ಕಿನ್ನಿಗೋಳಿ: ಯುಗಪುರುಷ ಸಂಸ್ಥಾಪಕೆರ್ ದಿ.ಕೊ.ಅ ಉಡುಪೆರೆನ ನೆಂಪುಗಾದ್ ಪ್ರತಿ ವರ್ಷ ಗೌರವರ್ದ್ ಕೊರ್ಪಿನ ಕೊ. ಅ ಉಡುಪ ಪ್ರಶಸ್ತಿನ್ ಈ ಸರ್ತಿ ಕನ್ನಡ- ತುಳು ಸಾಹಿತಿ, ಕಬಿ, ನಾಟಕಗಾರೆ, ನಿರ್ದೇಶಕೆ, ಯಕ್ಷಗಾನ ಅರ್ಥಧಾರಿ, ನಿರೂಪಕೆ, ಸಂಘಟಕೆ, ಕದ್ರಿ ನವನೀತ ಶೆಟ್ರೆಗ್ ಕೊರಿಯೆರೆ ಉಂಡು.
ಪ್ರತಿಭಾವಂತ ಕಬಿಯಾದ್, ಸಾಹಿತಿಯಾದ್ ಸಮಾಜಡ್ ಗುರುತಿಸಾಯಿನ ಮೇರ್ 30 ರ್ದ್ ಎಚ್ಚ ನಾಟಕ ಕೃತಿನ್ ರಚನೆ ಮಲ್ದೆರ್. ತುಳು ಭಾಷೆದ ಸುರುತ್ತ ಟಿ.ವಿ ವಾರ್ತಾ ವಾಹಿನಿ ನಮ್ಮ ಕುಡ್ಲದ ವಾರ್ತಾ ನಿರೂಪಕೆರಾದ್ ಸೇವೆ ಸಂದಾದೆರ್.
ಪರಿಚಯ ಲೇಖನ, ವಿಮರ್ಶೆ, ಪುರವಣಿ ಲೇಖನ, ಟ್ಯಾಬ್ಲೋ ಸಾಹಿತ್ಯ, ಸಮ್ಮೇಳನ ಶೀರ್ಷಿಕೆ ಗೀತೆ, ಸುಮಾರ್ ಸ್ಮರಣ ಸಂಚಿಕೆಡ್ ಮೆರೆನ ಬರವುಲು ಪ್ರಕಟ ಆತ್ಂಡ್. ಪುಗರ್ತೆದ ತುಳು ಪಿಕ್ಚರ್ ಲಾಯಿನ ದಬಕ್ ದಬಾ, ಪತ್ತನಾಜೆ ಪಿಕ್ಚರ್ ಗ್ ಪದ್ಯನ್ ರಚನೆ ಮಲ್ದೆರ್. ಅಂಚೆನೆ ಬೋಳಾರದ ಮಾರಿಯಮ್ಮ ಬೊಕ್ಕ ಶ್ರೀ ದೇವಿ ಚರಿತಾಮೃತ ಸಂಶೋಧನಾ ಕೃತಿನ್ ರಚನೆ ಮಲ್ದೆರ್.
ವೀಕ್ಷಕ ವಿವರಣಾಕಾರೆರಾದ್ ಪುಗರ್ತೆ ಪಡೆಯಿನ ಮೇರ್ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆರಾದ್ ಸುಮಾರ್ ಲೇಸ್ ನ್ ಸಂಘಟನೆ ಮಲ್ತ್ ದ್, ತುಳು ಭಾಷೆ ಬುಲೆಯೆರೆ ಕಾರಣರಾಯೆರ್. ಆದಿತ್ಯ ಮಂಜರಿ, ಶ್ರೀ ಶಿರಡಿ ಸಾಯಿಬಾಬಾ, ಶ್ರೀ ದೇವಿ ಮಾರಿಯಮ್ಮ ಪ್ರಸಂಗ ರಚನೆ ಮಲ್ತೆರ್. ಸಾಂಸ್ಕೃತಿಕ ತುಳುರತ್ನ, ದ.ಕ ಜಿಲ್ಲಾ ರಾಜ್ಯೋತ್ಸವ, ತುಳು ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, ಕನ್ನಡ ಸಾಹಿತ್ಯ ಪ್ರಶಸ್ತಿ ಮೆರೆಗ್ ತಿಕ್ ದ್ಂಡ್. ಇತ್ತೆ ಮೇರ್ ನಮ್ಮ ಕುಡ್ಲ ಟಿ.ವಿ ಚಾನೆಲ್ ದ ಪ್ರಧಾನ ಕಾರ್ಯನಿರ್ವಾಹಕ ಅಧಿಕಾರಿಯಾದ್ ಸೇವೆ ಸಂದಾವೊಂದು ಉಲ್ಲೆರ್.
ಕೊ.ಅ. ಉಡುಪ ಪ್ರಶಸ್ತಿನ್ ಉಂದುವೇ ಜುಲೈ 24 ಕ್ಕ್ ಕಿನ್ನಿಗೋಳಿ ಯುಗಪುರುಷ ಸಭಾಭವನಡ್ ನಡಪರೆ ಇಪ್ಪುನ ಲೇಸ್ ಡ್ ಗಣ್ಯೆರೆನ ಎದುರುಡ್ ನಗದು, ಗೌರವ ಫಲಕ, ಪ್ರಶಸ್ತಿ ಪತ್ರದೊಟ್ಟಿಗೆ ಪ್ರಧಾನ ಮಲ್ಪರೆ ಉಂಡು ಪಂದ್ ಯುಗಪುರುಷದ ಪ್ರಧಾನ ಸಂಪಾದಕೆರ್ ಕೊಡೆತ್ತೂರ್ ಭುವನಾಭಿರಾಮ ಉಡುಪೆರ್ ತೆರಿಪಾದೆರ್.
pallavi shetty