ಬೊಂಬೈ: 2028ಗ್ ಅಮೇರಿಕಾ ಲಾಸ್ ಏಂಜಲಿಸ್ಡ್ ನಡಪುನ ಜಾಗತಿಕ ಕ್ರೀಡಾಪರ್ಬ ಒಲಿಂಪಿಕ್ಸ್ಗ್ ಕ್ರಿಕೆಟ್ ಸೇರ್ಪಡೆ ಆತ್ಂಡ್. ಅಂತಾರಾಷ್ಟ್ರೀಯ ಒಲಿಂಪಿಕ್ಸ್ ಸಮಿತಿ ನಿರ್ವಾಹಕೆರ್ ಒಲಿಂಪಿಕ್ಸ್ ಕ್ರೀಡೆಡ್ ಕ್ರಿಕೆಟ್ ಸೇರ್ಪಡೆ ಮಲ್ಪುವ ಪಂದ್ ಘೋಷಣೆ ಮಲ್ತ್ದೆರ್.
ಅಂತಾರಾಷ್ಟ್ರೀಯ ಒಲಿಂಪಿಕ್ಸ್ ಸಮಿತಿದ ಗುರ್ಕಾರ್ಲು ಥಾಮಸ್ ಬಾಚ್ ಪಾತೆರ್ದ್, ಬೇಸ್ಬಾಲ್/ಸಾಫ್ಟ್ಬಾಲ್, ಫ್ಲ್ಯಾಗ್ ಫುಟ್ಬಾಲ್ದ ಒಟ್ಟಿಗೆ 5 ಪೊಸ ಕ್ರೀಡೆನ್ ಒಲಿಂಪಿಕ್ಸ್ಗ್ ಸೇರ್ಪಡೆ ಮಲ್ತ್ದೆರ್. ನೆಟ್ಟ್ ಕ್ರಿಕೆಟ್ಲ ಒಂಜಿ ಪಂದ್ ತೆರಿಪಾದೆರ್.
ಪಿರೊಂಜಿ ಸುತ್ತುದ ಬುಲೆ ಸಮೀಕ್ಷೆ ಮಲ್ತ್ ಕುಡ 22 ತಾಲೂಕುಲೆನ್ ಬರ ಪೀಡಿತ ಪಂದ್ ಸರಕಾರ ಘೋಷಣೆ ಮಲ್ತ್ದೆರ್. ಈ ಪೈಕಿ ಡ್ 11 ತಾಲೂಕು ತೀವ್ರ ಬರ ಪೀಡಿತ ಆದುಲ್ಲ.
ಬೆಂಗಳೂರು ಬಡಕಾಯಿ, ಗುಂಡ್ಲುಪೇಟೆ, ಹನೂರು, ಬೇಲೂರು, ಚನ್ನರಾಯಪಟ್ಟಣ, ಹೊಳೆನರಸೀಪುರ, ಸೋಮವಾರಪೇಟೆ, ಮಾಲೂರು, ದೇವದುರ್ಗ, ಮಸ್ಕಿ ಬೊಕ್ಕ ತುಮಕೂರು ತಾಲೂಕು ತೀವ್ರ ಬರಪೀಡಿತ; ಕುಡ್ಲ, ಬೆದ್ರ, ಬ್ರಹ್ಮಾವರ, ಕೊಳ್ಳೆಗಾಲ, ಕೊಪ್ಪ, ನರಸಿಂಹರಾಜಪುರ, ಶೃಂಗೇರಿ, ಸಕಲೇಶಪುರ, ಚನ್ನಪಟ್ಟಣ, ಮಾಗಡಿ ಬೊಕ್ಕ ಕಾರವಾರ ತಾಲೂಕುಲು ಸಾಧಾರಣ ಬರಪೀಡಿತ ಪಂದ್ ಗುರ್ತ ಮಲ್ತ್ದೆರ್.
