ ಒಡಿಪುಡು ನಡಪುನ ‘ಕೆಮ್ತೂರು ದೊಡ್ಡಣ್ಣ ಶೆಟ್ಟಿ ನೆಂಪುಗಾದ್ ನಡಪರೆ ಇಪ್ಪುನ ನಾಟಕ ಪಂತೊಡು ಪ್ರದರ್ಶನ ಆವೆರೆ ಉಂಡು.
“ಗಿಡ್ಡಿ” ನಾಟಕ ಸಾರರ್ದ್ ಪ್ರದರ್ಶನ ಆವಡ್, ಈ ನಾಟಕನ್ ಬೊಂಬೈ ಡ್ ಪ್ರದರ್ಶನ ಮಲ್ತಿನ ಪೆರ್ಮೆದ ಕಥೆಗಾರೆ ‘ವಿಶ್ವನಾಥ್ ಶೆಟ್ಟಿ ಪೇತ್ರಿ’ ಮೆರೆಗ್ ಅಭಿನಂದನೆ ಸಂದಾಯೆರ್.
ವರದಿ: ಮಾಧವ್ ಪಡೀಲ್
ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಪ್ರಥಮ ದರ್ಜೆ ಕಾಲೇಜ್ ಡ್ ಕರಿನ 30 ವರ್ಷೊರ್ದಿಂಚ ಕಾಮರ್ಸ್ ಉಪನ್ಯಾಸಕೆರಾದ್ ಬೇಲೆ ಮಲ್ತೊಂದು ಬತ್ತಿನ ಡಾ. ವಿಜಯ್ ವಿ ಮೆರೆನ್ ಕಾಲೇಜ್ ದ ಆಡಳಿತ ಮಂಡಳಿ ಜ.1 ಕ್ಕ್ ಕಾಲೇಜ್ ದ ಪ್ರಾಂಶುಪಾಲೆರಾದ್ ನೇಮಕ ಮಲ್ದ್ಂಡ್.
ಕಾಲೇಜ್ ದ ಎನ್ ಎಸ್ ಎಸ್ ಅಧಿಕಾರಿಯಾದ್, ಸಂಯೋಜಕೆರಾದ್, ಮಂಗಳೂರು ವಿಶ್ವವಿದ್ಯಾನಿಲಯದ ಪಠ್ಯರಚನಾ ಮಂಡಳಿ ಬೊಕ್ಕ ಪರೀಕ್ಷಾ ಮಂಡಳಿದ ಸದಸ್ಯೆರಾದ್ ಬೇಲೆ ಮಲ್ತಿನ ಮೇರ್ ಕುಂದಾಪುರ ವಡೇರಹೋಬಳಿದ ಲಕ್ಷ್ಮೀ ಬೊಕ್ಕ ದಿ.ಶೀನ ಪೂಜಾರಿ ದಂಪತಿಲೆನ ಮಗೆ ಆತೆರ್.
ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ದಕುಲು 35ನೇ ಮಾಸಿಕ ಸೇವಾ ಯೋಜನೆ ಬೊಕ್ಕ 36ನೇ ತುರ್ತು ಸೇವಾ ಯೋಜನೆದ ಮುಕೇನ 2 ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.
