ಬೊಂಬೈ: ರಾಷ್ಟ್ರೀಯವಾದಿ ಕಾಂಗ್ರೆಸ್ ಪಕ್ಷದ (ಎನ್ ಸಿಪಿ) ಅಖಿಲ ಭಾರತ ಗುರ್ಕಾರೆ ಶರದ್ ಪವಾರ್ ಬೊಕ್ಕ ರಾಜ್ಯಾಧ್ಯಕ್ಷೆರ್ ಜಯಂತ್ ಪಾಟೀಲ್ ಮೆರೆನ ಮುತಾಲಿಕೆಡ್ ಅ.15ನೇ ನಡತಿನ ಸಭೆಟ್ಟ್ ಎನ್.ಸಿ.ಪಿ. ಬೊಂಬೈದ ಹಿರಿಯ ಉಪಾಧ್ಯಕ್ಷೆರಾದ್ ಹಿರಿಯ ರಾಜಕಾರಿಣಿ, ಸಮಾಜ ಸೇವಕೆರ್ ಲಕ್ಷ್ಮಣ ಸಿ. ಪೂಜಾರಿ ಮೇರ್ ಅವಿರೋಧವಾದ್ ಆಯ್ಕೆ ಆತೆರ್.
ರಾಖಿ ಜಾಧವ್ ಮೇರ್ ಬೊಂಬೈ ಪ್ರಾದೇಶಿಕ ರಾಷ್ಟ್ರೀಯವಾದಿ ಕಾಂಗ್ರೆಸ್ ಪಕ್ಷದ ಗುರ್ಕಾರೆಯಾದ್, ಎನ್.ಸಿ.ಪಿ. ಚುನಾವಣಾಧಿಕಾರಿಯಾದ್ ನ್ಯಾ.ಹರೀಶ್ ಸನಾಸ್ ಆಯ್ಕೆ ಆತೆರ್.
ಉಳ್ಳಾಲ ಶ್ರೀ ಚೀರುಂಭ ಭಗವತೀ ಕ್ಷೇತ್ರಡ್ ಅ.15-23 ಮುಟ್ಟ ಮಾರ್ನೆಮಿ ಉಚ್ಚಯ ನಡಪರೆ ಉಂಡು.
ಅ.15 ಐತಾರ ಪೊಸ ಸಭಾಗೃಹದ ಉದಿಪನ ಆಂಡ್. ಅ.17 ಅಂಗಾರೆ ಬೊಲ್ಪುಗು ಕೈ ಕಡ್ತೆರ್. ಅಂಚೆನೆ ಪ್ರತಿದಿನೊಲ ಮಧ್ಯಾಹ್ನ ಬೊಕ್ಕ ರಾತ್ರೆ ಮಹಾಪೂಜೆ ನಡಪುಂಡು.
ಅಂಚೆನೆ ಅ.27 ಸುಕ್ರಾರ ತುಲಾಪತ್ ಉಚ್ಚಯ, ಬೊಲ್ಪುಗು ಭಂಡಾರ ಬರ್ಪುಂಡು. ಬಯ್ಯಗ್ ಬಲಿ, ಮೂರ್ತಿ ದರ್ಶನ, ಪರಕೆ, ರಾತ್ರೆ ಪೊಸ ಅರಿತ್ತ ವನಸ್, ಭಂಡಾರ ಪೋಯೆರೆ ಉಂಡು ಪಂದ್ ಉಳ್ಳಾಲ ಶ್ರೀ ಚೀರುಂಭ ಭಗವತೀ ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ಗಂಗಾಧರ ಉಳ್ಳಾಲ್, ಗುರ್ಕಾರೆ ಚಂದ್ರಹಾಸ್ ಉಳ್ಳಾಲ್ ಲೆಪ್ಪೋಲೆಡ್ ತೆರಿಪಾದೆರ್.
ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯಡ್ ಮಾರ್ನೆಮಿ ಉಚ್ಚಯದ ಲೆಕ್ಕೊಡು ಅ.15 ಐತಾರ ವಾಲಿಮೋಕ್ಷ ಹರಿಕಥೆ ನಡತ್ಂಡ್.