ಚಾರ್ಮಾಡಿ ಘಾಟಿನ್ 490 ಕೋಟಿ ರೂ. ಕರ್ಚ್ ಮಲ್ತ್ ಅಭಿವೃದ್ಧಿ ಮಲ್ಪರೆ ಕೇಂದ್ರ ಒತ್ತೊಂದುಂಡ್. ಚಾರ್ಮಾಡಿ ಘಾಟಿ ಚಿಕ್ಕಮಗಳೂರು ವಿಭಾಗೊಡು 25 ಕಿಮೀ ಅಂಚೆನೆ ಕುಡ್ಲ ವಿಭಾಗೊಡು 11.20 ಕಿಮೀ ತಾದಿ ಅಭಿವೃದ್ಧಿ ❌ಆವರೆ ಉಂಡು.
ಉಂದೆಕ್ ಚಾರ್ಮಾಡಿ ಪಲ್ಲರ್ದ್ ಘಾಟಿದ 11ನೇ ತೆಲವು ಮುಟ್ಟ 11.2 ಕಿಮೀ ವ್ಯಾಪ್ತಿದ ತಾದಿಗ್ ಡಿಪಿಆರ್ ವರದಿ ಕೊರಿಯರೆ ಸೂಚನೆ ಮಲ್ತ್ದೆರ್. 2019ದ ಬರ್ಸೊಗು ಗುಡ್ಡೆ ಮಗ್ರ್ದ್ ಅಲ್ಪ ಗಾಡಿ ಕೊನೊವರೆ ಆವಂದಿನ ಪರಿಸ್ಥಿತಿ ಇತ್ತ್ಂಡ್. ಅವೆರ್ದ್ ಬೊಕ್ಕ ಕೆಲವು ತಿಂಗೊಲು ಗಾಡಿಗ್ ಪೋವಂದಿಲೆಕ್ಕ ನಿರ್ಬಂಧ ಇತ್ತ್ಂಡ್. ಅವೆರ್ದ್ ಬೊಕ್ಕ ಸುಮಾರ್ ಬುಲೆಚ್ಚಿಲ್ ಆಂಡಲ ಮಲ್ಲ ಗಾಡಿಲು ಇತ್ತೆಲಾ ಸಮಗಟ್ಟ್ ಪೋವರೆ ಆಪುಜಿ. ಈ ಸಲ ಕುಡ್ಲರ್ದ್ ಚಾರ್ಮಾಡಿ ಘಾಟಿ ಮುಟ್ಟ 90 ಕಿಮೀ ತಾದಿ ಪತ್ತ ಅಭಿವೃದ್ದಿ ಆಪಿನ ನಿರೀಕ್ಷೆ ಉಂಡು.
ಬಂಟ್ವಾಳ: ಕರಿನ ಐನ್ ವರ್ಷರ್ದ್ ಕೋರ್ಟ್ಗ್ ಹಾಜರ್ ಆವಂದೆ ದೆಂಗ್ದ್ ಕುಲ್ದ್ ಇತ್ತಿನ ಒಟ್ಟು ಆಜಿ ಜನ ಆರೋಪಿಲೆನ್ ಬಂಟ್ವಾಳ ಗ್ರಾಮಾಂತರ ಪೋಲೀಸೆರ್ನ ತಂಡ ಅರೆಸ್ಟ್ ಮಲ್ತ್ದ್ ಕೋರ್ಟ್ಗ್ ಹಾಜರ್ ಪಡಿಸಾದೆರ್.
ಬಬುಲು ಸಹಾನಿ, ರಾಮ್ ಗೋವಿಂದ ಸಹಾನಿ, ಅಮಿತ್ ಕುಮಾರ್, ಸತ್ಯೇಂದ್ರ ಸಹಾನಿ, ಸೈದಾನ್ ಸಹಾನಿ, ಅಭಯ್ ನಾರಾಯಣ್ ಅರೆಸ್ಟ್ ಆಯಿನ ಆರೋಪಿಲು. ಪರಂಗಿಪೇಟೆದ ಅಕ್ರಮ ಮರಳು ಗಾರಿಕೆ ಕೇಸ್ಗ್ ಸಂಬಂಧ ಪಟ್ಟಿನಂಚ ಉತ್ತರ ಪ್ರದೇಶ ಮೂಲದ ಆಜಿ ಜನತ ಮಿತ್ತ್ ಬಂಟ್ವಾಳ ಗ್ರಾಮಾಂತರ ಪೋಲೀಸ್ ಠಾಣೆಡ್ 2017ಟ್ ಕೇಸ್ ದಾಖಲಾದ್ ಇತ್ತ್ಂಡ್.
