October 13, 2023

ಬಿರ್ವ ಸಂಜೀವ ಪೂಜಾರಿ ಮೆರೆರ್ದ್ ಗೆಜ್ಜೆಗಿರಿ ಮಾರ್ನೆಮಿ ಉಚ್ಚಯದ ಉದಿಪನ

ಶ್ರೀ ಕ್ಷೇತ್ರ ಗೆಜ್ಜೆಗಿರಿಟ್ಟ್ ಮಾರ್ನೆಮಿ ಉಚ್ಚಯ ಅ.15-24 ಮುಟ್ಟ ಬೇತೆ ಬೇತೆ ಧಾರ್ಮಿಕ ಸಂಪ್ರದಾಯಿಕ ವಿಧಿ ವಿಧಾನದೊಟ್ಟಿಗೆ ನಡಪರೆ ಉಂಡು.

ಅ.15 ಕ್ಕ್ ಬೊಲ್ಪುಗು ಮಾರ್ನೆಮಿ ಉಚ್ಚಯನ್ ದ.ಕ.ಜಿಲ್ಲಾ ಮೂರ್ತೆದಾರೆರೆನ ಸಹಕಾರಿ ಮಹಾಮಂಡಲದ ಗುರ್ಕಾರೆ, ಗೆಜ್ಜೆಗಿರಿ ಕ್ಷೇತ್ರಾಡಳಿತ ಸಮಿತಿದ ಕಾರ್ಯಕಾರಿ ಸಮಿತಿದ ಸದಸ್ಯೆರ್, ಮೇಲ್ಕಾರ್ ಬಿರ್ವ ಸೆಂಟರ್ ಮಾಲಕೆರ್ ಕೆ. ಸಂಜೀವ ಪೂಜಾರಿ ಮೇರ್ ತುಡರ್ ಅರ್ಲಾದ್ ಉದಿಪನ ಮಲ್ಪುವೆರ್.

ಕ್ಷೇತ್ರದ ಭಕ್ತಾದಿಲು ಮಾರ್ನೆಮಿ ದಿನಟ್ಟ್ ಕ್ಷೇತ್ರಗ್ ಬತ್ತ್ ದ್ ಕ್ಷೇತ್ರದ ಸರ್ವಶಕ್ತಿಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಗೆಜ್ಜೆಗಿರಿ ಕ್ಷೇತ್ರಾಡಳಿತ ಸಮಿತಿದ ಗುರ್ಕಾರೆ ಪೀತಾಂಬರ ಹೆರಾಜೆ ಬಿನ್ನಾಪು ಮಲ್ದೆರ್.

ಯುವ ಜನಾಂಗಡ್ ಸೇವೆ ಮಲ್ಪುನ ಮಲ್ಲ ಮನಸ್ ಪುಟ್ಟರೆ ಎನ್‌ಎಸ್‌ಎಸ್ ತಾದಿ: ಪ್ರೊ.ಸುಬ್ಬಪ್ಪ ಕೈಕಂಬ

ಸುಬ್ರಹ್ಮಣ್ಯ: ಯುವ ಜನಾಂಗಡ್ ಸೇವೆ ಮಲ್ಪುನ ಮಲ್ಲ ಮನಸ್ ಪುಟ್ಟರೆ ಎನ್‌ಎಸ್‌ಎಸ್ ತಾದಿಯಾದುಂಡು. ಕಲ್ಪಾರ್ಥಿಲು ಭವಿಷ್ಯದ ಕನನ್ ಈಡೇರಿಸಾವುನ ಶಕ್ತಿನೇ ರಾಷ್ಟ್ರೀಯ ಸೇವಾ ಯೋಜನೆ ಆತ್ಂಡ್. ಸೇವೆ ಬದ್ ಕ್ ದ ಅವಿಭಾಜ್ಯ ಅಂಗ ಪನ್ಪಿನ ಪಾಠನ್ ಕಲ್ಪಾರ್ಥಿ ಯುವ ಜನಾಂಗಗ್ ಕಲ್ಪಿಸಾವುನ ಎಡ್ಡೆ ಕೆಲಸನ್ ಎನ್‌ಎಸ್‌ಎಸ್ ಮಲ್ತೊಂದು ಬೈದ್ಂಡ್ ಪಂದ್ ಉಬಾರ್ ಸರಕಾರಿ ಪ್ರಥಮ ದೆರ್ಜೆ ಕಾಲೇಜ್ ದ ಪ್ರಾಂಶುಪಾಲೆರ್ ಪ್ರೊ.ಸುಬ್ಬಪ್ಪ ಕೈಕಂಬ ಪಂಡೆರ್‌.