ಕುಡ್ಲ ಕೋಡಿಕಲ್ಲ್ ನಿವಾಸಿ ಆಯಿನ ತುಳಸಿನಿ ಮೆರೆನ ಕಂಡನಿ ಹರೀಶ್ 2 ವರ್ಷದ ಪಿರವು ಕ್ಯಾನ್ಸರ್ ಸೀಕ್ ರ್ದ್ ತೀರ್ ಪೋತೆರ್. ಮೆರೆನ 19 ವರ್ಷದ ಮಗಲ್ ವಿಕಲಚೇತನರಾದ್ ಒವ್ವೇ ಕೆಲಸಗ್ಲಾ ನನೊರಿಯನ್ ಅವಲಂಬನೆ ಮಲ್ಪುನ ಸ್ಥಿತಿಡ್ ಉಲ್ಲೆರ್. ಮೆರೆನ ತಿಂಗೊಲ್ದ ಮರ್ದ್ ಬೊಕ್ಕ ಡಾಕ್ಟರ್ ನ ಚಿಕಿತ್ಸೆಗ್ ಮಸ್ತ್ ಕಾಸ್ ದ ಅವಶ್ಯಕತೆ ಉಂಡು. ಆರ್ಥಿಕವಾದ್ ಮಸ್ತ್ ಬಡಪತ್ತ್ ಡ್ ಉಲ್ಲ, ಅಂಚಾದ್ ಎನ್ನ ಮಗಲೆನ ನನದ ಚಿಕಿತ್ಸೆಗ್ ಸಹಕಾರ ಮಲ್ಪೊಡು ಪಂದ್ ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಕೂಟಗ್ ಬಿನ್ನಾಪು ಮಲ್ತ್ ದ್ ಇತ್ತೆರ್. ಮೆರೆನ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ 35ನೇ ಮಾಸಿಕ ಸೇವಾ ಯೋಜನೆದ ಮುಕೇನ 20,000 ರೂ. ದ ಚೆಕ್ ನ್ ಬಡಗ ಎಡಪದವು ಪಂಚಾಯತ್ ಮಾಜಿ ಗುರ್ಕಾರೆ ಹರೀಶ್ ಕೆ.ವಿ ಮೆರೆನ ಸಮ್ಮುಖಡ್ ಎಡಪದವು ರಾಮ ಮಂದಿರಡ್ ಕೊರಿಯೆರ್.
ಅಂಚೆನೆ ಕುಡ್ಲ ತಾಲೂಕ್ ದ ಬಡಗ ಎಡಪದವು ಗ್ರಾಮದ ಉರ್ಕಿ ನಿವಾಸಿ ಶಿವಾನಂದ ಗೌಡ 31 ವರ್ಷದಾರ್ ತನ್ನ ಎಲ್ಯ ಪ್ರಾಯಡೇ ತನ್ನ 2 ಕಿಡ್ನಿನ್ ಕಳೆವೊಂದು ಸಂಕಷ್ಟಡ್ ಉಲ್ಲೆರ್. ತನ್ನ ಅಪ್ಪೆನ ಕಿಡ್ನಿನ್ ಟ್ರಾನ್ಸ್ ಪ್ಲಾಂಟ್ ಮಲ್ಪರೆ ನಿರ್ಧಾರ ಮಲ್ದೆರ್. ಈ ಶಸ್ತ್ರ ಚಿಕಿತ್ಸೆಗ್ ಸುಮಾರ್ 12 ಲಕ್ಷ ರೂ. ಅವಶ್ಯಕತೆ ಉಂಡು ಪಂದ್ ವೈದ್ಯೆರ್ ತೆರಿಪಾದೆರ್. ಅಂಚೆನೆ ಶಿವಾನಂದ ಮೆರೆನ ಇಲ್ಲದಕುಲು ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಕೂಟಗ್ ಬಿನ್ನಾಪು ಸಂದಾಯೆರ್. ಈ ಬಿನ್ನಾಪುಗ್ ಸ್ಪಂದಿಸಾಯಿನ ಕೂಟ ತನ್ನ 36ನೇ ತುರ್ತು ಸೇವಾ ಯೋಜನೆದ ಮುಕೇನ 25000 ರೂ. ಚೆಕ್ ನ್ ಅಯೋಧ್ಯಾ ಶ್ರೀ ರಾಮ ಮಂದಿರ ಟ್ರಸ್ಟ್ ತಾಲೂಕ್ ಸಂಚಾಲಕೆರ್, ವಿಶ್ವ ಹಿಂದೂ ಪರಿಷತ್ ಭಜರಂಗದಳ ಗುರುಪುರ ಪ್ರಖಂಡದ ಕಾರ್ಯದರ್ಶಿ ದಿನೇಶ್ ಮಿಜಾರ್, ಹರೀಶ್ ಎಡಪದವು, ವಿಶ್ವ ಹಿಂದೂ ಪರಿಷತ್ ಬಜರಂಗದಳ ಗುರುಪುರ ಪ್ರಖಂಡದ ಸಹ ಸಂಚಾಲಕೆರ್ ಚಂದ್ರಕಾಂತ್ ನಾಯಕ್, ವಿಶ್ವ ಹಿಂದೂ ಪರಿಷತ್ ಗುರ್ಕಾರೆ ಜೈ ಶ್ರೀ ರಾಮ್ ಶಾಖೆ ಎಡಪದವು ಮೊಕ್ಲೆನ ಸಮ್ಮುಖಡ್ ಎಡಪದವು ರಾಮ ಮಂದಿರಡ್ ಕೊರಿಯೆರ್.
