January 2024

ಜ.14-23: ಉಜಿರೆ ಶ್ರೀ ಜನಾರ್ದನ ದೇವಲ್ಯಡ್ ವರ್ಷಾವಧಿ ಜಾತ್ರಾ ಉಚ್ಚಯ

ಉಜಿರೆ ಶ್ರೀ ಜನಾರ್ದನ ದೇವಲ್ಯಡ್ ಜ.14-23 ಮುಟ್ಟ ವರ್ಷಾವಧಿ ಜಾತ್ರಾ ಉಚ್ಚಯ ನಡಪರೆ ಉಂಡು.

ಜ.14 ರಾತ್ರೆ ಕೊಡಿ ಬೊಕ್ಕ ಭಂಡಾರ ಏರ್ಂಡ್.

ಜ.15 ರಾತ್ರೆ ಬದಿ ಮಿತ್ತ್ ಉಳ್ಳಾಲ್ತಿ, ಪೊಸಲ್ತಾಯಿ ಕುಮಾರ ಸ್ವಾಮಿ ದೈವೊಲೆಗ್ ನೇಮ ನಡತ್ಂಡ್.

ಜ.16 ಬಯ್ಯಗ್ ಬದಿ ಮಿತ್ತ್ ನೆತ್ತೆರ್ ಮುಗುಳಿ ದೈವೊದ ನೇಮ, ರಾತ್ರೆ ಭಂಡಾರ ಜಪ್ಪರೆ, ಉಚ್ಚಯ ನಡಪರೆ ಉಂಡು.

ಜ.17 ರಾತ್ರೆ ಅಶ್ವತ್ಥ ಕಟ್ಟೆ ಉಚ್ಚಯ, ಜ.18 ರಾತ್ರೆ ಪುಷ್ಕರಣಿ ಕಟ್ಟೆ ಉಚ್ಚಯ, ಜ.19 ರಾತ್ರೆ ಪೇಂಟೆ ಸವಾರಿ, ಜ.20 ರಾತ್ರೆ ಚಂದ್ರಮಂಡಲ ತೇರ್ ಉಚ್ಚಯ ನಡಪರೆ ಉಂಡು.

ಜ.21 ಬೊಲ್ಪುಗು ಉಚ್ಚಯ, ದರ್ಶನ ಬಲಿ, ಮಧ್ಯಾಹ್ನ ಸಾರ್ವಜನಿಕ ಅನ್ನ ಪ್ರಸಾದ ಸೇವೆ, ರಾತ್ರೆ ಮಲ್ಲ ತೇರ್ ಉಚ್ಚಯ, ಶ್ರೀ ಭೂತ ಬಲಿ ನಡಪರೆ ಉಂಡು.

ಜ.22 ಬೊಲ್ಪುಗು ಕವಾಟೋದ್ಘಾಟನೆ, ಬಯ್ಯಗ್ ಅವಭೃತೋತ್ಸವ ರಾತ್ರೆ ಕೊಡಿ ಜಾವೆರೆ ಉಂಡು. ಜ‌.23 ಬೊಲ್ಪುಗು ಕಲಶಾಭಿಷೇಕ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಅನುವಂಶಿಕ ಆಡಳಿತ ಮೊಕ್ತೇಸರೆರ್ ಶರತ್ ಕೃಷ್ಣ ಪಡುವೆಟ್ನಾಯ, ನಾಲ್ವಿಕೆಯೆರ್, ಅರ್ಚಕೆರೆನ ವೃಂದ ಬೊಕ್ಕ ಊರುದ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಹಳೆಯಂಗಡಿ: ಪ್ರಿಯದರ್ಶಿನಿ ಸೊಸೈಟಿಡ್ ಪಂಜದಗುತ್ತು ಶಾಂತಾರಾಮ ಶೆಟ್ರೆನ ನೆಂಪು ಲೇಸ್

ಹಳೆಯಂಗಡಿ: ಸಹಕಾರಿ ರಂಗದ ಸಾಧಕೆರ್, ಸಮಾಜಸೇವಕೆರ್ ಪಂಜದಗುತ್ತು ದಿ. ಶಾಂತಾರಾಮ ಶೆಟ್ಟಿ ಮೆರೆನ ನೆಂಪು ಲೇಸ್ ಹಳೆಯಂಗಡಿದ ಪ್ರಿಯದರ್ಶಿನಿ ಕೋ- ಆಪರೇಟಿವ್ ಸೊಸೈಟಿದ ಆಶ್ರಯೊಡು ಅಂಗಾರೆ ನಡತ್ಂಡ್.

ಸುರುಕ್ಕು ದಿ.ಶಾಂತಾರಾಮ ಶೆಟ್ರೆನ ಭಾವಚಿತ್ರೊಗು ಪುರ್ಪ ಪಾಡುನ ಮುಕೇನ ಬತ್ತಿ ಬಿನ್ನೆರ್ ಅರೆನ್ ನೆಂಪು ಮಲ್ತೊಂಡೆರ್. ಸವಿತಾ ಶಾಂತಾರಾಮ ಶೆಟ್ಟಿ ಲೇಸ್ ಡ್ ಪಾಲ್ ಪಡೆದಿತ್ತೆರ್.

