ಬೊಲ್ತೇರ್: ಪತ್ತೊಂಜಿ ವರ್ಷೊದ ಪಿರವು ಕೊಲೆ ಆಯಿನ ಬೊಲ್ತೇರ್ ತಾಲೂಕ್ ದ ಧರ್ಮಸ್ಥಳ ಗ್ರಾಮದ ಕಾಲೇಜ್ ಕಲ್ಪಾರ್ಥಿ ಸೌಜನ್ಯ ಕೇಸ್ ದ ಆರೋಪಿ ಸಂತೋಷ್ ರಾವ್ ನಿರ್ದೋಷಿ ಪಂದ್ ತೀರ್ಪು ಕೊರಿನ ಸುಮಾರ್ ತಿಂಗೊಲುರ್ದು ಬೊಕ್ಕ ನ.4 ಸನಿಯಾರ ಸಿಬಿಐ ತನಿಖಾಧಿಕಾರಿಲು ಹೈಕೋರ್ಟ್ ಗ್ ಮೇಲ್ಮನವಿ ಸಂದಾದೆರ್.
ನೆತ್ತ ಬಗೆಟ್ಟ್ ಕೆಲವೇ ದಿನಟ್ಟ್ ಹೈಕೋರ್ಟ್ ಕೇಸ್ ದಾಖಲ್ ಮಲ್ತಿನ ಬೊಕ್ಕ ದಾವೆದ CC ನ್ ಕೊರ್ತುಂಡು. ನನ ಕೇಸ್ ವಾ ರೀತಿಡ್ ಪೋಪುಂಡು ಪಂದ್ ನನ ಗೊತ್ತಾವೊಡಾತೆ.
ಕುಡ್ಲ ಪೇಂಟೆದ ಉರ್ವಸ್ಟೋರ್ ದ ಶ್ರೀ ಮಹಾಗಣಪತಿ ದೇವಲ್ಯಡ್ ಶ್ರೀ ದೇವೆರೆನ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯ ಫೆ.11-18 ಮುಟ್ಟ ನಡಪರೆ ಉಂಡು. ನೆತ್ತ ಲೆಪ್ಪೋಲೆ ಬುಡುಗಡೆ ಲೇಸ್ ಇಂಚಿಪ್ಪ ಕ್ಷೇತ್ರದ ಚಾವಡಿಡ್ ನಡತ್ಂಡ್.
ಶಾಸಕೆರ್ ಡಿ.ವೇದವ್ಯಾಸ ಕಾಮತ್ ಲೆಪ್ಪೋಲೆ ಬುಡುಗಡೆ ಮಲ್ತ್ ದ್, ಪಾತೆರ್ದ್, ಕ್ಷೇತ್ರದ ಜೀರ್ಣೋದ್ಧಾರ ಬ್ರಹ್ಮಕಲಶ ಉಚ್ಚಯದ ಕೆಲಸ ಕಾರ್ಯಲೆಗ್ ಮಾತೆರೆನ್ಲಾ ಸಹಕಾರ ಅಗತ್ಯ. ಬ್ರಹ್ಮಕಲಶ ಉಚ್ಚಯ ಲೇಸ್ ಗ್ ಸಂಬಂಧಪಟ್ಟಿನಂಚೆನೆ ಸರಕಾರದ ಮಟ್ಟಡ್ ತಿಕ್ಕೊಡಾಯಿನ ಸಕಾಯ-ಸಹಕಾರನ್ ದೆಪ್ಪಾದ್ ಕೊರ್ಪಿನ ಮತ ರೀತಿದ ಪ್ರಯತ್ನ ಮಲ್ಪುವೆ ಪಂದ್ ಪಂಡೆರ್.
ಕ್ಷೇತ್ರದ ತಂತ್ರಿ ಡಾ. ಶಿವಪ್ರಸಾದ್ ತಂತ್ರಿಲು ಕ್ಷೇತ್ರ ಬೊಕ್ಕ ಬ್ರಹ್ಮಕಲಶದ ಬಗೆಟ್ಟ್ ಪೊಲಬು ಕೊರಿಯೆರ್.