ಈ ಲೇಸ್ ಕಲಾ ಸಾರಥಿ ತೋನ್ಸೆ ಪುಷ್ಕಳ ಕುಮಾರ್ ಮೆರೆರ್ದ್ ನಡತ್ಂಡ್. ಹಾರ್ಮೋನಿಯಂಡ್ ಸುದೇಶ್ ಹೊಸಬೆಟ್ಟು, ತಬಲಡ್ ದೀಪಕ್ ರಾಜ್ ಉಳ್ಳಾಲ್ ಪಾಲ್ ಪಡೆದಿತ್ತೆರ್.
ಪೊಳಲಿ ಶ್ರೀ ರಾಜರಾಜೇಶ್ವರೀ ದೇವಲ್ಯಡ್ ಮಾರ್ನೆಮಿ ಉಚ್ಚಯ ಅ.15-22 ಮುಟ್ಟ ನಡಪರೆ ಉಂಡು.
ಅಂಚೆನೆ ಪ್ರತಿದಿನೊಲ ರಾತ್ರೆ ಮಾರ್ನೆಮಿಪೂಜೆ ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪುಂಡು. ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಗಲಸಿನ ರಡ್ಡ್ ಚಕ್ರ ಗಾಡಿಲೆನ ಮಳಿಗೆ ಗೋಡ್ವಿನ್ಸ್ ನಿರ್ಮಲ್ ಆಟೋ ಕನ್ಸಲ್ಟೆಂಟ್ಸ್ ಎಡ್ಡೆ ಸೇವೆರ್ದ್ ರಾಜ್ಯ ಇಡೀ ಪುದರ್ ಪಡೆತ್ಂಡ್.
ಕುದ್ರೋಳಿ ಅಳಕೆ ಪ್ರದೇಶಡ್ ಸುರು ಆಯಿನ ಶೋರೂಂ 25 ವರ್ಷೊಲೆನ ಸೇವೆನ್ ಕರ್ನಾಟಕದ ಮಾತ ಜಿಲ್ಲೆದ ಜನಕ್ಲೆಗ್ ಕೊರೊಂದು ಉಂಡು. ಮಾತ ವರ್ಗಲೆನ ಕಮ್ಮಿ ಕಿರಯಡ್ ಗಾಡಿಲು ಮುಲ್ಪ ತಿಕ್ಕುಂಡು.
ಅತ್ತಂದೆ ದಸರಾ ಪರ್ಬದ ಲೆಕ್ಕೊಡು ಒಂಜಿ ತಿಂಗೊಲ್ದ ಹೊಸ ಗಾಡಿಲು ಶೇ.30 ದಾತ್ ಕಮ್ಮಿ ಕಿರಯಡ್ ಉಂಡು. ರಡ್ಡ್ ಚಕ್ರದ ಗಾಡಿಲೆಗ್ ಭಾರೀ ಕಮ್ಮಿ ಬಡ್ಡಿಡ್ ಸಾಲ ತಿಕ್ಕುಂಡು. ಪರತ್ ಗಾಡಿಲೆನ್ ಬೇತೆ ಮಾತ ಶೋರೂಂರ್ದ್ ಎಚ್ಚ ಕಿರಯಡ್ ದೆತೊನೊವೆರ್. ಅತ್ತಂದೆ ಮಾರಾಟ ಮಲ್ತಿನ ಗಾಡಿನ್ ಕಡ್ಡಾಯವಾದ್ ಆರ್ ಸಿ ಟ್ರಾನ್ ಫರ್ ಮಲ್ತ್ ದ್ ಆಯಿನ ಪ್ರತಿನ್ ಗ್ರಾಹಕೆರೆಗ್ ಕೊರ್ಪೆರ್. ಮುಲ್ಪ ಕಮ್ಮಿ ಡೌನ್ ಪೇಮೆಂಟ್ ಡ್ ಗ್ರಾಹಕೆರೆಗ್ ಇಷ್ಟ ಇಪ್ಪುನ ಗಾಡಿನ್ ದೆತೊನೊಲಿ. ಒಂಜೇ ಸಂಸ್ಥೆದ ಮುಖೇನ ಆರ್ ಸಿ ವರ್ಗಾವಣೆ, ಇನ್ಸೂರೆನ್ಸ್ ಸಾಲ ಸೌಲಭ್ಯ ಉಂಡು. ಆಕರ್ಷಕ ಕಿರಯಿಡ್ ಎಕ್ಸ್ ಚೇಂಜ್ ಆಫರ್ ಉಂಡು.
