ಬೆಂಗ್ಲೂರು: ರಾಜ್ಯದ ಸುಮಾರ್ ಕಡೆಟ್ ನವೆಂಬರ್ 4-8 ಮುಟ್ಟ ಭಾರಿ ಬರ್ಸ ಬರ್ಪಿನ ಅಂದಾಜಿ ಉಂಡು ಪಂದ್ ಭಾರತೀಯ ಹವಾಮಾನ ಇಲಾಖೆ ಮುನ್ಸೂಚನೆ ಕೊರ್ತುಂಡು.
ಮುಂಜಾಗ್ರತೆ ಕ್ರಮವಾದ್ ದಕ್ಷಿಣ ಒಳನಾಡ್ ದ ಶಿವಮೊಗ್ಗ, ಮಂಡ್ಯ, ಕೊಡಗು, ಹಾಸನ, ಚಿಕ್ಕಮಗಳೂರು ಜಿಲ್ಲೆಡ್ ಯೆಲ್ಲೋ ಅಲರ್ಟ್ ಘೋಷಣೆ ಮಲ್ದ್ಂಡ್.
ಚಾಮರಾಜನಗರ, ಕೋಲಾರ, ಮೈಸೂರು, ತುಮಕೂರು, ದಕ್ಷಿಣ ಕನ್ನಡ, ಒಡಿಪು, ಉತ್ತರ ಕನ್ನಡ, ಧಾರವಾಡ, ಹಾವೇರಿ, ಬೆಂಗಳೂರು ಗ್ರಾಮಾಂತರ, ಬೆಂಗಳೂರು ನಗರ ಜಿಲ್ಲೆಡ್ ಸಾಧಾರಣ ಬರ್ಸ ಬರ್ಪಿನ ನಿರೀಕ್ಷೆ ಉಂಡು.
ದೇವದುರ್ಗ: ಕುಲಾಲ ಸಂಘ ಬೊಂಬೈದ ಮುಖವಾಣಿ ಅಮೂಲ್ಯ ಸಾಹಿತ್ಯ ಪಂತೊ 2023ನೇ ಸಾಲ್ ಡ್ ತಾಲೂಕ್ ದ ಯುವ ಸಾಹಿತಿಲು, ಬರವುಗಾರೆ ಶಂಕರ್ ರಾವ್ ಉಭಾಳೆ ಮೆರೆನ ಆನೆ ಬಂದ ದಿನ ಪನ್ಪುನ ಕಥೆ ಸುರುತ್ತ ತಾನ ಪಡೆತ್ಂಡ್.
ಮಹಾರಾಷ್ಟ್ರದ ಬೊಂಬೈಡ್ ನವೆಂಬರ್ 5 ಕ್ಕ್ ಗೋರೆಗಾಂವ್ ಪೂರ್ವಡ್ ನಂದಾದೀಪ ಹೈಸ್ಕೂಲ್ ಸಭಾಗೃಹಡ್ ನಡಪುನ ಲೇಸ್ ಡ್ ಮೆರೆನ ಬೂಕು ಕಥೆ ಸುರುತ್ತ ತಾನ ಪಡೆಯಿರ್ನೆದಾವೆರ ಮೆರೆಗ್ ಪ್ರಶಸ್ತಿ ಕೊರ್ದು ಗೌರವಿಸಾಯೆರೆ ಆಪುಂಡು ಪಂದ್ ಸಂಸ್ಥೆದ ಸಂಪಾದಕೆರ್ ಶಂಕರ್ ವೈ. ಮೂಲ್ಯ ತೆರಿಪಾಯೆರ್.
ಮೇರ್ ಕಲ್ಯಾಣ ಕರ್ನಾಟಕದ ರಾಯಚೂರು ಜಿಲ್ಲೆದ ದೇವದುರ್ಗ ಹಿಂದುಳಿದ ತಾಲೂಕ್ ದಾರ್ ಆತೆರ್. ಮೆರೆನ ಬೂಕು ಪ್ರಶಸ್ತಿ ಪಡೆಯಿನವು ಜಿಲ್ಲೆಗ್ ಬೊಕ್ಕ ಕಲ್ಯಾಣ ಕರ್ನಾಟಕ ಭಾಗದ ಕನ್ನಡ ಹೃದಯಗ್ ತಿಕಿನ ಕೀರ್ತಿ ಪಂದ್ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ ದ ಗುರ್ಕಾರೆ ರಂಗಣ್ಣ ಪಾಟೀಲ್ ಅಳ್ಳುಂಡಿ, ಕಸಾಪ ಗುರ್ಕಾರೆ ಹೆಚ್ ಶಿವರಾಜ, ಮಾಜಿ ಗುರ್ಕಾರೆ ನರಸಿಂಗರಾವ್ ಸರ್ಕೀಲ್, ಮೈನುದ್ದೀನ್ ಕಾಟಮಳ್ಳಿ, ಬಸವರಾಜ ಬ್ಯಾಗವಾಟ್, ಮಾಧವರಾವ ಉಭಾಳೆ ಬೊಕ್ಕ ಸಮಾಜದ ಮುಖಂಡೆರ್ ಸೇರಿನಂಚೆನೆ ಬೇತೆ ಬೇತೆ ಸಂಘಟನೆದ ಗುರ್ಕಾರೆ ಅಭಿನಂದನೆ ತೆರಿಪಾದೆರ್.