ಬಂಟರ ಯಾನೆ ನಾಡವರ ಮಾತೃ ಸಂಘದ ಗುರ್ಕಾರೆ ಅಜಿತ್ ಕುಮಾರ್ ರೈ ಮಾಲಾಡಿ ಪಾತೆರ್ದ್, ಬ್ರಹ್ಮ ಕಲಶ ಉಚ್ಚಯಗ್ ಸಹಕಾರದ ಭರವಸೆ ಕೊರಿಯೆರ್. ನೆತ್ತೊಟ್ಟಿಗೆ ಕ್ಷೇತ್ರದ ಭಕ್ತೆರ್, ದಾನಿಲು ಇಸೇಸ ಸಹಕಾರ ಕೊರೊಡು ಪಂದ್ ಬಿನ್ನಾಪು ಮಲ್ತೆರ್.
ಈ ಪೊರ್ತುಡು ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ಮಾಜಿ ಮೇಯರ್ ಎಂ. ಶಶಿಧರ ಹೆಗ್ಡೆ, ಮಹಾಗಣಪತಿ ಸೇವಾ ಸಮಿತಿ ಗುರ್ಕಾರೆ ಸುರೇಂದ್ರ ರಾವ್, ಬ್ಯಾಂಕ್ ಆಫ್ ಬರೋಡ ಮಹಾ ಪ್ರಬಂಧಕಿ ಗಾಯತ್ರಿ ಆರ್., ಎಕ್ಸಿಕ್ಯೂಟಿವ್ ಇಂಜಿನಿಯರ್ ವೇಣುಗೋಪಾಲ್, ಪ್ರಮುಖೆರಾಯಿನ ರಾಜಗೋಪಾಲ್ ರೈ, ಶ್ರೀಕಾಂತ್ ರಾವ್, ಸುರೇಶ್ ಆಳ್ವ ಮುಡಾರೆಗುತ್ತು, ಸಂತೋಷ್ ಕುಮಾರ್ ಶೆಟ್ಟಿ, ಪ್ರಿಯಾ ಹರೀಶ್, ರಾಜೇಶ್ ಶೆಟ್ಟಿ, ಕ್ಷೇತ್ರದ ಆಡಳಿತ ಸಮಿತಿ ಸದಸ್ಯೆರ್ ಪಾಲ್ ಪಡೆದಿತ್ತೆರ್. ಸಮಿತಿ ಕಾರ್ಯದರ್ಶಿ ಶ್ರೀಧರ್ ಎಂ. ಎದ್ಕೊಂದು, ಲೇಸ್ ಸುಧಾರಿಕೆ ಮಲ್ತೆರ್.
ಕುಡ್ಲ: ರಾಷ್ಟ್ರದ ಪ್ರಮುಖ ಗ್ರಾಮೀಣ ಬ್ಯಾಂಕ್ ಲೆನ ಸಾಲ್ ಡ್ ಇಪ್ಪುನ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದೊಟ್ಟಿಗೆ (ಕೆವಿಜಿಬಿ) ಜೀವ ವಿಮೆಗ್ ಸಂಬಂಧ ಪಟ್ಟಿನಂಚ ಒಡಂಬಡಿಕೆ ಮಲ್ತಿನ ಕೆನರಾ ಬ್ಯಾಂಕ್ ಪ್ರಾಯೋಜನೆದ ಕೆನರಾ ಎಚ್ಎಸ್ಬಿಸಿ ಜೀವ ವಿಮಾ ಕಂಪನಿ, ಪ್ರತಿಫಲನ್ ಖಾತರಿ ಮಲ್ಪುನ ಗ್ಯಾರಂಟೀಡ್ ಅಸ್ಯೂರ್ಡ್ ಇನ್ಕಮ್ (ಗೈನ್) ಪುದರ್ ದ ಪೊಸ ವಿಮಾ ಯೋಜನೆನ್ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದ ಗ್ರಾಹಕೆರೆಗಾದ್ ಬುಡುಗಡೆ ಮಲ್ದ್ಂಡ್.
