June 27, 2023

ತುಳುನಾಡ ಪೊರ್ಲು ಸೇವಾ ಟ್ರಸ್ಟ್(ರಿ.) ವತಿರ್ದ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ಬಂಟ್ವಾಳ: ತುಳುನಾಡ ಪೊರ್ಲು ಸೇವಾ ಟ್ರಸ್ಟ್(ರಿ.) ನೆತ್ತ ಮುತಾಲಿಕೆಡ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.

ಕರಿನ 7 ವರ್ಷೊರ್ದಿಂಚ ಸಾಮಾಜಿಕ ಸೇವೆ ಮಲ್ತೊಂದು ಬತ್ತಿನ ತುಳುನಾಡ್ ದ ಪುಗರ್ತೆದ ಸಂಸ್ಥೆ ತುಳುನಾಡ ಪೊರ್ಲು ಸೇವಾ ಟ್ರಸ್ಟ್(ರಿ.) ದ 82ನೇ ತಿಂಗೊಲ್ದ ಸೇವಾ ಪಯಣಡ್ ಕ್ಯಾನ್ಸರ್ ಸೀಕ್ ರ್ದ್ ನರಲೊಂದು ಇತ್ತಿನ ಬಂಟ್ವಾಳ ತಾಲೂಕ್ ದ ಮಣಿನಾಲ್ಕೂರು ಗ್ರಾಮದ ನೈಬೇಲು ನಿವಾಸಿ ಕುಸುಮಾವತಿ ಮೆರೆನ ಚಿಕಿತ್ಸೆಗ್ 20 ಸಾರ ರೂ‌. ಪನವುದ ಸಕಾಯನ್ ಇಳಿಯೂರು ಶ್ರೀ ಮಹಾವಿಷ್ಣು ದೇವಲ್ಯಡ್ ಕೊರಿಯೆರ್.

ಈ ಪೊರ್ತುಡು ಕ್ಷೇತ್ರದ ಅರ್ಚಕೆರ್, ಆಡಳಿತ ಟ್ರಸ್ಟಿಲು ಬೊಕ್ಕ ಟ್ರಸ್ಟ್ ದ ದಾನಿಲು ಇತ್ತೆರ್.

ಮಿಸೆಸ್ ಇಂಡಿಯಾ ಕುಡ್ಲ ಕಿರೀಟನ್ ಪಡೆಯಿನ ಸವಿತಾ ಚೇತನ್

ಕುಡ್ಲ: ಮಿಸೆಸ್ ಇಂಡಿಯಾದ ಕುಡ್ಲ ಕಿರೀಟನ್ ಸವಿತಾ ಚೇತನ್ ಕುಮಾರ್ ಮೇರ್ ಪಡೆತೆರ್.

ಕುಡ್ಲದ ರೋಶನಿ ನಿಲಯಡ್ ನಡತಿನ ಈ ಲೇಸ್ ನ್ ಮಿಸೆಸ್ ಇಂಡಿಯಾ ಕರ್ನಾಟಕದ ನಿರ್ದೇಶಕಿ ಪ್ರತಿಭಾ ಸೌಂಶಿಮಠ್, ದ.ಕ. ಮಿಸೆಸ್ ಇಂಡಿಯಾ ನಿರ್ದೇಶಕೆರ್ ದೀಪಕ್ ಗಂಗೂಲಿ, ಮರ್ಸಿ ಬ್ಯೂಟಿ ಅಕಾಡೆಮಿ ಬೊಕ್ಕ ಬ್ಯೂಟಿ ಸಲೂನ್ ದ ಮರ್ಸಿ ವೀಣಾ ಡಿಸೋಜ ಆಯೋಜನೆ ಮಲ್ದೆರ್.

ಮಿಸೆಸ್ ಇಂಡಿಯಾ ಕುಡ್ಲ ಕಿರೀಟನ್ ಪಡೆಯಿನ ಸವಿತಾ ಮೆರೆಗ್ ವಿದೇಶಡ್ ಒಂಜಿ ದಶಕದ ಕಾಲ ಆಡಳಿತ ವ್ಯವಸ್ಥಾಪಕೆರಾದ್ ಕೆಲಸ ಮಲ್ತಿನ ಅನುಭವ ಉಂಡು. ಆಂಡ ಇತ್ತೆ ಕುಡ್ಲಡ್ ಉಲ್ಲೆರ್.‌ ಅತ್ತಂದೆ ಮೆರೆಗ್ ನೃತ್ಯ, ಛಾಯಾಗ್ರಹಣದ ಹವ್ಯಾಸಲ ಉಂಡು.

