ಬೆಂಗ್ಲೂರ್ ರ್ದ್ ಶಬರಿಮಲೆಕ್ಕ್ ಕೆಎಸ್ ಆರ್ ಟಿಸಿ ವೋಲ್ಟ್ ಬಸ್ ಸೇವೆ ಸುರು ಆತ್ಂಡ್.
ಡಿ.1 ರ್ದ್ ಈ ಬಸ್ ಸಂಚಾರ ಸುರು ಆಪುಂಡು. ಬೆಂಗ್ಲೂರ್- ನೀಲಕ್ಕಲ್ (ಪಂಪಾ, ಶಬರಿಮಲೈ) ನಡುಟ್ಟ್ ಸಂಚಾರ ಮಲ್ಪುಂಡು. ಬೆಂಗ್ಲೂರ್ ದ ಶಾಂತಿನಗರ ಬಸ್ ನಿಲ್ದಾಣರ್ದ್ ಏಪಲ ಮಧ್ಯಾಹ್ನ 1.50 ಕ್ಕ್ ಪಿದಾಡುನ ಬಸ್ ಮಾನದಾನಿ ಬೊಲ್ಪುಗು 6.45 ಕ್ಕ್ ಪಂಪಾ ಎತ್ತುಂಡು. ಅಂಚೆನೆ ಬಯ್ಯಗ್ 6 ಗಂಟೆರ್ದ್ ಪಂಪಾರ್ದ್ ಪಿದಾಡ್ ದ್ ಮಾನದಾನಿ ಬೊಲ್ಪುಗು 10 ಗಂಟೆಗ್ ಬೆಂಗ್ಲೂರ್ ಗ್ ಎತ್ತುಂಡು.
ಚಳಿತ್ತ ಸೀಸನ್ ಡ್ ನರಮಾನಿ ಕ್ಯಾರೆಟ್ ತಿಂಡ ಆರೋಗ್ಯಗ್ ಮಸ್ತ್ ಎಡ್ಡೆ.
ದಾಯೆ ಪಂಡ ಕ್ಯಾರೆಟ್ ಡ್ ಬೀಟಾ-ಕ್ಯಾರೋಟಿನ್, ವಿಟಮಿನ್-ಎ, ವಿಟಮಿನ್-ಬಿ, ವಿಟಮಿನ್-ಕೆ, ವಿಟಮಿನ್-ಸಿ ಬೊಕ್ಕ ಪೊಟ್ಯಾಸಿಯಂ ಸಮೃದ್ಧ ಆಪುಂಡು.
ಅತ್ತಂದೆ ಚರ್ಮದ ಆರೋಗ್ಯಗ್ ಸಹಾಯಕಾರಿ ಆಪುಂಡು. ಯುವಿ ಕಿರಣರ್ದ್ ಚರ್ಮಗ್ ಆಪುನ ತೊಂದರೆನ್ ತಪ್ಪಾವುಂಡು. ಬೊಕ್ಕ ಕಣ್ಣ್ ದ ದೃಷ್ಟಿನ್ ಸರಿ ಮಲ್ಪುಂಡು, ಕಣ್ಣ್ ದ ಪೊರೆ ಬೊಕ್ಕ ಬೇತೆ ಸಮಸ್ಯೆನ್ ಪರಿಹಾರ ಮಲ್ಪುಂಡು. ಅಂಚೆನೆ ಸೆಕ್ಕರೆ ಸೀಕ್ ಕಮ್ಮಿ ಮಲ್ಪುಂಡು ಅತ್ತಂದೆ, ಹೃದಯದ ಆರೋಗ್ಯನ್ ಕಾಪಾಡೊಂಡು.