ಮಾತ ಕಂಪೆನಿದ ಗಾಡಿಲು ಮುಲ್ಪ ತಿಕ್ಕುಂಡು. ಒಂಜಿ ತಿಂಗೊಲ್ ಆಯಿನ ಬ್ಯಾಟರಿ ಗಾಡಿಲು, ಶೇ.40 ಕಿರಯಿಡ್ ತಿಕ್ಕುಂಡು. ಗ್ರಾಹಕೆರ್ ನೆತ್ತ ಸದುಪಯೋಗನ್ ಪಡೆವೊಲಿ ಪಂದ್ ಸಂಸ್ಥೆದ ವ್ಯವಸ್ಥಾಪಕ ನಿರ್ದೇಶಕೆರ್ ಗೋಡ್ವಿನ್ ಕಾರಿಯಪ್ಪ ಪ್ರಕಟಣೆಡ್ ತೆರಿಪಾದೆರ್.
ಬೊಂಬೈ: ಘಾಟ್ ಕೋಪರ್ ದ ಸುಭಾಷ್ ನಗರ ಶ್ರೀ ದತ್ತಾತ್ರೇಯ ದುರ್ಗಾಂಬಿಕಾ ದೇವಲ್ಯಡ್ 58ನೇ ವರ್ಷೊದ ಮಾರ್ನೆಮಿ ಉಚ್ಚಯ ಅ.15-23 ಮುಟ್ಟ ನಡಪರೆ ಉಂಡು.
ಅಂಚೆನೆ ಪ್ರತಿದಿನೊಲ ಬೇತೆ ಬೇತೆ ಧಾರ್ಮಿಕ, ವೈದಿಕ ವಿಧಿ ವಿಧಾನಲು ನಡಪುಂಡು. ಈ ಲೇಸ್ ಡ್ ಭಕ್ತಾಭಿಮಾನಿಲು ಮಾತೆರ್ಲಾ ಕುಟುಂಬ ಸಮೇತೆರಾದ್ ಬತ್ತ್ ದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು, ಶ್ರೀ ಗುರು ದತ್ತಾತ್ರೇಯ, ಆದಿಮಾತೆ ಶ್ರೀ ದುರ್ಗಾಂಬಿಕೆ, ಶ್ರೀ ಅಂಜನೇಯ, ಶ್ರೀ ನಾಗಶೇಷ ಬೊಕ್ಕ ಅಪ್ಪೆ ಚಾಮುಂಡಿ ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ದತ್ತಾತ್ರೇಯ ಮಿತ್ರ ಭಜನಾ ಮಂಡಳಿ (ರಿ.) ದ ಗುರ್ಕಾರೆ, ಧರ್ಮದರ್ಶಿಲು ದೇವ್ ಬಿ ಪೂಜಾರಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಶಿವಧ್ವಜ್ ಶೆಟ್ಟಿ ಕಥೆ, ಚಿತ್ರಕಥೆ, ನಿರ್ದೇಶನದ ಕೊರಮ್ಮ ತುಳು ಪಿಕ್ಚರ್ ಇನಿ (ಅ.18) ಬಯ್ಯಗ್ ಮೈಸೂರ್ ದಸರಾ ಫಿಲ್ಮ್ ಫೆಸ್ಟಿವಲ್ ಡ್ ಪ್ರದರ್ಶನ ಆಂಡ್.
