ಗುಜರಾತ್: ಕಾಂಗ್ರೆಸ್ ಶಾಸಕೆರ್ ಪರೇಶ್ ಧನಾನಿ ತನ್ನ ಇಲ್ಲರ್ದ್ ಗ್ಯಾಸ್ ಸಿಲಿಂಡರ್ ನ್ ಸೈಕಲ್ ದ ಪಿರವು ಕಟ್ಟೊಂದು ವೋಟು ಪಾಡರೆ ಮತಗಟ್ಟೆಗ್ ಪೋಯಿನ ಘಟನೆ ಗುಜರಾತ್ ವಿಧಾನಸಭೆ ಚುನಾವಣೆದ ಪೊರ್ತುಡು ನಡತ್ಂಡ್.
ಮೇರ್ ಗ್ಯಾಸ್ ದ ಮಿತ್ತ್ ಇತ್ತೆದ ಬಿಲೆತ ಒಟ್ಟಿಗೆ 2014ತ ಗ್ಯಾಸ್ ಬಿಲೆನ್ ಅಂಟಾದ್ ಇತ್ತೆರ್. ಮೇರೆ ಸಿಲಿಂಡರ್ ಬಿಲೆತ ಬಗೆಟ್ ವಿಭಿನ್ನ ರೀತಿಡ್ ಪ್ರತಿಭಟನೆ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.
ಬಿ.ಕೆ ಫ್ರೆಂಡ್ಸ್ ನಾಟಿ ನರಿಕೊಂಬು ನೆತ್ತ ವತಿರ್ದ್ ಬಂಟ್ವಾಳಡ್ ಸುರುತ ಸರ್ತಿ ಶ್ರೀ ಆದಿ ಧೂಮಾವತಿ ಶ್ರೀ ದೇಯಿಬೈದೆತಿ ಕೃಪಾ ಪೋಷಿತ ಯಕ್ಷಗಾನ ಮಂಡಳಿ ಮೂಲಸ್ಥಾನ ಗೆಜ್ಜೆಗಿರಿ ಮೊಕ್ಲೆರ್ದ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಆಟ ಡಿ.3 ಶನಿಯಾರ ಶ್ರೀ ಕೋದಂಡರಾಮಚಂದ್ರ ದೇವಲ್ಯ ವಠಾರ, ನಾಟಿ ಬೀದಿ ನರಿಕೊಂಬುಡ್ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲ ಬತ್ ದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಭದ್ರಕಾಳಿ ಉಪಖಂಡ ಸಮಿತಿ ಏರಮಲೆ, ನರಿಕೊಂಬು ಮೊಕುಲು ಲೆಪ್ಪೋಲೆಡ್ ತೆರಿಪಾದೆರ್.
ಕೆಲವೆರ್ ಬಂಜಿದ ಬಡವುಗು ಬೋಡಾದ್ ಲೆತ್ತಿಜಿಂಡಲ ಕೆಲವು ಮದಿಮೆಗ್ ಪೋಪೆರ್. ಇಂಚಿಪ್ಪಗ್ ಮಧ್ಯಪ್ರದೇಶದ ಜವನೆ ಒರಿ ಮದಿಮೆದ ಲೇಸ್ಗ್ ಲೆಪ್ಪೋಲೆ ಇಜ್ಜಂದೆ ಪೋದು ತಿಕ್ಕ್ದ್ ಬೂರ್ದೆರ್.
ಎಂಬಿಎ ಕಲ್ಪಾರ್ಥಿ ಆತಿನ ಮೇರ್ ಮದಿಮೆಗ್ ವನಸ್ಗ್ ಪಂದ್ ಪೋತಿನ ಪೊರ್ತುಡು ಮದಿಮೆದ ಆಯೋಜಕೆರ್ ಲೆಪ್ಪೋಲೆ ಉಂಡಾ ಪಂದ್ ಕೆನ್ನಗ ಜವನೆ ಇಜ್ಜಿ ಪಂತೆ. ಅಂಚಾದ್ ಕಲ್ಪಾರ್ಥಿನ ಕೈಟ್ ಪಾತ್ರೆ ದೆಕ್ಕಾದೆರ್. ಈ ವಿಡಿಯೋ ಇತ್ತೆ ವೈರಲ್ ಆದಿತ್ತ್ದ್, ಮಸ್ತ್ ಜನ ಬೆಚ್ಚ ಆತೆರ್.
