ರಾಜ್ಯ ಬಜೆಟ್: ಸಮುದಾಯ ಬಾನುಲಿಗ್ಲಾ ಪಾಲ್ ಇಪ್ಪಡ್

ಸಮುದಾಯದ ಅಭಿವೃದ್ಧಿಗಾದ್ ಬೇಲೆ ಮಲ್ತೊಂದು ಇಪ್ಪುನ ಸ್ವರ ಇಜ್ಜಂದಿನ ಸಮುದಾಯಗ್ ಸ್ವರ ಕೊರ್ಪಿನ ಪರಿಣಾಮಕಾರಿ ಮಾಧ್ಯಮ ಆತ್ಂಡ್ ಸಮುದಾಯ ಬಾನುಲಿ.

ಉಂದು ನಿಜವಾಯಿನ ಅರ್ಥಡ್ ಜನಕ್ಲೆಗಾದ್ ಜನಕುಲೆ ನಡಪಾವೊನ ಜನಕ್ಲೆನ ಬಾನುಲಿ. ಸಮಾಜದ ಮುಖ್ಯವಾಹಿನಿರ್ದ್ ದೂರ ಇಪ್ಪುನ ಸಮುದಾಯಲೆಗ್ ಒಂಜಿ ಸ್ವರ ಉಂಡು, ಅನುಭವ ಉಂಡು. ಅವೆನ್ ಬೇತೆಕ್ಲೆನೊಟ್ಟಿಗೆ ಪಾಲ್ ಪಟ್ಟಿಯೆರೆ ಸಮುದಾಯ ಬಾನುಲಿ ಸಹಕಾರಿ ಆತ್ಂಡ್.

ಕೇಂದ್ರ ಸರ್ಕಾರ ಇಂಚಿಪ್ಪದ ವರ್ಷಡ್ ಆಕಾಶವಾಣಿ ಬೊಕ್ಕ ದೂರದರ್ಶದ ಕೇಂದ್ರನ್ ಪೊಸತಾದ್ ಸುರು ಮಲ್ಪುಲೆಕ್ಕ ಇಜ್ಜಿ. ಈ ರಡ್ಡ್ ಮಾಧ್ಯಮಲು ಮಲ್ಪೊಡಾಯಿನ ಬೇಲೆನ್ ಖಾಸಗಿ ಬಾನುಲಿ ಬೊಕ್ಕ ಟಿವಿ ಚಾನೆಲ್‌ಗ್ ಕೊರ್ಪುನೆತ್ತೊಟ್ಟಿಗೆ ಎಚ್ಚದ ಜಬದಾರಿನ್ ಕೊರ್ತುಂಡು.‌ ಅತ್ತಂದೆ, ಬಾನುಲಿ ಕ್ಷೇತ್ರಡ್ ಸಮುದಾಯ ಬಾನುಲಿಲು ಬೊಕ್ಕ ಮೆಟ್ರೋ ಮಹಾನಗರಲೆಗ್ ಕಮರ್ಷಿಯಲ್ ಎಫ್ ಎಂ ಕೇಂದ್ರನ್ ಸುರು ಮಲ್ತ್ ದ್ ಜನಕ್ಲೆನ ಬೇಡಿಕೆನ್ ಪೂರೈಸಾಯೆರೆ ಕೇಂದ್ರ ಸರ್ಕಾರ ಅನುಮತಿ ಕೊರೊಂದು ಬೈದ್ಂಡ್.

ಇಂಚಿಪ್ಪದ ವರ್ಷಡ್ ಸುಮಾರ್ ಜಿಲ್ಲೆಡ್ ಶಿಕ್ಷಣ ಸಂಸ್ಥೆಲು ಬೊಕ್ಕ ಸರ್ಕಾರೇತರ ಸಂಸ್ಥೆಲು (ಎನ್.ಜಿ.ಒ) ಲು ಜಿಲ್ಲಾ ಬೊಕ್ಕ ತಾಲೂಕ್ ಕೇಂದ್ರಲೆಡ್ ಸಮುದಾಯ ಬಾನುಲಿನ್ ಸುರು ಮಲ್ದ್ಂಡ್. ಇಡೀ ದೇಶಡ್ 439 ರ್ದ್ ಎಚ್ಚ ಸಮುದಾಯ ಬಾನುಲಿ ಇತ್ತ್ಂಡ ಕರ್ನಾಟಕಡ್ ಸುಮಾರ್ 24 ಸಮುದಾಯ ಬಾನುಲಿ ಬೇಲೆ ಮಲ್ತೊಂದು ಉಂಡು.