ಈ ಪಿಕ್ಚರ್ ಗ್ ಈಶ್ವರಿದಾಸ್ ಶೆಟ್ಟಿ, ರಾಜೇಶ್ವರಿ ರೈ ನಿರ್ಮಾಪಕೆರಾತೆರ್. ಕ್ಯಾಮರ ಮ್ಯಾನ್ ಸುರೇಶ್ ಬೈರಸಂದ್ರ, ಸಂಗೀತ ಶಿನೋಯ್ ವಿ ಜೋಸೆಫ್, ಸಂಕಲನ ಗಣೇಶ್ ನೀರ್ಚಾಲ್, ಸಂಭಾಷಣೆ ಶ್ರೀನಿಧಿ ಡಿ.ಎಸ್, ಅನುವಾದ ಬೊಕ್ಕ ಸಾಹಿತ್ಯ ಕೆ. ಮಹೇಂದ್ರನಾಥ್ ಸಾಲೆತ್ತೂರ್, ಕಲೆ ಸಂತೋಷ್ ಪೂಜಾರಿ ವೇಣೂರ್, ಸಹ ನಿರ್ದೇಶನ ಹರ್ಸಿವ್ ಭಗೀರ, ಪ್ರಸಾದನ ಕುಮಾರ್ ನೊಣವಿನಕೆರೆ, ನಿರ್ಮಾಣ, ನಿರ್ವಹಣೆ ವೀರೇಶ್ ಎಸ್ ಎ, ಕಲೆ ಪರಿಕಾರಲು ಸುಧಾಕರ ಶೆಟ್ಟಿ, ಪ್ರಚಾರ ವಿನ್ಯಾಸ ಯಶ್ವಿನ್ ಕೆ. ಶೆಟ್ಟಿಗಾರ್ ಮಲ್ದೆರ್.
ಬೊಂಬೈ: ಸೃಜನಾ ಬೊಂಬೈ ಕನ್ನಡ ಲೇಖಕಿಯೆರೆನ ಬಳಗದ ಮುತಾಲಿಕೆಡ್ ಪ್ರವಾಸಿಗರ ಅಂತರಂಗ ಬೂಕು ಬುಡುಗಡೆ ಲೇಸ್ ಅ.14 ಸನಿಯಾರ ಬಯ್ಯಗ್ ಬೊಂಬೈದ ಮಾಟುಂಗಾದ ಮೈಸೂರ್ ಅಸೋಸಿಯೇಶನ್ ದ ಸಭಾಗೃಹಡ್ ನಡತ್ಂಡ್.
ಈ ಲೇಸ್ ದ ಗುರ್ಕಾರ್ಮೆನ್ ಸೃಜನಾ ಬಳಗದ ಸಂಚಾಲಕಿ ಪದ್ಮಜಾ ಮಣ್ಣೂರು ಒಯಿಸ್ ದಿತ್ತೆರ್. ಸಹ ಸಂಚಾಲಕಿ ಡಾ.ಜಿ.ಪಿ ಕುಸುಮಾ ಎದ್ಕೊಂದು ಪ್ರಸ್ತಾವನೆ ಭಾಷಣ ಮಲ್ತೆರ್.
ಸಾಹಿತಿ, ಪತ್ರಕರ್ತೆರ್ ಶ್ರೀನಿವಾಸ ಜೋಕಟ್ಟೆ ಬೂಕು ಬುಡುಗಡೆ ಮಲ್ತೆರ್. ಕಬಿ, ಸಾಹಿತಿ, ರಂಗನಟೆ ಗೋಪಾಲ ತ್ರಾಸಿ ಬೂಕುದ ಪರಿಚಯ ಮಲ್ತೆರ್.