ಗೃಹಜ್ಯೋತಿ ಯೋಜನೆಗ್ ರಾಜ್ಯಡ್ ಇದ ಮುಟ್ಟ 61.70 ಲಕ್ಷ ಅರ್ಜಿ

ಗೃಹಜ್ಯೋತಿ ಯೋಜನೆಗ್ ರಾಜ್ಯ ಇಡೀ 61.70,044 ಲಕ್ಷ ಜನ ಅರ್ಜಿ ಸಂದಾದೆರ್ ಪಂದ್ ಇಂಧನ ಇಲಾಖೆ ತೆರಿಪಾದ್ಂಡ್.

ಕೋಡೆ ಬಯ್ಯ 7 ಗಂಟೆ ಮುಟ್ಟ ಸುಮಾರ್ 8,01,768 ಜನ ಫ್ರೀ ಕರೆಂಟ್ ಗಾದ್ ಅರ್ಜಿ ಸಂದಾದೆರ್. ಬೆಸ್ಕಾಂ ವ್ಯಾಪ್ತಿಡ್ 24,95,340, ಬೆಸ್ಕಾಂ 9,67,751, ಜೆಸ್ಕಾಂ 6,60,668, ಹೆಸ್ಕಾಂ 12,92,176, ಬೊಕ್ಕ ಮೆಸ್ಕಾಂ ವ್ಯಾಪ್ತಿಡ್ 7,24,918 ಜನ ಅರ್ಜಿ ಸಂದಾದೆರ್.‌

ರೇಡಿಯೊ ಮಣಿಪಾಲ್ ಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಮುತಾಲಿಕೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 13ನೇ ಸಂಚಿಕೆ ಜೂನ್ 27 ಅಂಗಾರೆ ಬಯ್ಯಗ್ 5.30ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರೆ ಉಲ್ಲೆರ್. ನನ ಜೂನ್ 28 ಕ್ಕ್ ಮಧ್ಯಾಹ್ನ 1.30ಕ್ಕ್ ಕುಡೊರ ಪ್ರಸಾರ ಆಪುಂಡು.

ಕಾಪು ತಾಲೂಕ್ ಪ್ರೆಸ್ ಕ್ಲಬ್ ಗ್ ಹರೀಶ್ ಹೆಜಮಾಡಿ ಪೊಸ ಗುರ್ಕಾರ್ಲು

ಕಾಪು ತಾಲೂಕ್ ದ ಕಾರ್ಯ ನಿರತ ಪತ್ರಕರ್ತೆರೆನ ಸಂಘದ 2023 ನೇ ಸಾಲ್ ದ ಪೊಸ ಗುರ್ಕಾರ್ಲಾದ್ ಪುಗರ್ತೆದ ಪತ್ರಕರ್ತೆರ್, ವಿಜಯ ಕರ್ನಾಟಕ ಮುಲ್ಕಿ- ಪಡ್ಡೆದ್ರ ವರದಿಗಾರೆರ್ ಹರೀಶ್ ಪೆಜಮಾಡಿ ಅವಿರೋಧವಾದ್ ಆಯ್ಕೆ ಆತೆರ್.

ಕಾರ್ಯದರ್ಶಿಯಾದ್ ಸಂತೋಷ್ ಕಾಪು,ಉಪಾಧ್ಯಕ್ಷೆರಾದ್ ವಿಜಯ ಆಚಾರ್ಯ, ಜತೆ ಕಾರ್ಯದರ್ಶಿಯಾದ್ ಕರುಣಾಕರ ನಾಯಕ್, ಕೋಶಾಧಿಕಾರಿಯಾದ್ ಹೇಮನಾಥ ಪಡ್ಡೆದ್ರ, ಕ್ರೀಡಾ ಕಾರ್ಯದರ್ಶಿಯಾದ್ ರಾಕೇಶ್ ಕುಂಜೂರು ಆಯ್ಕೆ ಆತೆರ್.

