ಬೆಂಗಳೂರು: ಭಾರತೀಯ ಮೂಲದ ನ್ಯೂಜಿಲ್ಯಾಂಡ್ ಕ್ರಿಕೆಟಿಗೆ ರಚಿನ್ ರವೀಂದ್ರ ಈ ಸರ್ತಿದ ವಿಶ್ವಕಪ್ಡ್ ಎಡ್ಡೆ ಫಾರ್ಮ್ಡ್ ಉಲ್ಲೆರ್. ಗುರುವಾರ ನ್ಯೂಜಿಲ್ಯಾಂಡ್ ಬೆಂಗಳೂರು ಚಿನ್ನಸ್ವಾಮಿ ಕ್ರೀಡಾಂಗಣಡ್ ಶ್ರೀಲಂಕಾ ವಿರುದ್ಧ ಗೊಬ್ಬುದು ಇತ್ತ್ಂಡ್.
ಇತ್ತೆ ಬೆಂಗಳೂರುಡು ಇಪ್ಪುನ ಅಜ್ಜಿ ಇಲ್ಲಗ್ ರಚಿನ್ ರವೀಂದ್ರ ಭೇಟಿ ಕೊರ್ತೆರ್. ರಚಿನ್ ಅರೆನ ಅಜ್ಜಿ ಪುಳ್ಳಿನ ದೃಷ್ಟಿ ದೆಪ್ಪುನ ವಿಡಿಯೋ ವೈರಲ್ ಆತ್ಂಡ್. ನ್ಯೂಜಿಲ್ಯಾಂಡ್ದ ಯುವ ಆಲ್ರೌಂಡರ್ ತನ್ನ ಭಾರತೀಯ ಆಚರಣೆನ್ ತೂದು ಅಭಿಮಾನಿಲು ಖುಷಿ ಆತೆರ್.
ಒಡಿಪು: ಹಿರಿಯ ಪತ್ರಕರ್ತೆರ್ ಶಶಿಧರ ಹೆಮ್ಮಣ್ಣ (57) ತಿಗಲೆ ಬೇನೆ ಬತ್ತ್ ದ್ ತೀರ್ ಪೋಯೆರ್.
ಒಡಿಪುದ ಇಲ್ಲಲ್ ಗುರುವಾರ ಕಾಂಡೆ
ತಿಗಲೆಬೇನೆ ತೋಜಿದ್ ಬತ್ತ್ಂಡ್. ಪೇಂಟೆದ ಆಸ್ಪತ್ರೆಡ್ ತೋಜಾನಗ ಹಾರ್ಟ್ ಆಟ್ಯಾಕ್ ಆತ್ಂಡ್ ಪಂದ್ ಪಂಡೆರ್.
ಎಚ್ಚದ ಚಿಕಿತ್ಸೆಗಾದ್ ಮಣಿಪಾಲದ ಆಸ್ಪತ್ರೆಗ್ ಲೆತೊಂದು ಪೋದಿತ್ತೆರ್. ಐಸಿಯು ಡ್ ಇತ್ತಿನ ಮೇರ್ ರಾತ್ರೆ ತೀರ್ ಪೋತೆರ್.
1981 ಡ್ ಕುಂದ ಪ್ರಭ ಪತ್ರಿಕೆದ ಮುಖೆನ ವೃತ್ತಿ ಜೀವನನ್ ಸುರು ಮಲ್ತಿನ ಮೇರ್ ಕ್ಷಿತಿಜ ಪನ್ಪಿನ ಸ್ವಂತ ಪತ್ರಿಕೆನ್ ಸುರು ಮಲ್ತ್ ದ್ ಮುಖ್ಯ ಸಂಪಾದಕೆರ್ ಆದಿತ್ತೆರ್.
ಬೊಕ್ಕ ಈ ಟಿವಿ ಕನ್ನಡ, ಡಿಡಿ ನ್ಯೂಸ್ ಡ್ ಜಿಲ್ಲಾ ವರದಿಗಾರೆಯಾದ್ ಬೇಲೆ ಮಲ್ತೊಂದು ಇತ್ತೆರ್. ಮೇರ್ ಕೃಷಿಕ್ ಸಂಬಂಧಪಟ್ಟಿನಂಚಿನ ಲೇಖನನ್ ಬರೆದ್ ಸರಕಾರದ ಗಮನ ಸೆಳೆದಿತ್ತೆರ್. ಅಂಚನೆ ಕೆನೆಕ್ಟ್ ಸಂಸ್ಥೆನ್ ಪುಟ್ಟಾದ್ ಮಸ್ತ್ ಯೋಜಲೆನ್ ರಾಜ್ಯದಾದ್ಯಂತ ಸುರು ಮಲ್ಪೆರೆ ತಯಾರ್ ಆದಿತ್ತೆರ್.