ಈ ಪೊರ್ತುಡು ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ದ ಪದುಕೆರ್ ಪಾಲ್ ಪಡೆದಿತ್ತೆರ್.
ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯದ ಅಧೀನ ಸಂಸ್ಥೆ ಡಾ.ನಿಟ್ಟೆ ಶಂಕರ ಅಡ್ಯಂತಾಯ ಪ್ರಥಮ ದರ್ಜೆ ಕಾಲೇಜ್ ಬೊಕ್ಕ ಮುಲ್ಪದ ಹಿರಿಯ ವಿದ್ಯಾರ್ಥಿ ಸಂಘದ ಒಟ್ಟುಸೇರಿಗೆಡ್ ವಿಶ್ವ ಹಿರಿಯ ವಿದ್ಯಾರ್ಥಿಲೆನ ಸಭೆ-2023 ಇಂಚಿಪ್ಪ ಜಸ್ಟೀಸ್ ಕೆ.ಎಸ್. ಹೆಗ್ಡೆ ಉದ್ಯಮಾಡಳಿತ ಶಿಕ್ಷಣ ಸಂಸ್ಥೆದ ಸಭಾಂಗಣಡ್ ನಡತ್ಂಡ್.
ನಿಟ್ಟೆ ಸಂಕೀರ್ಣದ ನಿರ್ವಹಣೆ ಬೊಕ್ಕ ಅಭಿವೃದ್ಧಿ ನಿರ್ದೇಶಕೆರ್ ಪ್ರೊಫೆಸರ್ ಎ.ಯೋಗೀಶ್ ಹೆಗ್ಡೆ ಗುರ್ಕಾರ್ಮೆ ಒಯಿಸ್ ದಿತ್ತೆರ್. ಮಲ್ಲ ಬಿನ್ನೆರಾದ್ ನಿಟ್ಟೆ ವಿಶ್ವವಿದ್ಯಾಲಯದ ಉಪಕುಲಪತಿ ಡಾ.ಎಂ.ಎಸ್ ಮೂಡಿತ್ತಾಯ, ನಿಟ್ಟೆ ತಾಂತ್ರಿಕ ಶಿಕ್ಷಣ ವಿಭಾಗದ ಒತ್ತು ಗುರ್ಕಾರೆ ಡಾ. ಗೋಪಾಲ್ ಮೊಗೆರಾಯ, ವಿದ್ಯಾರ್ಥಿ ಕಲ್ಯಾಣ ಬೊಕ್ಕ ಹಳೆ ವಿದ್ಯಾರ್ಥಿಲೆನ ಸಂಬಂಧಿತ ಅಧಿಕಾರಿ ಪ್ರಸನ್ನ ಕೈಲಾಜೆ ಪಾಲ್ ಪಡೆದಿತ್ತೆರ್.
ಪೂರ್ವ ವಿದ್ಯಾರ್ಥಿನಿ ಅನುರಾಧಾ ಭಟ್ ಪ್ರಾರ್ಥನೆ ಮಲ್ತೆರ್. ಹಿರಿಯ ವಿದ್ಯಾರ್ಥಿ ಸಂಘದ ಗುರ್ಕಾರೆ ದರ್ವಿಶ್ ಎದ್ಕೊನಿಯೆರ್. ಸಂಸ್ಥೆದ ಪ್ರಾಂಶುಪಾಲೆರ್ ಡಾ. ವೀಣಾ ಬಿ.ಕೆ, ಸಂಸ್ಥೆದ ಇಂಚಿಪ್ಪದ ಬುಲೆವಣಿಗೆದ ಬಗೆಟ್ಟ್ ಪ್ರಸ್ತಾವನೆ ಮಲ್ತೆರ್.