ತುಳುವೆರೆಂಕುಲು ಬೆಂಗ್ಲೂರ್ (ರಿ.) ದ ಮುತಾಲಿಕೆಡ್ ಬಲಿಯೇಂದ್ರ ಪರ್ಬ ಆಚರಣೆ ನ.19 ಐತಾರ ಬೆಂಗ್ಲೂರ್ ರವೀಂದ್ರ ಕಲಾಕ್ಷೇತ್ರಡ್ ನಡಪರೆ ಉಂಡು.
ಬೊಕ್ಕ ಶ್ರೀ ಆದಿ ಧೂಮಾವತಿ ಶ್ರೀ ದೇಯಿಬೈದೆತಿ ಕೃಪಾಪೋಷಿತ ಯಕ್ಷಗಾನ ಮಂಡಳಿ ಗೆಜ್ಜೆಗಿರಿ ಮೇಳದಕ್ಲೆರ್ದ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ನಡಪರೆ ಉಂಡು ಪಂದ್ ಗುರ್ಕಾರ್ದಿ ಜಲಜ, ಪ್ರಧಾನ ಕಾರ್ಯದರ್ಶಿ ಮಟ್ಟಿ ರಾಮಚಂದ್ರರಾವ್, ಖಜಾಂಚಿ ಗೋಪಾಲ ಪೂಜಾರಿ ಪಟ್ಟೆ ಬೊಕ್ಕ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ದೇಶಡ್ ದಿನರ್ದ್ ದಿನೊ ಆಕ್ಸಿಡೆಂಟ್ ಸಂಖ್ಯೆ ಎಚ್ಚಾವೊಂದೇ ಉಂಡು. ಮಾರ್ಗ ಆಕ್ಸಿಡೆಂಟ್ ಡ್ ಸೈತಿನಕ್ಲೆನ ಸಂಖ್ಯೆಡ್ ಬೆಂಗ್ಲೂರ್ ದೇಶಡೇ 2ನೇ ತಾನಡ್ ಉಂಡು.
ಕೇಂದ್ರ ರಸ್ತೆ ಸಾರಿಗೆ ಬೊಕ್ಕ ಹೆದ್ದಾರಿ ಸಚಿವಾಲಯ ಬುಡುಗಡೆ ಮಲ್ತಿನ ವರದಿಡ್ ಈ ಆಕ್ಸಿಡೆಂಟ್ ಇಚಾರ ಉಲ್ಲೇಖ ಆತ್ಂಡ್. 2022ನೇ ಸಾಲ್ ದ ವರದಿ ಉಂದಾತ್ಂಡ್. ಕರಿನ ವರ್ಷ 3822 ಆಕ್ಸಿಡೆಂಟ್ ಆತ್ಂಡ್. 772 ಜನ ತೀರ್ ಪೋಯೆರ್. ಒಟ್ಟು 3189 ಜನಕ್ಕ್ ಪೆಟ್ಟಾತ್ಂಡ್. ಡೆಲ್ಲಿಡ್ 1500 ಜನ ಹುಷಾರ್ ಇಜ್ಜಂದೆ ಆತೆರ್.
ಮಾಟುಂಗಾ (ಪೂರ್ವ) ದ ಬೊಂಬೈ ಕನ್ನಡ ಸಂಘದ ಮುತಾಲಿಕೆಡ್ ಪ್ರತಿ ವರ್ಷಲ ಜೋಕುಲೆನ ದಿನಾಚರಣೆದ ಪೊರ್ತುಡು ಲೇಖನಿ ಸಾಮಗ್ರಿ ದೆತೊನಿಯೆರೆ ಬೊಂಬೈದ ಕನ್ನಡ ಮಾಧ್ಯಮದ ಒಂಜಿ ಶಾಲೆಗ್ ಪನವುದ ಸಕಾಯನ್ ಕೊರೊಂದು ಉಂಡು.
