ಕರ್ನಾಟಕದ ಬಿಸಿಯೂಟದ ಮಾದರಿದಂಚೆನೆ ಇನಿರ್ದ್ ತೆಲಂಗಾಣ ಸರ್ಕಾರ ಅಲ್ಪದ ಶಾಲೆಡ್ ಕಾಂಡೆದ ತಿಂಡಿ (ಬ್ರೇಕ್ ಫಾಸ್ಟ್) ಯೋಜನೆನ್ ಜಾರಿಗ್ ಕನದ್ಂಡ್.
ಮುಖ್ಯಮಂತ್ರಿ ಕೆ. ಚಂದ್ರಶೇಖರ್ ರಾವ್ ಮೇರ್ ರಂಗಾರೆಡ್ಡಿ ಜಿಲ್ಲೆದ ರವಿರ್ ಯಾಲಡ್ ಇಪ್ಪುನ ಜಿಲ್ಲಾ ಪರಿಷತ್ತ್ ಹೈಸ್ಕೂಲ್ ಡ್ ಈ ಯೋಜನೆಗ್ ಚಾಲನೆ ಕೊರಿಯೆರ್. ಈ ಯೋಜನೆದ ಮುಖೇನ 1-10 ನೇ ಕ್ಲಾಸ್ ಮುಟ್ಟದ ಸುಮಾರ್ 20 ಲಕ್ಷ ಸರ್ಕಾರಿ ಶಾಲೆದ ಕಲ್ಪಾರ್ಥಿಲೆಗ್ ಬೊಲ್ಪುಗು ತಿಂಡಿ ತಿಕ್ಕುಂಡು.
ಏಷ್ಯನ್ ಗೇಮ್ಸ್ ಕಬಡ್ಡಿ ಪಂತೊಡು ಪಾಕಿಸ್ತಾನದ ವಿರುದ್ಧ ಭಾರತ ಗೆಂದ್ ದ್ಂಡ್.
ಪಂತೊದ ಸುರುಟ್ಟೆ ಪಾಕಿಸ್ತಾನದ ಮಿತ್ತ್ ಸಂಪೂರ್ಣ ಪ್ರಾಬಲ್ಯ ತೂಪಾಯಿನ ಭಾರತ 61-14 ಅಂಕದ ಅಂತರಡ್ ಗೆಂದ್ ದ್, ಫೈನಲ್ ಬೈದ್ಂಡ್. ಭಾರತ ಪಾಕಿಸ್ತಾನನ್ 6 ಸರ್ತಿ ಆಲೌಟ್ ಮಲ್ತಿನವೇ ಈ ಪಂತೊದ ಇಸೇಸ ಆತ್ಂಡ್. ಈ ಟೂರ್ನಿಡ್ ಭಾರತ ಇಡೇ ಮುಟ್ಟ ಒಂಜೇ ಒಂಜಿ ಪಂತೊನ್ ಸೋಪಂದೆ ಗೆಂದ್ ದ್ಂಡ್. ಎಲ್ಲೆ ಬಂಗಾರ್ ದ ಪದಕಗಾದ್ ಇರಾನ್ ಅತ್ತ್ಂಡ ಚೀನಾದೊಟ್ಟಿಗೆ ಗೊಬ್ಬೆರೆ ಉಂಡು.
ಬಾರೆದ ಪೂಂಬೆರ್ದ್ ನರಮಾನಿನ ಆರೋಗ್ಯಗ್ ಮಸ್ತ್ ರೀತಿದ ಪ್ರಯೋಜನ ಉಂಡು.
ಹೃದ್ರೋಗಿಲೆನ ಸುಮಾರ್ ಸಮಸ್ಯೆನ್ ಸರಿ ಮಲ್ಪುನ ಗುಣ ನೆಕ್ಕ್ ಉಂಡು.
ಉಂದೆನ್ ತಿನ್ಪಿನೆರ್ದ್ ಮೂತ್ರಕೋಶದ ತೊಂದರೆರ್ದ್ ರಕ್ಷಣೆ ಮಲ್ಪುಂಡು. ಅತ್ತಂದೆ ನೆಟ್ಟ್ ಎಲುನ್ ಗಟ್ಟಿ ಮಲ್ಪುನ ಸಕ್ತಿ ಉಂಡು. ಅಂಚೆನೆ ದೇಹಡ್ ಇಪ್ಪುನ ನೆತ್ತೆರ್ ದ ಕೊರತೆನ್ ಸರಿ ಮಲ್ಪರೆ ಸಕಾಯ ಮಲ್ಪುಂಡು. ಬೊಕ್ಕ ನೆತ್ತೆರ್ ಡ್ ಇಪ್ಪುನ ಸೆಕ್ಕರೆದ ಅಂಸೊನು ಕಮ್ಮಿ ಮಲ್ಪುಂಡು.