ಮಲ್ಲ ಬಿನ್ನೆರಾದ್ ಬತ್ತಿತ್ತಿನ ಸಾಹಿತಿ, ಸಮಾಜಸೇವಕಿ ಎಚ್.ಶಕುಂತಳಾ ಭಟ್ ಮೇರ್ ಪಾತೆರ್ದ್, ಶಾಂತಾರಾಮ ಶೆಟ್ರೆನ ವಿದ್ಯಾದಾನದ ಬೇಲೆದ ಬಗೆಟ್ಟ್ ತೆರಿಪಾಯೆರ್.ಅಂಚೆನೆ ಸಾಹಿತ್ಯದ ಬೂಕುಲೆನ್ ದೆತೊಂದು ಪ್ರೋತ್ಸಾಹ ಮಲ್ದಿನೆನ್ ನೆಂಪು ಮಲ್ತೆರ್.

ಕುಡೊರಿ ಬಿನ್ನೆರ್ ಕೆಮ್ರಾಲ್ ಗ್ರಾಮ ಪಂಚಾಯಿತಿದ ಅಧ್ಯಕ್ಷೆರ್ ಮೈಯದ್ದಿ ಪಕ್ಷಿಕೆರೆ ಪಾತೆರ್ದ್, ಶಾಂತಾರಾಮ ಶೆಟ್ರ್ ಶಿಕ್ಷಣೊಗು ಕೊರ್ತಿನ ಆದ್ಯತೆ ಅಂಚೆನೆ ಏತೋ ಜನಕ್ಕ್ ಬೀಡಿದ ಬೇಲೆ ಕೊರ್ತಿನೆನ್ ನೆಂಪು ಮಲ್ತೆರ್.

ಪ್ರಿಯದರ್ಶಿನಿ ಕೋಆಪರೇಟಿವ್ ಸೊಸೈಟಿದ ಅಧ್ಯಕ್ಷೆರ್ ವಸಂತ್ ಬೆರ್ನಾಡ್ ಪಾತೆರ್ದ್, ಪಂಜದಗುತ್ತು ಶಾಂತಾರಾಮ ಶೆಟ್ರ್, ನಮ್ಮ ಸಹಕಾರಿ ಸಂಘದ ಒಂಜಿ ಮಾಮಲ್ಲ ಪ್ರೇರಕ ಶಕ್ತಿ. ಅರೆನ ಆದರ್ಶ, ಆಶೀರ್ವಾದಡ್ ಸೊಸೈಟಿ ನಡತೊಂದುಂಡು.

ಅಂಚೆನೆ ಗ್ರಾಹಕೆರ್, ನಿರ್ದೇಶಕೆರ್ ಬೊಕ್ಕ ಸಿಬ್ಬಂದಿಲೆನ ಬೆಗರ್ ದ ಫಲವಾದ್ ಸತತ ಮೂಜಿನೇ ವರ್ಷಲ ಬ್ಯಾಂಕ್ ಲಾಭಡ್ ಉಂಡು. ಮಾರ್ಚ್ 31 ತ್ತ ಉಲಯಿ ಕಿನ್ನಿಗೋಳಿಡ್ ರಡ್ಡನೇ ಶಾಖೆ ಉದಿಪನ ಆವರೆ ಉಂಡು ಪಂಡೆರ್.

ಸೊಸೈಟಿದ ಉಪಾಧ್ಯಕ್ಷೆರ್ ಪ್ರತಿಭಾ ಕುಳಾಯಿ, ನಿರ್ದೇಶಕೆರಾಯಿನ ಡಾ|ಗಣೇಶ್ ಅಮೀನ್ ಸಂಕಮಾರ್,ಧನಂಜಯ ಮಟ್ಟು,ಗೌತಮ್ ಜೈನ್, ಶರತ್ ಶೆಟ್ಟಿ ಪಂಚವಟಿ, ಉಮಾನಾಥ್ ಶೆಟ್ಟಿಗಾರ್,ಜೈ ಕೃಷ್ಣ ಕೋಟ್ಯಾನ್, ಗಣೇಶ್ ಪ್ರಸಾದ್ ದೇವಾಡಿಗ, ಧನರಾಜ್ ಕೋಟ್ಯಾನ್, ಮಿರ್ಜಾ ಅಹಮ್ಮದ್, ಶೆರಿಲ್ ಅಯೋನ ಐಮನ್, ಹರೀಶ್ ಎನ್.ಪುತ್ರನ್, ನವೀನ್ ಎನ್ ಸಾಲ್ಯಾನ್,ಸಂದೀಪ್,ವಿಜಯ ಕುಮಾರ್ ಸನಿಲ್,ತನುಜಾ ಶೆಟ್ಟಿ ಲೇಸ್ ಡ್ ಪಾಲ್ ಪಡೆದಿತ್ತೆರ್.

ಸೊಸೈಟಿದ ಕಾರ್ಯನಿರ್ವಹಣಾಧಿಕಾರಿ ಸುದರ್ಶನ್ ಮೊಗಪಾಡಿ ಸೊಲ್ಮೆ ಸಂದಾಯೆರ್.