ಮೇರ್ ಕೈಕಂಬ ಉನ್ನತೀಕರಣ ಮಲ್ತಿನ ಸರಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆಡ್ ಒಂಜಿ ವಾರ ನಡೆಪುನ ಸುಬ್ರಹ್ಮಣ್ಯದ ಎಸ್‌ಎಸ್‌ಪಿಯು ಕಾಲೇಜ್ ದ ರಾಷ್ಟ್ರೀಯ ಸೇವಾ ಯೋಜನೆ ಘಟಕದ ವಾರ್ಷಿಕ ಇಸೇಸ ಶಿಬಿರದ ಉದಿಪನ ಲೇಸ್ ಡ್ ದಿಕ್ಸೂಚಿ ಭಾಷಣ ಮಲ್ತೆರ್.

ಬಿಳಿನೆಲೆ ಗ್ರಾ.ಪಂ. ಗುರ್ಕಾರ್ದಿ ಶಾರದಾ ದಿನೇಶ್ ಎನ್ನೆಸ್ಸೆಸ್ ಕೊಡಿ ರಾಪಾಯೆರ್. ಶಿಬಿರನ್ ಕೈಕಂಬ ಶಾಲೆದ ಎಸ್‌ಡಿಎಂಸಿ ಗುರ್ಕಾರೆ ಮೋಹನ್ ಕಳಿಗೆ ಉದಿಪನ ಮಲ್ತೆರ್. ಲೇಸ್ ದ ಗುರ್ಕಾರ್ಮೆನ್ ಹಿರಿಯ ಉಪನ್ಯಾಸಕಿ ರೇಖಾರಾಣಿ ಸೋಮಶೇಖರ್ ಒಯಿಸೊಂದಿತ್ತೆರ್. ಕೈಕಂಬ ಶಾಲೆದ ಮುಖ್ಯಗುರು ಪವಿತ್ರ ಎ, ಗ್ರಾ.ಪಂ.ಸದಸ್ಯೆ ಭವ್ಯಾ ಕುಕ್ಕಾಜೆ, ಬಿಳಿನೆಲೆ ಗ್ರಾಮದ ಗ್ರಾಮ ಲೆಕ್ಕಿಗೆರ್ ಶ್ರುತಿ, ಎಸ್‌ಎಸ್‌ಪಿಯು ಕಾಲೇಜ್ ದ ಹಿರಿಯ ಕಲ್ಪಾರ್ಥಿ ಸಂಘದ ಗುರ್ಕಾರೆ ರಾಜೇಶ್ ಎನ್.ಎಸ್, ಶಿಕ್ಷಕ-ರಕ್ಷಕ ಸಂಘದ ಗುರ್ಕಾರೆ ರಾಜೇಶ್ ಮಾವನಕಟ್ಟೆ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್. ಈ ಪೊರ್ತುಡು ಎನ್ನೆಸ್ಸೆಸ್ ಯೋಜನಾಧಿಕಾರಿ ಸೌಮ್ಯಾ ದಿನೇಶ್, ಭವ್ಯಶ್ರೀ ಹರೀಶ್ ಕುಲ್ಕುಂದ, ಘಟಕದ ನಾಯಕೆರ್ ಪವನ್ ಬೊಕ್ಕ ಕಾವ್ಯ ಚಾವಡಿಡ್ ಇತ್ತೆರ್. ಸೌಮ್ಯಾ ದಿನೇಶ್ ಎದ್ಕೊನಿಯೆರ್. ಉಪನ್ಯಾಸಕಿ ಸವಿತಾ ಕೈಲಾಸ್ ಸೊಲ್ಮೆ ಸಂದಾಯೆರ್.

