ಪಾಟ್ನಾ: ಬಿಹಾರದ ಔರಂಗಾಬಾದ್ಡ್ ಗ್ಯಾಸ್ ಸಿಲಿಂಡರ್ ಪುಡಾದ್ ರಡ್ಡ್ ಮಾಳಿಗೆದ ಕಟ್ವಾನೊಗು ತೂ ಪೊತ್ತ್ದ್ಂಡ್.
ಈ ಘಟನೆಡ್ 30 ರ್ದ್ಲ ಎಚ್ಚ ಜನಕ್ಕ್ ಪೆಟ್ಟಾದಿತ್ತ್ದ್, ಮಸ್ತ್ ಜನ ಗಂಭೀರ ಸ್ಥಿತಿಟ್ಟ್ ಉಲ್ಲೆರ್ ಪಂದ್ ಮಾಹಿತಿ ತಿಕ್ಕ್ದ್ಂಡ್.
ಕಟ್ವಾನೊಡು ಇತ್ತಿನ ಕುಟುಂಬವೊಂಜಿ ಛಾತ್ ಪೂಜೆಗಾದ್ ಕಾಂಡೆ ಅಟಿಲ್ ತಯಾರ್ ಮಲ್ತೊಂದಿತ್ತಿನ ಪೊರ್ತುಡು ಈ ಘಟನೆ ನಡತ್ಂಡ್. ಘಟನೆದ ಬಗೆಟ್ ಸರಿಯಾಯಿನ ಮಾಹಿತಿ ತೆರಿದ್ ಬರೊಡಾತೆ ಪಂದ್ ಸಬ್ ಇನ್ಸ್ಪೆಕ್ಟರ್ ವಿನಯ್ ಕುಮಾರ್ ಸಿಂಗ್ ಪಂತೆರ್.
ಬೊಂಬಾಯಿ: ಕರಿನ 13 ವರ್ಷರ್ದ್ ಮಲಾಡ್ ಪೂರ್ವದ ಯುವ ನ್ಯಾಯವಾದಿ ಜಗನ್ನಾಥ್ ಎನ್ ಶೆಟ್ಟಿ ಮೆರೆನ ಮಾರ್ಗದರ್ಶನಡ್, ಸಮಾಜ ಸೇವಕೆರ್ ಜಗನ್ನಾಥ್ ಎಚ್. ಮೆಂಡನ್ ಮೆರೆನ ಮುತಾಲಿಕೆಡ್ ಕುರಾರ್ ವಿಲೇಜ್ದ ತುಳು-ಕನ್ನಡಿಗೆರೆನ್ ಒಟ್ಟು ಮಲ್ತ್ದ್ ಸ್ಥಾಪನೆ ಆಯಿನ ಶ್ರೀ ವರಮಹಾಲಕ್ಷ್ಮೀ ಪೂಜಾ ಸಮಿತಿ ಬೇತೆ ಬೇತೆ ಲೇಸ್ನ್ ಮಲ್ತೊಂದು ಪುಗರ್ತೆ ಪಡೆತ್ತ್ಂಡ್.
ಸಮಿತಿದ ಯುವ ವಿಭಾಗದ ಮುತಾಲಿಕೆಡ್ ಅಕ್ಟೋಬರ್ 30 ಗ್ ಇಡೀ ದಿನ ಮಲಾಡ್ ಪೂರ್ವದ ಚಿಲ್ಡ್ರನ್ಸ್ ಅಕಾಡೆಮಿ ಶಾಲೆದ ಸಭಾಂಗಣಡ್ ಪೂಜಾ ಸಮಿತಿದ ಅಧ್ಯಕ್ಷೆರ್, ನ್ಯಾಯವಾದಿ ಜಗನ್ನಾಥ್ ಎನ್.ಶೆಟ್ಟಿ ಮೆರೆನ ಅಧ್ಯಕ್ಷತೆಡ್ ಯುವ ವಿಭಾಗದ ಕಾರ್ಯಾಧ್ಯಕ್ಷೆರ್ ರಶ್ಮಿ ಎಸ್ ಪೂಜಾರಿ, ಕಾರ್ಯದರ್ಶಿ ಸೌಮ್ಯ ಜೆ.ಮಂಡನ್ ಮೊಕಲೆನ ಮುತಾಲಿಕೆಡ್ ಜೋಕ್ಲೆನ ಉಚ್ಚಯ ನಡಪರೆ ಉಂಡು.