ಸ್ವತಃ ಸುದ್ದಿ ಸಂಗ್ರಹ ಮಲ್ಪುನ ವಾರ್ತೆಲೆನ ಪ್ರಸಾರವೊಂಜೇನ್ ಬುಡ್ದ್ ಒರಿನ ಮತ ಇಸಯನ್ ಸಮುದಾಯ ಬಾನುಲಿಲು ಪ್ರಸಾರ ಮಲ್ಪೊಂಡು. ಆಂಡ ಕೈತಲ್ ದಕ್ಲೆನ ಮುತಾಲಿಕೆಡ್ ಪೊಲಬು ಬೊಕ್ಕ ಪ್ರಸಾರ ಸಚಿವಾಲಯದ ನಿಯಮಾವಳಿದ ಅನುಸಾರವಾದ್ ಶಿಕ್ಷಣ, ಆರೋಗ್ಯ, ಕೃಷಿ, ಕಲೆ, ಸಾಹಿತ್ಯ, ಕ್ರೀಡೆ, ಸಾಂಸ್ಕೃತಿಕ ಬೊಕ್ಕ ಮನರಂಜನೆದ ಲೇಸ್ ನ್ ಉಂದು ಪ್ರಸಾರ ಮಲ್ತೊಂದು ಉಂಡು. ಇಸೇಸವಾದ್ ಸರ್ಕಾರದ ಬೇತೆ ಬೇತೆ ಇಲಾಖೆದ ಅಭಿವೃದ್ಧಿ ಲೇಸ್ ನ್ ಪ್ರಸಾರ ಮಲ್ಪೆರೆ ಅವಕಾಶ ಕೊರೊಂದು ಬೈದ್ಂಡ್.

ಕರ್ನಾಟಕ ಸರಕಾರದ ಮುತಾಲಿಕೆಡ್ ಗ್ರಾಮೀಣ ಪರ್ಪಿನ ನೀರ್ ಬೊಕ್ಕ ನೈರ್ಮಲ್ಯ ಇಲಾಖೆದ ಯೋಜನೆದ ಬಗೆಟ್ ಲೇಸ್ ನ್ ಏಪಲ ಕೆಲವು ವರ್ಷೊದಿಂಚ ಪ್ರಸಾರ ಮಲ್ತಿನ ಉದಾಹರಣೆಲ ಉಂಡು. ಆಂಡ ದುರದೃಷ್ಟಕರ ಸಂಗತಿ ಪಂಡ ಪ್ರಾದೇಶಿಕ ಮಟ್ಟಡ್ ಮಲ್ಪು‌ನ ಸಮುದಾಯದ ಅಭಿವೃದ್ಧಿಪರವಾದಿಪ್ಪುನ ಸಮುದಾಯ ಬಾನುಲಿದ ಬೇಲೆಗ್ ಸರಕಾರದ ಸಕಾಯ ಏಪಲ ತಿಕ್ ದಿಜಿ.