ಈ ವರ್ಷದ ಲೆಕ್ಕೊಡು ಆಂಧೇರಿದ ನಿತ್ಯಾನಂದ ಮಾರ್ಗ ಹಿರಿಯ ಮಾಧ್ಯಮಿಕ ಮುನಿಸಿಪಲ್ ಕನ್ನಡ ಶಾಲೆನ್ ಆಯ್ಕೆ ಮಲ್ದ್ಂಡ್. ಬೊಂಬೈ ಕನ್ನಡ ಸಂಘದ ಕಾರ್ಯದರ್ಶಿ ಸೋಮನಾಥ ಎಸ್.ಕರ್ಕೇರ ಬೊಕ್ಕ ಜತೆ ಕಾರ್ಯದರ್ಶಿ ಮಲ್ಲಿಕಾರ್ಜುನ ಬಡಿಗೇರೆರ್ ಪನವುದ ಸಕಾಯನ್ ಶಾಲೆದ ಶಿಕ್ಷಕೆರ್ ಸಂಜಯ ಮಾಸ್ಯಾಳ ಬೊಕ್ಕ ರಮೇಶ ದೂದಗಿ ಮೆರೆಗ್ ಕೊರಿಯೆರ್.
ಈ ಪೊರ್ತುಡು ಶಾಲೆದ ಪ್ರತಿಭಾವಂತ ವಿದ್ಯಾರ್ಥಿನಿ ಚಂದ್ರಕಲಾ ಚವ್ಹಾನ್ರೆಗ್ ಸೋಮನಾಥ ಎಸ್ ಕರ್ಕೇರ ಬೊಕ್ಕ ಪ್ರತಿಭಾವಂತ ವಿದ್ಯಾರ್ಥಿ ಸಿದ್ಧಾರ್ಥ ಕುಂಬಾರ ಮೊಕ್ಲೆಗ್ ಸಂಘದ ಕೋಶಾಧಿಕಾರಿ ರಾಜೇಂದ್ರ ಗಡಿಯಾರ ಮೆರೆನ ಮುತಾಲಿಕೆಡ್ ವಿಶೇಷ ನಗದು ಪನವುದ ಸಕಾಯನ್ ಕೊರಿಯೆರ್.
ಕುಡ್ಲದ ಮಂಗಳಾ ದೇವಿದ ಶಾಂತ ದುರ್ಗಾ ಸ್ವಸಹಾಯ ಸಂಘದ ಮುತಾಲಿಕೆಡ್ ಸಸ್ಯ ಮೇಳ, ವಸ್ತು ಪ್ರದರ್ಶನ ಬೊಕ್ಕ ಮಾರಾಟ ಮೇಳ “ಕದ್ರಿ ಪಾರ್ಕ್ ಡ್ ಪರ್ಬದ ಮೇಳ” ಸಂಭ್ರಮ ನ.3ರ್ದ್ ನ. 5 ಮುಟ್ಟ ಪ್ರತಿ ದಿನ ಕಾಂಡೆ 9 ಗಂಟೆರ್ದ್ ರಾತ್ರೆ 9 ಗಂಟೆ ಮುಟ್ಟ ನಡಪರೆ ಉಂಡು. ನ.3 ಬಯ್ಯ 5 ಗಂಟೆಗ್ ಉದಿಪನ ಲೇಸ್ ನಡಪರೆ ಉಂಡು.
ಈ ಕಾರ್ಯಕ್ರಮಡ್ ಶಾಸಕೆರ್ ವೇದವ್ಯಾಸ್ ಕಾಮತ್ , ಮಹಾನಗರ ಪಾಲಿಕೆದ ಸದಸ್ಯೆರ್ ಶಕೀಲಾ ಕಾವ, ಕುಡ್ಲ ತೋಟಗಾರಿಕಾ ಇಲಾಖೆದ ಉಪನಿರ್ದೇಶಕೆರ್ ಹೆಚ್ ಆರ್ ನಾಯ್ಕ್, ACP ಟ್ರಾಫಿಕ್ ಪೊಲೀಸ್ ಗೀತಾ ಕುಲಕರ್ಣಿ, ಕುಡ್ಲ ದಕ ಜಿಲ್ಲಾ ಸಣ್ಣ ಕೈಗಾರಿಕಾ ಅಶೋಸಿಯೇಷನ್ದ ಅಧ್ಯಕ್ಷೆರ್ ವಿಶಾಲ್ ಎಲ್ ಸಾಲಿಯಾನ್, ಪಾಲ್ ಪಡೆಯೆರೆ ಉಲ್ಲೆರ್. ನ. 5 ದಾನಿ ಬಯ್ಯಗ್ 5 ಗಂಟೆಗ್ ಕಲಾ ತಪಸ್ವಿ ಸಾಂಸ್ಕೃತಿಕ ತಂಡ ಧರ್ಮನಗರ ವಿಟ್ಲ ಮೊಕ್ಲೆರ್ದ್ ಅಮೋಘ ಮನೋರಂಜನಾ ಕಾರ್ಯಕ್ರಮ ನಡಪರೆ ಉಂಡು.
ಕಲ್ಮಂಜ: ದೇವರಗುಡ್ಡೆ ಹಾಲು ಉತ್ಪಾದಕರ ಸಹಕಾರ ಸಂಘ ನಿಯಮಿತ ನೆತ್ತ ಕಾರ್ಯಾರಂಭ ನ.1 ಬುಧವಾರ ನಡತ್ಂಡ್.