ಕಾಂಡೆ ಮೆರವಣಿಗೆಡ್ ಸುರು ಆದ್ 10 ಗಂಟೆಗ್ ಉದಿಪನ ಲೇಸ್ ನಡಪರೆ ಉಂಡು. ಬಂಟರ ಸಂಘ ಬೊಂಬಾಯಿದ ಯುವ ವಿಭಾಗದ ಕಾರ್ಯಾಧ್ಯಕ್ಷೆರ್ ಸಾಗರ್ ಡಿ.ಶೆಟ್ಟಿ, ಬಾಂಬೆ ಬಂಟ್ಸ್ ಅಸೋಸಿಯೇಶನ್ದ ಯುವ ವಿಭಾಗದ ಕಾರ್ಯಧ್ಯಕ್ಷೆರ್ ಶಶಿಕಾಂತ್ ರೈ ಅಂಚನೆ ಮಸ್ತ್ ಜನ ಬಿನ್ನೆರ್ ಲೇಸ್ಡ್ ಪಾಲ್ ಪಡೆಯರೆ ಉಲ್ಲೆರ್.
ತುಳು ಕೂಟ ಫೌಂಡೇಶನ್, ನಾಲಾಸೋಪಾರ ಉಂದೆತ್ತ ಅಧ್ಯಕ್ಷೆರ್ ಶಶಿಧರ ಕೆ.ಶೆಟ್ಟಿ ಇನ್ನಂಜೆ ಮೇರ್ ಸಾಂಸ್ಕೃತಿಕ ಲೇಸ್ನ್ ಉದಿಪನ ಮಲ್ಪರೆ ಉಲ್ಲೆರ್. ಅಂಚನೆ ಈ ಲೇಸ್ಡ್ ನಲಿಕೆ, ಯಕ್ಷಗಾನ, ಮಿಮಿಕ್ರಿ, ಭಾಷಣ ಸೇರಿನಂಚನೆ ಬೇತೆ ಬೇತೆ ರೀತಿದ ಕಾರ್ಯಕ್ರಮ ನಡಪರೆ ಉಂಡು. ಈ ಲೇಸ್ಡ್ ಮಾತ ತುಳು-ಕನ್ನಡಿಗೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆಯೊಡು ಪಂದ್ ಮಲಾಡ್ ಶ್ರೀ ವರಮಹಾಲಕ್ಷ್ಮೀ ಪೂಜಾ ಸಮಿತಿದ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ : ಕನ್ನಡ ನಾಡು-ನುಡಿತ ಪೆರ್ಮೆನ್ ಸಾರುನ ಕೋಟಿ ಕಂಠ ಗಾಯನ ಲೇಸ್ ಪೇಂಟೆದ ಪಣಂಬೂರು ಕಡಲ್ ದ ಕಿನಾರೆಡ್ ಪೊರ್ಲುಡೇ ನಡತ್ಂಡ್.
ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್ ಬೊಕ್ಕ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ವತಿರ್ದ್ ಜಿಲ್ಲಾಧಿಕಾರಿ ಬೊಕ್ಕ ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಡಾ.ಕುಮಾರ್ ಮೇರೆನ ಮುತಾಲಿಕೆಡ್ ಗೀತ ಗಾಯನ ಲೇಸ್ ನಡತ್ಂಡ್.