ಮೇರೆಗ್ ಪೊಪ್ಪ, ಅಮ್ಮ, ಬುಡೆದಿ, ಮಗೆ, ನಾಲ್ ಜನ ಅಣ್ಣನಕುಲು, ಅಕ್ಕನಕುಲು ಉಲ್ಲೆರ್.
ರಾಜ್ಯದ ಮಾಜಿ ಮುಖ್ಯಮಂತ್ರಿ ವೀರಪ್ಪ ಮೊಯ್ಲಿ ಮೇರೆಗ್ ಬೆಂಗಳೂರು ಕಂಬುಲ ಸಮಿತಿ (ರಿ), ಬೆಂಗಳೂರು ಸಮಿತಿದ ಪದಾಧಿಕಾರಿಲು ಭೇಟಿ ಕೊರ್ದು”ಬೆಂಗಳೂರು ಕಂಬುಲ – ನಮ್ಮ ಕಂಬುಲಗ್ ” ಲೆಪ್ಪೋಲೆನ್ ಕೊರಿಯೆರ್.
ಈ ಪೊರ್ತುಡು ಕಂಬುಲ ಸಮಿತಿದ ಪದಾಧಿಕಾರಿಲು ಇತ್ತೆರ್.
ಪುತ್ತೂರು: ಪುತ್ತಿಲ ಪರಿವಾರದ ಕೆಮ್ಮಿಂಜೆ ವಾರ್ಡ್ದ ಕಾರ್ಯದರ್ಶಿ ಬಾಲಕೃಷ್ಣ ಗೌಡ ಅರೆನ ಮಗೆ ಮೆದುಳುದ ಕಾಯಿಲೆ ಎದುರಾದ್ ಮರ್ದ್ಗ್ ಸುಮಾರ್ 10 ಲಕ್ಷದ ಅವಶ್ಯಕತೆ ಇತ್ತ್ದ್, ಪುತ್ತಿಲ ಪರಿವಾರರ್ದ್ ಒಂಜಿ ಲಕ್ಷ ರೂ. ಪನವುದ ಸಕಾಯ ಮಲ್ತೆರ್.
ಪುತ್ತಿಲ ಪರಿವಾರದ ವತಿರ್ದ್ ಒಂಜಿ ದಿನಟ್ ಸಂಗ್ರಹ ಮಲ್ತಿನ ಒಂಜಿ ಲಕ್ಷ ರೂಪಾಯಿದ ಚೆಕ್ಕ್ನ್ ಬಾಲಕೃಷ್ಣ ಗೌಡೆರೆಗ್ ಹಿಂದೂ ಮುಖಂಡೆರ್ ಅರುಣ್ ಕುಮಾರ್ ಪುತ್ತಿಲ ಕೊರಿಯೆರ್.
ಈ ಪೊರ್ತುಡು ಪುತ್ತಿಲ ಪರಿವಾರದ ಪ್ರಮುಖೆರ್ ಇತ್ತೆರ್.
ಬೆಂಗ್ಲೂರ್: ಅರಮನೆ ಮೈದಾನ ಗೇಟ್ ಸಂಖ್ಯೆ 9 ಡ್ ಇಪ್ಪುನ ಗ್ರೀನ್ಸ್ ಹಾಲ್ ಡ್ ನ.8 ದಾನಿ ಕಂಬುಲ ಸಮಿತಿ (ರಿ), ಬೆಂಗ್ಲೂರ್ ನೆತ್ತ ಗೌರವ ಗುರ್ಕಾರ್ಲು ಕೆ ಪ್ರಕಾಶ್ ಶೆಟ್ಟಿ ಮೇರ್ ನ ನೇತೃತ್ವಡ್ “ಬೆಂಗಳೂರು ಕಂಬುಲ – ನಮ್ಮ ಕಂಬುಲ” ದ ಪೂರ್ವಭಾವಿ ಸಭೆ ನಡತ್ಂಡ್.
