ಕಿಲ್ಲೆ ಮೈದಾನಡ್ ಪುತ್ತೂರ‍್ದ ಪಿಲಿರಂಗ್

ಪುತ್ತೂರು: ಪುತ್ತೂರು ಪಿಲಿರಂಗ್ ಕ್ರೀಡಾ ಸಮಿತಿದ ಮುತಾಲಿಕೆಡ್ ಕಿಲ್ಲೆ ಮೈದಾನಡ್ ಪುತ್ತೂರ್‍ದ ಪಿಲಿರಂಗ್ ದ ರಡ್ಡನೇ ಆವೃತ್ತಿ ಐತಾರ ನಡತ್ಂಡ್.

ಲೇಸ್ ನ್ ಉದಿಪನ ಮಲ್ತಿನ ಪುತ್ತೂರು ಶಾಸಕೆರ್ ಅಶೋಕ್ ಕುಮಾರ್ ರೈ ಪಾತೆರ್ದ್, ತುಳುನಾಡ್ ದ ಆಚಾರ ವಿಚಾರಲು ವಿಶಿಷ್ಟ. ಪಿಲಿರಂಗ್, ಕೋಳಿದ ಕಟ್ಟ, ಭೂತಾರಾಧನೆ, ಯಕ್ಷಗಾನದಂಚಿನ‌ ಮುಲ್ಪದ ಕಲೆ ಬೊಕ್ಕ ಜಾನಪದ ಪ್ರಕಾರಲೆನ್ ದೇಶಗ್ ಪಸರೊಡು ಪಂದ್ ಪಂಡೆರ್.

ಕೆಪಿಸಿಸಿ ಉಪಾಧ್ಯಕ್ಷೆರ್ ಬಿ.ರಮಾನಾಥ ರೈ ಪಾತೆರ್ದ್, ದಕ್ಷಿಣ ಕನ್ನಡ ಪರ್ಬಲೆನ ಊರು. ಬೇತೆ ಬೇತೆ ಸಾಂಸ್ಕೃತಿಕ ಲೇಸ್ ರಾತ್ರೆ ಇಡೀ ನಡಪುಂಡು. ಸಾಂಸ್ಕೃತಿಕ ವೈಭವನ್ ಕಣ್ ದಿಂಜಾವೊನ ಅವಕಾಶ ಯುವ ಪೀಳಿಗೆಗ್ ತಿಕ್ಕ್ ದ್ಂಡ್. ಪೊಂಜೋವ್ ಯೊರ್ತಿ ಲೇಸ್ ದ ಜಬದಾರಿನ್ ದೆತೊನುನೇ ಇಸೇಸ ಪಂದ್ ಪಂಡೆರ್.

ಮಹಾಲಿಂಗೇಶ್ವರ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಕೇಶವ ಪ್ರಸಾದ್ ಮುಳಿಯ ಪಾತೆರ್ದ್, ಮಾರ್ನೆಮಿದ ಪೊರ್ತುಡು ಇಲ್ಲಗ್ ಬರೊಂದು ಇತ್ತಿನ ಪಿಲಿ ಏಸದ ಸಂಖ್ಯೆ ಕಮ್ಮಿ ಆತ್ಂಡ್. ಇಂಚಿನ ಲೇಸ್ ಲೆನ ಮುಖೇನ ಕುಡ ಪಿಲಿನ್ ತೂಯೆರೆ ಸಾಧ್ಯ ಆತ್ಂಡ್ ಪಂದ್ ಪಂಡೆರ್.

ಮಾಜಿ ಶಾಸಕಿ ಶಕುಂತಳಾ ಟಿ. ಶೆಟ್ಟಿ ಪಾತೆರ್ದ್, ತುಳುನಾಡ್ ದ ಕಲೆನ್ ಒರಿಪಾವುನ ದಿಟ್ಟಿಡ್ ಪಿಲಿರಂಗ್ ಲೇಸ್ ಆಯೋಜನೆ ಮಲ್ದ್ಂಡ್ ಪಂದ್ ಪಂಡೆರ್.

ಪಿಲಿಏಸದ 10 ಕೂಟಲು ಪಂತೊಡು ಪಾಲ್ ಪಡೆಂಡ್. ಕಾಂಗ್ರೆಸ್ ಮುಖಂಡೆರ್ ಮಿಥುನ್ ರೈ ಬೊಕ್ಕ ಹಿರಿಯ ತಾಸೆ ಕಲಾವಿದೆರ್ ಕೇಶವ ಶೆಟ್ಟಿಗಾರ್ ಮೊಕ್ಲೆಗ್ ಸನ್ಮಾನ ನಡತ್ಂಡ್.

ಈ ಪೊರ್ತುಡು ಉಪವಿಭಾಗಾಧಿಕಾರಿ ಗಿರೀಶ್ ನಂದನ್, ಸಮಿತಿದ ಗುರ್ಕಾರೆ ಈಶ್ವರ ಭಟ್ ಪಂಜಿಗುಡ್ಡೆ, ಕಾರ್ಯಾಧ್ಯಕ್ಷೆರ್ ಶಿವರಾಮ ಆಳ್ವ, ಮಾಜಿ ಸಚಿವೆರ್ ವಿನಯ ಕುಮಾರ್ ಸೊರಕೆ, ವಿಶ್ವನಾಥ ರೈ, ರೋಷನ್ ರೈ ಬನ್ನೂರು, ರಂಜೀತ್ ಬಂಗೇರ, ರಾಜಾರಾಮ ಕೆ.ಬಿ., ಪ್ರಸಾದ್ ಕೌಶಲ್ ಶೆಟ್ಟಿ, ಚಿಕ್ಕಪ್ಪ ನಾಯಕ್, ಮಹಮ್ಮದ್ ಆಲಿ, ಜೋಕಿಂ ಡಿಸೋಜ, ಮುರಳೀಧರ ರೈ ಮಠಂತಬೆಟ್ಟು, ಮಹಮ್ಮದ್ ಬಡಗನ್ನೂರು, ಬೇಬಿ ಕುಂದರ್, ಮಂಜುನಾಥ ನಾಯಕ್, ಎ ಕೆ ಜಯರಾಮ ರೈ, ಪ್ರವೀಣ್ ಚಂದ್ರ ಆಳ್ವ, ರಿಯಾಝ್ ಪರ್ಲಡ್ಕ, ಮಹಾಬಲ ರೈ ಒಳತ್ತೂಟ್ಟು, ರೂಪಾ ರೇಖಾ ಆಳ್ವ, ವಿನೋದ್ ಶೆಟ್ಟಿ, ಸಂತೋಷ್, ರಾಮಣ್ಣ ಪಿಲಿಂಜ, ಪದ್ಮನಾಭ ಪೂಜಾರಿ ಸಣ್ಣಗುತ್ತು, ಚಂದ್ರಹಾಸ ಶೆಟ್ಟಿ, ಮಹಾಬಲ ರೈ ಒಳತಡ್ಕ, ಚಿಕ್ಕಪ್ಪ ನಾಯ್ಕ್‌ ಪಾಲ್ ಪಡೆದಿತ್ತೆರ್. ಹರಿಪ್ರಸಾದ್ ಬನಾರಿ ಮುತಾಲಿಕೆಡ್ ಗಣಪತಿ ಹೋಮ, ದುರ್ಗಾಪೂಜೆ ನಡತ್ಂಡ್.