ಬೋಲ್ತೆರ್: ಯಕ್ಷ ಧ್ರುವ ಪಟ್ಲ ಫೌಂಡೇಶನ್ ಬೋಲ್ತೆರ್ ಘಟಕದ ವತಿರ್ದ್ ಯಕ್ಷ ಸಂಭ್ರಮ ಡಿಸೆಂಬರ್ 2 ತಾನಿ ಬಯ್ಯ 6 ಗಂಟೆಗ್ ಉಜಿರೆ ಶ್ರೀ ಜನಾರ್ಧನ ಸ್ವಾಮಿ ದೇವಸ್ಥಾನದ ರಥಬೀದಿಡ್ ನಡಪರೆ ಉಂಡು. ವಿಶೇಷವಾದ್ ಪತ್ತ್ ಮೈಸಾಸುರನ ಬಾಲಲೀಲೆದ ಆಟದೊಟ್ಟಿಗೆ ಸಭಾಪ್ರವೇಶ ಅವರೆ ಉಂಡು.
ಬಂಗಾರ್ದ ಕಿರೀಟಡ್ ಶ್ರೀ ದೇವಿನ ಪ್ರತ್ಯಕ್ಷದ ಸನ್ನಿವೇಶ, ಚಂಡ-ಮುಂಡೆರೆಬ ಅಬ್ಬರದ ಪ್ರವೇಶ, ಇಂಚನೆ ಮಸ್ತ್ ವಿಶೇಷ ವೈಭವದ ಸನ್ನಿವೇಶಲು, ಆಕರ್ಷಣೀಯ ವಿದ್ಯುತ್ ದೀಪಾ ಸಂಯೋಜನೆ, ರಂಗಸ್ಥಳಕ್ಕ್ ಪೂತ್ತ ವಿಶೇಷ ಅಲಂಕಾರ ಉಂಡು ಪಂದ್ ಘಟಕದ ಗುರ್ಕಾರ್ಲು ಸುರೇಶ್ ಶೆಟ್ಟಿ ಲಾಯಿಲ ತೆರಿಪಾದೆರ್. ನ.28 ತಾನಿ ಲಯನ್ಸ್ ಭವನಡ್ ನಡತ್ತಿನ ಪತ್ರಿಕಾಗೋಷ್ಠಿಡ್ ಪಾತೆರಿಯೆರ್.
ವೈಭವದ ಮೆರವಣಿಗೆ-ಪ್ರಶಸ್ತಿ ಪ್ರದಾನ- ಗೌರವ ಸನ್ಮಾನ: ಬಯ್ಯ 5 ಗಂಟೆರ್ದ್ ಉಜಿರೆ ಓಶಿಯನ್ ಪರ್ಲ್ ರ್ದ್ ಶ್ರೀ ಜನಾರ್ಧನ ಸ್ವಾಮಿ ದೇವಸ್ಥಾನ ರಥಬೀದಿ ಮುಟ್ಟ ಭಜನಾ ತಂಡಲು, ಚೆಂಡೆ, ಬ್ಯಾಂಡ್, ಕೊಂಬು, ಸ್ಯಾಕ್ಸೋಫೋನ್, ಆಕರ್ಷಕ ಪಟಾಕಿ, ಬೇತೆ ಬೇತೆ ವೇಷಭೂಷಣದೊಟ್ಟಿಗೆ ವೈಭವದ ಮೆರವಣಿಗೆ ನಡಪೆರೆ ಉಂಡು. ವಿಶೇಷ ಖಾದ್ಯಲೆನ ಭೋಜನ, ಯಕ್ಷಗಾನ ಕ್ಷೇತ್ರದ ಭಾಗವತೆರ್ ಮೋಹನ್ ಬೈಪಡಿತ್ತಾಯ ಬೊಕ್ಕ ಪ್ರಜ್ವಲ್ ಕುಮಾರ್ ಗುರುವಾಯನಕೆರೆ, ಕೃಷಿ ಕ್ಷೇತ್ರದ ಬಿ.ಕೆ.ದೇವರಾವದ ಅಮೈ ಮಿತ್ತಬಾಗಿಲು ಮೊಕ್ಲೆಗ್ ಯಕ್ಷ ಸಂಭ್ರಮ-2023ರ ಪ್ರಶಸ್ತಿ ಪ್ರದಾನ ನಡಪೆರೆ ಉಂಡು. ಶ್ರೀ ಲಕ್ಷ್ಮೀ ಗ್ರೂಪ್ ಉಜಿರೆದ ಮೋಹನ್ ಕುಮಾರ್, ಭರತ್ ಕುಮಾರ್ ಉಜಿರೆ, ಅರ್ಚನಾ ರಾಜೇಶ್ ಪೈ ಉಜಿರೆ ಮೊಕ್ಲೆಗ್ಲ ಈ ಪೊರ್ತುಡು ಮಾನಾದಿಗೆ ನಡಪೆರೆ ಉಂಡು.