ಈ ಮುಖೇನ ದೇವರಗುಡ್ಡೆ ಭಾಗದ ಜನಕ್ಲೆನ ಬಾರಿ ವರ್ಷದ ಕನ ನಿಜ ಆಂಡ್. ಸಂಘದ ಅಧ್ಯಕ್ಷೆರ್ ರಮೇಶ್ ಗೌಡ ಗುಲ್ಲೋಡಿ ಪೇರ್ ಶೇಖರಣೆ ಮಲ್ಪುನ ಮುಖೆನ ಕಾರ್ಯಾರಂಭ ಮಲ್ತೆರ್.
ಉಪಾಧ್ಯಕ್ಷೆರ್ ಸೂರ್ಯನಾರಾಯಣ ಹೊಳ್ಳ ಬೊಕ್ಕ ದ.ಕ.ಹಾಲು ಒಕ್ಕೂಟದ ಉಪ ವ್ಯವಸ್ಥಾಪಕೆರ್ ಸತೀಶ್ ರಾವ್ ಸದಸ್ಯೆರೆಗ್ ಷೇರು ಪ್ರಮಾಣ ಪತ್ರ ಪಟ್ಟಿಯೆರ್.
ಈ ಪೊರ್ತುಡು ಒಕ್ಕೂಟದ ವಿಸ್ತರಣಾಧಿಕಾರಿ ಯಮುನಾ, ಸಂಘದ ಮುಖ್ಯಕಾರ್ಯನಿರ್ವಹಣಾಧಿಕಾರಿ ಸಚಿನ್ ಗೌಡ ಕಲ್ಮಂಜ ಬೊಕ್ಕ ನಿರ್ದೇಶಕೆರ್ ಶಿವಪ್ರಸಾದ್, ರಾಧಾಕೃಷ್ಣ ಗೌಡ, ಮಂಜುನಾಥ್ ಗುಡಿಗಾರ್, ಗೀತಾ ನಾಯ್ಕ, ಪುಷ್ಪಾವತಿ, ಶ್ರೀನಿವಾಸ ಗೌಡ, ಗಂಗಾಧರ ಗೌಡ, ದೇಜಪ್ಪ ಪೂಜಾರಿ, ರಾಘವೇಂದ್ರ ವಿಷ್ಣು ನಾಯ್ಕ್ ಬೊಕ್ಕ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ವಿಮಲ, ಗಣ್ಯೆರಾಯಿನ ಪೃಥ್ವಿಶ್ ಧರ್ಮಸ್ಥಳ, ಕೃಷ್ಣಪ್ಪ ಗುಡಿಗಾರ್, ತುಕಾರಾಮ ಸಾಲಿಯಾನ್, ಸುಂದರ ಗೌಡ ಬೊಕ್ಕ ಸಂಘದ ಸದಸ್ಯೆರ್, ಊರುದಕುಲ್ ಇತ್ತೆರ್.
ಕಾರ್ಲ: ಇತ್ತೆದ ಪುಗರ್ತೆದ ಕಲಾವಿದೆರೆನೊಟ್ಟಿಗೆ ಒಂಜಿ ದಿನ ಕಳೆವೊನೇ ಕಷ್ಟ ಪನ್ಪುನ ಪರಿಸ್ಥಿತಿ ಇತ್ತ್ಂಡ್. ಯಕ್ಷಗಾನ ಕ್ಷೇತ್ರಡ್ 23 ವರ್ಷೊದಿಂಚ ಸೇವೆ ಸಂದಾವೊಂದು ಉಲ್ಲೆ. ಕಲಾವಿದೆರೆನ ಕಷ್ಟನ್ ಮಸ್ತ್ ಕೈತಲ್ ರ್ದ್ ತೂಯಿನಾಯೆ ಯಾನ್. ಕಲಾವಿದೆರೆಗ್ ಪನವುದ ಸಕಾಯ ಕೊರ್ಪುನ ದಿಟ್ಟಿಡ್ ಪಟ್ಲ ಫೌಂಡೇಶನ್ ಟ್ರಸ್ಟ್ ಸುರು ಆಂಡ್. ಟ್ರಸ್ಟ್ದ ಕಾರ್ಯವೈಖರಿಡ್ ಯಾನ್ ಕೇವಲ ನಿಮಿತ್ತ, ಮಾತಲ ಕಟೀಲ್ ಅಮ್ಮನ ಕೃಪೆ. ಹೃದಯ ಶ್ರೀಮಂತ ದಾನಿಲೆರ್ದ್ ನಮ್ಮ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಕಲಾಸೇವೆಡ್ ದುಂಬಾರಿವೊಂದು ಉಂಡು ಪಂದ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ದ ಸ್ಥಾಪಕಾಧ್ಯಕ್ಷೆರ್ ಸತೀಶ್ ಶೆಟ್ಟಿ ಪಟ್ಲ ಪಂಡೆರ್.