ಮಲ್ಲ ಬಿನ್ನೆರ್ ನಿಟ್ಟೆ ತಾಂತ್ರಿಕ ಶಿಕ್ಷಣ ವಿಭಾಗದ ಒತ್ತು ಗುರ್ಕಾರೆ ಡಾ.ಗೋಪಾಲ್ ಮೊಗೆರಾಯೆರ್ ಸಂಸ್ಥೆದ ಅಭಿವೃದ್ಧಿಡ್ ಪೂರ್ವ ವಿದ್ಯಾರ್ಥಿಲು ಸಹಕಾರ ಮಲ್ಪರೆ ಕೇನೊಂಡೆರ್. ಈ ಪೊರ್ತುಡು ಸಂಸ್ಥೆದ ಪ್ರಾಂಶುಪಾಲೆರ್ ಸೇರ್ದ್ ವಿಶ್ವವಿದ್ಯಾಲಯಡ್ ಬೇತೆ ಬೇತೆ ಜಬದಾರಿನ್ ನಿರ್ವಹಿಸಾಯಿನ ಇತ್ತೆದ ಉಪಕುಲಪತಿ ಡಾ.ಎಂ ಎಸ್ ಮೂಡಿತ್ತಾಯ ಮೆರೆಗ್ ಸನ್ಮಾನ ಮಲ್ತೆರ್.
ಸನ್ಮಾನ ಸ್ವೀಕಾರ ಮಲ್ತಿನ ಡಾ. ಮೂಡಿತ್ತಾಯೆರ್ ಪಾತೆರ್ದ್, ಹಿರಿಯ ವಿದ್ಯಾರ್ಥಿಲು ಸಂಸ್ಥೆದೊಟ್ಟಿಗೆ ಅವಿನಾಭಾವ ಸಂಬಂಧನ್ ಬುಲೆಪಾವುನೆತ್ತೊಟ್ಟಿಗೆ ಸಂಸ್ಥೆದ ಬುಲೆವಣಿಗೆಗ್ ಪ್ರೇರಣೆ ಅವೊಡು ಪಂದ್ ಸಲಹೆ ಕೊರಿಯೆರ್.
ಲೇಸ್ ಡ್ ನೆರ್ದ್ ದುಂಬು ಕೆಲಸ ಮಲ್ತಿನ ಉಪನ್ಯಾಸಕೆರ್, ಶಿಕ್ಷಕೇತರ ಸಿಬ್ಬಂದಿಲು ಬೊಕ್ಕ ಬೇತೆ ಬೇತೆ ಕಡೆಟ್ಟ್ ಇಪ್ಪುನ ಹಿರಿಯ ವಿದ್ಯಾರ್ಥಿಲು ಪಾಲ್ ಪಡೆದಿತ್ತೆರ್. ಲೇಸ್ ದ ಬೊಕ್ಕ ಹಿರಿಯ ವಿದ್ಯಾರ್ಥಿಲು ಬೊಕ್ಕ ಉಪನ್ಯಾಸಕೆರೆನ ಸ್ನೇಹ ಮಿಲನ, ಸಾಂಸ್ಕೃತಿಕ ಲೇಸ್ ನಡತ್ಂಡ್.
ತಾಂತ್ರಿಕ ಶಿಕ್ಷಣ ಸಂಸ್ಥೆದ ಸಹಾಯಕ ಗ್ರಂಥಪಾಲಕೆರ್ ಸತೀಶ್ ಶೆಟ್ಟಿ ಸನ್ಮಾನಿತೆರೆನ ಪರಿಚಯ ಮಲ್ತೆರ್. ಪೂರ್ವ ವಿದ್ಯಾರ್ಥಿ ಸಂಘದ ಕಾರ್ಯದರ್ಶಿ ಡಾ. ಸುಧೀರ್ ಎಂ. ಸೊಲ್ಮೆ ಸಂದಾಯೆರ್. ಪ್ರೊಫೆಸರ್ ರಾಕೇಶ್ ಶೆಟ್ಟಿ ಲೇಸ್ ನ್ ಸುಧಾರಿಕೆ ಮಲ್ತೆರ್. ಉಪನ್ಯಾಸಕೆರ್ ಡಾ.ದಯಾನಂದ ಬಾಯಾರ್, ಅರ್ಚನಾ ಭಟ್ ಸಹಕಾರ ಕೊರಿಯೆರ್.