ಕಾರ್ಯಕ್ರಮದ ಗುರ್ಕಾರ್ಮೆನ್ ಯಕ್ಷಧ್ರುವ ಪಟ್ಲ ಘಟಕದ ಗೌರವಾಧ್ಯಕ್ಷೆರ್ ಶಶಿಧರ್ ಶೆಟ್ಟಿ ಬರೋಡ ವಹಿಸೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಜಮ್ಮು ಕಾಶ್ಮೀರ ಸರ್ಕಾರದ ಪ್ರಿನ್ಸಿಪಲ್ ಸೆಕ್ರೆಟರಿ ಆಫ್ ಪವರ್ ಡಿಪಾರ್ಟ್ಮೆಂಟ್ ಹಿರಿಯಡ್ಕ ರಾಜೇಶ್ ಪ್ರಸಾದ್, ವಿವೇಕಾನಂದ ವಿದ್ಯಾವರ್ಧಕ ಸಂಘ ಪುತ್ತೂರುದ ಡಾ.ಪ್ರಭಾಕರ್ ಭಟ್ ಕಲ್ಲಡ್ಕ, ಬೆದ್ರ ಆಳ್ವಾಸ್ ಶಿಕ್ಷಣ ಸಂಸ್ಥೆದ ಡಾ.ಎಂ.ಮೋಹನ್ ಆಳ್ವ, ಶ್ರೀ ಜನಾರ್ಧನ ಸ್ವಾಮಿ ದೇವಸ್ಥಾನದ ಆನುವಂಶಿಕ ಆಡಳಿತ ಮೋಕ್ತೇಸರೆರ್ ಶರತ್ಕೃಷ್ಣ ಪಡುವೆಟ್ನಾಯ, ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ ಬೊಕ್ಕ ಉಜಿರೆ ಗ್ರಾ.ಪಂ. ಅಧ್ಯಕ್ಷೆ ಉಷಾಕಿರಣ್ ಕಾರಂತ್ ಪಾಲ್ ಪಡೆಯೆರೆ ಉಲ್ಲೆರ್. ಪತ್ರಿಕಾಗೋಷ್ಠಿಡ್ ಕೋಶಾಧಿಕಾರಿ ಆದರ್ಶ ಜೈನ್ ಗುರುವಾಯನಕೆರೆ, ಸಂಚಾಲಕೆರ್ ಕಿರಣ್ ಕುಮಾರ್ ಜೈನ್ಪೇಟೆ ಬೊಕ್ಕ ಸಹ ಸಂಚಾಲಕೆರ್ ತುಕರಾಮ್ ಬಿ. ಬೋಲ್ತೆರ್ ಇತ್ತೆರ್.
ಗುಜರಾತ್ ಡ್ ಬತ್ತಿನ ತೆಡಿಲ್ ಬರ್ಸರ್ದಾವರ ಒಂಜೇ ದಿನ ತೆಡಿಲ್ ಹಾಕ್ ದ್ 27 ಜನ ತೀರ್ ಪೋಯೆರ್.
ದಾಹೋದ್, ಭರೂಜ್, ತಾಪಿ, ಅಹಮದಾಬಾದ್, ಅಮ್ರೇಲಿ, ಬನಸ್ಕಾಂತ, ಬೋಟಡ್, ಖೇಡಾ, ಮೆಹಸಾನ, ಪಂಚಮಹಲ್, ಸಬರ ಕಾಂತ, ಸೂರತ್, ಸುರೇಂದ್ರನಗರ, ದೇವಭೂಮಿ ದ್ವಾರಕಾ ಜಿಲ್ಲೆಡ್ ತೆಡಿಲ್ ಹಾಕ್ ದ್ ಜನ ತೀರ್ ಪೋಯೆರ್.