ತೊಕ್ಕೊಟ್ಟು ಶ್ರೀ ಸಾಯಿ ಪರಿವಾರ್ ಟ್ರಸ್ಟ್ ದ ಮುತಾಲಿಕೆಡ್ ಅಯೋಧ್ಯೆ ಕಾಂಡ ಚಿತ್ರ ಬುಡ್ಪಾವುನ ಪಂತೊ

ಅಯೋಧ್ಯೆದ ಶ್ರೀರಾಮ ಚಂದ್ರನ ಮಂದಿರ ಉದಿಪನದ ಲೆಕ್ಕೊಡು ದ.ಕ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ತೊಕ್ಕೊಟ್ಟುದ ಶ್ರೀ ಸಾಯಿ ಪರಿವಾರ್ ಟ್ರಸ್ಟ್ ದ ಮುತಾಲಿಕೆಡ್ ಹೈಸ್ಕೂಲ್ ಬೊಕ್ಕ ಪದವಿ ಪೂರ್ವ ಕಲ್ಪಾರ್ಥಿಲೆಗಾದ್ ಅಯೋಧ್ಯ ಕಾಂಡ ಚಿತ್ರ ಬುಡ್ಪಾವುನ ಪಂತೊ ಉಳ್ಳಾಲದ ಚೀರುಂಭ ಭಗವತಿ‌ ಕ್ಷೇತ್ರಡ್ ನಡತ್ಂಡ್.

ಚಿತ್ರ ಪಂತೊದ ಉದಿಪನನ್ ಒಡಿಪು ಶಂಕರಪುರದ ದ್ವಾರಕಾಮಯಿ‌ ಪೀಠದ ಪ.ಪೂ. ಶ್ರೀ ಸಾಯಿ ಈಶ್ವರ್ ಗುರೂಜಿ ಮಲ್ತೆರ್. ಬೊಕ್ಕ ಮೇರ್ ಪಾತೆರ್ದ್, ಸಾಯಿ ಪರಿವಾರ್ 500 ರ್ದ್ ಎಚ್ಚ ಸೇವಾ ಕಾರ್ಯನ್ ಮಲ್ಪುನೆತ್ತೊಟ್ಟಿಗೆ ಜನಕ್ಲೆನ ಮನಸ್ ಗ್ ಮುಟ್ಟುದುಂಡು. ಅಯೋಧ್ಯೆ ಇಸಯದ ಚಿತ್ರ ಪಂತೊರ್ದ್ ಜೋಕ್ಲೆಡ ಸನಾತನ ಧರ್ಮದ ಅರಿವು ಮೂಡುದುಂಡು ಪಂದ್ ಪಂಡೆರ್.

ವಿಶ್ವಹಿಂದೂ ಪರಿಷತ್ ಪ್ರಾಂತ ಕಾರ್ಯದರ್ಶಿ ಶರಣ್ ಪಂಪ್ ವೆಲ್ ಲೇಸ್ ಗ್ ಎಡ್ಡೆಪ್ಪು ಬಯಕಿಯೆರ್. ಚೀರುಂಭ ಭಗವತೀ ಕ್ಷೇತ್ರದ ಗುರ್ಕಾರೆ ಚಂದ್ರಹಾಸ್ ಉಳ್ಳಾಲ್ ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್.

ಮಲ್ಲ ಬಿನ್ನೆರಾದ್ ಭಾರತೀಯ ಜನತಾ ಪಾರ್ಟಿದ ಜಿಲ್ಲಾಧ್ಯಕ್ಷೆರ್ ಸತೀಶ್‌ ಕುಂಪಲ, ಬಿಜೆಪಿ ರಾಜ್ಯ ಕಾರ್ಯದರ್ಶಿ ಕ್ಯಾ. ಬ್ರಿಜೇಶ್ ಚೌಟ, ನೋಟರಿ ಗಂಗಾಧರ ಉಳ್ಳಾಲ್, ಭಜರಂಗದಳ ಸಂಚಾಲಕೆರ್ ಪುನೀತ್ ಅತ್ತಾವರ, ವಿದ್ಯಾರತ್ನ ವಿದ್ಯಾ ಸಂಸ್ಥೆದ ರವೀಂದ್ರ ಶೆಟ್ಟಿ ಉಳಿದೊಟ್ಟು, ಭಗವತಿ ಕ್ಷೇತ್ರದ ಒತ್ತು ಗುರ್ಕಾರೆ ಸುರೇಶ್ ಭಟ್ನಗರ, ಜಿಲ್ಲಾ ಪಂಚಾಯತ್ ಮಾಜಿ ಸದಸ್ಯೆ ಧನಲಕ್ಷ್ಮಿ ಗಟ್ಟಿ, ರೈಲ್ವೆ ಸಲಹಾ ಸಮಿತಿದ ಸದಸ್ಯೆರ್ ಯಶವಂತ ಅಮೀನ್, ಬುರ್ದುಗೋಳಿ ಕ್ಷೇತ್ರದ ಕಾರ್ಯದರ್ಶಿ ಪ್ರಶಾಂತ್ ಕಾಯಂಗಳ, ಸಾಯಿ ಪರಿವಾರ್ ದ ಟ್ರಸ್ಟಿಲು ಗಣೇಶ್ ಅಂಚನ್, ಪುರುಷೋತ್ತಮ ಕಲ್ಲಾಪು ಪಾಲ್ ಪಡೆದಿತ್ತೆರ್.