ಕುಡ್ಲದ ಹೊಯ್ಗೆ ಬಜಾರ್ ಶ್ರೀ ಅಶ್ವಥ ಕಟ್ಟೆ ಅಯ್ಯಪ್ಪ ಸ್ವಾಮಿ ಭಕ್ತ ವೃಂದ ಮೊಕಲೆನ 18 ನೇ ವರ್ಷದ ಶಬರಿಮಲೆ ಯಾತ್ರೆದ ಸಲುವಾದ್ ಡಿ.4 ತಾರೀಕ್ ಐತಾರ ದಾನಿ ಅಯ್ಯಪ್ಪ ಸಹಸ್ರ ದೀಪೋಚ್ಚಯ ಅಪ್ಪ ಸೇವೆ, ಕೆಂಡ ಸೇವೆ, ಮಹಾಪೂಜೆ ಅಂಚನೆ ಯಕ್ಷಗಾನ ಬಯಲಾಟ ನಡಪರೆ ಉಂಡು.
ಪೂಜ್ಯ ಗುರುಕುಲು ಜಯ ಪ್ರಕಾಶ್ ಶಾಂತಿ ಅಂಚನೆ ಸಂಜೀವ ಗುರುಸ್ವಾಮಿ ಮೊಕುಲೆನ ಆಶೀರ್ವಾದದೊಟ್ಟುಗು ನಿತಿನ್ ಗುರುಸ್ವಾಮಿ ಮೆರೆನ ಮುತಾಲಿಕೆಡ್ ಈ ಲೇಸ್ ನಡಪರೆ ಉಂಡು. ಈ ಲೇಸ್ಗ್ ಮಾತ ಭಕ್ತೆರ್ ಬತ್ತ್ದ್ ಶ್ರೀ ಅಯ್ಯಪ್ಪ ಸ್ವಾಮಿ ದೇವೆರೆನ ಪ್ರಸಾದ ದೆತೊಂದು ಸ್ವಾಮಿನ ಕೃಪೆಗ್ ಪಾತ್ರರಾವೊಡು ಪಂದ್ ಅಶ್ವಥಕಟ್ಟೆ ಅಯ್ಯಪ್ಪ ಭಕ್ತವೃಂದ ಹೊಯ್ಗೆ ಬಜಾರ್ದ ವಿನೋದ್ ಗುರುಸ್ವಾಮಿ ಲೆಪ್ಪೋಲೆಡ್ ತೆರಿಪಾದೆರ್.
ಕಾರವಾರ: ಬೈಕ್ ಬೊಕ್ಕ ಟೆಂಪೋದ ನಡುಟ್ಟ್ ಆಕ್ಸಿಡೆಂಟ್ ಆದ್ ಆಸ್ಪತ್ರೆಗ್ ಕೊನನಗ ಸಾದಿದ ನಡುಟ್ಟ್ ಬೈಕ್ ಡ್ರೈವರ್ ತೀರ್ ಪೋಯಿನ ಘಟನೆ ಕಾರವಾರದ ಅಮದಳ್ಳಿ ಕೈತಲ್ ನಡತ್ಂಡ್.
ಕುಮಟಾದ ಫೋಟೊಗ್ರಾಫರ್ ಆಯಿನ ಮಹಾಬಲೇಶ್ವರ ಅಂಬಿಗ ತೀರ್ ಪೋಯಿನಾರ್. ಬೈಕ್ಡ್ ಪೋವೊಂದಿಪ್ಪುನಗ ಮಹಾಬಲೇಶ್ವರ ತಿರ್ಗಾಸ್ಡ್ ಬೈಕ್ ಟರ್ನ್ ಮಲ್ಪುನಗ ಈ ಘಟನೆ ನಡತ್ಂಡ್.
ಬೈಕ್ದ ಪಿರವು ಇತ್ತಿನ ಟೆಂಪೋ ಡ್ರೈವರ್ನ ನಿಯಂತ್ರಣ ತಿಕ್ಕಂದೆ ದುಂಬು ಇತ್ತಿನ ಮಹಾಬಲೇಶ್ವರ ಮೆರೆನ ಬೈಕ್ಗ್ ಗುದ್ದುದ್ಂಡ್. ಬೈಕ್ಡ್ ಇತ್ತಿನ ಮಹಾಬಲೇಶ್ವರ ಪಿಚ್ಚರ್ದ ರೀತಿಡ್ ಬೈಕ್ ಸಮೇತ ಲಾಗಿದ್ ಎದುರುಗು ಪೋವೊಂದಿತ್ತಿನ ಕಾರ್ಗ್ ಗುದ್ದುದು ಮಾರ್ಗದ ಬರಿಕ್ಕ್ ಬೂರ್ದೆರ್.