ಈ ಪೊರ್ತುಡು ಶ್ಯಾಮಲಾ ಮಾಧವ, ಸುಶೀಲಾ ದೇವಾಡಿಗ, ಸರೋಜಾ ಅಮಾತಿ, ಪ್ರವಾಸಿಗರ ಅಂತರಂಗ ಸಂಪಾದಕೆರ್ ಲತಾ ಸಂತೋಷ್ ಶೆಟ್ಟಿ ಮುದ್ದುಮನೆ ಪಾಲ್ ಪಡೆದಿತ್ತೆರ್. ಸೃಜನಾ ಬಳಗದ ಜತೆ ಕೋಶಾಧಿಕಾರಿ ಸರೋಜಾ ಅಮಾತಿ ಲೇಸ್ ದ ಸುಧಾರಿಕೆ ಮಲ್ತೆರ್.
ಬಿಲ್ಲವರ ಸಂಘ ಬೊಂಬೈದ ಪೊಂಜೋವ್ ಲೆನ ವಿಭಾಗದ ಮುತಾಲಿಕೆಡ್ ಮಾರ್ನೆಮಿ ಉಚ್ಚಯ ಅ.21ಸನಿಯಾರ ಸಾಂತಾಕ್ರೂಜ್ ದ ಬಿಲ್ಲವ ಭವನಡ್ ನಡಪರೆ ಉಂಡು.
ಆನಿ ಮಧ್ಯಾಹ್ನ 3 ಗಂಟೆಗ್ ಲಲಿತಾ ಸಹಸ್ರನಾಮ, ದಾಂಡಿಯಾ ರಾಸ್ ನಡಪರೆ ಉಂಡು. ಈ ಲೇಸ್ ಗ್ ಕುಟುಂಬ ಸಮೇತೆರಾದ್ ಬರೊಡು ಪಂದ್ ಬಿಲ್ಲವರ ಸಂಘ ಬೊಂಬೈದ ಗುರ್ಕಾರೆ ಹರೀಶ್ ಜಿ ಅಮೀನ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಧರ್ಮಸ್ಥಳ: ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆರೆನ 56ನೇ ಪಟ್ಟಾಭಿಷೇಕ ವರ್ಧಂತ್ಯುತ್ಸವ ಅ. 24 ದಾನಿ ಧರ್ಮಸ್ಥಳಡ್ ನಡಪರೆ ಉಂಡು.
ಪಟ್ಟಾಭಿಷೇಕದ 56ನೇ ವರ್ಧಂತ್ಯುತ್ಸವದ ಪ್ರಯುಕ್ತ ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ಅ.24 ದಾನಿ ಬೇತೆ ಬೇತೆ ಧಾರ್ಮಿಕ ಬೊಕ್ಕ ಸಾಮಾಜಿಕ ಕಾರ್ಯಕ್ರಮ ನಡಪರೆ ಉಂಡು. ಪಟ್ಟಾಭಿಷೇಕ ವರ್ಧಂತ್ಯುತ್ಸವದ ಪ್ರಯುಕ್ತ ದೇವಳದ ಸಿಬ್ಬಂದಿ ವರ್ಗರ್ದ್ ಅ.19 ದಾನಿ ಧರ್ಮಾಧಿಕಾರಿಲೆಗ್ ಗೌರವ ಸಮರ್ಪಣೆ ನಡಪರೆ ಉಂಡು. ಅಮೃತವರ್ಷಿಣಿ ಸಭಾಭವನಡ್ ನಡಪುನ ಕಾರ್ಯಕ್ರಮಡ್ ದೇವಳದ ಹಿರಿಯ 25 ನೌಕರೆರೆಗ್ ಮಾನಾದಿಗೆ ನಡಪರೆ ಉಂಡು. ಅ. 20 ದಾನಿ ಶಾಲಾ-ಕಾಲೇಜ್ರ್ದ್, ಗ್ರಾಮಸ್ಥರೆರ್ದ್, ಶ್ರೀ ಕ್ಷೇತ್ರ ಗ್ರಾಮಾಭಿವೃದ್ಧಿ ಯೋಜನೆ, ಸಿರಿ ಗ್ರಾಮೋದ್ಯೋಗ ಸಂಸ್ಥೆ, ಧರ್ಮಸ್ಥಳ ಸರ್ಕಾರಿ ಕಚೇರಿದ ನೌಕರೆರೆರ್ದ್ ಡಾ|ಡಿ.ವೀರೇಂದ್ರ ಹೆಗ್ಗಡೆರೆಗ್ ಗೌರವ ಸಮರ್ಪಣೆ ನಡಪೆರ ಉಂಡು.