ಸಾಯಿ ಪರಿವಾರ್ ಟ್ರಸ್ಟ್ ದ ರಜನೀಶ್ ನಾಯಕ್ ಎದ್ಕೊನಿಯೆರ್. ಹರ್ಷರಾಜ್ ಕುಲಾಲ್ ಸೊಲ್ಮೆ ಸಂದಾಯೆರ್. ಪ್ರವೀಣ್ ಎಸ್ ಕುಂಪಲ ಲೇಸ್ ದ ಸುಧಾರಿಕೆ ಮಲ್ತೆರ್.

ಇನಿ ಖಂಡಿಗ ಶ್ರೀ ಸಂತಾನ ಗೋಪಾಲಕೃಷ್ಣ ದೇವಲ್ಯಡ್ ವರ್ಷದ ಜಾತ್ರೆ

ಬೊಲ್ತೇರ್: ತೆಂಕಕಾರಂದೂರು ಗ್ರಾಮದ ಖಂಡಿಗ ಶ್ರೀ ಸಂತಾನ ಗೋಪಾಲಕೃಷ್ಣ ದೇವಲ್ಯಡ್ ಜ.16 ಅಂಗಾರೆ (ಇನಿ) ವರ್ಷದ ಜಾತ್ರೆ ನಡಪರೆ ಉಂಡು.

ಈ ಲೇಸ್ ದ ವೈದಿಕ, ಧಾರ್ಮಿಕ ವಿಧಿ ವಿಧಾನಲು ಮಡಂತ್ಯಾರು ಗೋಪಾಲಕೃಷ್ಣ ತಂತ್ರಿಲೆನ ಮುತಾಲಿಕೆಡ್ ನಡಪರೆ ಉಂಡು.

ಬೊಲ್ಪುಗು ಪೂಜೆ, ಪ್ರಾರ್ತನೆ, ತೋರಣ ಮೂರ್ತ, ಉಗ್ರಾಣ ಮೂರ್ತ, ಕೈಲ್ ದ ಮೂರ್ತ, ಗಣಪತಿ ಹವನ, ಕಲಶ ಪೂಜೆ, ಹಾಲು ಪಾಯಸ ಸೇವೆ, ನಾಗತಂಬಿಲ, ಪ್ರಧಾನ ಹೋಮ, ಪಂಚಾಮೃತ ಅಭಿಷೇಕ, ಗಣಪತಿ ಕಲಶಾಭಿಷೇಕ, ದುರ್ಗೆಗ್ ಕಲಶಾಭಿಷೇಕ, ಪವಮಾನ ಕಲಶಾಭಿಷೇಕ ಮಧ್ಯಾಹ್ನ ದೈವೊಲೆನ ಕಲಶಾಭಿಷೇಕ, ಪಂಚಪರ್ವ, ಬಯ್ಯಗ್ ಭಜನೆ, ರಾತ್ರೆ ಮಹಾ ರಂಗಪೂಜೆ, ದೈವೊಲೆಗ್ ಪರ್ವಸೇವೆ, ಅನ್ನ ಪ್ರಸಾದ ಸೇವೆ, ದೇವೆರೆನ ಬಲಿ ಉಚ್ಚಯ, ದರ್ಶನ ಬಲಿ, ಬಟ್ಟಲ್ ಕಾಣಿಕೆ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಅನುವಂಶಿಕ ಆಡಳಿತ ಮೊಕ್ತೇಸರೆರ್ ಸುಬ್ರಹ್ಮಣ್ಯ ನೂರಿತ್ತಾಯ, ಮಾನಾದಿಗೆದ ಗುರ್ಕಾರೆ ಯೋಗೀಶ್ ಕುಮಾರ್ ಕೆಎಸ್, ಗುರ್ಕಾರೆ ಪದ್ಮ ನಾಯಕ್ ಖಂಡಿಗ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಜ.20: ಕುಡ್ಲದ ಕುದ್ಮುಲ್ ರಂಗರಾವ್ ಪುರಭವನಡ್ ಕಡಲನಾಡ್ ದ್ ಸಂಗೀತೋತ್ಸವ

ಕುಡ್ಲ ಸಂಯುಕ್ತ ಕರಾವಳಿ ಸಾಂಸ್ಕೃತಿಕ ಪ್ರತಿಷ್ಠಾನದ ಮುತಾಲಿಕೆಡ್ ಸುರುತ್ತ ಸರ್ತಿ ಕಡಲನಾಡ್ ದ್ ಸಂಗೀತೋತ್ಸವ 2024 ಜ.20 ಸನಿಯಾರ ಕುಡ್ಲದ ಕುದ್ಮುಲ್ ರಂಗರಾವ್ ಪುರಭವನಡ್ ನಡಪರೆ ಉಂಡು.