ಮೇರ್ ನ.2 ಕ್ಕ್ ಗೋವಾ ಪಣಜಿ ಇನ್ಸಿಟ್ಯೂಟ್ ಮೆನೆಜಸ್ ಬ್ರಗಾನ್ಸಾ ಸಭಾಗೃಹಡ್ ನಡತಿನ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಗೋವಾ ಘಟಕದ ಉದಿಪನ ಲೇಸ್ ಡ್ ಪಾತೆರಿಯೆರ್.
ಲೇಸ್ ದ ಉದಿಪನ ಮಲ್ತಿನ ಬೈಂದೂರು ವಿಧಾನ ಸಭಾ ಕ್ಷೇತ್ರದ ಶಾಸಕೆರ್ ಗುರುರಾಜ್ ಗಂಟಿಹೊಳೆ ಪಾತೆರ್ದ್, ಯಕ್ಷಗಾನ ನಮ್ಮ ಕರಾವಳಿಗ್ ದೇವೆರ್ ಕೊರ್ನ ಕಾಣಿಕೆ. ಯಕ್ಷಗಾನ ಸಂಸ್ಕಾರನ್ ಕಲ್ಪಾವೊಂಡು. ಉಂದು ಎಡ್ಡೆ- ಆಳ್ ದ ಬಗೆಟ್ಟ್ ಜನಕ್ಲೆಗ್ ತೆರಿಪಾವೊಂಡು. ಯಕ್ಷಗಾನ ಸಾಂಸ್ಕೃತಿಕವಾದ್, ಸಾಮಾಜಿಕವಾದ್ ಘನತೆನ್ ಎಚ್ಚ ಮಲ್ಪೊಂಡು ಪನ್ಪುನೆಕ್ಕ್ ಪಟ್ಲ ಫೌಂಡೇಶನ್ ದ ಲೇಸ್ ಲೇ ಸಾಕ್ಷಿ ಪಂದ್ ಪಂಡೆರ್.
ಕಂಬುಲ ಕ್ಷೇತ್ರದ ಸಾಧನೆಗಾದ್ ಸದಾನಂದ ಶೆಟ್ಟಿ ಬೆಳುವಾಯಿ ಬೊಕ್ಕ ಅಶೋಕ್ ಶೆಟ್ಟಿ ಬೇಲಾಡಿ, ಕ್ರೀಡಾ ಕ್ಷೇತ್ರದ ಸಾಧನೆಗಾದ್ ಜಯ ಶೆಟ್ಟಿ ಗೋವಾ, ಯಕ್ಷಗಾನ ಭಾಗವತೆರ್ ಸದಾಶಿವ ಅಮಿನ್ ಕೊಕ್ಕರ್ಣೆ, ಯಕ್ಷಗಾನ ಕಲಾವಿದೆರ್ ಸತೀಶ್ ಮೊಗವೀರ ಹಾಲಾಡಿ, ವಿಶ್ವನಾಥ ಪೂಜಾರಿ ಎಣ್ಣೆಬೈಲು, ರಾಕೇಶ್ ಶೆಟ್ಟಿ ಮೇಘರವಳ್ಳಿ, ನವೀನ್ ಶಾನುಭೋಗ್, ಒಡಿಪು ಜಿಲ್ಲಾ ಪ್ರಶಸ್ತಿ ಪುರಸ್ಕೃತೆರ್ ಉಪ್ಪುಂದ ನಾಗೇಂದ್ರ ರಾವ್, ಸತೀಶ್ ಶೆಟ್ಟಿ ಪಟ್ಲ ಬೊಕ್ಕ ಶಶಿಧರ್ ಶೆಟ್ಟಿ ಬರೋಡಾ ಮೊಕ್ಲೆಗ್ ಸನ್ಮಾನ ಮಲ್ತೆರ್.
ದೇಣಿಗೆ ಕೊರ್ಪುನ ಗೋವಾ ಘಟಕರ್ದ್ ಪಟ್ಲ ಫೌಂಡೇಶನ್ದ ಕೇಂದ್ರ ಘಟಕಗ್ 1 ಲಕ್ಷ ರೂ. ದೇಣಿಗೆನ್ ಪಟ್ಟಿಯೆರ್. ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ದ ಗೋವಾ ಘಟಕದ ಮಾನಾದಿಗೆದ ಗುರ್ಕಾರೆ ವಿಜಯೇಂದ್ರ ಶೆಟ್ಟಿ ದಂಪತಿನ್ ಬೊಕ್ಕ ಗುರ್ಕಾರೆ ಗಣೇಶ್ ಶೆಟ್ಟಿ ಇರ್ವತ್ತೂರು ದಂಪತಿಗ್ ಅಭಿನಂದನೆ ಮಲ್ತೆರ್.
ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ದ ಪ್ರಧಾನ ಸಂಚಾಲಕೆರ್, ತುಳುಕೂಟ ಬರೋಡದ ಗುರ್ಕಾರೆ ಶಶಿಧರ್ ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್. ಈ ಪೊರ್ತುಡು ಕುಡ್ಲ ಘಟಕದ ಗುರ್ಕಾರೆ ತಾರನಾಥ ಶೆಟ್ಟಿ, ಗುಜರಾತ್ ಘಟಕದ ಅಜಿತ್ ಶೆಟ್ಟಿ, ಗೋವಾ ಬಂಟರ ಸಂಘದ ಗುರ್ಕಾರೆ ಶಶಿಧರ್ ನಾಯಕ್, ಬಿಲ್ಲವ ಸಂಘದ ಗುರ್ಕಾರೆ ನಾಗೇಶ್ ಪೂಜಾರಿ, ಆರ್ಎಸ್ಎಸ್ ಗೋವಾ ವಿಭಾಗದ ಸಂಘ ಸಂಚಾಲಕೆರ್ ಸಿಎ ರಾಜೇಂದ್ರ ಬೊಬೈ, ನಾರಾಯಣಗುರು ಸೇವಾ ಟ್ರಸ್ಟ್ ಗುರ್ಕಾರೆ ಪ್ರಕಾಶ್ ಪೂಜಾರಿ, ಕೋಶಾಧಿಕಾರಿ ಸುದೇಶ್ ಕುಮಾರ್ ರೈ, ಸಂಘಟನಾ ಕಾರ್ಯದರ್ಶಿ ಕದ್ರಿ ನವನೀತ ಶೆಟ್ಟಿ, ಜತೆ ಕಾರ್ಯದರ್ಶಿ ರವಿಚಂದ್ರ ಶೆಟ್ಟಿ, ಸಂಘಟನಾ ಕಾರ್ಯದರ್ಶಿ ಜಗನ್ನಾಥ ಶೆಟ್ಟಿ, ಪ್ರದೀಪ್ ಆಳ್ವ, ಪ್ರಸನ್ನ ಶೆಟ್ಟಿ ಬೈಲೂರು, ಪಳ್ಳಿ ಘಟಕದ ಗುರ್ಕಾರೆ ಸುನಿಲ್ ಶೆಟ್ಟಿ, ರಾಜೇಶ್ ಶೆಟ್ಟಿ, ಕರ್ನೂರು ಸುಭಾಷ್ ರೈ, ಗೋವಾ ಘಟಕದ ಕಾರ್ಯದರ್ಶಿ ಸುನಿಲ್, ಖಜಾಂಚಿ ಮೋಹನ್ದಾಸ್ ಶೆಟ್ಟಿ, ಸಂಚಾಲಕೆರ್ ಅಶೋಕ್ ಶೆಟ್ಟಿ ಪಾಲ್ ಪಡೆದಿತ್ತೆರ್.
ಆನಂದ್ ಶೆಟ್ಟಿ ಬೊಕ್ಕ ಕೂಟದಕುಲು ಪ್ರಾರ್ತನೆ ಮಲ್ತೆರ್. ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ದ ಗೋವಾ ಘಟಕದ ಗುರ್ಕಾರೆ ಗಣೇಶ್ ಶೆಟ್ಟಿ ಇರ್ವತ್ತೂರು ಎದ್ಕೊಂಡೆರ್. ಕುಡ್ಲ ಯಕ್ಷಧ್ರುವ ಪಟ್ಲ ಫೌಂಡೇಶನ್ದ ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮ ಕೆ. ಭಂಡಾರಿ ಪ್ರಾಸ್ತಾವಿಕವಾದ್ ಪಾತೆರಿಯೆರ್. ನಿತೇಶ್ ಶೆಟ್ಟಿ ಎಕ್ಕಾರು ಲೇಸ್ ದ ಸುಧಾರಿಕೆ ಮಲ್ತ್ ದ್, ಸೊಲ್ಮೆ ಸಂದಾಯೆರ್.
ಕುಡ್ಲ : ತನ್ನ ಲವರ್ ಔಟಿಂಗ್ ಬತ್ತಿಜಲ್ ಪಂದ್ ಆಲ್ ಬೇಲೆ ಮಲ್ತೊಂದು ಇತ್ತಿನ ಕಟ್ವಾನಗ್ ಜವನೆ ಒರಿ ಕಲ್ಲ್ ದಕ್ಕಿನ ಘಟನೆ ಕುಡ್ಲದ ಸೆಂಟ್ ಆಗ್ನೇಸ್ ಕಾಲೇಜ್ದಲ್ಪ ನಡತ್ಂಡ್. ಸುಳ್ಯ ನಿವಾಸಿ ವಿವೇಕ್ (18) ಪನ್ಪಿನಾಯೆ ಪೀಜಿಡ್ ಬೇಲೆ ಮಲ್ತೊಂದು ಇತ್ತೆ. ಲವ್ವರ್ನ್ ಕೋಡೆ (ನವೆಂಬರ್ 2) ಬಯ್ಯಗ್ ಔಟಿಂಗ್ ಬರಿಯೆರೆ ಪಂದ್ ಇತ್ತೆ.
