ತುಳುನಾಡ್ ಡ್ ಸಾರರ್ದ್ ಎಚ್ಚ ವರ್ಷೊದಿಂಚ ದೈವೊಲೆನ್ ನಂಬೊಂದು ಬರೊಂದುಲ್ಲೆರ್. ಕೋಲ, ತಂಬಿಲ ಉಂದು ಮಾತ ತುಳುನಾಡ್ ದ ಜನಕ್ಲೆನ ನಂಬಿಕೆ ಆತ್ಂಡ್. ಉಂದು ಪ್ರದರ್ಶನದ ಸೊತ್ತು ಅತ್ತ್, ಬದಲಾದ್ ಜನಕ್ಲೆನ ನಂಬಿಕೆ, ಅಂಚಾದ್ ಶಾಲೆದ ಪ್ರತಿಭಾ ಕಾರಂಜಿಡ್ ದೈವ ಕೋಲಗ್ ಅವಕಾಶ ಕೊರಿಯೆರೆ ಬಲ್ಲಿ ಪಂದ್ ಮಾಜಿ ಸಚಿವ ಸುನೀಲ್ ಕುಮಾರ್ ವಿಧಾನಸಭೆಟ್ ಪಂತೆರ್.
ಇಂಚಿಪ್ಪ ಶಿಕ್ಷಣ ಇಲಾಖೆ ಶಾಲೆದ ಪ್ರತಿಭಾ ಕಾರಂಜಿಡ್ ದೈವ ಕೋಲಗ್ ಅವಕಾಶ ಕೊರ್ಲೆ ಪಂದ್ ಆದೇಶ ಕೊರ್ತಿತ್ತ್ಂಡ್. ನೆರ್ದ್ ಸಾಮಾಜಿಕ ಜಾಲತಾಣ ಸೇರಿನಂಚೆನೆ ಸುಮಾರ್ ಕಡೆಟ್ ಜನ ಬೆಚ್ಚ ಆದಿತ್ತೆರ್.
ಇತ್ತೆ ಮಾಜಿ ಸಚಿವೆರ್, ಕಾರ್ಲ ವಿಧಾನ ಸಭೆ ಕ್ಷೇತ್ರದ ಶಾಸಕೆರಾಯಿನ ವಿ.ಸುನೀಲ್ ಕುಮಾರ್ ವಿಧಾನ ಸಭೆಟ್ ಈ ಇಚಾರನ್ ತೆರಿಪಾದ್ ಶಿಕ್ಷಣ ಇಲಾಖೆದ ಆದೇಶನ್ ಪಿರ ದೆತೊನೊಡು ಪಂದ್ ಪಂಡೆರ್.
ಈ ಇಚಾರದ ಬಗ್ಗೆ ವಿಧಾನ ಸಭೆಟ್ ಮೇರ್ ಪಾತೆರ್ದ್, ‘ದೈವ ಕೋಲ ಪನ್ಪುನವು ತುಳುನಾಡ್ ದ ಬೊಕ್ಕ ತುಳು ಜನಕ್ಲೆನ ಮಲ್ಲ ನಂಬಿಕೆ. ಆಂಡ ಇತ್ತೆ ಶಿಕ್ಷಣ ಇಲಾಖೆ ಶಾಲೆದ ಪ್ರತಿಭಾ ಕಾರಂಜಿಡ್ ಜನಪದ ವಿಭಾಗಡ್ ದೈವ ಕೋಲ ಪ್ರದರ್ಶನಗ್ ಅವಕಾಶ ಕೊರ್ತಿನವು ತಪ್ಪು.ದೈವ ಕೋಲ ಪನ್ಪುನವು ಪ್ರದರ್ಶನದ ಸೊತ್ತು ಅತ್ತ್, ಅಂಚಾದ್ ಸರ್ಕಾರ ಈ ಆದೇಶನ್ ಪಿರ ದೆಪ್ಪೊಡು’ ಪಂದ್ ಒತ್ತಾಯ ಮಲ್ದೆರ್. ಈ ಬಗ್ಗೆ ಪ್ರತಿಕ್ರಿಯೆ ಕೊರ್ನ ಶಿಕ್ಷಣ ಸಚಿವೆರ್ ಮಧು ಬಂಗಾರಪ್ಪ ಪರಿಶೀಲನೆ ಮಲ್ಪುವ ಪಂದ್ ಭರವಸೆ ಕೊರ್ತೆರ್.
Editorial