ಈ ಸಂಗೀತ ಪರ್ಬ ಚಲನಚಿತ್ರ ಸಂಗೀತ ಗಾಯಕೆರ್ ಬೊಕ್ಕ ನಿರ್ದೇಶಕೆರಾಯಿನ ವಿ ಮನೋಹರ್, ಗುರುಕಿರಣ್​ ಬೊಕ್ಕ ಮಣಿಕಾಂತ್ ಕದ್ರಿ ಮೊಕ್ಲೆನ ಸಾರಥ್ಯಡ್ ನಡಪರೆ ಉಂಡು. ಅಂಚೆನೆ ಈ ಪರ್ಬಡ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಪುಗರ್ತೆದ ಗಾಯಕೆರೆರ್ದ್ ನಡಪುಂಡು.

ಕಾಯಿ ಮುಂಚಿ ಆರೋಗ್ಯಗ್ ಎಡ್ಡೆ

ಕಾಯಿ ಮುಂಚಿ ತಿನ್ಪುನೆರ್ದ್ ಆರೋಗ್ಯಗ್ ಮಸ್ತ್ ಎಡ್ಡೆ. ದಾಯೇ ಪಂಡ ಉಂದು ಚರ್ಮಗ್ ಆರೋಗ್ಯ ಬೊಕ್ಕ ಮೆನ್ಕುಲೆಕ್ಕ ಮಲ್ಪೊಂಡು.

ಕಾಯಿ ಮುಂಚಿಡ್ ವಿಟಮಿನ್ ಸಿ ಬೊಕ್ಕ ಫೈಬರ್ ಇಪ್ಪುಂಡು. ಉಂದು ಜೀರ್ಣಕ್ರಿಯೆನ್ ಸುಲಭ ಮಲ್ಪುಂಡು. ಕಾಯಿ ಮುಂಚಿ ಹೃದಯ ಬೊಕ್ಕ ನೆತ್ತೆರ್ ದ ಸಮಸ್ಯೆನ್ ಸರಿ ಮಲ್ಪೆರೆ ಸಕಾಯ ಮಲ್ಪೊಂಡು. ನೆತ್ತೆರ್ ದ ಕೊಲೆಸ್ಟ್ರಾಲ್, ಟ್ರೈಗ್ಲಿಸರೈಡ್ ಮಟ್ಟ ಬೊಕ್ಕ ಪ್ಲೇಟ್ಲೆಟ್ ನ್ ಒಟ್ಟು ಸೇರ್ಸಾವೊನೆನ್ ಕಮ್ಮಿ ಮಲ್ಪುಂಡು.

ಬಂಡಿಕೊಟ್ಯ ಶ್ರೀ ಕೋರ್ದಬ್ಬು ದೈವೊಲ್ಯಡ್ ವರ್ಷಾಧಿದ ನೇಮೋಚ್ಚಯ ಮುಗಿತಲ

ಉಳ್ಳಾಲ: ಬಂಡಿಕೊಟ್ಯ (ಆದಿಕ್ಷೇತ್ರ ಪುನ್ಕೆದಡಿ) ಶ್ರೀ ಕೋರ್ದಬ್ಬು ದೈವೊಲ್ಯಡ್ ವರ್ಷಾಧಿದ ನೇಮೋಚ್ಚಯ ಜ.11 ಕ್ಕ್ ಸುರು ಆಯಿನ ಜ‌.15 ಕ್ಕ್ ಮುಗಿತಲ ಆಂಡ್.

ಜ.11 ಗುರುವಾರ ರಾತ್ರೆ ಶ್ರೀ ದೈವೊದ ಭಂಡಾರ ಏರ್ಂಡ್.

ಜ.12 ಸುಕ್ರಾರ ಬೊಲ್ಪುಗು ಕ್ಷೇತ್ರಪಾಲ ಗುಳಿಗ ದೈವೊದ ನೇಮ, ಮಧ್ಯಾಹ್ನ ಮೈಸಂದಾಯ ದೈವೊದ ನೇಮ, ರಾತ್ರೆ ಶ್ರೀ ಪಂಜುರ್ಲಿ ದೈವೊದ ನೇಮ ಬೊಕ್ಕ ಸೂದ್ರಮ ಬಂಟ ದೈವೊದ ನೇಮ ನಡತ್ಂಡ್.

ಜ.13 ಸನಿಯಾರ ಬೊಲ್ಪುಗು ಧರ್ಮ ದೈವೊದ ನೇಮ, ರಾತ್ರೆ ದೈವರಾಜ ಶ್ರೀ ಕೋರ್ದಬ್ಬು ತನ್ನಿಮಾನಿಗ ದೈವೊಲೆನ ನೇಮೋಚ್ಚಯ ನಡತ್ಂಡ್.

ಜ.14 ಐತಾರ ಮಧ್ಯಾಹ್ನ ಜುಮಾದಿ ಬಂಟ ದೈವೊದ ನೇಮ, ಪಿಲಿಚಾಮುಂಡಿ ದೈವೊದ ನೇಮ, ಸುಬ್ಬಿಯಮ್ಮ ದೈವೊದ ನೇಮ, ಕೊರಗ ತನಿಯಜ್ಜ ದೈವೊದ ನೇಮ ನಡತ್ಂಡ್.