ಮಾನಾದಿಗೆದ ಗುರ್ಕಾರೆಯಾದ್ ತಾರಾನಾಥ ರೈ ಮೇಗಿನಗುತ್ತು, ಸ್ಥಾಪಕಾಧ್ಯಕ್ಷೆರಾದ್ ರೋಹನ್ ಪುರುಷೋತ್ತಮ ಶೆಟ್ಟಿ ಆಯ್ಕೆ
ಪೂನಾ: ಪೂನಾದ ತುಳು ಕನ್ನಡಿಗೆರೆನ ಸ್ವಾಭಿಮಾನಿ ಸಂಘಟನೆ ತುಳುನಾಡ ಫೌಂಡೇಶನ್ ಪುಣೆದ ಮಾನಾದಿಗೆದ ಗುರ್ಕಾರೆಯಾದ್ ತಾರಾನಾಥ ರೈ ಮೇಗಿನಗುತ್ತು, ಸ್ಥಾಪಕಾಧ್ಯಕ್ಷೆರಾದ್ ಪುಗರ್ತೆದ ಸಮಾಜ ಸೇವಕೆರ್, ನ್ಯಾಯವಾದಿ ರೋಹನ್ ಪುರುಷೋತ್ತಮ ಶೆಟ್ರ್ ಆಯ್ಕೆ ಆತೆರ್.
ಅಂಚೆನೆ ಅರೆನ ಗುರ್ಕಾರ್ಮೆಡ್ ಕಾರ್ಯಕಾರಿ ಸಮಿತಿ ರಚನೆ ಆತ್ಂಡ್.
ಪೊಸ ಕೂಟದ ಒತ್ತು ಗುರ್ಕಾರೆಯಾದ್ ವಿಕೇಶ್ ರೈ ಶೇಣಿ, ಅಕ್ಷಿತ್ ಸಾಲ್ಯಾನ್, ಸುಪ್ರೀತಾ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿಯಾದ್ ಸುಜಯ್ ದಿನೇಶ್ ಶೆಟ್ಟಿ, ಜತೆ ಕಾರ್ಯದರ್ಶಿಯಾದ್ ರತನ್ ಸಾಲ್ಯಾನ್ ಬೊಕ್ಕ ಸಮೀಕ್ಷಾ ಪೂಜಾರಿ, ಕೋಶಾಧಿಕಾರಿಯಾದ್ ಕಿರಣ್ ಮೂಲ್ಯ, ಜತೆ ಕೋಶಾಧಿಕಾರಿಯಾದ್ ಸೂರಜ್ ಬಂಗೇರ ಬೊಕ್ಕ ಪ್ರೀತಮ್ ಶೆಟ್ಟಿ ಆಯ್ಕೆ ಆತೆರ್.
ಸಾಮಾಜಿಕ ಸಮಿತಿ ಸದಸ್ಯೆರಾದ್ ಪೂಜಾ ಜಹಗೀರದಾರ್, ಸಂತೋಷ್ ಶೆಟ್ಟಿ, ಅಹಾನ್ ದೇವಾಡಿಗ, ಶೈಕ್ಷಣಿಕ ಸಮಿತಿಗ್ ವಿಂದಿ ಪೂಜಾರಿ, ಮಲ್ಲಣ್ಣ ಲಿಂಗಾಯತ್, ಪ್ರತೀಕ್ ಪೂಜಾರಿ, ಸಮೀಕ್ಷಾ ಶೆಟ್ಟಿ, ಕ್ರೀಡಾ ಸಮಿತಿಗ್ ವಿನೀತ್ ಪೂಜಾರಿ, ದೀಕ್ಷಾ ಶೆಟ್ಟಿ, ರಾಜೇಂದ್ರ ಕೋಟ್ಯಾನ್, ಕೌಶಿಕ್ ಶೆಟ್ಟಿ, ಸಾಂಸ್ಕೃತಿಕ ಸಮಿತಿಗಾದ್ ರವಿರಾಜ್ ಶೆಟ್ಟಿ, ರೇಷ್ಮಾ ನಾಯ್ಕ್, ಸ್ವಾತಿ ಪೂಜಾರಿ, ಸಹನಾ ಕುಲಾಲ್, ಶಿವಪ್ರಸಾದ್ ಪೂಜಾರಿ, ಸಾಮಾಜಿಕ ಮಾಧ್ಯಮ ಸಮಿತಿಗ್ ಹೃತಿಕ್ ಶೆಟ್ಟಿ, ವಿನೀತಾ ಗೌಡ, ಸುಜಿತ್ ಮೂಲ್ಯ ಬೊಕ್ಕ ತನ್ವಿ ಶೆಟ್ಟಿ ಆಯ್ಕೆ ಆತೆರ್.
