October 16, 2023

ಅ.15-24: ಭಾಯಂದರ್ ಶ್ರೀ ದುರ್ಗಾಪರಮೇಶ್ವರಿ ಭಕ್ತ ವೃಂದ ಚಾರಿಟೇಬಲ್ ಟ್ರಸ್ಟ್ (ರಿ.) ದ ಮುತಾಲಿಕೆಡ್ ಮಾರ್ನೆಮಿ ಉಚ್ಚಯ-2023

ಭಾಯಂದರ್ ಶ್ರೀ ದುರ್ಗಾಪರಮೇಶ್ವರಿ ಭಕ್ತ ವೃಂದ ಚಾರಿಟೇಬಲ್ ಟ್ರಸ್ಟ್ (ರಿ.) ದ ಮುತಾಲಿಕೆಡ್ ಮಾರ್ನೆಮಿ ಉಚ್ಚಯ-2023 ಅ.15-24 ಮುಟ್ಟ ನಡಪರೆ ಉಂಡು.

ಅ.19 ಕ್ಕ್ ರಂಗಪೂಜೆ, ತೀರ್ಥ ಪ್ರಸಾದ ಬೊಕ್ಕ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು. ಅ.22 ಕ್ಕ್ ಮಹಾಪೂಜೆ, ಬೊಲ್ಪುಗು ದುರ್ಗಾಹೋಮ, ಭಜನೆ, ಮಹಾಮಂಗಳಾರತಿ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ತುಳು ಯಕ್ಷಗಾನ ಮಹಿಮೆದ ಮಂತ್ರ ದೇವತೆ ಬೊಕ್ಕ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.

ಅಂಚೆನೆ ಪ್ರತಿದಿನೊಲ ಬೊಲ್ಪುಗು ಪೂಜೆ, ಮಂಗಳಾರತಿ, ತೀರ್ಥ ಪ್ರಸಾದ, ಬಯ್ಯಗ್ ಬೇತೆ ಬೇತೆ ಮಂಡಳಿದಕ್ಲೆರ್ದ್ ಭಜನೆ, ರಾತ್ರೆ ಮಂಗಳಾರತಿ, ತೀರ್ಥ ಪ್ರಸಾದ ಬೊಕ್ಕ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.

ಈ ಲೇಸ್ ಗ್ ಕುಟುಂಬ ಸಮೇತೆರಾದ್ ಬತ್ತ್ ದ್ ಶ್ರೀ ದೇವೆರೆನ ಆಶೀರ್ವಾದ ಪಡೆವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ದೇವೆರೆ ಪಾದ ಸೇರಿಯೆರ್ ಬೆದ್ರದ ಪತ್ರಕರ್ತೆ, ಯುವ ವಕೀಲೆರ್ ವೇಣುಗೋಪಾಲ್

ಬೆದ್ರ: ಪ್ರೆಸ್ ಕ್ಲಬ್ ದ ಮಾಜಿ ಗುರ್ಕಾರೆ, ಜಯಕಿರಣ ಪತ್ರಿಕೆದ ಬೆದ್ರ ತಾಲೂಕ್ ವರದಿಗಾರೆ ಬೊಕ್ಕ ಯುವ ನ್ಯಾಯವಾದಿ ವೇಣುಗೋಪಾಲ (30) ಮೇರ್ ಇನಿ ತಿಗಲೆ ಬೇನೆಡ್ ತೀರ್ ಪೋಯೆರ್.

ಸಚ್ಚೇರಿಪೇಟೆದ ಆನಂದ ಪೂಜಾರಿ ಮೆರೆನ ಮಗೆ ಆಯಿನ ವೇಣುಗೋಪಾಲ ಮೇರ್ ಪತ್ರಿಕಾ ಕ್ಷೇತ್ರಡ್ ಮಾತ್ರ ಅತ್ತಂದೆ ಸಾಂಸ್ಕೃತಿಕ ಬೇತೆ ಬೇತೆ ಕ್ಷೇತ್ರಡ್ ಕೆಲಸ ಮಲ್ದೆರ್.

ಮೆರೆನ ಸಾವುಗ್ ಬೆದ್ರ ತಾಲೂಕ್ ಕಾರ್ಯನಿರತ ಪತ್ರಕರ್ತರೆನ ಸಂಘ, ಬೆದ್ರ ವಕೀಲೆರೆನ ಸಂಘ, ಬೊಕ್ಕ ಜಿಲ್ಲಾ ಪತ್ರಕರ್ತೆರೆನ ಸಂಘ ಸಂತಾಪ ತೆರಿಪಾದೆರ್.