ಜ.15 ಸೋಮಾರ ಬೊಲ್ಪುಗು ಭಂಡಾರ ಜತ್ತ್ ದ್ ನೇಮೋಚ್ಚಯದೊಟ್ಟಿಗೆ ಮುಗಿತಲ ಆಂಡ್. ‌

ಜ.15-20: ಪೇರಮೊಗ್ರು ದೇಂತಡ್ಕ ಶ್ರೀ ವನದುರ್ಗಾ ದೇವಲ್ಯಡ್ ಜಾತ್ರೆ

ಕೆದಿಲ: ಪೇರಮೊಗ್ರು ದೇಂತಡ್ಕ ಶ್ರೀ ವನದುರ್ಗಾ ದೇವಲ್ಯಡ್ ಜ.15-20 ಮುಟ್ಟ ಜಾತ್ರೆ ನಡಪರೆ ಉಂಡು.

ಈ ಲೇಸ್ ಗೋಕರ್ಣ ಮಂಡಲಾಧೀಶೆರ್ ಶ್ರೀ ರಾಘವೇಶ್ವರ ಭಾರತೀ ಸ್ವಾಮೀಜಿನ ಆಶೀರ್ವಾದಡ್, ಬ್ರಹ್ಮಶ್ರೀ ಕೆಮ್ಮಿಂಜೆ ನಾಗೇಶ ತಂತ್ರಿಲೆನ ಮುತಾಲಿಕೆಡ್ ನಡಪರೆ ಉಂಡು.

ಜ.7 ಐತಾರ ಕೈಲ್ ಕಡ್ತೆರ್. ಜ.15 ಸೋಮಾರ ಬೊಲ್ಪುಗು ಗಣಹೋಮ, ಸಾಮೂಹಿಕ ಪ್ರಾರ್ಥನೆ, ತೋರಣ ಮೂರ್ತ, ಬಯ್ಯಗ್ ಪುದೆಕಾಣಿಕೆ ಸಮರ್ಪಣೆ, ಸಾಂಸ್ಕೃತಿಕ ಲೇಸ್, ಕೊಡಿ ಏರಿಯೆರೆ, ಶ್ರೀ ದೇವೆರೆನ ಬಲಿ ಪಿದಾಡ್ ದ್ ಉಚ್ಚಯ ವಸಂತ ಕಟ್ಟೆ ಪೂಜೆ ನಡತ್ಂಡ್.

ಜ.16 ಅಂಗಾರೆ ಬೊಲ್ಪುಗು ಶ್ರೀ ದೇವೆರೆನ ಬಲಿ ಪಿದಾಡ್ ದ್ ಉಚ್ಚಯ, ಮಧ್ಯಾಹ್ನ ಕಲಶಾಭಿಷೇಕ ಮಹಾಪೂಜೆ, ಅನ್ನ ಪ್ರಸಾದ ಸೇವೆ ಬಯ್ಯಗ್ ಗಾನಸಿರಿ ಸಂಗೀತ ಸೌರಭ, ಶ್ರೀ ದೇವೆರೆನ ಬಲಿ ಪಿದಾಡ್ ದ್ ಉಚ್ಚಯ, ಇಸೇಸ ವಸಂತ ಕಟ್ಟೆ ಪೂಜೆ, ನೃತ್ಯ ಬಲಿ ನಡಪರೆ ಉಂಡು.

ಜ.17 ಬುಧಾರ ಬೊಲ್ಪುಗು ಶ್ರೀ ದೇವೆರೆನ ಬಲಿ ಪಿದಾಡ್ ದ್ ಉಚ್ಚಯ, ದರ್ಶನ ಬಲಿ, ಬಟ್ಟಲ್ ಕಾಣಿಕೆ, ಕೆದಿಲ ದೈವೊಲ್ಯರ್ದ್ ದೈವೊಲೆನ ಭಂಡಾರ ಬರಿಯೆರೆ, ದೇವೆರೆನ ಭೇಟಿ, ಬಯ್ಯಗ್ ಕರ್ನಾಟಕ ಶಾಸ್ತ್ರೀಯ ಸ್ಯಾಕ್ಸೋಪೋನ್ ಕಛೇರಿ, ಪಲ್ಲಕ್ಕಿ ಉಚ್ಚಯ, ಉಯ್ಯಾಲೋತ್ಸವ ನಡಪರೆ ಉಂಡು.

ಜ.18 ಗುರುವಾರ ಬೊಲ್ಪುಗು ಶ್ರೀ ದೇವೆರೆನ ಬಲಿ ಪಿದಾಡ್ ದ್ ಉಚ್ಚಯ, ಕಲಶಾಭಿಷೇಕ, ಮಹಾಪೂಜೆ ಬಯ್ಯಗ್ ಗೀತ ಸಾಹಿತ್ಯ ಸಂಭ್ರಮ, ದೀಪೋತ್ಸವ, ರಕ್ತೇಶ್ವರಿ ದೈವೊದ ಭೇಟಿ ರಾತ್ರೆ ತೇರ್ ಒಯಿಪೆರೆ ಉಂಡು.