ಇಂಚೆನೆ ಸುಮಾರ್ ಜಿಲ್ಲೆಡ್ ಬರ್ಸ ಬತ್ತ್ ದ್ ಜನಜೀವನ ಹಾಳಾತ್ಂಡ್. ಅತ್ತಂದೆ ಸುಮಾರ್ ಪ್ರಮಾಣಡ್ ಬುಲೆ ನಷ್ಟ ಆತ್ಂಡ್. ರೈತೆರ್ ಕಂಗಾಲಾತೆರ್.
ರಾಜ್ಯ ಮಾನವ ಹಕ್ಕು ಆಯೋಗದ ಗುರ್ಕಾರೆಯಾದ್ ಹಿಮಾಚಲ ಪ್ರದೇಶ ಹೈಕೋರ್ಟ್ ದ ನಿವೃತ್ತ ನ್ಯಾಯಮೂರ್ತಿ ಎಲ್ ನಾರಾಯಣ ಸ್ವಾಮಿ ನೇಮಕ ಆತೆರ್.
ಮೆರೆನೊಟ್ಟಿಗೆ ನಿವೃತ್ತ ಜಿಲ್ಲಾ ನ್ಯಾಯಾಧೀಶೆರ್ ಎಸ್ ಕೆ. ವಂಟಿಗೋಡಿ ಬೊಕ್ಕ ಕೆಪಿಎಸ್ ಸಿ ಮಾಜಿ ಗುರ್ಕಾರೆ ಟಿ. ಶ್ಯಾಂ ಭಟ್ ಮೇರ್ ಆಯೋಗದ ಸದಸ್ಯೆರಾದ್ ನೇಮಕ ಆಯೆರ್. ಈ ಮೂಜಿ ಜನತ್ತ ಅಧಿಕಾರಾವಧಿ 5 ವರ್ಷ ಅತ್ತಂಡ 70 ವರ್ಷ ಪ್ರಾಯ ಆಪುನ ಮುಟ್ಟ ಇಪ್ಪುಂಡು.
ಕುಡ್ಲ: ಅತ್ತಾವರದ ಫ್ಲ್ಯಾಟ್ ಒಂಜೆಟ್ಟ್ ತೂ ಪೊತ್ತ್ ದ್ ಪೊಂಜೋವು ತೀರ್ ಪೋಯಿನ ನಡಕೆ ನಡತ್ಂಡ್.
ಸಹೈನ್ ಮುಸಾಬ್ (57) ತೀರ್ ಪೋಯಿನಾರ್ ಪಂದ್ ತೆರಿದ್ ಬೈದ್ಂಡ್. ಬೊಲ್ಪುಗು ಶಾರ್ಟ್ ಸರ್ಕ್ಯಿಟ್ ರ್ದ್ ಈ ಘಟನೆ ನಡತ್ಂಡ್. ಆ ಪೊರ್ತುಡು ಇಲ್ಲಲ್ ಇತ್ತಿನಕುಲು ಪಿದಾಯಿ ಬೈದೆರ್. ಆಂಡ ಮುಸಾಬ್ ಶೌಚಾಲಯಡ್ ಇತ್ತಿನೆರ್ದಾವರ ಪಿದಾಯಿ ಬರಿಯೆರೆ ಅವಂದೆ ಮತಿ ತತ್ತ್ ದೆರ್. ಅರೆನ್ ಕೂಡ್ಲೆ ಆಸ್ಪತ್ರೆಗ್ ಸಾಗಾದ್ ಚಿಕಿತ್ಸೆ ಕೊರ್ತೆರ್. ಆಂಡ ಚಿಕಿತ್ಸೆ ಫಲಕಾರಿ ಅವಂದೆ ತೀರ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್.
ಅತ್ತಂದೆ ಇಲ್ಲಲ್ ಇತ್ತಿನ ಸೊತ್ತುಲು ಕರೆಂಚಿದ್ಂಡ್. ನೆರ್ದ್ ಮಸ್ತ್ ನಷ್ಟ ಆತ್ಂಡ್. ಈ ಬಗೆಟ್ಟ್ ಪಾಂಡೇಶ್ವರ ಅಗ್ನಿಶಾಮಕ ದಳತ್ತಕುಲು ಕಾರ್ಯಾಚರಣೆ ನಡಪಾದೆರ್.