ಕುಡ್ಲ: ಭಾರೀ ವಿವಾದರ್ದ್ ಬೊಕ್ಕ ತೊರ್ತಲ್ದ (ಸುರತ್ಕಲ್) ಎನ್ಐಟಿಕೆ ಟೋಲ್ಗೇಟ್ ಡಿಸೆಂಬರ್ 1 ಜೆಡ್ದ್ ಬಂದ್ ಆದಿತ್ತ್ದ್, ಇನಿರ್ದ್ ಸರಾಗವಾದ್ ಗಾಡಿಲು ಪೋವೊಂದು ಉಂಡು.
ಕರಿನ 35 ದಿನರ್ದ್ ನಡತಿನ ಪೊರ್ಂಬಾಟ ಕಡೆ ಆದಿತ್ತ್ದ್, ಇನಿ ಸುರತ್ಕಲ್ ಎನ್ಐಟಿಕೆ ಟೋಲ್ಗೇಟ್ ವಿರೋಧಿ ಪೊರ್ಂಬಾಟಗಾರೆರ್ ಕೋಡೆ ನಡುರಾತ್ರೆ ಕೇಕ್ ಕಟ್ ಮಲ್ತ್ದ್ ವಿಜಯೋತ್ಸವ ಆಚರಣೆ ಮಲ್ತೆರ್. ಈ ಪೊರ್ತುಡು ಪೊರ್ಂಬಾಟ ಸಮಿತಿದ ಮುಖಂಡೆರ್, ಕಾರ್ಯಕರ್ತೆರ್ ಅಂಚನೆ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಸಮಾನ ಮನಸ್ಕ ಸಂಘಟನೆದ ಮುಖಂಡೆರ್ ಇತ್ತೆರ್.
ಹಿಂದು ಜಾಗರಣ ವೇದಿಕೆ, ಬಂಟ್ವಾಳ ತಾಲೂಕ್ ನೆತ್ತ ಮುತಾಲಿಕೆಡ್ ಉಂದುವೇ ಬರ್ಪುನ ಡಿ. 6 ಅಂಗಾರೆದಾನಿ ಬೊಲ್ಪುಗು 10 ಗಂಟೆರ್ದ್ ಬಿ.ಸಿ.ರೋಡ್ ದ ಶ್ರೀ ರಕ್ತೇಶ್ವರೀ ದೇವಲ್ಯಡ್ ಅಯೋಧ್ಯೆ ಶ್ರೀ ರಾಮ ಜನ್ಮಸ್ಥಾನದ ಮುಕ್ತಿ ಆಂದೋಲನದ ವಿಜಯೋಚ್ಚಯದ ಅಂಗವಾದ್ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ನಡಪರೆ ಉಂಡು.
ಅಯಿರ್ದ್ ಬೊಕ್ಕ ಮಧ್ಯಾಹ್ನ 11 ಗಂಟೆಗ್ ಸಭಾ ಲೇಸ್ ನಡಪುಂಡು. ನೆತ್ತ ಅಧ್ಯಕ್ಷತೆನ್ ವೆಂಕಟ್ರಮಣ ಮುಚ್ಚಿನ್ನಯ ಕಾರಿಂಜ (ಖ್ಯಾತ ಜ್ಯೋತಿಷ್ಯೆರ್) ಒಯಿಸೊನ್ವೆರ್. ಕರ್ನಾಟಕ ರಾಜ್ಯ ಹಿಂಜಾವೇ ಗೌರವಾಧ್ಯಕ್ಷೆರ್, ಶ್ರೀ ವಜ್ರದೇಹಿ ಮಠ, ಗುರುಪುರದ ಶ್ರೀ ಶ್ರೀ ಪರಮಪೂಜ್ಯ ರಾಜಶೇಖರಾನಂದ ಸ್ವಾಮೀಜಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಕರ್ನಾಟಕ ದಕ್ಷಿಣ ಹಿಂಜಾವೇ ಪ್ರಾಂತ ಸಂಚಾಲಕೆರ್ ದೋ. ಕೇಶವಮೂರ್ತಿ ದಿಕ್ಸೂಚಿ ಭಾಷಣನ್ ಮಲ್ಪೆರೆ ಉಲ್ಲೆರ್ ಪಂದ್ ಬಂಟ್ವಾಳ ತಾಲೂಕ್ ದ ಹಿಂದು ಜಾಗರಣ ವೇದಿಕೆದಕುಲು ತೆರಿಪಾದೆರ್.