ವೋಟುದ ಪ್ರಕ್ರಿಯೆನ್ ಒಡಿಪು ಜಿಲ್ಲಾ ಕಾರ್ಯ ನಿರತ ಪತ್ರಕರ್ತೆರೆನ ಸಂಘದ ಉಪಾಧ್ಯಕ್ಷೆರ್ ಬಾಲಕೃಷ್ಣ ಪೂಜಾರಿ, ಕಾರ್ಯದರ್ಶಿ ಪ್ರಮೋದ್ ಸುವರ್ಣ, ಕಾರ್ಯಕಾರಿಣಿ ಸಮಿತಿ ಸದಸ್ಯೆರ್ ವಿಜಯ ಆಚಾರ್ಯ ನಡಪಾದ್ ಕೊರಿಯೆರ್.

ನರಹರಿ ಪರ್ವತ ಶ್ರೀ ಸದಾಶಿವ ದೇವಲ್ಯಡ್ ಯುವಶಕ್ತಿ ಸೇವಾಪಥದ ಸ್ವಚ್ಚತಾ ಅಭಿಯಾನ

ಯುವಶಕ್ತಿ ಸೇವಾಪಥ ದ.ಕ ಮುತಾಲಿಕೆಡ್ ನರಹರಿ ಪರ್ವತ ಶ್ರೀ ಸದಾಶಿವ ದೇವಲ್ಯಡ್ ರಡ್ಡನೇ ವರ್ಷದ ಶ್ರಮದಾನ ಬೊಕ್ಕ ಸ್ವಚ್ಚತಾ ಅಭಿಯಾನ ನಡತ್ಂಡ್.

“ಸ್ವಚ್ಛ ನರಹರಿಯತ್ತ ಸೇವಾಪಥದ ಚಿತ್ತ” ಪನ್ಪುನ ಶೀರ್ಷಿಕೆದಂಚೆನೆ ಜೂನ್ 25 ಐತಾರ ಬೊಲ್ಪುಗು 7 ಗಂಟೆರ್ದ್ ಮಧ್ಯಾಹ್ನ 1 ಗಂಟೆ ಮುಟ್ಟ ಅಭಿಯಾನ ನಡತ್ಂಡ್. ಸುಮಾರ್ 80 ರ್ದ್ ಎಚ್ಚ ಸ್ವಯಂಸೇವಕೆರ್ ಈ ಪುಣ್ಯ ಲೇಸ್ ಡ್ ಪಾಲ್ ಪಡೆದಿತ್ತೆರ್.

ಓಂ ಶ್ರೀ ಸಾಯಿಗಣೇಶ್ ಸೇವಾ ಟ್ರಸ್ಟ್ ಕಲ್ಲಡ್ಕ, ಯುವಕೇಸರಿ ಫ್ರೆಂಡ್ಸ್ (ರಿ.) ಅರೆಬೆಟ್ಟು ಎರ್ಮೆಮಜಲು, ಶ್ರೀಮಂತ್ರದೇವತಾ ಜನಸೇವಾ ಟ್ರಸ್ಟ್ ಅಮ್ಟೂರು, ಕೋಡಿ ಫ್ರೆಂಡ್ಸ್ ಸರ್ಕಲ್ ಕರಿಂಗಾಣ, ಕೆ.ಎಫ್.ಎಮ್ ಮುಡಿಪು, ಹಿಂದೂ ಜನಸೇವಾ ಸಮಿತಿ ಬೊಂಡಾಲ ಕಲ್ಲಡ್ಕ, ಶಿವಛತ್ರಪತಿ ಫ್ರೆಂಡ್ಸ್ ಬಡೆಕೊಟ್ಟು, ಯುವಶಕ್ತಿ ಕಡೇಶಿವಾಲಯ (ರಿ.) ಕೂಟದ ಸಹಕಾರ ಇತ್ಂಡ್.

ಪಿಂಕ್ ವಾಟ್ಸ್ ಆಪ್ ಮೆಸೇಜ್ ಲಿಂಕ್ ಓಪನ್ ಮಲ್ಪಡೆ!