ಈ ಯೋಜನೆನ್ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದ ಗುರ್ಕಾರೆ ಶ್ರೀಕಾಂತ ಎಮ್ ಭಂಡಿವಾಡ ಕುಡ್ಲಡ್ ಅಂಗಾರೆ ಬುಡುಗಡೆ ಮಲ್ತೆರ್. ಬೊಕ್ಕ ಮೇರ್ ಪಾತೆರ್ದ್, ಕೆನರಾ ಎಚ್ಎಸ್ಬಿಸಿ ಜೀವ ವಿಮಾ ಕಂಪನಿಗ್ ಕೆನರಾ ಬ್ಯಾಂಕ್ ಬೊಕ್ಕ ಎಚ್.ಎಸ್.ಬಿ.ಸಿ ಪಾಲುದಾರಿಕೆ ಉಂಡು. ಸುಮಾರ್ 120 ಮಿಲಿಯನ್ ಗ್ರಾಹಕೆರ್ ಇಪ್ಪುನ ಎಡ್ಡೆ ಜೀವ ವಿಮಾ ಕಂಪನಿಯಾದ್ ಉಂಡು. ರಾಷ್ಟ್ರಮಟ್ಟಡ್ ವಿಮಾ ನಿಯಂತ್ರಣ ಬೊಕ್ಕ ಅಭಿವೃದ್ಧಿ ಪ್ರಾಧಿಕಾರ (ಐ ಆರ್ ಡಿ ಏ) ರಾಷ್ಟ್ರಡ್ ಎಡ್ಡೆ ವಿಮಾ ಕಂಪನಿನ್ ಪ್ರೋತ್ಸಾಹ ಮಲ್ತೊಂದು ಉಂಡು. ನೆರ್ದ್ ಜನಸಾಮಾನ್ಯೆರೆಗ್ ವೈವಿಧ್ಯಮಯ ವಿಮಾ ಯೋಜನೆಲು ತಿಕ್ಕಡ್ ಪಂದ್ ಪಂಡೆರ್.
ದೇಶದ ಜನಸಂಖ್ಯೆಡ್ ಕೇವಲ 15 ಪ್ರತಿ ಶತದಾತ್ ಜನಕ್ಕ್ ಮಾತ್ರ ಸಂಪೂರ್ಣ ವಿಮಾ ಸುರಕ್ಷೆ ಉಂಡು. ಮಾತೆರೆನ್ ವಿಮಾ ಯೋಜನೆಗ್ ಸೇರ್ಸಾವುನ ಜಬದಾರಿ ಇಪ್ಪುನೆರ್ದಾವರ ಬ್ಯಾಂಕ್ ಲು ವಿಮಾ ವ್ಯವಹಾರಗ್ ದುಂಬಾತ್ಂಡ್. ವಿಮೆ ಪಂಡ ಸಾವುಗು ಮಾತ್ರ ಸಂಬಂಧ ಇಪ್ಪಂದೆ ಒಟ್ಟಾರೆ ಕುಟುಂಬಗ್ ಸುರಕ್ಷೆ ಕೊರ್ಪುನ ಉಳಿತಾಯ ಯೋಜನೆ ಆತ್ಂಡ್. ಈ ಯೋಜನೆ ಬ್ಯಾಂಕ್ ದ ಮಾತ 629 ಶಾಖೆಡ್ ತಿಕ್ಕುಂಡು. ಅತ್ತಂದೆ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಇತ್ತೆ 33150 ಕೋಟಿ ರೂ. ವೈವಾಟ್ ಮಲ್ತೊಂದು ಉಂಡು. 80 ಲಕ್ಷ ಗ್ರಾಹಕೆರೆಗ್ ವೈವಿಧ್ಯಮಯ ಬ್ಯಾಂಕಿಂಗ್ ಸೇವೆ ಕೊರೊಂದು ಉಂಡು ಪಂದ್ ಭಂಡಿವಾಡ ಪಂಡೆರ್.