ಆಂಡ ಪೊಣ್ಣು ಔಟಿಂಗ್ ಬರಿಯೆರೆ ಒಪ್ಪ್ಯಂದಿನೆಕ್ಕ್ ಕೋಪಡ್ ವಿವೇಕ್, ಆಲ್ ಇತ್ತಿನ ಪೀಜಿಗ್ ಕಲ್ಲ್ ದಕ್ಕ್ದೆ. ಘಟನೆಡ್ ಗ್ಲಾಸ್ ಪೊಡಿ ಆದ್, ಸಾರ್ವಜನಿಕೆರ್ನ ಕೈರ್ದ್ ದರ್ಮೊದ ಪೆಟ್ಟ್ ತಿಂತೆ.
ಬೊಂಬೈ: ಪೋರ್ಟ್ ಪರಿಸರಡ್ 1920 ಟ್ಟ್ ಸ್ಥಾಪನೆ ಆಯಿನ ವಿದ್ಯಾದಾಯಿನಿ ಸಭಾದ ಶತಮಾನೋತ್ಸವ ಗೌಜಿ ಅ.29 ಐತಾರ ಸಾಂತಕ್ರೂಸ್ ಪೂರ್ವದ ಬಿಲ್ಲವ ಭವನದ ಸಭಾಗೃಹದ ನಿರ್ಮಿತ ಸೂರು ಸಿ. ಕರ್ಕೇರ ಚಾವಡಿಡ್ ನಡತ್ಂಡ್.
ಈ ಲೇಸ್ ವಿದ್ಯಾದಾಯಿನಿ ಸಭಾ (ರಿ.) ದ ಗುರ್ಕಾರೆ ಪುರುಷೋತ್ತಮ ಎಸ್ ಕೋಟ್ಯಾನ್ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್. ವಿದ್ಯಾದಾಯಿನಿ ಸಭಾ ಸಂಚಾಲಿತ ಕೆನರಾ ವಿದ್ಯಾದಾಯಿನಿ ರಾತ್ರೆ ಶಾಲೆದ ಹಳೆ ವಿದ್ಯಾರ್ಥಿ, ಸಮಾಜ ಸೇವಕೆರ್, ಭರತ್ ಕೋಚ್ ಬಿಲ್ಡರ್ಸ್ ದ ಮುಖ್ಯ ಆಡಳಿತ ನಿರ್ದೇಶಕೆರ್ ಸದಾಶಿವ ಎಸ್ ಶೆಟ್ಟಿ ಪಿಂಗಾರ ಅರಲಾವುನ ಮುಖೇನ ಲೇಸ್ ದ ಉದಿಪನ ಮಲ್ತೆರ್. ಅಂತರಾಷ್ಟ್ರೀಯ ಖ್ಯಾತಿದ ಪುರೋಹಿತೆರ್, ಜ್ಯೋತಿಷ್ಯೆರ್, ವಾಸ್ತುತಜ್ಞೆರ್ ಅಶೋಕ್ ಪುರೋಹಿತ್, ಪೋರ್ಟ್ ಶ್ರೀ ಭುವನೇಶ್ವರಿ ಸೇವಾ ಸಮಿತಿದ ಧರ್ಮದರ್ಶಿಲು ರಾಜೇಶ್ ಭಟ್ ಆಶೀರ್ವಚನ ಕೊರಿಯೆರ್.
ಮಲ್ಲ ಬಿನ್ನೆರಾದ್ ಸಾಫಲ್ಯ ಸೇವಾ ಸಂಘದ ಗುರ್ಕಾರೆ ಶ್ರೀನಿವಾಸ್ ಸಾಫಲ್ಯ, ಭಾರತ್ ಬ್ಯಾಂಕ್ ದ ಮಾಜಿ ಕಾರ್ಯಾಧ್ಯಕ್ಷೆರ್ ಡಿ.ಬಿ ಅಮಿನ್, ಸಮಾಜ ಸೇವಕೆರ್ ಡಾ.ಸತೀಶ್ ಎನ್ ಬಂಗೇರ, ವೆಸ್ಟರ್ನ್ ಇಂಡಿಯಾ ಶನಿಮಹಾತ್ಮ ಸೇವಾ ಸಮಿತಿ ಪೋರ್ಟ್ ದ ಗುರ್ಕಾರೆ ರವಿ ಎಲ್ ಬಂಗೇರ, ಸುಮಂಗಳಾ ಮಿಷಿನರಿ ಭಿವಂಡಿದ ಆಡಳಿತ ನಿರ್ದೇಶಕೆರ್ ನಾರಾಯಣ್ ಆರ್ ಪೂಜಾರಿ, ಕನ್ನಡ ಜಾನಪದ ಪರಿಷತ್ತು ಬೆಂಗ್ಲೂರ್ ಮಹಾರಾಷ್ಟ್ರ ಘಟಕದ ಸಂಚಾಲಕೆರ್ ರಾಮಣ್ಣ ದೇವಾಡಿಗ, ಕೆನರಾ ವಿದ್ಯಾದಾಯಿನಿ ರಾತ್ರೆ ಶಾಲೆದ ಮುಖ್ಯೋಪಾಧ್ಯಾಯೆರ್ ಪ್ರಕಾಶ್ಚಂದ್ರ ಎಮ್ ಆರ್, ವಿದ್ಯಾದಾಯಿನಿ ಸಭಾದ ಮಾನಾದಿಗೆದ ಗುರ್ಕಾರೆ ಜೆ ಎಮ್ ಕೋಟ್ಯಾನ್, ಒತ್ತು ಗುರ್ಕಾರೆ ಆರ್ ಕೆ ಕೋಟ್ಯಾನ್, ಗೌರವ ಪ್ರಧಾನ ಕಾರ್ಯದರ್ಶಿ ಚಿತ್ರಾಪು ಕೆ ಎಮ್ ಕೋಟ್ಯಾನ್, ಶಾಲೆದ ಕಾರ್ಯಾಧ್ಯಕ್ಷೆರ್ ಡಾ. ಪ್ರಕಾಶ್ ಬೆದ್ರ, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ವಸಂತಿ ಆರ್ ಕೋಟ್ಯಾನ್, ಸೇವಾ ದಳತ್ತ ಜಿಒಸಿ ಸುರೇಶ್ ಎಮ್ ಪೂಜಾರಿ ಪಾಲ್ ಪಡೆದಿತ್ತೆರ್.
ಬತ್ತಿ ಬಿನ್ನೆರೆನ್ ಸಭಾದ ಗುರ್ಕಾರೆ ಪುರುಷೋತ್ತಮ ಎಸ್ ಕೋಟ್ಯಾನ್ ಸಾಲ್ ಪುದೆಪಾದ್, ಪೂಗುಚ್ಚ, ಸ್ಮರಣಿಕೆ ಕೊರ್ದು ಮಾನಾದಿಗೆ ಮಲ್ತೆರ್. ಹರಿಣಾಕ್ಷಿ ನಿಲೇಶ್ ಪೂಜಾರಿ ಬೊಕ್ಕ ಸಚ್ಚೀಂದ್ರ ಅಂಬಾಗಿಲು ಲೇಸ್ ದ ಸುಧಾರಿಕೆ ಮಲ್ತೆರ್. ಸಭಾದ ಜತೆ ಕಾರ್ಯದರ್ಶಿ ಉಮೇಶ್ ಕೆ ಅಂಚನ್, ಹರೀಶ್ ಶಾಂತಿ ಹೆಜಮಾಡಿ, ಗೌರವ ಕೋಶಾಧಿಕಾರಿ ಶರತ್ ಜಿ ಪೂಜಾರಿ, ಶತಮಾನೋತ್ಸವ ಸಮಿತಿದ ಗೌರವ ಕಾರ್ಯದರ್ಶಿ ಜೆ.ಜೆ ಕೋಟ್ಯಾನ್ ಸಹಕಾರ ಕೊರಿಯೆರ್.
ಉದಿಪನ ಲೇಸ್ ದ ಬೊಕ್ಕ ಸ್ವಾಗತ ನೃತ್ಯ, ಡೆನ್ನಾ-ಡೆನ್ನಾನ ಜಾನಪದ ನೃತ್ಯ ಪಂತೊ, ವಿಠ್ಠಲ್ ನಾಯಕ್ ಕಲ್ಲಡ್ಕ ಮೆರೆರ್ದ್ ವಿನೂತನ ಶೈಲಿದ ಗೀತಾ ಸಾಹಿತ್ಯ ಸಂಭ್ರಮ, ಜೈ ತುಳುನಾಡ್ ಸ್ವರ ಮಾಧುರ್ಯ, ಪುಣೆ ಫ್ರೆಂಡ್ಸ್ ಮೊಕ್ಲೆರ್ದ್ ತಾದಿ ತತ್ತ್ಂಡ ತುಳು ನಾಟಕ ಪ್ರದರ್ಶನ ಆಂಡ್. ಬೊಕ್ಕ ಸಾಧಕೆರೆಗ್ ಪ್ರಶಸ್ತಿ ಪಟ್ಟುನ ಲೇಸ್ ನಡತ್ಂಡ್. ಲೇಸ್ ದ ದ್ವಾರನ್ ನರ್ಸಪ್ಪ ಸಿ ಸಾಲ್ಯಾನ್ (ಪೋರ್ಟ್ ಸೆಂಟ್ರಲ್) ಬೊಕ್ಕ ಜಯ ಪೂಜಾರಿ (ಹೋಟೆಲ್ ಗೋಕುಲ್) ನೆಂಪುಗಾದ್ ನಿರ್ಮಾಣ ಮಲ್ದೆರ್.