ವರದಿ: ಗೋಪಿಚಂದನ್ ಕೆಎಸ್

ಅ.15: ಭಟ್ಟಿಪಾಡ ಶ್ರೀ ಶನೀಶ್ವರ ಮಂದಿರದ ಮುತಾಲಿಕೆಡ್ 39ನೇ ವರ್ಷೊದ ಆಚರಣೆ, ಶ್ರೀ ಬಪ್ಪನಾಡು ಕ್ಷೇತ್ರ ಮಹಾತ್ಮೆ ಆಟ

ಭಟ್ಟಿಪಾಡ ಶ್ರೀ ಶನೀಶ್ವರ ಮಂದಿರದ ಮುತಾಲಿಕೆಡ್ 39ನೇ ವರ್ಷೊದ ಆಚರಣೆ ಅ.15 ಐತಾರ ಮುಲುಂಡ್ ಕಾಳಿದಾಸ್ ಹಾಲ್ ಡ್ ನಡಪರೆ ಉಂಡು.

ಈ ಲೇಸ್ ದೊಟ್ಟಿಗೆ ಜನಾರ್ಧನ್ ಸಾಲ್ಯಾನ್ ಮೆರೆನ ಶಿಷ್ಯವೃಂದದಕ್ಲೆರ್ದ್ ತಬಲೆ ವಾದನ, ಯಕ್ಷಗುರು ಅಜೆಕಾರ್ ಬಾಲಕೃಷ್ಣ ಶೆಟ್ಟಿ ಮೆರೆನ ನಿರ್ದೇಶನಡ್, ಮಂದಿರಡ್ ತರಬೇತಿ ಪಡೆಯಿನ ಕಲಾವಿದೆರೆರ್ದ್ 4 ನೇ ವರ್ಷೊದ ಆಟ ಶ್ರೀ ಬಪ್ಪನಾಡು ಕ್ಷೇತ್ರ ಮಹಾತ್ಮೆ ನಡಪರೆ ಉಂಡು.

ಅಂಚೆನೆ ಭಾಗವತಿಕೆನ್ ಭಾಗವತೆರ್ ಶ್ರೀದೇವಿ ಪ್ರಸಾದ್ ಆಳ್ವ ತಲಪಾಡಿ ಮಲ್ಪುವೆರ್. ಶ್ರೀ ರಾಧಾಕೃಷ್ಣ ನಾವಡ, ಸೀತಾರಾಮ್ ಕುಮಾರ್ ಅತಿಥಿ ಕಲಾವಿದೆರಾದ್ ಬರಿಯೆರೆ ಉಲ್ಲೆರ್. ಚೆಂಡೆ ವಾದನಗ್ ಪ್ರಶಾಂತ್ ಶೆಟ್ಟಿ ವಗೆನಾಡು ಬರಿಯರೆ ಉಲ್ಲೆರ್.

ಅ.19: ಕಾಜ್ರಳ್ಳಿ ಶ್ರೀ ವನದುರ್ಗಾ ದೇವಲ್ಯಡ್ ಶಿವದೂತ ಪಂಜುರ್ಲಿ ಆಟ

ಕಾಜ್ರಳ್ಳಿ ಶ್ರೀ ವನದುರ್ಗಾ ದೇವಲ್ಯದ 9ನೇ ವರ್ಷೊದ ಮಾರ್ನೆಮಿ ಉಚ್ಚಯದ ಲೆಕ್ಕೊಡು ಶ್ರೀ ಕ್ಷೇತ್ರಡ್ ಅ.19 ಗುರುವಾರ ರಾತ್ರೆ ಶಿವದೂತ ಪಂಜುರ್ಲಿ ಆಟ ನಡಪರೆ ಉಂಡು.

ಈ ಆಟ ಶ್ರೀ ಮಹಾಗಣಪತಿ ಪ್ರವಾಸಿ ಯಕ್ಷಗಾನ ಮಂಡಳಿ ನಡೂರು ಮಂದಾರ್ತಿ ಮೊಕ್ಲೆರ್ದ್ ನಡಪರೆ ಉಂಡು. ಈ ಲೇಸ್ ಗ್ ಅಲ್ತಾರು ದೇವಲ್ಯದ ಮೊಕ್ತೇಸರೆರ್ ನಿರಂಜನ ಹೆಗ್ಡೆ ಸಂಪೂರ್ಣ ಸಹಕಾರ ಕೊರ್ತೆರ್.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಲೇಸ್ ದ ಸಂಯೋಜಕೆರ್ ಮಂದಾರ್ತಿ ಮೇಳದ ಯಕ್ಷಗಾನ ಕಲಾವಿದೆ ಮಾನ್ಯ ನರಸಿಂಹ ಲೆಪ್ಪೋಲೆಡ್ ತೆರಿಪಾದೆರ್.