ಈ ಲೇಸ್ ಡ್ ಶಾಸಕೆರ್ ಡಾ. ವೈ. ಭರತ್ ಶೆಟ್ಟಿ, ಮೀನುಗಾರಿಕೆ ಅಭಿವೃದ್ಧಿ ನಿಗಮದ ಅಧ್ಯಕ್ಷೆರ್ ಎ.ವಿ. ತೀರ್ಥರಾಮ ಅಂಬೆಕಲ್ಲು, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಋಷಿಕೇಶ್ ಭಗವಾನ್ ಸೋನಾವಣೆ, ಮಹಾನಗರ ಪಾಲಿಕೆದ ಆಯುಕ್ತೆರ್ ಅಕ್ಷಯ್ ಶ್ರೀಧರ್, ಅಪರ ಜಿಲ್ಲಾಧಿಕಾರಿ ಕೃಷ್ಣಮೂರ್ತಿ, ಪ್ರವಾಸೋದ್ಯಮ ಇಲಾಖೆ ಉಪ ನಿರ್ದೇಶಕ ಮಾಣಿಕ್ಯ, ಸಂಚಾರ ವಿಭಾಗದ ಎಸಿಪಿ ಗೀತಾ ಕುಲಕರ್ಣಿ, ಬೇತೆ ಬೇತೆ ಇಲಾಖೆದ ಅಧಿಕಾರಿಲು, ಸುಮಾರ್ ಶಾಲಾ ಕಾಲೇಜ್ ದ ವಿದ್ಯಾರ್ಥಿಲು, ಶಿಕ್ಷಕೆರ್-ಶಿಕ್ಷಕಿಯೆರ್ ಪಾಲ್ ಪಡೆತೆರ್.
ಕವಿ ಕುವೆಂಪುನ ನಾಡಗೀತೆದೊಟ್ಟಿಗೆ ಕೋಟಿ ಕಂಠ ಗಾಯನನ್ ಸುರು ಮಲ್ತೆರ್. ಬೊಕ್ಕ ಉದಯವಾಗಲಿ ನಮ್ಮ ಚೆಲುವ ಕನ್ನಡ ನಾಡು, ಬಾರಿಸು ಕನ್ನಡ ಡಿಂಡಿಮವ, ಹಚ್ಚೇವು ಕನ್ನಡದ ದೀಪ, ಚೆನ್ನವೀರ ಕಣವಿನ ವಿಶ್ವ ವಿನೂತನ ವಿದ್ಯಾಚೇತನ ಬೊಕ್ಕ ಹುಟ್ಟಿದರೆ ಕನ್ನಡ ನಾಡಲ್ಲಿ ಹುಟ್ಟಬೇಕು ಪದ್ಯನ್ ಪನ್ಪುನೆತೊಟ್ಟಿಗೆ ಕೋಟಿ ಕಂಠ ಗಾಯನ ಪೊರ್ಲು ಆಂಡ್.
ಒಡಿಪುದ ಕೋಟತಟ್ಟು ಗ್ರಾಮ ಪಂಚಾಯತ್ ವ್ಯಾಪ್ತಿದ ಪಡುಕರೆಡ್ ರಾಶಿ ರಾಶಿ ಬೂತಾಯಿ ಮೀನುಲು ಬಲೆಗ್ ಬೂರ್ದುಂಡು.
ನೆರ್ದಾವರ ಮೀನ್ ಪ್ರಿಯೆರ್ ಮಸ್ತ್ ಖುಷಿ ಆತೆರ್. ವಿಷಯ ತೆರಿದ್ ಕೈತಲ್ದಕುಲು ಬಾಜನ ಪತೊಂದು ಕಡಲಗ್ ಬೈದೆರ್.
ವಸಾಯಿ : ಶ್ರೀ ಜೀವ್ ದಾನಿ ಯಕ್ಷಕಲಾ ವೇದಿಕೆ ವಸಾಯಿದ 6 ನೇ ವರ್ಷದ ಅಂಗವಾದ್ ಜೀವದಾನಿ ಯಕ್ಷಕಲಾ ವೇದಿಕೆದ ಜೋಕುಲೆರ್ದ್ ಶ್ರೀ ಶನೀಶ್ವರ ಮಹಾತ್ಮೆ ಯಕ್ಷಗಾನ ಬಯಲಾಟ ಅ.30 ಐತಾರದಾನಿ ಮಧಾಹ್ನ 3 ಗಂಟೆಗ್ ವಸಾಯಿ ಅರ್ಣ ಸ್ವರ್ಣ ಬ್ಯಾಂಕ್ವೆಟ್ ಹಾಲ್ ಡ್ ನಡಪರೆ ಉಂಡು.