ಜ.19 ಸುಕ್ರಾರ ಬೊಲ್ಪುಗು ತೈಲಾಭಿಷೇಕ, ಮಹಾಪೂಜೆ, ಬಯ್ಯಗ್ ಶ್ರೀ ದೇವೆರೆನ ಬಲಿ ಪಿದಾಡ್ ದ್ ಮೆರವಣಿಗೆ, ಅವಭೃತ ಸ್ನಾನ, ಕೊಡಿ ಜಾವೆರೆ, ರಾತ್ರೆ ಬ್ರಹ್ಮಕಪಾಲ-ಕನಕಾಂಗಿ ಕಲ್ಯಾಣ ಆಟ ನಡಪರೆ ಉಂಡು.

ಜ.20 ಸನಿಯಾರ ಬೊಲ್ಪುಗು ಮಹಾಗಣಪತಿ ಹೋಮ, ಕಲಶಾಭಿಷೇಕ, ಬೊಂಡದ ಅಭಿಷೇಕ, ಮಹಾಪೂಜೆ ಬಯ್ಯಗ್ ಕರಿಮಜಲು ಶ್ರೀ ಕೃಷ್ಣ ಕಲಾ ವೃಂದದಕ್ಲೆರ್ದ್ ತುಳುನಾಡ ವೈಭವ ಸಾಂಸ್ಕೃತಿಕ ಲೇಸ್ ರಾತ್ರೆ ಮಹಾ ರಂಗಪೂಜೆ, ಗುಳಿಗ ದೈವೊದ ನೇಮೋಚ್ಚಯ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀವನದುರ್ಗಾ ದೇವಲ್ಯದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಜ.14-18: ಕಾವೂರು ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ವರ್ಷಾವಧಿ ಮಹೋಚ್ಚಯ

ಕುಡ್ಲ: ಕಾವೂರು ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ಜ.14-18 ಮುಟ್ಟ ವರ್ಷಾವಧಿ ಮಹೋಚ್ಚಯ ನಡಪರೆ ಉಂಡು.

ಜ‌.13 ಸನಿಯಾರ ಬೊಲ್ಪುಗು ಪ್ರಾರ್ತನೆ, ದಿಕ್ಪಾಲ ಬಲಿ ನಡತ್ಂಡ್.

ಜ.14 ಐತಾರ ಮಧ್ಯಾಹ್ನ ಬಲಿ ಪಿದಾಡ್ ದ್ ಕೊಡಿ ಏರ್ಂಡ್, ಬಯ್ಯಗ್ ಸಾರ್ವಜನಿಕ ಸತ್ಯನಾರಾಯಣ ಪೂಜೆ ನಡತ್ಂಡ್.

ಜ.15 ಸೋಮಾರ ಮೂಡುಸವಾರಿ ರಾತ್ರೆ ದಕ್ಷಯಜ್ಞ ಆಟ ನಡತ್ಂಡ್.

ಜ.16 ಅಂಗಾರೆ ಪಡುಸವಾರಿ, ರಾತ್ರೆ ಧಾರ್ಮಿಕ ಸಭಾ ಲೇಸ್, ಪುದರ್ ದೀದಾಂಡ್ ತುಳು ನಾಟಕ ನಡಪರೆ ಉಂಡು.

ಜ.17 ಬುದಾರ ಮಧ್ಯಾಹ್ನ ಪಲ್ಲಪೂಜೆ, ಅನ್ನ ಪ್ರಸಾದ ಸೇವೆ, ದ್ವಂದ್ವ ವಾದ್ಯ ಸಂಗೀತ ಬಯ್ಯಗ್ ವಿಷ್ಣು ಸಹಸ್ರನಾಮ ಪಠಣ ಬೊಕ್ಕ ಭಜನೆ, ಭಕ್ತಿಗೀತೆ, ಭಾವಗೀತೆ ಸಾಂಸ್ಕೃತಿಕ ಲೇಸ್ ರಾತ್ರೆ ತೇರ್ ಒಯಿಪೆರೆ ಉಂಡು.

ಜ.18 ಗುರುವಾರ ಬೊಲ್ಪುಗು ಕವಾಟೋದ್ಘಾಟನೆ, ತುಲಾಭಾರ, ಕರ್ನಾಟಕ ಶಾಸ್ತ್ರೀಯ ಸಂಗೀತ ಲೇಸ್, ಬಯ್ಯಗ್ ಮರ್ಲ್ ಜುಮಾದಿ
ಭಂಡಾರ ಬರಿಯೆರೆ ಉಂಡು. ಬೊಕ್ಕ ಯಕ್ಷಗಾನ ತಾಳಮದ್ದಳೆ ಸುದರ್ಶನ ವಿಜಯ, ರಾತ್ರೆ ಮರ್ಲ್ ಜುಮಾದಿ ಗಗ್ಗರ ಸೇವೆ, ಅಗ್ನಿ ಕೇಳಿ ದೈವೊದ ಭೇಟಿಯಾದ್ ಕೊಡಿ ಜಾವರೆ ಬೊಕ್ಕ ನೃತ್ಯ ಗಾನ ವೈಭವ ಸಾಂಸ್ಕೃತಿಕ ಲೇಸ್ ಉಂಡು.