ವಿಶ್ವ ಹಿಂದೂ ಪರಿಷತ್ 60ನೇ ವರ್ಷಗ್ ಪಾದಾರ್ಪಣೆ ಮಲ್ತಿನ ಲೆಕ್ಕಡ್ ಬಜರಂಗದಳದ ನೇತೃತ್ವಡ್ ದೇಶಾದ್ಯಂತ ಶೌರ್ಯ ಜಾಗರಣ ರಥಯಾತ್ರೆ ನಡತೊಂದು ಉಂಡು.
ಚಿತ್ರದುರ್ಗರ್ದ್ ಪಿದಡಿನ ಶೌರ್ಯ ಜಾಗರಣ ರಥಯಾತ್ರೆಗ್ ವಿಶ್ವ ಹಿಂದೂ ಪರಿಷತ್ ಬಜರಂಗದಳ ಸುಳ್ಯ ಪ್ರಖಂಡ ಬೊಕ್ಕ ಕಡಬ ಪ್ರಖಂಡ ವತಿರ್ದ್ ಸಂಪಾಜೆಡ್ ಸ್ವಾಗತ ಮಲ್ತೆರ್.
ಸಂಪಾಜೆ ಪೆಟ್ರೋಲ್ ಪಂಪ್ದ ಕೈತಲ್ ಮಾಜಿ ಸಚಿವೆರ್ ಎಸ್. ಅಂಗಾರೆರ್ ತಾರಾಯಿ ಹಾಕುನ ಮುಕೇನ ರಥಯಾತ್ರೆಗ್ ಸ್ವಾಗತ ಮಲ್ತೆರ್. ಬೊಕ್ಕ ಅಲ್ಪರ್ದ್ ಸಂಪಾಜೆ ಚೆಕ್ ಪೋಸ್ಟ್ ಮುಟ್ಟ ಪಾದಯಾತ್ರೆದ ಮುಕೇನ ವಿಶ್ವ ಹಿಂದೂ ಪರಿಷತ್ ಬೊಕ್ಕ ಬಜರಂಗದಳದ ಕಾರ್ಯಕರ್ತೆರ್ ಪೋಯೆರ್.
ಈ ಪೊರ್ತುಡು ಸುಳ್ಯ ತಾಲೂಕು ಬಜರಂಗದಳದ ಸಂಚಾಲಕೆರ್ ಹರಿಪ್ರಸಾದ್ ಎಲಿಮಲೆ, ಕಡಬ ತಾಲೂಕು ಬಜರಂಗದಳದ ಸಂಚಾಲಕೆರ್ ರಾಜೇಶ್ ಉದನೆ, ಕಾರ್ಯದರ್ಶಿಲಾಯಿನ ನವೀನ್ ಎಲಿಮಲೆ, ಜಯಂತ ಕಲ್ಲುಗುಡ್ಡೆ, ಸುಳ್ಯ ಪ್ರಖಂಡ ಗುರ್ಕಾರ್ಲು ಸೋಮಶೇಖರ ಪೈಕ, ಕಡಬ ಪ್ರಖಂಡ ಗುರ್ಕಾರ್ಲು ರಾಧಾಕೃಷ್ಣ ಕೋಲ್ಪೆ, ಸುಳ್ಯ ಬಿಜೆಪಿ ಮಂಡಲ ಸಮಿತಿದ ಗುರ್ಕಾರ್ಲು ಹರೀಶ್ ಕಂಜಿಪಿಲಿ, ಪ್ರಧಾನ ಕಾರ್ಯದರ್ಶಿ ಸುಬೋದ್ ಶೆಟ್ಟಿ ಮೇನಾಲ, ಅರಂತೋಡು ತೊಡಿಕಾನ ಪ್ರಾ.ಕೃ.ಪ.ಸ.ಸಂಘದ ಗುರ್ಕಾರ್ಲು ಸಂತೋಷ್ ಕುತ್ತಮೊಟ್ಟೆ, ವಿಶ್ವ ಹಿಂದೂ ಪರಿಷತ್ ಬೊಕ್ಕ ಬಜರಂಗದಳದ ಕಾರ್ಯಕರ್ತೆರ್ ಇತ್ತೆರ್.