ಬೋಲ್ತೆರ್: ಸ್ಯಾಕ್ಸೋಫೋನ್ ವಾದನ ಕಲಾವಿದೆರ್, ಆಕಾಶವಾಣಿ ಬೊಕ್ಕ ದೂರದರ್ಶನದ ಎ ಗ್ರೇಡ್ ಪಡೆತಿನ ಧರ್ಮಸ್ಥಳ ಬಿ ಪ್ರಕಾಶ ದೇವಾಡಿಗೆರೆಗ್ ಅಮೇರಿಕಾದ ಪುತ್ತಿಗೆ ಮಠಡ್ “ಕೃಷ್ಣಾನುಗ್ರಹ ಪತ್ರ” ಮನ್ನಣೆ ತಿಕ್ ದ್ಂಡ್. ಅಮೇರಿಕಾದ ಫಿನಿಕ್ಸ್ದ ಪುತ್ತಿಗೆ ಮಠದ ಪೀಠಾಧಿಪತಿಲಾಯಿನ ಶ್ರೀ ಸುಗುಣೇಂದ್ರ ತೀರ್ಥ ಶ್ರೀಪಾದ ಮೆರೆನ ಮೂಜನೆ ಸರ್ತಿದ ಅಮೇರಿಕಾ ಕಲಾ ಪ್ರವಾಸದ ಪೊರ್ತುಡು ಕೊರ್ನ ಕಲಾ ಸೇವೆನ್ ಗೌರವಿಸಾದ್ ಈ ಪುರಸ್ಕಾರ ಪತ್ರ ನೀಡಿ ಸೊಲ್ಮೆ ಸಂದಾಯ ಮಲ್ತೆರ್.
ಅಮೆರಿಕಾದ ಅರಿಝೇನಾಡ್ ಇಪ್ಪುನ ಸುಜ್ಞಾನ ರಿಲಿಜಿಯಸ್ ಎಂಡ್ ಚಾರಿಟೇಬಲ್ ಫೌಂಡೇಶನ್ ವೆಂಕಟಕೃಷ್ಣ ದೇವಸ್ಥಾನಡ್ ಅ.28 ರ್ದ್ ನ.4 ಮುಟ್ಟ ನಡತ್ತಿನ ‘ ಶ್ರೀ ಯಜುರ್ವೇದ ಸಂಹಿತ ಯಾಗ’ ಬೊಕ್ಕ ‘ಸಹಸ್ರ ಅಥರ್ವ ಶ್ರೀರ್ಶ ಮಹಾಗಣಪತಿ ಯಾಗ’ ಕಾರ್ಯಕ್ರಮಡ್ ಪ್ರಕಾಶ ದೇವಾಡಿಗ ಭಾರತೀಯ ಸಾಂಪ್ರದಾಯಿಕ ಸ್ಯಾಕ್ಸೋಫೋನ್ ವಾದನನ್ ಮನೋಜ್ಞವಾದ್ ನಡಪಾದ್ ಕೊರಿಯೆರ್. ಆರ್ ಈ ಸರ್ತಿ ಭಾರತರ್ದ್ ಆಹ್ವಾನ ಪಡೆದ್ ಅಮೆರಿಕಗ್ ಮೂಜನೇ ಸರ್ತಿ ಪ್ರಯಾಣ ಮಲ್ತ್ ಇತ್ತೆರ್. ಸ್ವಾಮೀಜಿಲು ಪುರಸ್ಕಾರ ಪ್ರದಾನ ಮಲ್ಪುನ ಪೊರ್ತುಡು ಮಠದ ಪ್ರಧಾನ ಅರ್ಚಕೆರ್ ಕಿರಣ್ ರಾವ್ ಉಜಿರೆ ಬೊಕ್ಕ ಸ್ವಾಮೀಜಿಲೆನ ಧಾರ್ಮಿಕ ಕೈಂಕರ್ಯದ ಪರಿವಾರ ಬಂಧುಲು ಇತ್ತೆರ್.