ಉದ್ಯಾವರದ ಬೊಳ್ಜೆ ಶ್ರೀ ಬ್ರಹ್ಮಬೈದರ್ಕಳ ಗರಡಿ ಕ್ಷೇತ್ರಡ್ ಡಿ.8 – ಡಿ. 10 ಮುಟ್ಟ ವಾರ್ಷಿಕ ನೇಮೋಚ್ಚಯ ನಡಪರೆ ಉಂಡು.
ಡಿ.8 ತಾರೀಕ್ ಗುರುವಾರ ಕಾಂಡೆ 6 ಗಂಟೆಗ್ ತೋರಣ ಪ್ರತಿಷ್ಠೆ, 6.15 ಕ್ಕ್ ನುಪ್ಪು ಸೇವೆದ ಹಸಿರುವಾಣಿ ಗರಡಿ ಬರಿಯರೆ, 6.30 ಗ್ ನವಕ ಪ್ರಧಾನ ಹೋಮ ನಡಪರೆ ಉಂಡು. ಡಿ.9 ಗ್ ಸುಕ್ರಾರ ಮಧ್ಯಾಹ್ನ 12.05 ಗಂಟೆಗ್ ಮಹಾಪೂಜೆ, 12.15 ಗ್ ಪಲ್ಲಪೂಜೆ ಆದ್, ಬಯ್ಯ 2.30 ಗಂಟೆಗ್ ಶ್ರೀ ಬೈದರ್ಕಳ ನೇಮ ನಡಪರೆ ಉಂಡು. ಡಿ.10 ಸನಿವಾರ ಮಧ್ಯಾಹ್ನ 2.30 ಗಂಟೆಗ್ ಮಾಯಂದಾಲ್ ನೇಮ, ಬಯ್ಯ 6.30 ಗಂಟೆಗ್ ವ್ಯಾಘ್ರ ಚಾಮುಂಡಿ ಕೋಲ ನಡಪರೆ ಉಂಡು.
ಈ ಲೇಸ್ಗ್ ಮಾತ ಭಕ್ತೆರ್ ಬತ್ತ್ದ್ ಸಿರಿಮುಡಿ ಗಂಧ-ಪ್ರಸಾದನ್ ದೆತೊಂದು, ಶ್ರೀ ಬ್ರಹ್ಮಬೈದರ್ಕಳ ಅಂಚನೆ ಕ್ಷೇತ್ರದ ಮಹಾಶಕ್ತಿಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಬ್ರಹ್ಮಬೈದರ್ಕಳ ಗರಡಿ ಸೇವಾ ಸಮಿತಿ (ರಿ.) ದ ಅಧ್ಯಕ್ಷೆರ್ ಬೊಕ್ಕ ಸರ್ವ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕಿನ್ನಿಗೋಳಿ : ಕಾಂತಾಬಾರೆ-ಬೂದಾಬಾರೆ ಫ್ರೆಂಡ್ಸ್ ಕ್ಲಬ್ ಐಕಳ ನೆತ್ತ ಮುತಾಲಿಕೆಡ್ ಸಾರ್ವಜನಿಕ ಸೇವಾ ಚಟುವಟಿಕೆಲೆನ ಸಹಾಯಾರ್ಥವಾದ್ ಗ್ರಾಮೀಣ ವಲಯ ಮಟ್ಟದ ವಾಲಿಬಾಲ್ ಪಂದ್ಯಾಟ-2022 ಡಿ.25 ಐತಾರದಾನಿ ಬೊಲ್ಪುಗು 9 ಗಂಟೆಗ್ ಐಕಳ ಕಂಬುಲದ ಮಂಜ್ಜೊಟ್ಟಿ ಕಂಡದ ಕೈತಲ್ ದ ಮೈದಾನಡ್ ನಡಪರೆ ಉಂಡು.
ಅಂಚನೆ ಈ ಪಂದ್ಯಾಡ್ ಗೆಂದಿನಕ್ಲೆಗ್ ಸುರುತ ಇನಾಮ್ 10,001/- ಬೊಕ್ಕ ಶಾಶ್ವತ ಫಲಕ, ರಡ್ಡ್ ನೇ ಇನಾಮ್ 7001/- ಶಾಶ್ವತ ಫಲಕ, ಮೂಜಿನೇ ಇನಾಮ್ ಶಾಶ್ವತ ಫಲಕ, ನಾಲ್ ನೇ ಇನಾಮ್ ಶಾಶ್ವತ ಫಲಕ ತಿಕ್ಕುಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಮಂಜೇಶ್ವರದ ಪೊಯ್ಯತ್ತಬೈಲ್ ಶ್ರೀ ಮಹಾವಿಷ್ಣುಮೂರ್ತಿ ದೇವಲ್ಯಡ್ ಜನವರಿ 22 – 27 ಮುಟ್ಟ ಶ್ರೀ ಮಹಾಗಣಪತಿ ಬೊಕ್ಕ ಶ್ರೀ ಮಹಾವಿಷ್ಣುಮೂರ್ತಿ ದೇವೆರೆನ ನೂತನ ಬಿಂಬ ಪುನಃ ಪ್ರತಿಷ್ಠೆ, ಅಷ್ಟಬಂಧ ಬ್ರಹ್ಮಕಲಶಾಭಿಷೇಕ ಉಚ್ಚಯ ನಡಪರೆ ಉಂಡು.