ಇಂಗ್ಲೀಷ್ ಮೀಡಿಯಂದ ಜೋಕುಲೆಗ್ ತುಳು ಕನ್ನಡ ಕಲ್ಪಾದ್ ಯಕ್ಷಗಾನ ತರಬೇತಿ ಕೊರ್ನ ಯಕ್ಷ ಗುರು ಅಜೇಕಾರು ಬಾಲಕೃಷ್ಣ ಶೆಟ್ರೆನ ನಿರ್ದೇಶನಡ್ ಈ ಪ್ರದರ್ಶನ ನಡಪುಂಡು. ಭಾಗವತೆರಾದ್ ದೇವಿಪ್ರಸಾದ್ ಆಳ್ವ ತಲಪಾಡಿ ಬೊಕ್ಕ ಹರೀಶ್ ಶೆಟ್ಟಿ ಕಟೀಲ್, ಮದ್ದಳೆಡ್ ಆನಂದ ಶೆಟ್ಟಿ ಇನ್ನ ಬೊಕ್ಕ ಹರೀಶ್ ಸಾಲ್ಯಾನ್, ಚೆಂಡೆಡ್ ಪ್ರಶಾಂತ್ ಶೆಟ್ಟಿ ವಗೆನಾಡು, ಚಕ್ರತಾಳಡ್ ಅವಕಾಶ್ ಜೈನ್ ಕೆರ್ವಾಶೆ ಉಲ್ಲೆರ್ ಪಂದ್ ವಸಾಯಿ ತಾಲೂಕ್ ಹೋಟೆಲ್ ಅಸೋಸಿಯೇಶನ್ ದ ಗುರ್ಕಾರ್ಲು, ಸ್ಥಾಪಕೆರ್ ನಾಗರಾಜ್ ಎನ್ ಶೆಟ್ಟಿ ವಸಾಯಿ, ಸಂಸ್ಥಾಪಕಿ ಯಶೋದ ನಾಗರಾಜ್ ಶೆಟ್ಟಿ ವಸಾಯಿ, ಗೌರವಾಧ್ಯೆಕ್ಷೆರ್ ಶಂಕರ್ ಕೆ ಆಳ್ವ ವಸಾಯಿ, ಅಧ್ಯಕ್ಷೆರ್ ಮಂಜುನಾಥ ಶೆಟ್ಟಿ ಕೊಡ್ಲಾಡಿ, ಉಪಾಧ್ಯೆಕ್ಷೆರ್ ಅಶೋಕ್ ಕೆ ಶೆಟ್ಟಿ ವಸಾಯಿ, ಸಲಹಾ ಸಮಿತಿ ಅಧ್ಯಕ್ಷೆರ್ ರಮೇಶ್ ವಿ ಶೆಟ್ಟಿ ಕಾಪು, ಸಲಹಾ ಸಮಿತಿ ಉಪಾಧ್ಯೆಕ್ಷೆರ್ ಮೋಹನ್ ಬಿ ಶೆಟ್ಟಿ ನಾಲಸೋಪರ, ಕಾರ್ಯದರ್ಶಿ ನವೀನ್ ಎ ಅಂಚನ್ ವಸಾಯಿ ಲೆಪ್ಪೋಲೆಡ್ ತೆರಿಪಾದೆರ್.
ಬೊಂಬೈ: ಬೊಂಬೈದ ಸೆಂಟ್ರಲ್ ವಿಭಾಗದ ಅತುಲ್ ಡ್ ವಂದೇ ಭಾರತ್ ರೈಲ್ ಕೈಕಂಜಿಗ್ ತಾಂಟ್ ದ್ ರೈಲ್ ದ ಎದುರುಭಾಗಗ್ ಪೆಟ್ಟಾಯಿನ ಘಟನೆ ಇನಿ ಬೊಲ್ಪುಗು ನಡತ್ಂಡ್.
ಈ ಬಗೆಟ್ ಭಾರತೀಯ ರೈಲ್ವೆ ಇಲಾಖೆ ಟ್ವೀಟ್ ಮಲ್ದ್ಂಡ್, ನೆಕ್ ಗುದ್ದಿನ 4 ಎರ್ಮೆಲು ತೀರ್ ಪೋತ. ಒಂಜೇ ತಿಂಗೊಲ್ ಡ್ ಮೂಜಿನೇ ಸಲ ಈ ಘಟನೆ ನಡಪುನು.