ಕೈಕಂಬ: ಕರ್ನಾಟಕ ಸಂಘ ಶಾರ್ಜಾದ ಮುತಾಲಿಕೆಡ್ ನ.18 ಕ್ಕ್ ಶಾರ್ಜಾ ಈವಾನ್ ಹೋಟೆಲ್ ಡ್ ಅಟ್ಟಣೆ ಮಲ್ತಿನ ಕರ್ನಾಟಕ ರಾಜ್ಯೋತ್ಸವ, ಕರ್ನಾಟಕ ಸಂಘ ಶಾರ್ಜಾದ 21ನೇ ವರ್ಷದ ಉಚ್ಚಯ ಬೊಕ್ಕ ಮಯೂರ ವಿಶ್ವಮಾನ್ಯ ಕನ್ನಡಿಗೆ ಪ್ರಶಸ್ತಿ ಪ್ರದಾನ ಲೇಸ್ ಡ್ ಅನಿವಾಸಿ ಭಾರತೀಯೆರೆಗ್ ನಡಪುನ ರಾಷ್ಟ್ರ ಮಟ್ಟದ ದೇಹರ್ದಾಡ್ಯ ಪಂತೊಗು ಮುಖ್ಯ ತೀರ್ಪುಗಾರೆರಾದ್ ಕುಡ್ಲರ್ದ್ ಮಿಸ್ಟರ್ ಇಂಡಿಯಾ ಜಗದೀಶ್ ಪೂಜಾರಿ ಮೆರೆನ್ ಲೆತ್ತ್ ದ್ ಇತ್ತೆರ್.
ಈ ಲೇಸ್ ದ ಪೊರ್ತುಡು ಚಾವಡಿಡ್ ಪ್ರದರ್ಶನ ಕೊರ್ನ ಅನಿವಾಸಿ ಕನ್ನಡಿಗೆ ದೇಹರ್ದಾಡ್ಯ ಕಲಿಲೆನ ಅಂಗ ಸೌಷ್ಟವ್ಯಗ್ ತೀರ್ಪು ಕೊರ್ನ ಬೊಕ್ಕ ಸ್ವತಃ ಜಗದೀಶ್ ಪೂಜಾರಿ ಚಾವಡಿಡ್ ದೇಹರ್ದಾಡ್ಯದ ಪ್ರದರ್ಶನ ಕೊರಿಯೆರ್.
ಜಗದೀಶ್ ಪೂಜಾರಿ ಮೆರೆನ ಸಾಧನೆಗ್ ಕರ್ನಾಟಕ ಸಂಘ ಶಾರ್ಜಾ ವತಿರ್ದ್ ಮಯೂರ ಶ್ರೀ ಬಿರ್ದ್ ಕೊರ್ದು ಸನ್ಮಾನ ಮಲ್ತೆರ್.
ಜಗದೀಶ್ ಕರ್ನಾಟಕದ ತುಳುನಾಡ್ ದ ಕುಡ್ಲ ಅಡ್ಯಾರ್ ಪದವುದ ಲಿಂಗಪ್ಪ ಪೂಜಾರಿ ಬೊಕ್ಕ ಯಮುನಾ ಪೂಜಾರಿ ದಂಪತಿಲೆನ ಮಗೆ. ಅಂಗ ವೈಕಲ್ಯತೆ ಇತ್ತ್ಂಡಲ ಕಠಿಣ ದೈಹಿಕ ಕಸರತ್ತು ಮಲ್ತ್ ದ್ ರಾಷ್ಟ್ರದ ಗಮನ ಸೆಳೆಯಿನ ಛಲವಾದಿ. ಜಿಲ್ಲೆ, ರಾಜ್ಯ, ರಾಷ್ಟ್ರಮಟ್ಟದ ದೇಹರ್ದಾಡ್ಯ ಪಂತೊಡು ಪಾಲ್ ಪಡೆತೆರ್.