ಜ.20 ಸನಿಯಾರ ಸಂಪ್ರೋಕ್ಷಣೆ, ಮಂತ್ರಾಕ್ಷತೆ, ಬಯ್ಯಗ್ ಕಟೀಲ್ ಮೇಳದಕ್ಲೆರ್ದ್ ಆಟ ನಡಪರೆ ಉಂಡು.

ಈ ಮಾತ ಲೇಸ್ ಮಾತೆರ್ಲಾ ಪಾಲ್ ಪಡೆದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ಮಹಾಲಿಂಗೇಶ್ವರ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಕಾರ್ಯ ನಿರ್ವಹಣಾಧಿಕಾರಿ, ಮಾಗಣೆದ ಪತ್ತ್ ಸಮಸ್ತೆರ್, ದೇವಲ್ಯದ ಸಿಬ್ಬಂದಿ ವರ್ಗ, ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಕುಂಟಾಲಗಿರಿ ಶ್ರೀ ಲಕ್ಷ್ಮೀ ನರಸಿಂಹ ದೇವಲ್ಯಡ್ ವರ್ಷದ ಜಾತ್ರೆ ಮುಗಿತಲ

ಕುಡ್ಲ: ಕುಂಟಾಲಗಿರಿ ಶ್ರೀ ಲಕ್ಷ್ಮೀ ನರಸಿಂಹ ದೇವಲ್ಯಡ್ ಜ.13-15 ಮುಟ್ಟ ವರ್ಷದ ಜಾತ್ರೆ ನಡಪರೆ ಉಂಡು.

ಈ ಲೇಸ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ|ಡಿ ವೀರೇಂದ್ರ ಹೆಗ್ಗಡೆರೆನ ಆಶೀರ್ವಾದಡ್, ಬ್ರಹ್ಮಶ್ರೀ ನೀಲೇಶ್ವರ ಉಚ್ಚಿಲತ್ತಾಯ ಪದ್ಮನಾಭ ತಂತ್ರಿಲೆನ ಮಾರ್ಗದರ್ಶನಡ್ ನಡಪರೆ ಉಂಡು.

ಜ.13 ಸನಿಯಾರ ಬಯ್ಯಗ್ ಕೊಡಿ ಏರ್ಂಡ್, ಭಜನೆ ರಾತ್ರೆ ದೇವೆರೆನ ಬಲಿ ಉಚ್ಚಯ, ಅನ್ನ ಪ್ರಸಾದ ಸೇವೆ, ಕೈತಲ್ದ ಪ್ರತಿಭೆಲೆರ್ದ್ ಸಾಂಸ್ಕೃತಿಕ ಲೇಸ್, ಕುಡ್ಲ ಏಕದಂತ ಕಲಾತಂಡದಕ್ಲೆರ್ದ್ ಬಲೆ ತೆಲಿಪಾಲೆ ಬಲೆ ಬುಲಿಪಾಲೆ ಲೇಸ್ ನಡಪರೆ ಉಂಡು.

ಜ.14 ಐತಾರ ಬೊಲ್ಪುಗು ಗಣಹೋಮ ಮಧ್ಯಾಹ್ನ ನವಕ ಕಲಶ, ದೇವೆರೆನ ಬಲಿ ಉಚ್ಚಯ, ಅನ್ನ ಪ್ರಸಾದ ಸೇವೆ ಬಯ್ಯಗ್ ಭಜನೆ, ರಾತ್ರೆ ದೇವೆರೆನ ಬಲಿ ಉಚ್ಚಯ, ಬಾಚಕೆರೆ ಶ್ರೀ ದುರ್ಗಾಪರಮೇಶ್ವರಿ ಪ್ರಸಾದಿತ ಯಕ್ಷಗಾನ ಮಂಡಳಿದಕ್ಲೆರ್ದ್ ಗುಳಿಗ ಶಿವ ಗುಳಿಗ ತುಳು ಆಟ ನಡತ್ಂಡ್.

ಜ.15 ಸೋಮಾರ (ಇನಿ) ಬೊಲ್ಪುಗು ಅವಭೃತ ಸ್ನಾನ, ಕೊಡಿ ಜಾವೆರೆ ಉಂಡು, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ ಬಯ್ಯಗ್ ಭಜನೆ ನಡಪುಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಬೋಳಿಯಾರುದ ಕುಂಟಾಲಗಿರಿ ಶ್ರೀ ಲಕ್ಷ್ಮೀ ನರಸಿಂಹ ದೇವಲ್ಯದ ಆಡಳಿತ ಸಮಿತಿ, ಸೇವಾ ಸಮಿತಿ ಬೊಕ್ಕ ಮಹಿಳಾ ಸಮಿತಿದ ಗುರ್ಕಾರೆ, ಮಾನಾದಿಗೆದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್, ಅರ್ಚಕೆರ್ ಭಾಸ್ಕರ ಭಟ್, ಅಮ್ಮೆಂಬಳ ಮಾಗಣೆದ ಪತ್ತ್ ಸಮಸ್ತೆರ್ ಬೊಕ್ಕ ಊರುದ ಪರವೂರುದ ಭಕ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.