10 ಕೆಜಿ ಅರಿತ್ತ ಬದಲ್ 170 ರೂ. ಕೊರಿಯೆರೆ ರಾಜ್ಯ ಸರ್ಕಾರ ನಿರ್ಧಾರ: ಜುಲೈ 1 ರ್ದ್ ಸುರು

ಕೇಂದ್ರ ಸರ್ಕಾರ ಅರಿ ಕೊರ್ಪಿನ ಇಚಾರಡ್ ರಾಜಕೀಯ ಮಲ್ದ್ಂಡ್ ಪಂದ್ ಆರೋಪ ಮಲ್ತಿನ ರಾಜ್ಯ ಸರ್ಕಾರ ಅನ್ನ ಭಾಗ್ಯ ಯೋಜನೆದ ಅನುಷ್ಠಾನದ ಬಗೆಟ್ ಇನಿ ಮಹತ್ವದ ಘೋಷಣೆ ಮಲ್ದ್ಂಡ್ .

ಇನಿ ಸಚಿವ ಸಂಪುಟ ಸಭೆ ನಡಪಾಯಿನ ಬೊಕ್ಕ ಸುದ್ದಿಗೋಷ್ಠಿಡ್ ಸಚಿವೆರ್ ಕೆ ಹೆಚ್​ ಮುನಿಯಪ್ಪ ಪಾತೆರ್ದ್, ಪಡಿತರದಾರೆರೆಗ್ ಅರಿತ್ತ ಬದಲ್ ಕಾಸ್ ಕೊರ್ಪ ಪಂದ್ ಪಂಡೆರ್. ಜುಲೈ 1 ರ್ದ್ 10 ಕೆಜಿ ಅರಿ ಕೊರ್ಪ ಪಂದ್ ಭರವಸೆ ಕೊರ್ದ್ ಇತ್ತ.‌ ಜನಕ್ಲೆಗ್ ಎಂಕುಲು ಕೊರಿನ ಭರವಸೆದಲೆಕನೇ ಕಾಸ್ ಕೊರಿಯೆರೆ ನಿರ್ಧಾರ ಮಲ್ದ ಪಂದ್ ಸಿದ್ದರಾಮಯ್ಯ ಪಂತೆರ್.

ರಾಜ್ಯಡ್ ಜನಕ್ಲೆಗ್ ಅರಿನ್ ಕೊರಿಯೆರೆ ಅರಿತ್ತ ಕೊರತೆ ಉಂಡು. ಇಂಚಾದ್ ಪ್ರತಿ ಕೆಜಿಗ್ 34 ರೂಪಾಯಿದಂಚ ಇಲ್ಲದ ಪ್ರತಿಯೊರಿ ಸದಸ್ಯಗ್ ರಾಜ್ಯ ಸರ್ಕಾರ 170 ರೂಪಾಯಿನ್ ಕೊರ್ಪುಂಡು. ಅನ್ನಭಾಗ್ಯ ಯೋಜನೆದ ಬದಲಾದ್ ಈ ಪರ್ಯಾಯ ವ್ಯವಸ್ಥೆನ್ ಮಲ್ತೊಂದು ಉಲ್ಲ. ಕಾರ್ಡ್​ ಹೋಲ್ಡರ್​ ಎಕೌಂಟ್ ಗ್ ಈ ಕಾಸ್ ಬೂರುಂಡು ಪಂದ್ ವಿಧಾನಸೌಧಡ್ ಸಚಿವೆರ್ ಮುನಿಯಪ್ಪ ಪಂಡೆರ್.

ಬಿಪಿಎಲ್​ ಕಾರ್ಡ್ ಇಪ್ಪುನಕ್ಲೆಗ್ ಮಾತ್ರ ಈ ಯೋಜನೆದ ಲಾಭ ತಿಕ್ಕುಂಡು. ಕಾರ್ಡ್​ದ ಅನುಸಾರವಾದ್ಇಲ್ಲದ ಯಜಮಾನನ ಎಕೌಂಟ್ ಗ್ ಬೇತೆ ಕುಟುಂಬಸ್ಥೆರೆಗ್ ಕೊರೊಡಾಯಿನ ಕಾಸ್ ಲ ಪೋಪುಂಡು. ಆಯಿನಾತ್ ಬೇಗಡೇ ಈ ಯೋಜನೆ ಬರಿಯೆರೆ ಉಂಡು ಪಂದ್ ತೆರಿಪಾಯೆರ್.