ಕಂಬುಲ ಸಮಿತಿ (ರಿ), ಬೆಂಗ್ಲೂರ್ ನೆತ್ತ ಗುರ್ಕಾರ್ಲು ಅಶೋಕ್ ಕುಮಾರ್ ರೈ, ಕಾರ್ಯಾಧ್ಯಕ್ಷೆರ್ ಗುರುಕಿರಣ್, ಉಪಾಧ್ಯಕ್ಷೆರ್ ಗುಣರಂಜನ್ ಶೆಟ್ಟಿ, ಸಂಘಟನಾ ಗುರ್ಕಾರ್ಲು ಉಮೇಶ್ ಶೆಟ್ಟಿ ಬೊಕ್ಕ ಉಪೇಂದ್ರ ಶೆಟ್ಟಿ ಈ ಪೊರ್ತುಡು ಇತ್ತೆರ್.
ಬೆದ್ರ: ತುಳು ರಂಗಭೂಮಿಡ್ ಬೇತೆ ಬೇತೆ ರೀತಿದ ನಾಟಕಲು ಬೈದ್ಂಡ್. ಇತ್ತೆ ಪಿಂಗಾರ ಕಲಾವಿದ ತಂಡದ ‘ಕದಂಬ’ ನಾಟಕ ಶೀರ್ಷಿಕೆ ವಿಶಿಷ್ಟ ಬೊಕ್ಕ ಕುತೂಹಲ ಆದ್ ಈ ನಾಟಕ ರಂಗಡ್ ಬದಲಾವಣೆದ ಗಾಳಿ ಬೀಜುನಂಚ ಮಲ್ತ್ಂಡ್.
ಈ ನಾಟಕ ತುಳು ರಂಗಭೂಮಿಗ್ ಮೈಲುಗಲ್ಲು ಆವಡ್ ಪಂದ್ ಹಿರಿಯ ರಂಗ ನಿರ್ದೇಶಕೆರ್ ವಿಜಯಕುಮಾರ್ ಕೊಡಿಯಾಲ್ ಬೈಲ್ ಪಂಡೆರ್. 
ಆರ್ ಮಣಿ ಕೋಟೆಬಾಗಿಲು ಅರೆನ ನಿರ್ದೇಶನದ 8 ನೇ ನಾಟಕ ‘ಕದಂಬ” ಕನ್ನಡ ಭವನಡ್ ನಡತ್ತಿನ ಸುರುತ ಪ್ರದರ್ಶನದ ಸಭಾ ಕಾರ್ಯಕ್ರಮಡ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರಿಯೆರ್.
ಅಲಂಗಾರು ಶ್ರೀ ಬಡಗು ಮಹಾಲಿಂಗೇಶ್ವರ ದೇವಸ್ಥಾನದ ಅರ್ಚಕೆರ್ ಸುಬ್ರಹ್ಮಣ್ಯ ಭಟ್ ಲೇಸ್ನ್ ಉದಿಪನ ಮಲ್ತೆರ್. ಬಿಜೆಪಿ ಜಿಲ್ಲಾಧ್ಯಕ್ಷೆರ್ ಸುದರ್ಶನ್ ಎಂ. ಪಾತೆರ್ದ್ ತುಳು ನಾಟಕದ ಮುಕೇನ ಧಾರ್ಮಿಕ ಬೊಕ್ಕ ಸಾಮಾಜಿಕವಾದ್ ಜನಕ್ಲೆಗ್ ಎಡ್ಡೆ ಸಂದೇಶನ್ ಕೊರೊಂದು ತುಳು ಭಾಷೆನ್ ಒರಿಪಾದ್ ಬುಲೆಪುನಂಚಿನ ಬೇಲೆ ಮಣಿ ಕೋಟೆಬಾಗಿಲು ಮಲ್ತೊಂದು ಇಪ್ಪುನ ಎಡ್ಡೆ ಇಚಾರ.
ಉದ್ಯಮಿ ರವೀಂದ್ರ ಶೆಟ್ಟಿ ಬಜಗೋಳಿ ಪಾತೆರ್ದ್, ಮಣಿ ಅರೆನ ನಾಟಕಡ್ ಸಾಮಾಜಿಕ ಸುಧಾರಣೆದ ಸಂದೇಶ ಇಪ್ಪುಂಡು ಪಂಡೆರ್. ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಉದ್ಯಮಿ ಶ್ರೀಪತಿ ಭಟ್, ಸತ್ಯಪ್ರಕಾಶ್ ಹೆಗ್ಡೆ, ಸತೀಶ್ ಕಾಶಿಪಟ್ನ, ಕೋಟೆಬಾಗಿಲು ಮಹಮ್ಮಾಯಿ ದೇವಸ್ಥಾನದ ಗೌರವ ಗುರ್ಕಾರ್ಲು ಪುರುಷೋತ್ತಮ ಶೆಟ್ಟಿ ಈ ಪೊರ್ತುಡು ಇತ್ತೆರ್.