ಕೆನರಾ ಎಚ್.ಎಸ್.ಬಿ.ಸಿ ಜೀವ ವಿಮಾ ನಿಗಮದ ಪ್ರಾದೇಶಿಕ ಮುಖ್ಯಸ್ಥೆರ್ ರಾಘವೇಂದ್ರ ಧಾರವಾಡ್ಕರ್ ಪಾತೆರ್ದ್, ವಿಮಾ ಯೋಜನೆಲು ದುಂಬುರ್ದ್ ಆಕರ್ಷಕ ಆತ್ಂಡ್. ವಿಮಾ ಕಂಪನಿಲು ಸುರಕ್ಷತೆದೊಟ್ಟಿಗೆ ಎಚ್ಚದ ಪ್ರತಿಫಲನ್ ಗ್ಯಾರಂಟಿ ಬಾಂಡ್ ದೊಟ್ಟಿಗೆ ಕೊರೊಂದು ಉಂಡು. ನೆರ್ದ್ ಜನಸಾಮಾನ್ಯೆರೆಗ್ ಬ್ಯಾಂಕ್ ನಿರ್ದಿಷ್ಟ ಠೇವಣಿದಲೆಕ್ಕ ನಿರ್ಧಾರ ಮಲ್ತಿನ ಅವಧಿದ ಬೊಕ್ಕ ಬಡ್ಡಿದೊಟ್ಟಿಗೆ ಪೂರ್ಣ ಮೊತ್ತ ಪಡೆಯೆರೆ ಅತ್ತಂಡ ಪೂರ್ಣ ಜೀವಿತಾವಧಿ ಮುಟ್ಟ ಪಿಂಚಣಿ ಪಡೆಯೆರೆ ಅನುಕೂಲ ಆತ್ಂಡ್ ಪಂದ್ ಪಂಡೆರ್.
ಈ ಪೊರ್ತುಡು ಬ್ಯಾಂಕ್ ದ ಪ್ರಾದೇಶಿಕ ವ್ಯವಸ್ಥಾಪಕೆರ್ ವಿಜಯ ಧೋತಿಹಾಳ, ಮಾರ್ಕೆಟ್ ಮುಖ್ಯ ಪ್ರಬಂಧಕೆರ್ ಉಲ್ಲಾಸ ಗುನಗಾ, ಕೆನರಾ ಎಚ್ಎಸ್ಬಿಸಿ ಜೀವ ವಿಮಾ ನಿಗಮದ ಹಿರಿಯ ಅಧಿಕಾರಿಲು ಪಾಲ್ ಪಡೆದಿತ್ತೆರ್.
ಕುಂಬಳೆ: ಪಿಲಿ ಚಾಮುಂಡಿ, ಅಣ್ಣಪ್ಪ ಪಂಜುರ್ಲಿ, ಕೋಮರಾಯಿ ದೈವಸ್ಥಾನದ ವಿಜ್ಞಾಪನಾ ಪತ್ರನ್ ಸಮಿತಿ ಸಂರಕ್ಷಕೆರಾಯಿನ ಬ್ರಹ್ಮಶ್ರೀ ಚಕ್ರಪಾಣಿ ದೇವ ಪೂಜಿತ್ತಾಯೆರ್ನ ಉಪಸ್ಥಿತಿಡ್ ಬುಧವಾರ ಬುಡುಗಡೆ ಮಲ್ತೆರ್.
ಬಿನ್ನೆರಾದ್ ಅಜಯನ್ ಆಚಾರ್ಯ ಪಯ್ಯನ್ನೂರು, ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ಕುಂಬಳೆ ವಲಯ ಮೇಲ್ವಿಚಾರಕೆರ್ ರಮೇಶ್ ಎಂ. ಬಡುವನ್ ಕುಂಞ ಕುಂಡಾಪು ಮೊಕ್ತೇಸರೆರ್ ಐತ್ತಪ್ಪ ಅರಿಕ್ಕಾಡಿ, ಕೋಶಾಧಿಕಾರಿ ಅಜಯಕುಮಾರ್ ಪಾಲ್ ಪಡೆದಿತ್ತೆರ್.