ವಾಟ್ಸ್ ಆಪ್ ಗಲಸುನಕುಲು ಪಿಂಕ್ ಸ್ಕ್ಯಾಮ್ ಬಗೆಟ್ಟ್ ಎಚ್ಚರಿಕೆ ಒಯಿಸೊಡು ಪಂದ್ ತಜ್ಞೆರ್ ತೆರಿಪಾದೆರ್.

ಕೆಲವು ದಿನೊರ್ದಿಂಚ ವಾಟ್ಸ್ ಆಪ್ ಅಪ್ ಡೇಟ್ ಪುದರ್ ಡ್ ಫಾರ್ವರ್ಡ್ ಮೆಸೇಜ್ ಪಸೆರೊಂದು ಉಂಡು. ನೆಟ್ಟ್ ಇನ್ಸ್ ಸ್ಟಲೇಷನ್ ಲಿಂಕ್ ಉಂಡು. ಆಯಿನ್ ಒತ್ತಿನ ಕೂಡ್ಲೆ ನಿಕ್ಲೆನ ಓಟಿಪಿ, ಮೊಬೈಲ್ ನಂಬರ್, ಪೋಟೋ, ಬ್ಯಾಂಕ್ ಪೊಲಬು ಸೇರಿನಂಚನೆ ಮೊಬೈಲ್ ದ ಮಾತ ಡೇಟಾ ಹ್ಯಾಕ್ ಆಪುಂಡು. ಇಂಚಾದ್, ಯೂಸರ್ ವಾಟ್ಸ್ ಆಪ್ ಪಿಂಕ್ ಸ್ಕ್ಯಾಮ್ ಬಗ್ಗೆ ಜಾಗೃತೆಡ್ ಇಪ್ಪೊಡು ಪಂದ್ ತಜ್ಞೆರ್ ಪಂತೆರ್.

ಹಾಸನ ಜಿಲ್ಲೆಡ್ ಭೂಕಂಪ

ಹಾಸನ ಜಿಲ್ಲೆದ ಸುಮಾರ್ ಕಡೆಟ್ಟ್ ಇನಿ ಬೊಲ್ಪುಗು ಭೂಮಿ ಅದರ್ ನ ಅನುಭವ ಆತ್ಂಡ್.

ಅರಕಲಗೂಡು ಪಟ್ಟಣ ಬೊಕ್ಕ ತಾಲೂಕ್ ದ ಸುತ್ತಮುತ್ತ ಬೊಲ್ಪುಗು 10.25 ತ್ತ ಸುಮಾರ್ ಗ್ ಭೂಮಿ ಅದ್ ರ್ ದ್ಂಡ್. ಅಧಿಕಾರಿಲು ಜಾಗೆಗ್ ಭೇಟಿ ಕೊರ್ತೆರ್. ಭೂಕಂಪದ ಬಿರ್ಸ್ ದ ಬಗ್ಗೆ ಪರಿಶೀಲನೆ‌ ಮಲ್ತೊಂದು ಉಲ್ಲೆರ್‌. ಕೆಲವು ‌ಸೆಕೆಂಡ್ ದ ಭೂಕಂಪ ಗ್ ಜನಕುಲು ಪೋಡಿದ್ ಇಲ್ಲರ್ದ್ ಪಿದಯಿ ಬೈದೆರ್. ‌ನನ ಎಚ್ಚದ ಪೊಲಬು ಪರಿಶೀಲನೆದ ಬೊಕ್ಕನೇ ತೆರಿದ್ ಬರೊಡಾತೆ.

Kathmandu Pashupathinatha temple-10 kg gold stolen ಕಠ್ಮಂಡು ಪಶುಪತಿನಾಥ ದೇವಲ್ಯಡ್ 10 ಕೆಜಿ ಬಂಗಾರ್ ಕಂಡಿನ ಕಲ್ವೆರ್; ದೇವಲ್ಯ ಬಂದ್‌!

