December 2022

ಇನಿರ್ದ್ ಭಾರತ-ಆಸ್ಟ್ರೇಲಿಯ ಮಹಿಳಾ ಟಿ20 ಕ್ರಿಕೆಟ್

ನವಿ ಬೊಂಬೈ: ನನ ರಡ್ಡ್ ತಿಂಗೊಲ್ಡು ದಕ್ಷಿಣ ಆಫ್ರಿಕಾಡ್ ಪೊಂಜೊವುಲೆನ ಟಿ20 ವಿಶ್ವಕಪ್‌ ಕ್ರಿಕೆಟ್ ಕೂಟ ನಡಪರೆ ಉಂಡು.

ನೆತ್ತ ಅಟ್ಟಣೆಗಾದ್ ಶುಕ್ರಾರರ್ದ್ ಭಾರತ-ಆಸ್ಟ್ರೇಲಿಯ ವನಿತಾ ತಂಡದೊಟ್ಟಿಗೆ ಐನ್ ಪಂತೊದ ಟಿ20 ಸರಣಿಡ್ ಗೊಬ್ಬೆರೆ ಉಂಡು. ಈ ಸರಣಿದ ಸುರುತ ಪಂತೊ ಶುಕ್ರಾರ ಡಿ.ವೈ.ಪಾಟೀಲ್‌ ಕ್ರೀಡಾಂಗಣಡ್ ಬಯ್ಯಗ್ 7 ಗಂಟೆಗ್ ಸುರು ಆಪುಂಡು. ಈ ಸರಣಿಡ್ ಹರ್ಮನ್‌ಪ್ರೀತ್‌ ಕೌರ್‌ ಕೂಟ ಎಡ್ಡೆ ನಿರ್ವಹಣೆ ಕೊರ್ಪುನ ಉತ್ಸಾಹಡ್ ಉಂಡು. ಆಂಡ ಮೂಜಿ ದಿನತ ಪಿರವು ಕೂಟದ ಕೋಚ್‌ ರಮೇವ್‌ ಪೊವಾರ್‌ ಮೆರೆನ್ ಹಠಾತ್‌ ದೆತ್ತಿನವು ಗೊಬ್ಬುನಕ್ಲೆಗ್ ಮಾಸ್ತ್ ಬೇನೆ ಆತ್ಂಡ್. ಇತ್ತೆ ಬ್ಯಾಟಿಂಗ್‌ ಕೋಚ್‌ ಆದ್ ಹೃಷಿಕೇಶ್‌ ಕಾನಿಟ್ಕರ್‌ ಮಾರ್ಗದರ್ಶನ ಕೊರಿಯೆರೆ ಉಲ್ಲೆರ್.

ಟಿ20 ಸರಣಿದ ವೇಳಾಪಟ್ಟಿ:

ದಿನ / ಜಾಗೆ
ಡಿ. 9 ಡಿ.ವೈ. ಪಾಟೀಲ್‌ ಸ್ಟೇಡಿಯಂ
ಡಿ. 11 ಡಿ.ವೈ. ಪಾಟೀಲ್‌
ಡಿ. 14 ಬ್ರಬೋರ್ನ್
ಡಿ. 17 ಬ್ರಬೋರ್ನ್
ಡಿ. 20 ಬ್ರಬೋರ್ನ್

ಗೋಳಿತ್ತೊಟ್ಟುಡು ಕಾರ್ ಪಲ್ಟಿ

ನೆಲ್ಯಾಡಿ: ಉಬಾರ್ ರ್ದ್ ಗೋಳಿತ್ತೊಟ್ಟುಗು ಬರೊಂದು ಇತ್ತಿನ ಸ್ವಿಫ್ಟ್ ಕಾರೊಂಜಿ ಗೋಳಿತ್ತೊಟ್ಟು ಸರಕಾರಿ ಶಾಲೆದ ಎದುರು ಡ್ರೈವರ್ ನ ಕೈ ತತ್ತ್ ದ್ ಪಲ್ಟಿಯಾಯಿನ ಘಟನೆ ಗುರುವಾರ ಮಧ್ಯಾಹ್ನ ನಡತ್ಂಡ್.

ಈ ಕಾರ್ ಗೋಳಿತ್ತೊಟ್ಟು ಪಿ.ಎಸ್.ಸ್ಟೋರ್ ಧಣಿ ಪಿ.ಎಸ್.ಮಹಮ್ಮದ್‌ ಪನ್ಪನರೆನ ಪಂದ್ ತೆರಿದ್ ಬೈದ್ಂಡ್. ಈ ಘಟನೆಡ್ ಕಾರ್ ಲಗಾಡಿ ಪೋತ್ಂಡು. ಡ್ರೈವರ್ ಮಹಮ್ಮದ್‌ ಅಪಾಯರ್ದ್ ಪಾರಾತೆರ್ ಪಂದ್ ವರದಿ ಆತ್ಂಡ್.

ಮ್ಯಾಂಡಸ್ ಚಂಡಮಾರುತ ಬೀಜುನ ಪೋಡಿಗೆ: ತಮಿಳುನಾಡ್ ಡ್ ರೆಡ್ ಅಲರ್ಟ್

ಚೆನ್ನೈ: ಬಂಗಾಳ ಕೊಲ್ಲಿಡ್ ನಿರ್ಮಾಣ ಆಯಿನ ಮ್ಯಾಂಡಸ್ ಚಂಡಮಾರುತದ ಶಕ್ತಿ ಹೆಚ್ಚಾವೊಂದುಂಡು. ಅಂಚಾದ್ ಮಲ್ಲ ಮಟ್ಟ್ ದ ಚಂಡಮಾರುತವಾದ್ ಬದಲಾಪುನ ಹಂತಡ್ ಉಂಡು ಪಂದ್ ಹವಾಮಾನ ಇಲಾಖೆ ಸೂಚನೆ ಕೊರ್ತುಂಡು.

ಈ ಬಗೆಟ್ ತಮಿಳುನಾಡ್ ದ ಮೂಜಿ ಜಿಲ್ಲೆಲೆಡ್ ಬೊಕ್ಕ ಚೆಂಗಲ್ ಪೆಟ್ಟು, ಕಾಂಚೀಪುರಂ ಬೊಕ್ಕ ವಿಲ್ಲುಪುರಂ ಜಿಲ್ಲೆಲೆಡ್ ರೆಡ್ ಅಲರ್ಟ್ ಘೋಷಣೆ ಆತ್ಂಡ್. ಚಂಡಮಾರುತರ್ದ್ ತಮಿಳುನಾಡ್ ಡ್ ಭಾರೀ ಬರ್ಸ ಬರ್ಪುನ ಸಾಧ್ಯತೆ ಉಂಡು ಪಂದ್ ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ತೆರಿಪಾದ್ಂಡ್.

ಕಲ್ವತಾದಿಡ್ ಪೊಯ್ಯೆ ದೆಪ್ಪುನ ಕೆಲವು ಕಡೆಕ್ಕ್ ಲೋಕಾಯುಕ್ತ ರೈಡ್

ಕುಡ್ಲ: ಕಲ್ವ ತಾದಿಡ್ ಪೊಯ್ಯೆ ಕೊನೊಪುನ ದಂಧೆದಕಲ್ನೊಟ್ಟಿಗೆ ಗಣಿ ಬೊಕ್ಕ ಭೂ ವಿಜ್ಞಾನ ಇಲಾಖೆದ ಅಧಿಕಾರಿಲು ಕಾಸ್ ದೆತೊಂದು ಶಾಮಿಲಾತೆರ್ ಪನ್ಪುನ ದೂರು ಕುಡ್ಲ ಲೋಕಾಯುಕ್ತ ಇಲಾಖೆಗ್ ಬತ್ತಿನ ಕಾರಣ ಲೋಕಾಯುಕ್ತ ಪೊಲೀಸೆರೆನ ತಂಡ ಕೋಡೆ ಜಿಲ್ಲೆದ ಮೂಜಿ ತಾಲೂಕ್ ದ ಪೊಯ್ಯೆದ ಅಡ್ಡೆಗ್ ದಾಳಿ ಮಲ್ದೆರ್.