ಸಮಿತಿ ಸದಸ್ಯೆರಾದ್ ಆನಂದ್ ಜಾಲಿಹಾಳ, ಧೀರಜ್ ಬಂಗೇರ, ಅಂಕಿತ್ ಸಾಲ್ಯಾನ್, ಮಹೇಶ್ ನಾಯ್ಕ್, ಪ್ರಾಣೇಶ್ ಶೆಟ್ಟಿ, ಸಚಿನ್ ಕೋಟ್ಯಾನ್, ಶಶಿಧರ ಕೋಟ್ಯಾನ್, ಅದಿಯೋ ಬಡಿಗೇರ, ಪ್ರಸಾದ್ ಪೂಜಾರಿ, ತರುಣ್ ಶೆಟ್ಟಿ, ದೀಕ್ಷಿತಾ ಹೆಗ್ಡೆ, ರೋಹನ್ ಕೋಟ್ಯಾನ್, ಸುಜಿತ್ ಸಾಲ್ಯಾನ್ ಬೊಕ್ಕ ಅಂಕಿತ್ ಪೂಜಾರಿ ಆಯ್ಕೆ ಆತೆರ್.
ಸಂಘದ ಸಲಹಾ ಸಮಿತಿದ ಸದಸ್ಯೆರಾದ್ ಸಾಹಿತಿ ಪಾಂಗಾಳ ವಿಶ್ವನಾಥ ಶೆಟ್ಟಿ, ಚಂದ್ರಶೇಖರ ಶೆಟ್ಟಿ ನಿಟ್ಟೆ, ಮಿಯ್ಯಾರ್ ರಾಜ್ ಕುಮಾರ್ ಎಂ ಶೆಟ್ಟಿ, ಪುರುಷೋತ್ತಮ ಶೆಟ್ಟಿ ಕಾಪು, ವಿಶ್ವನಾಥ ಶೆಟ್ಟಿ ಹಿರಿಯಡ್ಕ ಬಸ್ತಿ, ಗೀತಾ ರಾಮಣ್ಣ ಶೆಟ್ಟಿ, ಚಂದ್ರಕಾಂತ ಹಾರಕೂಡೆ, ರೂಪೇಶ್ ಶೆಟ್ಟಿ, ಪ್ರಶಾಂತ್ ಶೆಟ್ಟಿ ಹೆರ್ಡೆಬೀಡು, ಮನೋಹರ್ ಶೆಟ್ಟಿ ರಂಜಿತ್ ಕ್ಯಾಟರರ್ಸ್, ಲತಾ ರಘುನಾಥ ಗೌಡ, ದೇವಕಿ ರಮೇಶ್ ಶೆಟ್ಟಿ, ಉಮಾ ಸದಾಶಿವ ಶೆಟ್ಟಿ, ಪ್ರೇಮಾ ಪುರುಷೋತ್ತಮ ಶೆಟ್ಟಿ, ಮಹೇಶ್ ಹೆಗ್ಡೆ ಪೊಳಲಿ, ಯಶವಂತ್ ಶೆಟ್ಟಿ ತಾಮರು ಬೊಕ್ಕ ಗೋವರ್ಧನ ಶೆಟ್ಟಿ ಆಯ್ಕೆ ಆತೆರ್.