ಸಮುದಾಯ ಬಾನುಲಿನ್ ಬುಲೆಪಾವೊಡು ಪಂದ್ ಕೇಂದ್ರ ಸರ್ಕಾರದ ಆಶಯ. ಸುಮಾರ್ ಸರ್ತಿ ಕೇಂದ್ರ ಸರ್ಕಾರ ರಾಜ್ಯ ಸರ್ಕಾರಗ್ ಪತ್ರ ಬರೆದ್ ಕೈತಲ್ ದ ಸಮುದಾಯ ಬಾನುಲಿನ್ ಉತ್ತೇಜನ ಮಲ್ಪೆರೆ ಆರ್ಥಿಕ ಬಲ ಕೊರ್ಪಿನ ಇಸೇಸ ಪ್ರಾಜೆಕ್ಟ್ ನ್ ಕೊರೊಡು ಪಂದ್ ತೆರಿಪಾವೊಡು.‌ ಆಂಡ ಕೇಂದ್ರ ಸರ್ಕಾರದ ಈ ಬಿನ್ನಾಪುಗ್ ರಾಜ್ಯ ಸರ್ಕಾರಲು ನನ ಮಾನ್ಯ ಮಲ್ಪಂದಿನ ವಿಷಾದದ ಸಂಗತಿ. ರಾಜ್ಯದ ಗ್ರಾಮೀಣ ಪ್ರದೇಶದ ಸಮುದಾಯ ಅಭಿವೃದ್ಧಿ ಕಾರ್ಯಗ್ ಪೊಲಬುನ್ ಒದಗಿಸಾವೊನ ಉದ್ದೇಶರ್ದ್ ಸುರು ಆಯಿನ ‘ನಮ್ಮ ಬಾನುಲಿ’ ಯೋಜನೆನ್ ಇಂಚಿಪ್ಪದ ವರ್ಷಡ್ ಉಂತಾದೆರ್. ನೆನ್ ಕುಡೊರ ಪರಿಶೀಲನೆ ಮಲ್ಪುನ ಅಗತ್ಯ ಉಂಡು. ವಾರ್ಷಿಕ ಮಾಧ್ಯಮ ಯೋಜನೆಡ್ ಸಮುದಾಯ ಬಾನುಲಿನ್ ಸೇರ್ಸಾವೊನ ಮುಖೇನ ಆಯಿತ್ತ ಸೇವೆನ್ ಸದ್ಬಳಕೆ ಮಲ್ಪೆರೆ ರಾಜ್ಯದ ಪೊಲಬು ಬೊಕ್ಕ ಸಾರ್ವಜನಿಕ ಸಂಪರ್ಕ ಇಲಾಖೆಗ್ ಕೇಂದ್ರ ಪೊಲಬು ಬೊಕ್ಕ ಪ್ರಸಾರ ಇಲಾಖೆರ್ದ್ ಆದೇಶ ಬತ್ತ್ ದ್ ಒಂಜಿ ವರ್ಷ ಕಳೆಂಡಲ ರಾಜ್ಯ ಸರಕಾರ ಒವ್ವೇ ಕ್ರಮಗ್ ದುಂಬಾತಿಜಿ. ಬೇತೆ ಮಾಧ್ಯಮಗ್ ಕೊರ್ಪಿನ ಸರಕಾರಿ ಜಾಹೀರಾತ್ ನ್ ಕೊರೊಂದು ಇಜ್ಜಿ. ಈ ಸರ್ತಿ ಆಂಡಲ ರಾಜ್ಯ ಸರಕಾರ ಸ್ವರ ಇಜ್ಜಂದಿನಕ್ಲೆಗ್ ಸ್ವರ ಕೊರ್ಪಿನ ಸಮುದಾಯ ಬಾನುಲಿಗಾದ್ ಯೋಜನೆನ್ ರೂಪಿಸಾವೊನ ಅಗತ್ಯ ಉಂಡು. ಆವೆರ್ದಾವೆರ ರಾಜ್ಯ ಸರ್ಕಾರ ತನ್ನ ಬಜೆಟ್‌ ಗ್ ಒತ್ತು ಕೊರ್ದು ಸಮುದಾಯ ಬಾನುಲಿದ ಬೇಲೆನ್ ಉತ್ತೇಜನೆ ಮಲ್ಪೊಡು‌. ಸರಕಾರದ ಮತ ಯೋಜನೆನ್ ಕೈತಲ್ ದ ಸಮುದಾಯಗ್ ಎತ್ತವೊಂದಿಪ್ಪುನ ಸಮುದಾಯ ಬಾನುಲಿದ ಸೇವೆನ್ ಪರಿಗಣಿಸಾದ್ ಅಭಿವೃದ್ಧಿದ ಕನನ್ ನನಸ್ ಮಲ್ಪೊಡಾಪುಂಡು.‌

ಡಾ.ರಶ್ಮಿ ಅಮ್ಮೆಂಬಳ
ಸ್ಥಾಪಕಾಧ್ಯಕ್ಷೆರ್,
ಕರ್ನಾಟಕ ಸಮುದಾಯ ಬಾನುಲಿ ಕೇಂದ್ರಲೆನ ಸಂಘ