ಕಿನ್ನಿಗೋಳಿ: ರಾಜರತ್ನಪುರದ ಯಕ್ಷ ಕೌಸ್ತುಭ ಯಕ್ಷಗಾನ ತರಬೇತಿ ಕೇಂದ್ರದ ನಾಲನೇ ವರ್ಷದ ವಾರ್ಷಿಕೋತ್ಸವದ ಅಂಗವಾದ್ ಅ.15 ದಾನಿ ಕಾಂಡೆ 9 ರ್ದ್ ರಾಜರತ್ನಪುರದ ಸರಾಫ್ ಅಣ್ಣಯ್ಯಾಚಾರ್ಯ ಸಭಾಭವನಡ್ ಬಣ್ಣದ ಮನೆ ಪನ್ಪಿನ ಶೀರ್ಷಿಕೆೆಡ್ ಉಚಿತ ತೆಂಕುತಿಟ್ಟು ಯಕ್ಷಗಾನ ಬಣ್ಣಗಾರಿಕೆ ತರಬೇತಿ ಶಿಬಿರದ ಉದಿಪನ ನಡಪರೆ ಉಂಡು.
ಶ್ರೀ ಕ್ಷೇತ್ರ ಕಟೀಲ್ ಪ್ರಧಾನ ಅರ್ಚಕೆರ್ ಕೆ. ಲಕ್ಷ್ಮೀ ನಾರಾಯಣ ಅಸ್ರಣ್ಣೆರ್ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಕಿನ್ನಿಗೋಳಿದ ಯುಗಪುರುಷದ ಕೆ. ಭುವನಾಭಿರಾಮ ಉಡುಪ, ಉದ್ಯಮಿ ಪೃಥ್ವಿರಾಜ್ ಆಚಾರ್ಯ, ಯಕ್ಷಗಾನ ಕಲಾವಿದೆರ್ ಗಣೇಶ್ ಚಂದ್ರಮಂಡಲ, ಕಿನ್ನಿಗೋಳಿ ಮೋಹಿನಿ ಕಲಾ ಸಂಪದದ ಗಂಗಾಧರ ಡಿ ಶೆಟ್ಟಿಗಾರ್, ಯಕ್ಷಗಾನ ಕಲಾವಿದೆರ್ ಬಾಲಕೃಷ್ಣ ಮಿಜಾರ್, ಶಶಿಧರ್ ಪಂಜ, ದುರ್ಗಾಪ್ರಸಾದ್ ಕಟೀಲ್ ಪಾಲ್ ಪಡೆಯೆರೆ ಉಲ್ಲೆರ್. ಸಾಂಸ್ಕೃತಿಕ ಕಾರ್ಯಕ್ರಮ ಅಂಗವಾದ್ ಯಕ್ಷಮಿತ್ರರು ಪಂಜಿನಡ್ಕ ಬೊಕ್ಕ ಜಿಲ್ಲೆದ ಪುಗಾರ್ತೆದ ಅತಿಥಿ ಕಲಾವಿದೆರ್ನ ಕೂಡುವಳಿಕೆಡ್ ಯಕ್ಷ ನಾಟ್ಯ ಹಾಸ್ಯ ವೈಭವ ನಡಪರೆ ಉಂಡು. ಕನ್ನಡಿ, ಬಣ್ಣ ಒರೆಸುನ ಕುಂಟು ಶಿಬಿರಾರ್ಥಿಲು ಕನವೊಡ್. ಒರಿನ ಮಾತ ವಸ್ತ್ ಲೆನ್ ಸಂಸ್ಥೆ ವತಿರ್ದ್ ಕೊರ್ಪೆರ್.
ಬೊಕ್ಕಾತ್ ಮಾಹಿತಿಗಾದ್: 8105673707, 9353564063 ಕಾಲ್ ಮಲ್ಪೊಲಿ ಪಂದ್ ಪ್ರಕಟನೆಡ್ ತೆರಿಪಾದೆರ್.
