ಶೋಭಾಯಾತ್ರೆಡ್ ದೈವಾರಾಧನೆಗ್ ಕುಂದು ಬರಂದಿಲೆಕ್ ತೂವೊನರೆ ಜೈ ತುಲುನಾಡ್ ಬಿನ್ನಾಪು

ಕುಡ್ಲ : ಇಂಚಿಪ್ಪೊದ ದಿನೊಟು ಸಂಸ್ಕೃತಿದ ಪ್ರಚಾರ ಪನ್ಪಿನ ಕಾರಣೊನು ಕೊರ್ದು ಶೋಭಾಯಾತ್ರೆಲೆಡ್ ದೈವಾರಾಧನೆನ್ ಚಿತ್ರ ವಿಚಿತ್ರವಾದ್ ತೋಜಾದ್ ಅಪಮಾನ ಮಲ್ಪುನ ಘಟನೆಲು ಅಲ್ಪಲ್ಪ ನಡತ್ತೊಂದುಂಡು. ಉಂದೆನ್ ತೂದು ತುಳು ಸಂಸ್ಕೃತಿಯೇ ತೆರಿಯಂದಿನ ಜಾಗೆಲೆಡ್ ದೈವಾರಾಧನೆನ್ ನನಾತ್ ವಿಕೃತವಾದ್ ಚಿತ್ರಿಪುನ ಘಟನೆಲುಲಾ ಅಲ್ಪಲ್ಪ ತೂವರೆ ತಿಕ್ಕೊಂದುಂಡು. ಇಂಚ ಸಂಸ್ಕೃತಿದ ವಿಕೃತಿನ್ ತೋಜಾವುನ ತುಳುನಾಡ್‌ಡೇ ಅವೆನ್ ಸುರುಟ್ಟು ಉಂತಾವೊಡು ಪನ್ಪಿನ ದಿಟ್ಟಿಡ್ ಜೈ ತುಲುನಾಡ್ (ರಿ.) ಕುಡ್ಲ ಎಗ್ಗೆರ್ದ್ ಕುದ್ರೋಳಿ ಕ್ಷೇತ್ರೊಗು ಅರಿಕೆ ಮಲ್ತೆರ್.

ಈ ಪೊರ್ತುಡು ಕ್ಷೇತ್ರದಕುಲು ಸಕಾರಾತ್ಮಕ ಪ್ರತಿಕ್ರಿಯೆನ್ ಕೊರಿಯೆರ್‌. ಅರಿಕೆ ಮಲ್ಪುನ ಪೊರ್ತುಡು ಜೈ ತುಲುನಾಡ್ (ರಿ.) ಕುಡ್ಲ ಎಗ್ಗೆದ ಗುರ್ಕಾರ್ಲಾಯಿನ ನಿರಂಜನ್ ಕರ್ಕೇರ, ಕೇಂದ್ರ ಸಮಿತಿದ ಪ್ರಧಾನ ಕಾರ್ಯಂತೆರ್ ಕಿರಣ್ ತುಲುವೆ, ಕುಡ್ಲ ಎಗ್ಗೆದ ಒತ್ತು ಗುರ್ಕಾರ್ಲು ಮನೀಶ್ ಕುಮಾರ್, ಸ್ಥಾಪಕ ಸಮಿತಿದ ಪದುಕೆರಾಯಿನ ರಕ್ಷಿತ್ ರಾಜ್, ಕುಡ್ಲ ಎಗ್ಗೆ ಒತ್ತು ಕಾರ್ಯಂತೆರಾಯಿನ ರಾಜೇಶ್ ಶೆಟ್ಟಿ, ಒತ್ತು ಪನವುದ ಪಾಲವೆರ್ ಪುನೀತ್ ಬೋಳೂರು, ಸಂಘಟನಾ ಕಾರ್ಯಂತೆರ್ ದುರ್ಗಾಪ್ರಸಾದ್ ರೈ, ಒತ್ತು ಸಂಘಟನಾ ಕಾರ್ಯಂತೆರ್ ಲತಾ ಡಿಂಪಲ್, ಕೇಂದ್ರ ಸಮಿತಿದ ಒತ್ತು ಸಂಘಟನಾ ಕಾರ್ಯಂತೆರ್ ರಾಜೇಶ್ ಪೂಜಾರಿ, ಪದುಕೆರಾಯಿನ ವಿನಯ್ ರೈ, ಪ್ರಕಾಶ್ ತುಲುವೆ, ರಕ್ಷಿತ್ ಕಲ್ಲಾಪು, ಗಣೇಶ್ ಪೊರ್ಕೋಡಿ, ಮನೋಜ್, ಜೀವಿತಾ ಕುತ್ತಾರ್, ಭವಿಷ್ಯ ಒತ್ತುಪಾಲಿತ್ತೆರ್.