ವಿಶ್ವ ಪ್ರಸಿದ್ಧ ಮೈಸೂರು ದಸರಾ ಮಹೋತ್ಸಡ್ ಏರ್ಶೋ ನಡಪಾವೆರೆ ಕೇಂದ್ರ ಸರ್ಕಾರ ಅನುಮತಿ ಕೊರ್ತುಂಡು. ಈ ನಡುವೆ ದಸರಾ ಪೊರ್ತುಡು ವೈಮಾನಿಕ ಪ್ರದರ್ಶನ ನಡಪಾಯೆರೆ ಅನುಮತಿಗಾದ್ ರಾಜ್ಯ ಸರ್ಕಾರ ರಕ್ಷಣಾ ಸಚಿವೆರ್ ರಾಜನಾಥ್ ಸಿಂಗ್ ಅರೆಗ್ ಪ್ರಸ್ತಾವನೆ ಕಡಪಾದ್ ಇತ್ತೆರ್. ಅವೆಕ್ಕ್ ಇತ್ತೆ ಅನುಮತಿ ತಿಕ್ಕ್ದುಂಡ್.
ಈ ಹಿನ್ನೆಲೆಡ್ ಮೈಸೂರು ಡಿಸಿ ಡಾ. ರಾಜೇಂದ್ರ ವಾಯುಪಡೆ ಅಧಿಕಾರಿಲೆನ ಒಟ್ಟಿಗೆ ಬನ್ನಿ ಮಂಟಪಗ್ ಭೇಟಿ ಕೊರ್ದು ಸಿದ್ಧತೆದ ಬಗ್ಗೆ ಪರಿಶೀಲನೆ ಮಲ್ತ್ದೆರ್.ಅ.15 ದಾನಿ ನಾಡಪರ್ಬ ದಸರಾದ ಉದಿಪನ ಆವೆರೆ ಉಂಡು, ಅಂಚನೆ 14 ಆನೆಲೆದ ಜಂಬೂ ಸವಾರಿದೊಟ್ಟಿಗೆ ಮುಕ್ತಾಯ ಆವೆರೆ ಉಂಡು.
ಉಬಾರ್: ಕ್ಷೇತ್ರ ಶಿಕ್ಷಣಾಧಿಕಾರಿಲೆನ ಕಚೇರಿ ಪುತ್ತೂರ್, ಸರ್ವೋದಯ ಪ್ರೌಢಶಾಲೆ ಪೆರಿಯಡ್ಕ ಉಬಾರ್ ದ ಒಟ್ಟುಸೇರಿಗೆಡ್ 2023-24 ನೇ ಸಾಲ್ ದ ಪುತ್ತೂರ್ ಶೈಕ್ಷಣಿಕ ವಲಯದ ಪ್ರಾಥಮಿಕ ಬೊಕ್ಕ ಪ್ರೌಢಶಾಲೆದ ಆನ್- ಪೊಣ್ಣುಲೆಗ್ ಕ್ರೀಡೋತ್ಸವ-2023 ಲೇಸ್ ಅ.6 ಬೊಕ್ಕ 7 ಕ್ಕ್ ಪೆರಿಯಡ್ಕ ಸರ್ವೋದಯ ಪ್ರೌಢಶಾಲೆದ ಜಾಲ್ ಡ್ ನಡಪರೆ ಉಂಡು.
ಅ.6 ಸುಕ್ರಾರ ಬೊಲ್ಪುಗು ಈ ಕ್ರೀಡಾಕೂಟದ ಉದಿಪನ ಲೇಸ್ ನಡತ್ಂಡ್. ಅ.7 ಸನಿಯಾರ ಮಧ್ಯಾಹ್ನ ನೆತ್ತ ಸಮಾರೋಪ ಸಮಾರಂಭ ಲೇಸ್ ನಡಪರೆ ಉಂಡು ಪಂದ್ ಕ್ರೀಡಾಕೂಟ ಸಮಿತಿ, ಎಸ್ ಡಿಎಂಸಿ ಪೋಷಕೆರ್, ಹಿರಿಯ ವಿದ್ಯಾರ್ಥಿ ಸಂಘ, ಮುಖ್ಯೋಪಾಧ್ಯಾಯೆರ್, ಸಹಶಿಕ್ಷಕೆರ್, ಬೋಧಕೇತರ ಸಿಬ್ಬಂದಿಲು ಬೊಕ್ಕ ಪೆರಿಯಡ್ಕ ಸರ್ವೋದಯ ಪ್ರೌಢ ಶಾಲೆದ ಕಲ್ಪಾರ್ಥಿಲು ಲೆಪ್ಪೋಲೆಡ್ ತೆರಿಪಾದೆರ್.