ಕುಡ್ಲ: ಜಾಗತಿಕ ಬಂಟರ ಸಂಘಗಳ ಒಕ್ಕೂಟ(ರಿ) ಕುಡ್ಲ ನೆತ್ತ ಮುತಾಲಿಕೆಡ್ ಅ.28, 29 ದಾನಿ ನಡಪುನ ವಿಶ್ವ ಬಂಟರ ಸಮ್ಮೇಳನ ಬೊಕ್ಕ ಕ್ರೀಡಾಕೂಟದ ಪೂರ್ವಭಾವಿ ಅ.14 ಇನಿ ಬಯ್ಯಗ್ 5 ಗಂಟೆಗ್ ಕಾರ್ಲದ ಕಟೀಲ್ ಇಂಟರ್ ನ್ಯಾಷನಲ್ ಸಭಾಂಗಣಡ್ ನಡಪೆರೆ ಉಂಡು.
ಜಾಗತಿಕ ಬಂಟರ ಸಂಘದ ಗುರ್ಕಾರ್ಲು ಐಕಳ ಹರೀಶ್ ಶೆಟ್ಟಿ, ವಿಶ್ವ ಬಂಟರ ಕ್ರೀಡಾ ಸಮಿತಿದ ಸಂಚಾಲಕೆರ್ ಗಿರೀಶ್ ಶೆಟ್ಟಿ ತೆಳ್ಳಾರ್ ಈ ಲೇಸ್ಡ್ ಪಾಲ್ ಪಡೆಯೆರೆ ಉಲ್ಲೆರ್. ಕಾರ್ಲ-ಹೆಬ್ರಿ ತಾಲೂಕುದ ಸಮಸ್ತ ಬಂಟೆರ್ ಈ ಸಭೆಟ್ ಪಾಲ್ ಪಡೆಯೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ : ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ ಪೊಸ ಪೊಸ ಲಕ್ಸುರಿ ಬಸ್ ನ್ ಪರಿಚಯ ಮಲ್ತೊಂದು ಉಂಡು. ಇತ್ತೆ ಈ ಸಾಲ್ಗ್ ಪಲ್ಲಕ್ಕಿ ಪನ್ಪಿನ ಪೊಸ ಸ್ಲೀಪರ್ ಕೋಚ್ ಬಸ್ ಸೇರ್ಪಡೆ ಆತ್ಂಡ್.
ಸಾರಿಗೆ ನಿಗಮ ಪ್ರಸ್ತುತ 12 ಬಸ್ ಕಾರ್ಯಾಚರಣೆಡ್ ಉಂಡು. ಈ ಸಾಲ್ಗ್ ಇತ್ತೆ 40 ಪಲ್ಲಕ್ಕಿ ಬಸ್ನ್ ಸೇರ್ಪಾವೆರೆ ಸಂಸ್ಥೆ ಯೋಚನೆ ಮಲ್ತ್ದ್ಂಡ್. ಈ ಪೈಕಿ 8 ಬಸ್ ಕುಡ್ಲಗ್ ಬೊಕ್ಕ 4 ಬಸ್ ಪುತ್ತೂರು ವಿಭಾಗಗ್ ಪೋವೆರೆ ಉಂಡು. ಪುತ್ತೂರು ವಲಯಗ್ 9 ಪೊಸ ಕರ್ನಾಟಕ ಸಾರಿಗೆ ಬಸ್ ಬತ್ತ್ದ್ಂಡ್. ಹೆಚ್ಚುವರಿಯಾದ್ ರಾಜ್ಯ ಸಾರಿಗೆ ಸಂಸ್ಥೆ ಬಿ.ಸಿ.ರೋಡ್, ಧರ್ಮಸ್ಥಳ ಬೊಕ್ಕ ಮಡಿಕೇರಿ ಡಿಪೋಲೆಗ್ 2 ಬಸ್ ಬೊಕ್ಕ ಸುಳ್ಯಗ್ 1 ಬಸ್ ನಿಯೋಜನೆ ಮಲ್ಪೆರೆ ಉಲ್ಲೆರ್.
ಬೋಲ್ತೆರ್: ತುಳುನಾಡ ಸಂಸ್ಕೃತಿದಂಚ ಹೆರಾಜೆ ಕುಟುಂಬದ ಮೂಲ ಕ್ಷೇತ್ರ ಮುಗ್ಗ ಗುತ್ತುಡ್ ಅ.13 ದಾನಿ ದಿ. ಸ್ಪಂದನ ಮೇರ್ನ ಆತ್ಮನ್ ಹಿರಿಯಕ್ಲೆನ ಒಟ್ಟಿಗೆ ಸೇರ್ಪಾವುನ ಕಾರ್ಯಕ್ರಮ ನಡತ್ಂಡ್.