ಅ.21 ದಾನಿ ಬೇತೆ ಬೇತೆ ವಿಭಾಗದ ನಡುಟ್ ಛದ್ಮವೇಷ ಸ್ಪರ್ಧೆ ನಡಪೆರೆ ಉಂಡು. ಅ.24 ದಾನಿ ನಡಪುನ ರಾಜ್ಯಸಭಾ ಸದಸ್ಯೆರ್ ಅಂಚನೆ ಧರ್ಮಾಧಿಕಾರಿ ಡಾ.ವೀರೇಂದ್ರ ಹೆಗ್ಗಡೆರೆನ 56ನೇ ಪಟ್ಟಾಭಿಷೇಕ ವರ್ಧಂತ್ಯುತ್ಸವದ ಕಾರ್ಯಕ್ರಮಕ್ಕ್ ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ಭಾರಿ ತಯಾರಿ ನಡತೊಂದು ಉಂಡು.
ಶ್ರೀ ಕ್ಷೇತ್ರ ಧರ್ಮಸ್ಥಳದ 21ನೇ ಧರ್ಮಾಧಿಕಾರಿಯಾದ್ ಪಟ್ಟನ್ ಅಲಂಕಾರ ಮಲ್ತಿನಾರ್ ಡಾ.ಡಿ ವೀರೇಂದ್ರ ಹೆಗ್ಗಡೆರ್.1968 ಅಕ್ಟೋಬರ್ 24 ದಾನಿ ಪಟ್ಟಾಭಿಷಕ್ತೆರಾಯಿನ ಡಾ| ಹೆಗ್ಗಡೆರ್ ನವ ಧರ್ಮಸ್ಥಳದ ನಿರ್ಮಾಣ ಮಲ್ದಿನಾರ್. ಕ್ಷೇತ್ರದ ಪರಂಪರೆನ್ ಬುಲೆಪಾಯಿನಾರ್. ಚತುರ್ದಾನಲಾಯಿನ ಅನ್ನದಾನ, ವಿದ್ಯಾದಾನ, ಅಭಯದಾನ ಬೊಕ್ಕ ಔಷಧ ದಾನರ್ದ್ ಕ್ಷೇತ್ರನ್ ಬುಲೆಪಾಯಿನಾರ್ . ಹೆಗ್ಗಡೆರೆನ ಸಾಮಾಜಿಕ, ಧಾರ್ಮಿಕ, ಸಾಹಿತ್ಯಿಕ, ಸಾಂಸ್ಕೃತಿಕ ಕಾರ್ಯಗ್ ಕೋಟ್ಯಾಂತರ ಭಕ್ತೆರ್ ಮನಸೋತ್ದೆರ್. ಧರ್ಮಸ್ಥಳ ಪನ್ಪುನ ಪುದರ್ನ ವಿಶ್ವವಿಖ್ಯಾತ ಮಲ್ತಿನಾರ್ ಪದ್ಮಭೂಷಣ ಡಾ| ಡಿ.ವಿರೇಂದ್ರ ಹೆಗ್ಗಡೆರ್. ಲಕ್ಷಾಂತರ ಭಕ್ತೆರ್ನ ಇಲ್ಲಲ್ ಧರ್ಮಸ್ಥಳದ ಮಂಜುನಾಥನ ಒಟ್ಟಿಗೆ ಪಾತೆರುನ ಮಂಜುನಾಥ ಪಂದೇ ಭಕ್ತೆರ್ ಲೆಪ್ಪುನ ವೀರೇಂದ್ರ ಹೆಗ್ಗಡೆರೆನ ಪೋಟೋನ್ಲ ಆರಾಧನೆ ಮಲ್ಪುನಕುಲ್ ಉಲ್ಲೆರ್.