ಮಾಣಿ: ಇಂಚರ ರೈತ ಉತ್ಪಾದಕರ ಕಂಪನಿ ನಿಯಮಿತ ನೆತ್ತ 2022-23ನೇ ಸಾಲ್ದ ಸುರುತ ವಾರ್ಷಿಕ ಮಹಾಸಭೆ ಮಾಣಿ ಕುಲಾಲ ಸಂಘಡ್ ನಡತ್ಂಡ್. ಸಭೆತ ಗುರ್ಕಾರ್ಮೆನ್ ಪ್ರಕಾಶ್ ಕೆ.ಎಸ್ ವಹಿಸ್ದ್ ಇತ್ತೆರ್.
ವೇದಿಕೆಡ್ ನಿರ್ದೇಶಕೆರಾಯಿನ ಕೆ.ಎನ್ ಗಂಗಾಧರ ಆಳ್ವ, ವಸಂತಿ ಸಂಜೀವ ಪೂಜಾರಿ, ಜನಾರ್ಧನ ನಾಯ್ಕ, ಪೆರಾಜೆ, ಉಮೇಶ್ ಪಿ, ರೋಹಿತಾಶ್ವ, ರಮಣಿ ಲೋಬೋ, ಜನಾರ್ಧನ ನಲಿಕೆ, ರೂಪೇಶ್ ರೈ ಇತ್ತೆರ್. 2022-23ನೇ ವರ್ಷದ ಆಡಳಿತ ಮಂಡಳಿದ ವರದಿ ಬೊಕ್ಕ ಲೆಕ್ಕ ಪರಿಶೋಧನಾ ವರದಿನ್ ಪಿ. ಗೌತಮ್ ಶೆಣೈ CEO ವಾಚನ ಮಲ್ತೆರ್. ರಾಮಕೃಷ್ಣ ಆಳ್ವ (CBBO)ನಬಾರ್ಡ್ದ ಬಗ್ಗೆ ಮಾಹಿತಿ ಕೊರಿಯೆರ್.
ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪುನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 28ನೇ ಸಂಚಿಕೆ ಅ.6 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಕಲ್ಪಾರ್ಥಿಯಾದ್ ಪುಟಾಣಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ಅ.7 ಸನಿಯಾರ ಮಧ್ಯಾಹ್ನ 1.30ಕ್ಕ್ ಕುಡೊರ ಪ್ರಸಾರ ಆಪುಂಡು. ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಈ ಲೇಸ್ ನ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ವಿದ್ಯಾನಗರ ಸಜೀಪಮುನ್ನೂರು ಶ್ರೀ ಶಾರದಾ ಫ್ರೆಂಡ್ಸ್ ಸರ್ಕಲ್ (ರಿ.) ದ 30 ನೇ ವರ್ಷೊದ ಮಾರ್ನೆಮಿ ಉಚ್ಚಯ ಅ.20 ಸುಕ್ರಾರ ನಡಪರೆ ಉಂಡು.
ಬಯ್ಯಗ್ ಅಂಗನವಾಡಿ ಬೊಕ್ಕ ಶಾಲೆದ ಜೋಕುಲೆರ್ದ್ ನೃತ್ಯ ಸಿಂಚನ ಬೊಕ್ಕ ಭರತನಾಟ್ಯ, ರಾತ್ರೆ ಸಭಾ ಲೇಸ್, ಬಿನ್ನೆರೆನ ಸಮ್ಮುಖಡ್ ಸಾಧಕೆರೆಗ್ ಸನ್ಮಾನ, ಸಂಘಗಾದ್ ಬೆಂದಿನ ಹಿರಿಯ ನಾಗರಿಕೆರೆಗ್ ಮಾನಾದಿಗೆ, ಊರುದ ಸಮಾಜ ಸೇವಕೆರೆಗ್ ಮಾನಾದಿಗೆ, 2022-23 ನೇ ಸಾಲ್ ದ 10 ನೇ ಕ್ಲಾಸ್ ಬೊಕ್ಕ ಪಿಯುಸಿಡ್ 575 ರ್ದ್ ಎಚ್ಚ ಮಾರ್ಕ್ ಪಡೆಯಿನ ಕಲ್ಪಾರ್ಥಿಲೆಗ್ ಪ್ರೋತ್ಸಾಹ ಧನ ಪಟ್ಟುನ ಲೇಸ್ ನಡಪರೆ ಉಂಡು.