ಸಮಿತಿದ ಅಧ್ಯಕ್ಷೆರಾಯಿನ ಮಂಜುನಾಥ ಆಳ್ವ ಮಡ್ವ ದೂಮಣ್ಣ ಶೆಟ್ಟಿ ಕೊಡ್ಯಮ್ಮೆಗುತ್ತು, ನಾಗೇಶ್ ಕಾರ್ಳೆ, ರಾಮಚಂದ್ರ ಶೆಟ್ಟಿ ಬೀರಂಟಿಕೆರೆ, ಸಮಿತಿದ ಕಾರ್ಯದರ್ಶಿಲಾಯಿನ ಕೃಷ್ಣಪ್ಪ ಪೂಜಾರಿ ಶೇಣಿ, ಲಕ್ಷ್ಮಣ ಆಳ್ವ ಕುಂಡಾಪುಗುತ್ತು, ರಮೇಶ್ ರೈ ಕುಂಡಾವುಗುತ್ತು, ಲೋಕನಾಥ ಶೆಟ್ಟಿ ಉಜಾರು, ಸುಬ್ಬಣ್ಣ ಬಂಬ್ರಾಣಬೈಲು, ಸಂಜೀವ ಪೂಜಾರಿ ಜೋಡುಗೋಳಿ, ಗಂಗಾಧರ ಕುಂಡಾಪು, ಸದಸ್ಯೆರಾಯಿನ ನಾಗೇಶ್, ಚಂದ್ರಶೇಖರ ಪಿ.ಕೆ., ಪೂವಪ್ಪ ಪೂಜಾರಿ ಮುಂಡಿತ್ತಡ್ಕ ಗೋಪಾಲಕೃಷ್ಣ, ಕಮಲಾ, ಸುಂದರಿ ಈ ಪೊರ್ತುಡು ಇತ್ತೆರ್.
ದಕ್ಷಿಣ ಕನ್ನಡ ಸೈನ್ಸ್ ಫೌಂಡೇಶನ್ ಕರ್ನಾಟಕ ರಾಜ್ಯ ವೈಜ್ಞಾನಿಕ ಸಂಶೋಧನಾ ಪರಿಷತ್ತ್ ದಕ್ಷಿಣ ಕನ್ನಡ ಘಟಕ, ವಿಶ್ವೇಶ್ವರಯ್ಯ ಕೈಗಾರಿಕಾ ಬೊಕ್ಕ ತಾಂತ್ರಿಕ ವಸ್ತು ಸಂಗ್ರಹಾಲಯ ಬೆಂಗಳೂರು, ಲಯನ್ಸ್ ಕ್ಲಬ್ ಕಡಬ, ನೆತ್ತ ಒಟ್ಟು ಸೇರಿಗೆಡ್ ಸಂಚಾರಿ ವಿಜ್ಞಾನ ಪ್ರದರ್ಶನ ಕಾರ್ಯಕ್ರಮ ಶ್ರೀ ಸುಬ್ರಹ್ಮಣ್ಯೇಶ್ವರ ಪದವಿಪೂರ್ವ ಕಾಲೇಜ್ ಡ್ ನವಂಬರ್ 6 ದಾನಿ ಉದಿಪನ ಆಂಡ್.
ಲೇಸ್ ದ ಉದಿಪನನ್ ವಿಶ್ವೇಶ್ವರಯ್ಯ ಕೈಗಾರಿಕಾ ಬೊಕ್ಕ ತಾಂತ್ರಿಕ ವಸ್ತು ಸಂಗ್ರಹಾಲಯ ಬೆಂಗಳೂರು ನೆತ್ತ ಎಜುಕೇಶನ್ ಆಫೀಸರ್ ಹೇಮರಾಜ್ ಪಾತೆರ್ದ್ ” ಇತ್ತೆದ ತಾಂತ್ರಿಕ ಯುಗಟ್ ನಮಲ ಅವೆತ ಪಿರಾವುಡ್ ಪೋವೊಡಾಪುಂಡು. ಆ ನಿಟ್ಟ್ ಡ್ ವಿದ್ಯಾರ್ಥಿಲು ತನ್ನ ಪ್ರೌಢ ಹಂತಡೆ ವಿಜ್ಞಾನದ ಬಗ್ಗೆ ಎಚ್ಚಿನ ಆಸಕ್ತಿನ್ ವಹಿಸಿದ್ ಕ್ಲಾಸ್ ಡ್ ಪಾಠ ಕೇನ್ನ ಒಟ್ಟಿಗೆ ಪ್ರಾಯೋಗಿಕವಾದ್ ಅವೆತ ವಿವರಣೆನ್ ಬೊಕ್ಕ ಮಾಹಿತಿನ್ ತೆರಿಯೊನ್ನ ಅವಶ್ಯಕ ಪಂದ್ ಪಂಡೆರ್.