ಶೇಖರ ಬಂಗೇರ ನೇತೃತ್ವಡ್ ಪ್ರಶಾಂತ್ ಕಾಂಡೆತ್ಯಾರು, ದಿನೇಶ್ ಮೇರೆನ ಸಹಕಾರದೊಟ್ಟಿಗೆ ಪೂಜಾ ವಿಧಿ ವಿಧಾನನ್ ನಡಪಾದ್ ಕೊರಿಯೆರ್.
ಈ ಕಾರ್ಯಕ್ರಮಡ್ ದಿ. ಸ್ಪಂದನಾ ಕಂಡನಿ ಚಲನಚಿತ್ರ ನಟ ವಿಜಯ ರಾಘವೇಂದ್ರ, ಮಗೆ ಶೌರ್ಯ ವಿಜಯ ರಾಘವೇಂದ್ರ, ಬಿ.ಕೆ.ಶಿವರಾಂ ಕುಟುಂಬಸ್ಥೆರ್, ಸಿನೆಮಾ ನಿರ್ಮಾಪಕೆರ್ ಸಿ.ಎಸ್.ಎ ಚಿನ್ನೇ ಗೌಡ, ರಕ್ಷಿತ್ ಶಿವರಾಂ, ರಾಜು ಪೂಜಾರಿ ಕಾಶಿಪಟ್ಟಣ, ಭಗೀರಥ ಜಿ., ಯೋಗೇಶ್ ಕುಮಾರ್ ನಡಕರ, ಗಂಗಾಧರ ಮಿತ್ತಮಾರು, ಸತೀಶ್ ಬಂಗೇರ ಕಾಶಿಪಟ್ನ, ನಾಗೇಶ್ ಗೌಡ, ಡಾ.ರಾಜಾರಾಮ್, ಸುಭಾಷ್ ರೈ, ರಮೇಶ ಬಂಗೇರ ಪ್ರವೀಣ್ ಫರ್ನಾಂಡಿಸ್, ಜಯ ವಿಕ್ರಂ ಕಲ್ಲಾಪು, ತುಕಾರಾಮ ಬಂಗೇರ, ಚಂದ್ರಶೇಖರ ಪೂಜಾರಿ ನಾರಾಯಣ ಮಚ್ಚಿನ, ಜಗನ್ನಾಥ್ ಬಂಗೇರ ಮುಗ್ಗ, ಹೆರಾಜೆ ಕುಟುಂಬದ ಪೀತಾಂಬರ ಹೆರಾಜೆ, ಮಿತ್ರ ಹೆರಾಜೆ ಕುಟುಂಬಸ್ಥೆರ್ ಬೊಕ್ಕ ತಾಲೂಕುದ ಗಣ್ಯೆರ್ ಈ ಪೊರ್ತುಡು ಇತ್ತೆರ್.
ಕುಡ್ಲ ಮಹಾನಗರ ಪಾಲಿಕೆದ ಲೆಕ್ಕಪತ್ರ ಸ್ಥಾಯಿ ಸಮಿತಿದ ಗುರ್ಕಾರೆರಾದ್ ಆಯ್ಕೆ ಆಯಿನ ಸಮಾಜ ಸೇವಕೆ, ಸರಳ ಸಜ್ಜನಿಕೆದ ಜನನಾಯಕೆ ಗಣೇಶ್ ಕುಲಾಲ್ ಉರ್ವ ಮೇರೆಗ್ ಐತಾರ ಬಯ್ಯ 4:30 ಕ್ಕ್ ಸರಿಯಾದ್ ಉರ್ವದ ಗಣೇಶ ಮಂಟಪಡ್ ಉರ್ವ ಊರುದ ಮಾತ ದೈವಸ್ಥಾನ, ದೇವಸ್ಥಾನ ಅಂಚೆನೆ ಊರೆಕ್ಲೆನ ವತಿರ್ದ್ ಪೌರ ಸನ್ಮಾನ ಕಾರ್ಯಕ್ರಮ ನಡಪರೆ ಉಂಡು.