ಬ್ರಹ್ಮಶ್ರೀ ನೀಲೇಶ್ವರ ಉಚ್ಚಿಲತ್ತಾಯ ಪದ್ಮನಾಭ ತಂತ್ರಿಲೆನ ಮುತಾಲಿಕೆಡ್ ಗ್ರಾಮದ ಕೂಡುಕಟ್ಟ್ದ ಯಜಮಾನೆರ್ನ ಒಟ್ಟು ಸೇರಿಗೆಡ್ ಈ ಉಚ್ಚಯ ನಡಪರೆ ಉಂಡು. ಅಂಚನೆ 7 ದಿನಲ ವೈದಿಕ, ಧಾರ್ಮಿಕ ಅಂಚನೆ ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು.
ಜನವರಿ 22 ತಾರೀಕ್ಗ್ ಬಯ್ಯ 6 ಗಂಟೆಗ್ ಧಾರ್ಮಿಕ ಸಭಾ ಕಾರ್ಯಕ್ರಮ ಆದ್, 8.30 ಗ್ ನಾಟ್ಯನಿಲಯಂ ಶ್ರೀ ಬಾಲಕೃಷ್ಣ ಮಂಜೇಶ್ವರ ಶಿಷ್ಯ ವೃಂದರ್ದ್ ನೃತ್ಯ ಸಿಂಚನ, ರಾತ್ರೆ 10 ಗಂಟೆಗ್ ಶಾರದಾ ಆರ್ಟ್ಸ್ ಕಲಾವಿದೆರ್ (ರಿ.) ಮಂಜೇಶ್ವರ ಮೊಕುಲೆರ್ದ್ “ಯಾನ್ ಉಲ್ಲೆತ್ತ” ತುಳು ನಾಟಕ ನಡಪರೆ ಉಂಡು. ಅಂಚನೆ ಜನವರಿ 23 ತಾರೀಕ್ಗ್ ರಾತ್ರೆ 10 ಗಂಟೆಗ್ ಶಿವದೂತೆ ಗುಳಿಗೆ ಪೌರಾಣಿಕ ನಾಟಕ, ಜನವರಿ 24 ಕ್ಕ್ ಬಯ್ಯ 6.30 ಗಂಟೆಗ್ ಕಟೀಲು ಮೇಳರ್ದ್ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ, ಜನವರಿ 25 ಕ್ಕ್ ರಾತ್ರೆ 9 ಗಂಟೆಗ್ ಮಾಯೊದ ಮಾಯಂದಾಳ್ ತುಳು ನಾಟಕ, 26 ಕ್ಕ್ ರಾತ್ರೆ 10 ಗಂಟೆಗ್ ಶ್ರೀ ಬೆಂಕಿನಾಥೇಶ್ವರ ಕೃಪಾಪೋಷಿತ ದಶಾವತಾರ ಯಕ್ಷಗಾನ ಮಂಡಳಿರ್ದ್ ಸತ್ಯೊದ ಸ್ವಾಮಿ ಕೊರಗಜ್ಜ ಯಕ್ಷಗಾನ ನಡಪರೆ ಉಂಡು.
ಜನವರಿ 27 ತಾರೀಕ್ಗ್ ಕಾಂಡೆ 9.47 ರ್ದ್ 11.27 ತ್ತ ಮೀನ ಲಗ್ನಡ್ ಶ್ರೀ ಮಹಾವಿಷ್ಣು ದೇವೆರೆನ ಬಿಂಬ ಪ್ರತಿಷ್ಟೆ, ಅಷ್ಟಬಂಧ ಲೇಪನ, ಕುಂಭೇಶ ಕಲಶಾಭಿಷೇಕ, ಜೀವಕಲಶಾಭಿಷೇಕ, ಪರಿಕಲಶಾಭಿಷೇಕ ಬ್ರಹ್ಮಕಲಶ ಅಭಿಷೇಕ, ಪ್ರತಿಷ್ಠಾ ಬಲಿ ನಡಪರೆ ಉಂಡು.