ಸಮಾರಂಭದ ಅಧ್ಯಕ್ಷತೆನ್ ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖರ ನಾಯಕ್ ವಹಿಸ್ ದ್ ಇತ್ತೆರ್. ಮಲ್ಲ ಬಿನ್ನೆರಾದ್ ಕಡಬ ಲಯನ್ಸ್ ಕ್ಲಬ್ ದ ಗುರ್ಕಾರ್ಲು ಗೋಪಾಲಕೃಷ್ಣ, ಪ್ರೌಢಶಾಲಾ ಪ್ರಭಾರ ಮುಖ್ಯ ಶಿಕ್ಷಕೆರ್ ಕೃಷ್ಣ ಭಟ್, ತಾಂತ್ರಿಕ ಸಹಾಯಕೆರಾಯಿನ ಚಂದ್ರ, ಬೊಕ್ಕ ದಿಲೀಪ್ ಜಟ್ಟಿ, ಕಾಲೇಜ್ ದ ಭೌತಶಾಸ್ತ್ರ ಉಪನ್ಯಾಸಕೆರ್ ಗಿರೀಶ್ ಇತ್ತೆರ್. ಸಂಚಾರಿ ವಿಜ್ಞಾನ ಪ್ರದರ್ಶನ ನವೆಂಬರ್6 ರ್ದ್ ಡಿಸೆಂಬರ್ 5 ಮುಟ್ಟ ನಿರಂತರವಾದ್ ದಕ್ಷಿಣ ಕನ್ನಡ ಜಿಲ್ಲೆಯಾದ್ಯಂತ ಇಪ್ಪುನ ಕೆಲವು ಶಾಲೆಗ್ ಪೋದು ವಿದ್ಯಾರ್ಥಿಲೆಗ್ ತಾಂತ್ರಿಕ ಮಾಹಿತಿನ್ ಕೊರ್ಪೆರ್. ಪ್ರೌಢಶಾಲಾ ಪ್ರಭಾರ ಮುಖ್ಯ ಶಿಕ್ಷಕ ಕೃಷ್ಣ ಭಟ್ ಮಾತೆರೆನ್ ಎದ್ಕೊಂದು, ಸಹ ಶಿಕ್ಷಕ ಸುರೇಶ್ ಲೇಸ್ನ್ ಸುದಾರಿಕೆ ಮಲ್ತೆರ್. ಸಹ ಶಿಕ್ಷಕಿ ಸೊಲ್ಮೆ ಸಂದಾಯ ಮಲ್ತೆರ್. ಬೊಕ್ಕ ವಿದ್ಯಾರ್ಥಿಲೆಗ್ ವಿಜ್ಞಾನ ಪ್ರದರ್ಶನನ್ ತೂವೆರೆ ಅವಕಾಶ ಮಲ್ತೆರ್ .
ವಿಟ್ಲ : ಜೋಕ್ಲೆನ ಕಲಾಲೋಕ ಕನ್ನಡ ಸಾಹಿತ್ಯ ಪರಿಷತ್ ಬಂಟ್ವಾಳ ತಾಲೂಕು ಘಟಕ ಜೋಕ್ಲೆಗಾದ್ ಕಲೆ ಸಾಹಿತ್ಯ ಚಟುವಟಿಕೆಡ್ ಪ್ರತಿ ವರ್ಷ ಕೊರ್ಪುನ ತಾಲೂಕು ಮಟ್ಟದ ಬಾಲಬಂಧು ಪುರಸ್ಕಾರಗ್ ಈ ಸರ್ತಿ ರಾಜೇಶ್ ವಿಟ್ಲ ಆಯ್ಕೆಯಾತೆರ್.