ಮಾಲಿನ್ಯ ನಿಯಂತ್ರಿತ ಕೈಗಾರಿಕೋದ್ಯಮರ್ದ್ ಅವಳಿ ಜಿಲ್ಲೆಲೆನ ಅಭಿವೃದ್ದಿ: ಜಿಲ್ಲಾಧ್ಯಕ್ಷೆರ್ ಡಿ. ಆರ್. ರಾಜು

ಒಡಿಪು: ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಸರ್ವತೋಮುಖ ಅಭಿವೃದ್ಧಿಗಾದ್ ಪೇಜಾವರ ಸ್ವಾಮೀಜಿಲೆನ ಆಶೀರ್ವಾದರ್ದ್ ತೋನ್ಸೆ ಜಯಕೃಷ್ಣ ಎ. ಶೆಟ್ಟಿ ಮೆರೆನ ಮುತಾಲಿಕೆಡ್ 23 ವರ್ಷೊದ ಪಿರವು ಸ್ಥಾಪನೆ ಆಯಿನ ಸರಕಾರೇತರ ಸಂಸ್ಥೆ, ಜಯಶ್ರೀಕ್ರಷ್ಣ ಪರಿಸರ ಪ್ರೇಮಿ ಸಮಿತಿ ಇತ್ತೆ ಅಂತರಾಷ್ಟ್ರೀಯ ಮಟ್ಟಡ್ ಸಮಿತಿನ್ ಸ್ಥಾಪನೆ ಮಲ್ದ್ಂಡ್. ಸಮಿತಿದ ನಿಸ್ವಾರ್ಥ ಸೇವೆಗ್ ನನಲ ಎಚ್ಚದ ಶಕ್ತಿ ತಿಕ್ ದ್ಂಡ್. ಮಾಲಿನ್ಯ ರಹಿತ ಅಭಿವೃದ್ದಿಗಾದ್ ಸಮಿತಿ ದುಂಬುದಲೆಕ್ಕ ನನಲ ಶಕ್ತಿ ಮೀರ್ದ್ ಬೆನಿಯೆರೆ ಉಂಡು ಪಂದ್ ಜಯಶ್ರೀಕೃಷ್ಣ ಪರಿಸರ ಪ್ರೇಮಿ ಸಮಿತಿದ ಒಡಿಪು ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲೆದ ಗುರ್ಕಾರೆ ಡಿ.ಆರ್. ರಾಜು ಪಂಡೆರ್.

ಮೇರ್ ಅ.13 ಕ್ಕ್ ಬಯ್ಯಗ್ ಒಡಿಪುದ ಮಾಧವ ಕೃಷ್ಣ ಸಭಾಂಗಣ, ಕಿದಿಯೂರು ಹೋಟೆಲ್ ಡ್ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿಯೆರ್.

ಸಮಿತಿದ ಸಂಸ್ಥಾಪಕೆರ್ ತೋನ್ಸೆ ಜಯಕೃಷ್ಣ ಎ. ಶೆಟ್ಟಿ ಪಾತೆರ್ದ್, 2000ನೇ ಇಸವಿಡ್ 29 ಬೇತೆ ಬೇತೆ ಸಮುದಾಯ ಸಂಘಟನೆಲೆನ್ ಒಟ್ಟು ಸೇರ್ಸಾದ್ ಸಮಿತಿನ್ ರಚನೆ ಮಲ್ದೆರ್. ಆನಿದ ಒಡಿಪು ಪೇಜಾವರ ಮಠತ್ತ ಸ್ವಾಮೀಜಿ ಮೇರ್ ಸಮಿತಿಗ್ ಪುದರ್ ದೀದ್ ಆಶೀರ್ವಾದ ಮಲ್ತೆರ್.

ಈ ಪೊರ್ತುಡು ಏರ್ ಇಂಡಿಯಾದ ಸ್ಟೇಷನ್ ಪ್ರಬಂಧಕೆರ್ ನಾಗೇಶ್ ಶೆಟ್ಟಿ ಮಾಣಿಗುತ್ತು, ಸಮಿತಿದ ಗೌರವ ಕಾರ್ಯದರ್ಶಿ ರವಿ ದೇವಾಡಿಗ, ಜಿಲ್ಲಾ ಉಪಾಧ್ಯಕ್ಷೆರ್ ಜಗದೀಶ್ ಅಧಿಕಾರಿ ಬೊಕ್ಕ ಜಿಲ್ಲಾ ಸಮಿತಿದ ಗೌರವ ಕಾರ್ಯದರ್ಶಿ ಪ್ರೊ. ಶಂಕರ್ ಚಾವಡಿಡ್ ಪಾಲ್ ಪಡೆದಿತ್ತೆರ್. ಸಮಿತಿದ ಗೌರವ ಪ್ರಧಾನ ಕಾರ್ಯದರ್ಶಿ ಮುಂಡ್ಕೂರು ಸುರೇಂದ್ರ ಸಾಲ್ಯಾನ್ ಪರಿಚಯ ಮಲ್ತ್ ದ್ ಎದ್ಕೊನಿಯೆರ್.