ಸತೀಶ್ ಹೊಸ್ಮಾರು ಲೇಸ್ದ ಸುದಾರಿಕೆ ಮಲ್ತ್, ನಾಟಕದ ರಚನೆಗಾರೆರ್ ಮಣಿ ಕೋಟೆಬಾಗಿಲು ಪ್ರಾಸ್ತಾವಿಕವಾದ್ ಪಾತೆರ್ದ್ ಮಾತೆರೆನ್ ಎದ್ಕೊಂಡೆರ್.
ಕುಡ್ಲ: ಕರ್ನಾಟಕ ರಾಜ್ಯ ಕಾರ್ಯ ನಿರತ ಪತ್ರಕರ್ತೆರೆನ ಸಂಘದ ಮುತಾಲಿಕೆಡ್ ಜ.5-7 ಮುಟ್ಟ ನಡಪುನ ರಾಜ್ಯ ಮಟ್ಟದ ಕ್ರಿಕೆಟ್ ಮ್ಯಾಚ್ ನ್ ದಕ್ಷಿಣ ಕನ್ನಡ ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಮುತಾಲಿಕೆಡ್ ನಡಪಾಯೆರೆ ರಾಜ್ಯ ಸಮಿತಿ ತೀರ್ಮಾನ ಮಲ್ದ್ಂಡ್.
ಈ ಬಗೆಟ್ಟ್ ಕುಡ್ಲ ಪತ್ರಿಕಾ ಭವನಡ್ ದ.ಕ ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಗುರ್ಕಾರೆ ಶ್ರೀನಿವಾಸ ನಾಯಕ್ ಇಂದಾಜೆ ಮೇರ್ ಗುರ್ಕಾರ್ಮೆನ್ ಒಯಿಸೊಂದು ಪಾತೆರ್ದ್, ತುಳುನಾಡ್ ದ ಸೌಹಾರ್ದ ಪರಂಪರೆದ ಬ್ರ್ಯಾಂಡ್ ಕುಡ್ಲ ಪರಿಕಲ್ಪನೆನ್ ರಾಜ್ಯ ಇಡೀ ಪಸರಿಯೆರೆ ಈ ಮ್ಯಾಚ್ ಪೂರಕ ಆತ್ಂಡ್ ಪಂದ್ ಪಂಡೆರ್.
ಕರ್ನಾಟಕ ರಾಜ್ಯ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಒತ್ತು ಗುರ್ಕಾರೆ ಅಜ್ಜ ಮಾಡ ರಮೇಶ್ ಕುಟ್ಟಪ್ಪ ಪಾತೆರ್ದ್, ಈ ಕ್ರೀಡಾ ಕೂಟಡ್ 25 ಜಿಲ್ಲೆಡ್ 500 ಪ್ರತಿನಿಧಿಲು ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಪಂಡೆರ್.
ಸಭೆಟ್ಟ್ ಕ್ರಿಕೆಟ್ ಪಂತೊದ ಪ್ರಧಾನ ಸಂಚಾಲಕೆರ್, ಕುಡ್ಲ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಜಿತೇಂದ್ರ ಕುಂದೇಶ್ವರ, ರಾಜ್ಯ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಜಗನ್ನಾಥ ಶೆಟ್ಟಿ ಬಾಳ, ಪ್ರತ್ರಿಕಾ ಭವನ ಟ್ರಸ್ಟ್ ದ ಗುರ್ಕಾರೆ ರಾಮಕೃಷ್ಣ, ಸಂಚಾಲಕೆರ್ ರವೀಂದ್ರ ಶೆಟ್ಟಿ, ಪುಷ್ಪ ರಾಜ್ ಬಿ.ಎನ್, ಭಾಸ್ಕರ್ ರೈ ಕಟ್ಟ, ರಾಜೇಶ್ ಪೂಜಾರಿ ಪಾಲ್ ಪಡೆದಿತ್ತೆರ್.
ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ಡ್ ಖಾಲಿ ಇಪ್ಪುನ 47 ಬೇಲೆಗ್ ಅರ್ಜಿ ಸಂದಾವೊಲಿ.