ಕುಡ್ಲ: ಸುರತ್ಕಲ್ ದ ಫಾಝಿಲ್ ಕೆರ್ತಿನ ಕೇಸ್ ದ ಆರೋಪಿಗ್ ಜಾಮೀನ್ ಕೊರ್ಯೆರೆ ಕುಡ್ಲದ ನಾಲ್ ನೇ ಜಿಲ್ಲೆ ಬೊಕ್ಕ ಸತ್ರ ಕೋರ್ಟ್ ನಿರಾಕರಣೆ ಮಲ್ದ್ಂಡ್.
ಈ ಬಗೆಟ್ ಅಜಿತ್ ಕ್ರಾಸ್ತಾ ಕೋರ್ಟ್ ಗ್ ಅರ್ಜಿ ಸಂದಾದಿತ್ತೆರ್. ಆಂಡ ಕೋರ್ಟ್ ಅರ್ಜಿನ್ ನಿರಾಕರಣೆ ಮಲ್ದ್ಂಡ್. ಮೇರ್ ಕೊಲೆ ಮಲ್ಪರೆ ಗಲಸಿನ ಕಾರ್ ದ ಮಾಲಕೆ. ಈ ಕೇಸ್ ದ ಏಳ್ ನೇ ಆರೋಪಿ.
ಬೊಲ್ತೇರ್: ಬೊಲ್ತೇರ್ ತಾಲೂಕ್ ದ ಆಸ್ಪತ್ರೆಡ್ ರೋಗಿಲೆಗ್ ಸರಿಯಾಯಿನ ಚಿಕಿತ್ಸೆ ಕೊರೊಂದು ಇಜ್ಜೆರ್ ಪಂದ್ ಬೊಲ್ತೇರ್ ತಹಶೀಲ್ದಾರ್ ಕಚೇರಿಗ್ ದೂರು ಬತ್ತ್ ದ್ ಇತ್ತ್ಂಡ್. ಈ ಬಗೆಟ್ ಬೊಲ್ತೇರ್ ತಹಶೀಲ್ದಾರ್ ಪೃಥ್ವಿ ಸಾನಿಕಾಂ ಇನಿ ಆಸ್ಪತ್ರೆಗ್ ದಿಢೀರ್ ಭೇಟಿ ಕೊರ್ತೆರ್.
ಈ ಪೊರ್ತುಡು ಇನ್ ವಾಟರ್ ಸಮಸ್ಯೆ ಇಪ್ಪುನವು ಗೊತ್ತಾತ್ಂಡ್. ಬೊಕ್ಕ ವೈದ್ಯಾಧಿಕಾರಿ ಚಂದ್ರಕಾಂತ್ ಬೊಕ್ಕ ಸಿಬ್ಬಂದಿನ್ ಲೆತ್ತ್ ದ್, ನೆರ್ತೆರ್. ಅವ್ವತ್ತಂದೆ ಏಜೆನ್ಸಿಗ್ ಕೂಡ್ಲೆ ಪತ್ರ ಬರೆದ್ ಸಮಸ್ಯೆ ಸರಿ ಮಲ್ಪೆರೆ ಪಂತೆರ್.
ಈ ಪೊರ್ತುಡು ಮೇರೆನ ಟೀಮ್ ಬೊಕ್ಕ ಕಂದಾಯ ನಿರೀಕ್ಷಕೆರ್ ಪ್ರತೀಶ್ ಬೊಕ್ಕ ಚಾಲಕೆರ್ ಸಂತೋಷ್ ಒಟ್ಟಿಗೆ ಇತ್ತೆರ್.
ಕೊಲ್ಲಂ: ಹೆಲ್ಮೆಟ್ ಪಾಡಂದಿನ ಕಾರ್ ಡ್ರೈವರ್ ಗ್ ಕೊಲ್ಲಂ ಟ್ರಾಫಿಕ್ ಪೊಲೀಸೆರ್ ನೋಟಿಸ್ ಕಡಪದೆರ್.