ಕಡೇಶಿವಾಲಯ ಸರಕಾರಿ ಹಿರಿಯ ಪ್ರಾಥಮಿಕ ಶಾಲಾ ನೇತೃತ್ವಡ್ ನ.6 ದಾನಿ ನಡಪುನ 17ನೇ ವರ್ಷದ ಬಂಟ್ವಾಳ ತಾಲೂಕು ಜೋಕ್ಲೆನ ಸಾಹಿತ್ಯ ಸಮ್ಮೇಳನಡ್, ಸಮಾರೋಪ ಸಮಾರಂಭಡ್ ರಾಜೇಶ್ ವಿಟ್ಲ ಮೇರೆಗ್ ಮಾನಾದಿಗೆ ಮಲ್ತ್, ಬಂಟ್ವಾಳ ತಾಲೂಕು ಮಟ್ಟದ ಬಾಲಬಂಧು ಪುರಸ್ಕಾರನ್ ಕೊರಿಯೆರೆ ಉಲ್ಲೆರ್ ಪಂದ್ ಜೋಕ್ಲೆನ ಕಲಾ ಲೋಕದ ಗುರ್ಕಾರೆರಾಯಿನ ರಮೇಶ ಎಂ. ಬಾಯಾರು ತೆರಿಪಾದೆರ್.
ತುಡರ ಪರ್ಬ, ತುಳಸಿ ಪರ್ಬ ಅಂಚೆನೆ ಕ್ರಿಸ್ಮಸ್ ದಪಗ ಪಟಾಕಿಲೆನ ಮಾರಾಟ ಬೊಕ್ಕ ಗಲಕೆ ನಿಯಂತ್ರಣ ಮಲ್ಪುನ ಬಗೆಟ್ ಸರ್ವೋಚ್ಛ ನ್ಯಾಯಾಲಯದ ಆದೇಶ ಉಪ್ಪುನೆರ್ದಾವರ ಕುಡ್ಲ ಮಹಾನಗರ ಪಾಲಿಕೆದ ವ್ಯಾಪ್ತಿಡ್ ರಾತ್ರೆ 10 ಗಂಟೆ ಮುಟ್ಟ ಮಾತ್ರ ಪಟಾಕಿ ಬುಡೊಡು ಪನ್ದ್ ಆದೇಶ ಆತ್ಂಡ್.
ಪರ್ಬದ ಪೊರ್ತುಡು ರಾತ್ರೆ 8 ರ್ದ್ 10 ಮುಟ್ಟ ಪಚ್ಚೆ ಪಟಾಕಿ( ಕಮ್ಮಿ ಸೌಂಡುದ) ಬೊಕ್ಕ ಬೆಡಿಮರ್ದ್ ಬುಡೊಡು ಪನ್ದ್ ಸರ್ವೋಚ್ಚ ನ್ಯಾಯಂತಡೆ ಪನ್ತ್ಂಡ್. ಒರಿದಿನ ಪೊರ್ತುಡು ಪಟಾಕಿ ಬುಡ್ಪಿನೆನ್ ನಿಷೇಧ ಮಲ್ದೆರ್. ಕಡ್ಡಾಯವಾದ್ ಪಸಂತ್ರ ಪಾಸಾಡಿ ಪಚ್ಚೆ ಪಟಾಕಿ ಬುಡೊಡು ಪನ್ದ್ ನಗರ ಪಾಲಿಕೆದ ಉಪ ಆಯುಕ್ತೆರ್(ಕಂದಾಯ) ತೆರಿಪಾದೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಒಟ್ಟುಸೇರಿಗೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 32ನೇ ಸಂಚಿಕೆ ನ.7 ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರೆ ಉಲ್ಲೆರ್. ನ.8 ಕ್ಕ್ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದೆರ್.