ಈ ಲೇಸ್ ಡ್ ಪದ್ಮಶ್ರೀ ಪ್ರಶಸ್ತಿ ಪಡೆಯಿನ ಅಕ್ಷರ ಸಂತ ಹರೇಕಳ ಹಾಜಬ್ಬ, ಸಮಾಜ ಸೇವೆ ಬೊಕ್ಕ ಶಿಕ್ಷಣ ಕ್ಷೇತ್ರದ ಕೆ. ನಾರಾಯಣ ನಾಯಕ್, ಉದ್ಯಮ ಕ್ಷೇತ್ರದ ಮಹಾಬಲ ಕೊಟ್ಟಾರಿ, ವೈದ್ಯಕೀಯ ಕ್ಷೇತ್ರದ ಡಾ.ಸುಜಯ್ ಭಂಡಾರಿ, ಕಲಾ ಕ್ಷೇತ್ರದ ಜನಾರ್ಧನ ಆಚಾರ್ಯ ಸನ್ಮಾನ ಸ್ವೀಕಾರ ಮಲ್ಪರೆ ಉಲ್ಲೆರ್.
ಶ್ರೀರಾಮ ಪ್ರಕಾಶನ ಮಂಡ್ಯ ಬೊಕ್ಕ ಸಾಹಿತ್ಯ ಸುಗ್ಗಿ ಬೆಂಗ್ಲೂರ್ ಪ್ರಕಟ ಮಲ್ತಿನ ಸಾಹಿತಿ ಪತ್ರಕರ್ತೆ ಶ್ರೀನಿವಾಸ ಜೋಕಟ್ಟೆ ಮೆರೆನ ರಡ್ಡ್ ಬೂಕುಲೆನ ಬುಡುಗಡೆ ಲೇಸ್ ಅ.8 ಐತಾರ ಬಯ್ಯಗ್ ಮೈಸೂರ್ ಅಸೋಸಿಯೇಷನ್ ಡ್ ನಡಪರೆ ಉಂಡು.
ಮೆರೆನ 40ನೇ ಕೃತಿ ದೇವರುಗಳ ನ್ಯಾಯಾಲಯ ಮತ್ತು ಸ್ಮಶಾನದಲ್ಲಿ ನೃತ್ಯ ಬೊಕ್ಕ 41 ನೇ ಕೃತಿ ಎಲ್ಲಿಗೋ ಪಯಣ ಯಾವುದೋ ದಾರಿ ಪನ್ಪುನ ಬೂಕು ರಡ್ಡ್ ಬುಡುಗಡೆ ಆಪುಂಡು.
ಈ ಲೇಸ್ ದ ಗುರ್ಕಾರ್ಮೆನ್ ಬೊಂಬೈ ಬಿಎಸ್ ಕೆ ಬಿ ಅಸೋಸಿಯೇಷನ್ ದ ಗುರ್ಕಾರೆ ಡಾ.ಸುರೇಶ್ ರಾವ್ ಒಯಿಸೊನ್ವೆರ್. ಸಾಫಲ್ಯ ಸೇವಾ ಸಂಘದ ಗುರ್ಕಾರೆ ಶ್ರೀನಿವಾಸ ಸಾಫಲ್ಯ ಬೊಕ್ಕ ಹೈಕೋರ್ಟ್ ದ ಪುಗರ್ತೆದ ಅಡ್ವಕೇಟ್ ಆರ್ ಎಂ ಭಂಡಾರಿ ಮೊಕುಲು ಬೂಕು ಬುಡುಗಡೆ ಮಲ್ಪುವೆರ್.
ಮಲ್ಲ ಬಿನ್ನೆರಾದ್ ಐಐಟಿಸಿದ ಆಡಳಿತ ನಿರ್ದೇಶಕೆರ್ ವಿಕ್ರಾಂತ್ ಉರ್ವಲ್ ಪಾಲ್ ಪಡೆಯೆರೆ ಉಲ್ಲೆರ್. ಕೃತಿಲೆನ ಬಗೆಟ್ಟ್ ಕರ್ನಾಟಕ ಸಂಘದ ಗುರ್ಕಾರೆ ಡಾ.ಭರತ್ ಕುಮಾರ್ ಪೊಲಿಪು, ಯುವ ಲೇಖಕಿ ರೂಪಾ ಸಂಗೋಳಿ ಪೊಲಬು ಕೊರಿಯೆರೆ ಉಲ್ಲೆರ್. ಪುಗರ್ತೆದ ಕಲಾವಿದೆರ್ ಅವಿನಾಶ್ ಕಾಮತ್ ಬೊಕ್ಕ ಸುರೇಂದ್ರ ಮಾರ್ನಾಡ್ ಲೇಸ್ ನ್ ಸುಧಾರಿಕೆ ಮಲ್ಪುವೆರ್.