ಶಾಂತಿನಗರ ಶ್ರೀ ಮೂಕಾಂಬಿಕಾ ದೇವಲ್ಯದ ಜೀರ್ಣೋದ್ಧಾರ, ಬ್ರಹ್ಮಕಲಶ ಉಚ್ಚಯದ ಸಮಾಲೋಚನೆ ಸಭೆ

ಕಿನ್ನಿಗೋಳಿ: ಗುತ್ತಕಾಡು ಕೈತಲ್ದ ತಾಳಿಪಾಡಿದ ಶಾಂತಿನಗರ ಶ್ರೀ ಮೂಕಾಂಬಿಕಾ ದೇವಲ್ಯ ಡ್ ನಡಪರೆ ಇಪ್ಪುನ ದೇವಲ್ಯದ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯದ ಲೆಕ್ಕೊಡು ಸಮಾಲೋಚನೆ ನಡತ್ಂಡ್.

ಲೇಸ್ ದ ಗುರ್ಕಾರ್ಮೆನ್ ಶಾಂತಿನಗರ ಶ್ರೀ ಮೂಕಾಂಬಿಕಾ ದೇವಲ್ಯದ ಗುರ್ಕಾರೆ ಚಂದ್ರಶೇಖರ ಒಯಿಸೊಂದಿತ್ತೆರ್.

ಸಭೆಟ್ಟ್ ದಿನೇಶ್ ಬಂಡ್ರಿಯಾಲ್ ತಾಳಿಪಾಡಿ ಗುತ್ತು, ಧರ್ಮದರ್ಶಿಲು ವಿವೇಕಾನಂದ, ಸುರೇಶ್ ಶೆಟ್ಟಿ ನಡಿಯಾಲ್ ಗುತ್ತು, ಭುವನಾಭಿರಾಮ ಉಡುಪ, ದಯಾನಂದ ಭಟ್, ಕುಶಲ ಪೂಜಾರಿ, ರೋಕಿ ಪಿಂಟೋ, ದಿನೇಶ್ ಆಚಾರ್, ರಘುರಾಮ ಪುನರೂರು, ಡೋಲ್ಪಿ ಸಂತು ಮಯಾರ್, ಶಾಂಭವಿ ಶೆಟ್ಟಿ, ಧನಂಜಯ ಶೆಟ್ಟಿಗಾರ್, ಸಾಗರಿಕ ಪಕ್ಷಿಕೆರೆ, ಮಾಧವ, ಚಿತ್ರಾಕ್ಷಿ ಶೆಟ್ಟಿ, ಮೀರಾ ಶೆಟ್ಟಿ, ಸುಕುಮಾರ್ ಶೆಟ್ಟಿ, ವಿಠಲ ಪೂಜಾರಿ ಬೆದ್ರಡಿ, ದಿವಾಕರ ಕರ್ಕೇರಾ, ಯೋಗೀಶ್ ಕೋಟ್ಯಾನ್, ಕೇಶವ, ಶಶಿಕಾಂತ್, ಸಮಿತಿದ ಬೇತೆ ಬೇತೆ ಪದಾಧಿಕಾರಿಲು ಬೊಕ್ಕ ಭಕ್ತಾದಿಲು ಎಚ್ಚದ ಸಂಖ್ಯೆಡ್ ಪಾಲ್ ಪಡೆದಿತ್ತೆರ್.

ದಿವಾಕರ ಕರ್ಕೇರ ಲೇಸ್ ದ ಸುಧಾರಿಕೆ ಮಲ್ತೆರ್. ಶಶಿಕಾಂತ್ ಎದ್ಕೊಂದು ಸೊಲ್ಮೆ ಸಂದಾಯೆರ್. ಮಾರ್ಚ್ 10,11,12 ಕ್ಕ್ ಬ್ರಹ್ಮಕಲಶ ಉಚ್ಚಯ ನಡಪರೆ ಉಂಡು.