ಚಡಯಮಂಗಲಂ ಕೂರಿ ಮೂಲದ ಸಜೀವ್ ಕುಮಾರ್ ಮೇರೆಗ್ ಈ ನೋಟಿಸ್ ಬೈದ್ಂಡ್. ಮೇರ್ ಕರಿನ ಮೇ ತಿಂಗೊಲ್ ಡ್ ಹೆಲ್ಮೆಟ್ ಪಾಡಂದೆ ಗಾಡಿ ಕೊನೊತೆರ್ ಪಂದ್ ಸಂಚಾರಿ ಪೊಲೀಸೆರ್ ನೋಟಿಸ್ ಕಡಪಾದೆರ್. ಕೆಎಲ್ 24 ಎಂ 3474 ನಂಬರ್ ದ ಸಜೀವ್ ಕುಮಾರ್ ಮೇರೆನ ಸ್ವಿಫ್ಟ್ ಕಾರ್ ದ ಪುದರ್ ಡ್ ನೋಟಿಸ್ ಬೈದ್ಂಡ್. ದಂಡ ಪಾವತಿ ಮಲ್ಪೊಡು ಪಂದ್ ನೋಟಿಸ್ಡ್ ಉಂಡು. ನೆಕ್ ಸಜೀವ್ ಎಂಕ್ ಬೈಕ್ ಕೊನೊಯೆರೆ ಬರ್ಪುಜಿ ಪಂದ್ ಪಂತೆರ್. ಈ ಬಗೆಟ್ ಪ್ರತಿಕ್ರಿಯೆ ಕೊರ್ನ ಸಂಚಾರ ಪೊಲೀಸೆರ್, ಟೈಪಿಂಗ್ ಮಿಸ್ಟೇಕ್ ಆದಿಪ್ಪು, ಕಾರ್ ಡ್ ಸೀಟ್ ಬೆಲ್ಟ್ ಪಾಡಂದಿನ ಕಾರಣ ಸಜೀವ್ ಗ್ ನೋಟಿಸ್ ಕಡಪಾದೆರ್ ಪಂದ್ ಪಂಡೆರ್.
ತಿರುಪತಿ: ಕಂಡಗ್ ಮರ್ದ್ ಪಾಡೊಂದಿಪ್ಪುನ ಪೊರ್ತುಡು ಕರೆಂಟ್ ತಾಗ್ದ್ ಮೂಜಿ ಬೆನ್ಪಿ ಬೆನ್ಪುನಕುಲು ಜಾಗೆಡೆ ತೀರ್ ಪೋಯಿನ ಘಟನೆ ಆಂಧ್ರಪ್ರದೇಶದ ಕಡಪಾ ಜಿಲ್ಲೆದ ಚಾಪಡು ಮಂಡಲ ಚಿಯ್ಯಪಡು ಪನ್ಪಿನಲ್ಪ ನಡತ್ಂಡ್.
ಪೆದ್ದಿರೆಡ್ಡಿ ಓಬಳ ರೆಡ್ಡಿ(65), ಬಾಲ ಓಬಳ ರೆಡ್ಡಿ (60).ಬಿ.ಮಲ್ಲಿಕಾರ್ಜುನ ರೆಡ್ಡಿ (23) ತೀರ್ ಪೋಯಿನಕುಲು ಪಂದ್ ಗುರ್ತಿಸಾದೆರ್. ಕಂಡಗ್ ಮರ್ದ್ ಬುಡೊಂದಿಪ್ಪುನಗ ಒರಿ ತಿರ್ತ್ಡ್ ನೇಲೊಂದಿತ್ತಿನ ಕರೆಂಟ್ ಕೇಬಲ್ ತಾಗ್ದ್ಂಡ್. ಉಂದೆನ್ ತೂದು ನನ ರಡ್ಡ್ ಜನ ಆಯೆನ್ ಬುಡ್ಪಾವರೆ ಪೋಯರೆ. ಅಕುಲೆಗ್ಲ ಕರೆಂಟ್ ತಾಗ್ದ್ ಮೂಜಿ ಜನ ಜಾಗೆಡೇ ತೀರ್ ಪೋತೆರ್ ಪಂದ್ ಪೊಲೀಸೆರ್ ಮಾಹಿತಿ ಕೊರ್ತೆರ್.