ಅತ್ತಂದೆ ಮಿಸ್ಟರ್ ಕದಂಬ, ಮಿಸ್ಟರ್ ವಜ್ರದೇಹಿ, ಕರ್ನಾಟಕ ಭೂಷಣ, ಮಿಸ್ಟರ್ ಕಾಸರಗೋಡು, ಮಿಸ್ಟರ್ ಕರಾವಳಿ, ಮಿಸ್ಟರ್ ಸರ್ವೋತ್ತಮ ಸಾಧಕ, ಮಿಸ್ಟರ್ ಸ್ವಾಭಿಮಾನ್, ಮಡಿಲು ಸನ್ಮಾನ 2019, ಬೆದ್ರ ಕ್ಲಾಸಿಕ 2022, ಕರ್ನಾಟಕ ಅಚೀವರ್ಸ್ ಬುಕ್ ಅಫ್ ರೆಕಾರ್ಡ್, ಫ್ಯೂಚರ್ ಕಲಾಂ ಯೂನಿವರ್ಸಲ್ ಬುಕ್ ಅಫ್ ರೆಕಾರ್ಡ್ಸ್ ಪ್ರಶಸ್ತಿನ್ ಪಡೆತೆರ್.
ಇತ್ತೆ ಸಹ್ಯಾದ್ರಿ ಇಂಜಿನಿಯರಿಂಗ್ ಕಾಲೇಜ್ ಡ್ ಕಲ್ಪಾರ್ಥಿಯಾದ್ ಜಿಮ್ ಟ್ರೈನರ್ ಆದ್ ಬೇಲೆ ಮಲ್ತೊಂದು ಉಲ್ಲೆರ್.
ಬೈಂದೂರು: ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಕೂಟದಕ್ಲೆರ್ದ್ ಶ್ರೀನಿವಾಸ ಕಲ್ಯಾಣೋತ್ಸವ ಆಟ ನೇತ್ರಾವತಿ ಬೊಕ್ಕ ದಿವಾಕರ ಶೆಟ್ಟಿ ನೆಲ್ಯಾಡಿ ಸ್ವಗೃಹದ ವಠಾರಡ್ ಡಿ.1 ಸುಕ್ರಾರ ಬಯ್ಯಗ್ 7 ಗಂಟೆಗ್ ನಡಪರೆ ಉಂಡು.
ದಿವಾಕರ ಶೆಟ್ಟಿ ನೆಲ್ಯಾಡಿ ಮೇರ್ ಪಾತೆರ್ದ್, ಯಕ್ಷಗಾನನ್ ಪ್ರೋತ್ಸಾಹ ಮಲ್ಪುನ ಉದ್ದೇಶರ್ದ್ ಪ್ರತಿ ವರ್ಷಲ ಒಂಜೊಂಜಿ ಯಕ್ಷಗಾನನ್ ಆಯೋಜನೆ ಮಲ್ತೊಂದು ಬೈದ. ಅಂಚೆನೆ ಈ ವರ್ಷಲ ಸ್ವಗೃಹಡ್ ಬಯ್ಯಗ್ ನಡಪುನ ಸತ್ಯನಾರಾಯಣ ಪೂಜೆ ರಾತ್ರೆ ನಡಪುನ ನುಪ್ಪು ಪ್ರಸಾದ ಸೇವೆ ಬೊಕ್ಕ ಯಕ್ಷಗಾನ ಬಯಲಾಟಗ್ ಮಾತೆರ್ಲಾ ಬರೊಡು ಪಂದ್ ಪಂಡೆರ್.
ಈ ಪೊರ್ತುಡು ಕುಟುಂಬಸ್ಥೆರ್, ಆಟದ ಅಭಿಮಾನಿಲು, ಊರುದ ಗ್ರಾಮಸ್ಥೆರ್ ಪಾಲ್ ಪಡೆಯೆರೆ ಉಲ್ಲೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಒಟ್ಟುಸೇರಿಗೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 35ನೇ ಸಂಚಿಕೆ ನ.28 ಕ್ಕ್ ಅಂಗಾರೆ ಬಯ್ಯಗ್ 5.30ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರೆ ಉಲ್ಲೆರ್. ನ.29 ಕ್ಕ್ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