ನೆಟ್ಟ್ ಉಪ ವ್ಯವಸ್ಥಾಪಕೆರ್, ಅಧಿಕಾರಿ ಬೊಕ್ಕ ಡೇಟಾ ಅನಾಲಿಸ್ಟ್ ಬೇಲೆ ಉಂಡು. ಪದವಿ, BE/B.Tec, ಡಿಪ್ಲೊಮಾ, ಎಂಬಿಎ, ಎಂಎಸ್ಸಿ ವಿದ್ಯಾರ್ಹತೆ ಇಪ್ಪುನ ಅರ್ಹ ಅಭ್ಯರ್ಥಿಲು ಅಧಿಕೃತ ವೆಬ್ ಸೈಟ್ ಮುಖೇನ ಅರ್ಜಿ ಸಂದಾವೊಲಿ. ಈ ಬೇಲೆಗ್ ಪರೀಕ್ಷೆ, ಸಂದರ್ಶನ ಬೊಕ್ಕ ಅನುಭವ ಆಧಾರದ ಮಿತ್ತ್ ನೇಮಕಾತಿ ನಡಪರೆ ಉಂಡು. ಅರ್ಜಿ ಸಂದಾಯೆರೆ ನ.27 ಅಕೇರಿದ ದಿನ ಆತ್ಂಡ್.
ಶಬರಿಮಲೆ ಅಯ್ಯಪ್ಪಸ್ವಾಮಿ ಸನ್ನಿಧಿಡ್ 18 ಮೊಟ್ಟು ಉಂಡು. ನೆತ್ತ ಪುದರ್ ಇಂಚ ಉಂಡು.
1.ಅಣಿಮಾ, 2.ಲಘಿಮಾ, 3.ಮಹಿಮಾ , 4.ಈಶ್ವತ, 5.ವಶ್ಯತ, 6.ಪ್ರಾಕಾಮ್ಯ, 7.ಬುದ್ಧಿ, 8.ಇಚ್ಛಾ, 9.ಪ್ರಾಪ್ತಿ, 10.ಸರ್ವಕಾಮ, 11.ಸರ್ವ ಸಂಪತ್ಕರ, 12.ಸರ್ವ ಪ್ರಿಯಕರ, 13.ಅರ್ವಾ ಸಾವುದ ಪರಿಹಾರ, 16.ಸರ್ವವಿಘ್ನ ನಿವಾರಣ, 17.ಸರ್ವಾಂಗ ಸುಂದರ, 18.ಸರ್ವ ಸೌಭಾಗ್ಯದಾಯಕ
ಕುಡ್ಲ: ರಾಜ್ಯ ರಾಜಧಾನಿ ಬೆಂಗಳೂರುರ್ದ್ -ಕುಡ್ಲಗ್ “ವಂದೇ ಭಾರತ್” ರೈಲ್ ಸೇವೆನ್ ಕೊರೊಡು ಪನ್ಪಿನವು ಈ ಭಾಗದ ಜನಕುಲೆನ ಮಸ್ತ್ ದಿನತ ಬೇಡಿಕೆಯಾದುಂಡು, ಈ ಬಗೆಟ್ ಕೇಂದ್ರ ಸರ್ಕಾರೊರ್ದು ಸಕಾರಾತ್ಮಕ ಸ್ಪಂದನೆ ತಿಕ್ಕ್ ದ್ಂಡ್ ಪಂಡ್ದ್ ಸಂಸದೆರ್ ನಳಿನ್ ಕುಮಾರ್ ಕಟೀಲ್ ಪನ್ತೆರ್.
ಈ ಬಗೆಟ್ ನಳಿನ್ x ಮಲ್ತ್ ” ಕುಡ್ಲ – ಮಡಗಾಂ ವಂದೇ ಭಾರತ್ ರೈಲ್ ಬಲ್ಪರೆ ಸರ್ವಸನ್ನದ್ಧವಾದುಂಡು, ಪೊರ್ತು ಪಟ್ಟಿ ಒವ್ವೇ ಪೊರ್ತುಡು ಬುಡುಗಡೆ ಆವು. ನನ ಕುಡ್ಲ – ಬೆಂಗಳೂರು ವಂದೇ ಭಾರತ್ ರೈಲ್ ಗ್ ಮಲ್ತಿನ ಮನವಿ ಫಲಪ್ರದ ಆತ್ಂಡ್, ಬೇಗೊಡು ಅವ್ಲಾ ಬರ್ಪುಂಡು. ಈ ಚೀಪೆ ಸುದ್ದಿಗ್ ಜಿಲ್ಲೆದ ನಾಗರಿಕೆರೆನ ಲೆಕ್ಕೊಡು ಕೇಂದ್ರ ಸರಕಾರೊಗು ಧನ್ಯವಾದ” ಪನ್ದ್ ಬರೆಯೊಂದೆರ್.