ಧರ್ಮಸ್ಥಳ: ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರ್ ಸಮಾಜಸೇವಾ ಕ್ಷೇತ್ರಡ್ ಮಲ್ತಿನ ಅನುಪಮ ಸೇವೆನ್ ಮನ್ನಿಸಾದ್ ನ.7 ದಾನಿ ಬೆಂಗ್ಲೂರುಡ್ ರಾಜ್ಯಪಾಲೆರಾಯಿನ ಥಾವರ್ಚಂದ್ ಗೆಹ್ಲೋಟ್ ಮೇರೆರ್ದ್ ‘ಕರ್ನಾಟಕ ಪರಿವರ್ತನೆದ ರೂವಾರಿ’ ಪ್ರಶಸ್ತಿ ಪ್ರದಾನ ಮಲ್ತೆರ್.
ಕೇಂದ್ರ ಸರ್ಕಾರರ್ದ್ ಪುದರ್ ಪಡೆನ ‘Interactive Forum on Indian Economy” ಸಂಸ್ಥೆದ ವತಿರ್ದ್ ಪ್ರಶಸ್ತಿ ಪ್ರದಾನ ಮಲ್ತೆರ್.
ಕುಸಲ್ದ ಜವನೆರ್ ಬದ್ಯಾರು ಶಿರ್ಲಾಲು ಮುತಾಲಿಕೆಡ್ ತುಡರ್ ಪರ್ಬದ ಲೆಕ್ಕೊಡು 5ನೇ ವರ್ಷೊದ ಕೆಸರ್ ಡೊಂಜಿ ಕುಸಲ್ದ ಗೊಬ್ಬು ನ.13 ಸೋಮಾರ ನಲ್ಲಾರುಗುತ್ತು ಬಾಕಿಮಾರ್ ಕಂಡಡ್ ನಡಪರೆ ಉಂಡು.
ಈ ಲೇಸ್ ದ ಉದಿಪನನ್ ಮೋನಪ್ಪ ಮೂಲ್ಯ ನಲ್ಲಾರಗುತ್ತು ಮಲ್ಪುವೆರ್. ಲೇಸ್ ದ ಗುರ್ಕಾರ್ಮೆನ್ ಬದ್ಯಾರು ಲೋಕನಾಥೇಶ್ವರ ಭಜನಾ ಮಂಡಳಿ ಗುರ್ಕಾರೆ ಜಗನ್ನಾಥ್ ಕುಲಾಲ್ ಬೈರೊಟ್ಟು ಒಯಿಸೊನ್ವೆರ್. ಕೆಸರ್ ಕಂಡ ಕ್ರೀಡಾಕೂಟದ ಉದಿಪನನ್ ತುಳುನಾಡು ಒಕ್ಕೂಟ ಬೊಲ್ತೇರ್ ದ ಸ್ಥಾಪಕ ಗುರ್ಕಾರೆ ಶೈಲೇಶ್ RJ ಮೇರ್ ಮಲ್ಪೆರೆ ಉಲ್ಲೆರ್.
ಮಲ್ಲ ಬಿನ್ನೆರಾದ್ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಚಿತ್ರದುರ್ಗದ ಯೋಜನಾಧಿಕಾರಿ ಪ್ರವೀಣ್ A G, ಶ್ರೀ ಲೋಕನಾಥೇಶ್ವರ ಭಜನಾ ಮಂಡಳಿ ಬದ್ಯಾರುದ ಕಾರ್ಯದರ್ಶಿ ಸದಾಶಿವ ಶಿವಗಿರಿ ಬೊಕ್ಕ ಶ್ರೀ ಲೋಕನಾಥೇಶ್ವರ ಭಜನಾ ಮಂಡಳಿ ಬದ್ಯಾರುದ ಮಾಜಿ ಗುರ್ಕಾರೆ ಸುರೇಶ್ ಮೂಲ್ಯ ಕೊಚ್ಚೊಟ್ಟು ಪಾಲ್ ಪಡೆಯೆರೆ ಉಲ್ಲೆರ್.