ಬಂಟ್ವಾಳ ತಾಲೂಕ್, ಬೆದ್ರ ತಾಲೂಕ್, ಬೊಲ್ತೇರ್ ತಾಲೂಕ್ ಡ್ ಮೂಜಿ ತಂಡವಾದ್ ದಾಳಿ ಮಲ್ದೆರ್. ಬೊಲ್ತೇರ್ ತಾಲೂಕ್ ದ ಧರ್ಮಸ್ಥಳ, ಪುದುವೆಟ್ಟು, ಕಕ್ಕಿಂಜೆ ಮುಂಡಾಜೆ, ವೇಣೂರು ಕಡೆಟ್ ಲೋಕಾಯಕ್ತ ಡಿವೈಎಸ್ಪಿ ಚೆಲುವರಾಜ್ ಬೊಕ್ಕ ತಂಡ ದಾಳಿ ಮಲ್ತ್ ದ್, ಧರ್ಮಸ್ಥಳ ಗ್ರಾಮದ ನೇತ್ರಾವತಿದಲ್ಪ ಪೊಯ್ಯೆ ಕೊನೊಯೆರೆ ಇತ್ತಿನ ರಡ್ಡ್ ಟಿಪ್ಪರ್ ಬೊಕ್ಕ ಒಂಜಿ ದೋಣಿ ವಶಕ್ ಪಡೆದ್ ಧರ್ಮಸ್ಥಳ ಪೊಲೀಸೆರೆಗ್ ಕೊರಿಯೆರ್. ಬಂಟ್ವಾಳ ತಾಲೂಕ್ ದ ತುಂಬೆದ ಸುಮಾರ್ ಕಡೆಟ್ ಲೋಕಾಯುಕ್ತ ಇನ್ಸೆಕ್ಟರ್ ಅಮಾನುಲ್ಲಾ ಬೊಕ್ಕ ತಂಡ ದಾಳಿ ಮಲ್ತ್ ದ್, ಒಂಜಿ ಪೊಯ್ಯೆ ದೆತೊಂದು ಇತ್ತಿನ ಓಡನ್ ವಶಕ್ ಪಡೆದ್ ಬಂಟ್ವಾಳ ಪೊಲೀಸೆರೆಗ್ ಕೊರಿಯೆರ್. ಬೆದ್ರ ತಾಲೂಕ್ ದ ಎಡಪದವು, ಕೈಕಂಬ, ಅಡ್ಯಾರು ಸೇರ್ದ್ ಸುಮಾರ್ ಕಡೆಟ್ ಲೋಕಾಯಕ್ತ ಡಿವೈಎಸ್ಪಿ ಕಲಾವತಿ ಬೊಕ್ಕ ತಂಡ ದಾಳಿ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.

‘ಸೊಲ್ಮೆಲು ಗುಜರಾತ್’ ಪ್ರಧಾನಿ ನರೇಂದ್ರ ಮೋದಿ ಟ್ವೀಟ್

ಡೆಲ್ಲಿ: ಗುಜರಾತ್‌ ವಿಧಾನಸಭಾ ಚುನಾವಣೆಡ್ ದಾಖಲೆದ ವೋಟುಡು ಬಿಜೆಪಿ ಗೆಂದಿನ ಬೊಕ್ಕ ಪ್ರಧಾನಿ ನರೇಂದ್ರ ಮೋದಿ ಗುಜರಾತ್ ಜನಕ್ಲೆಗ್ ಸೊಲ್ಮೆ ಸಂದಾದೆರ್.

ಈ ಬಗೆಟ್ ಟ್ವೀಟ್ ಮಲ್ತಿನ ಪ್ರಧಾನಿ ಮೋದಿ, ಸೊಲ್ಮೆಲು ಗುಜರಾತ್, ಗುಜರಾತ್‌ದ ಜನಶಕ್ತಿಗ್ ಎನ್ನ ಕೈ ಮುಗಿಪೆ. ಅಭಿವೃದ್ದಿ ರಾಜಕೀಯಗ್ ಗುಜರಾತ್‌ದ ಜನ ಆಶೀರ್ವಾದ ಮಲ್ದೆರ್. ಈ ಪೊರ್ತುಡು ಎಂಕುಲು ವೇಗವಾದ್ ಅಭಿವೃದ್ದಿ ಪಥಡ್ ಪೋವೊಡು ಪನ್ಪುನ ಆಕಾಂಕ್ಷೆ ಜನತ ಆತ್ಂಡ್. ಗುಜರಾತ್‌ದ ಜನ ಕೊರ್ನ ಈ ತೀರ್ಪುಗ್ ಯಾನ್ ತರೆ ತಗ್ಗಾವೆ ಪಂದ್ ಪಂನ್ತೆರ್.