ಕಠ್ಮಂಡು: ನೇಪಾಳದ ರಾಜಬೂಡು ಕಠ್ಮಂಡುಡ್ ಇಪ್ಪುನ ಶ್ರೀ ಪಶುಪತಿನಾಥ ದೇವಲ್ಯಡ್ ಶಿವಲಿಂಗದ ಮಿತ್ತ್ ಇತ್ತಿನ 100 ಕೆ.ಜಿ. ತೂಕದ ಬಂಗಾರ್ ದ ಪದ್ದಯಿಲೆಡ್ ಸುಮಾರ್ 10 ಕೆ.ಜಿ. ಪದ್ದಯಿ ನಾಪತ್ತೆ ಆತ್ಂಡ್.

ಈ ಬಗೆಟ್ ನೇಪಾಳದ ತನಿಖಾ ಸಂಸ್ಥೆ ತನಿಖೆ ಸುರು ಮಲ್ದ್ಂಡ್. ಅಂಚಾದ್ ಒಂತೆ ಸಮಯ ದೇವಲ್ಯನ್ ಮುಚ್ಚಿದೆರ್. ಕರಿನ ವರ್ಷ ಮಹಾಶಿವರಾತ್ರಿ ಉಚ್ಚಯದ ಪೊರ್ತುಡು ದೇವಲ್ಯದ ಗರ್ಭಗುಡಿತ್ತ ಶಿವಲಿಂಗದ ಸುತ್ತ 103 ಕೆಜಿ ಬಂಗಾರ್ ದ ಜಲಹರಿ ನಿರ್ಮಾಣ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್. ಬಂಗಾರ್ ಕಂಡ್ ದ್ ಪೋಯಿನ ಬಗೆಟ್ ನೇಪಾಳದ ಭ್ರಷ್ಟಾಚಾರ ವಿರೋಧಿ ಸಂಸ್ಥೆ ದೇವಲ್ಯನ್ ತನಿಖೆಗಾದ್ ವಶಕ್ಕ್ ಪಡೆತ್ಂಡ್. ದೇವೆರೆನ ಬಂಗಾರ್ ದ ಪದ್ದಯಿ ನಾಪತ್ತೆ ಆಯಿನ ಬಗೆಟ್ ಸಂಸತ್ತ್ ಡ್ ಚರ್ಚೆ ನಡಪಾಯಿನ ಬೊಕ್ಕ ಸರ್ಕಾರ ತನಿಖೆಗ್ ನಿರ್ದೇಶನ ಕೊರ್ತುಂಡು. ದೇವಲ್ಯದ ಆವರಣಡ್ ನೇಪಾಳ ಸೇನೆದ ಯೋಧೆರ್, ಪತ್ತೆರ್ದ್ ಎಚ್ಚ ಭದ್ರತಾ ಸಿಬ್ಬಂದಿಲೆನ್ ನಿಯೋಜನೆ ಮಲ್ದ್ಂಡ್.

Bantara Sangha has to meet the aspirations of students : Vishwanath Shetty ಬಂಟರ ಸಂಘದಕುಲು ಕಲ್ಪಾರ್ಥಿಲೆನ ಇಚ್ಛೆಗ್ ಸ್ಪಂದನೆ ಕೊರೊಡು: ವಿಶ್ವನಾಥ ಶೆಟ್ಟಿ ಕಟ್ಲ ಬಾಳಿಕೆ

ಸುರತ್ಕಲ್: ಕಲ್ಪಾರ್ಥಿಲೆನ ಇಚ್ಛೆ ದಾದ ಉಂಡ ಅವೆನ್ ಕೋಡಿ ಎತ್ತಾವುನ ಬೇಲೆನ್ ಬಂಟರ ಸಂಘದಕುಲು ಮಲ್ಪೊಡು. ಜಿಲ್ಲೆಡ್ ಬಂಟರ ಮೆಡಿಕಲ್ ಕಾಲೇಜ್ ಲು ಉಂಡು. ಅಂಚಾದ್ ಕನಿಷ್ಠ ಐನ್ ಪರ್ಸಂಟ್ ಸೀಟ್ ನ್ ಬಂಟ ಕಲ್ಪಾರ್ಥಿಲೆಗ್ ಕೊರೊಡು ಪಂದ್ ಬಂಟರ ಮಾತೃ ಸಂಘ, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಮುಖೇನ ಒತ್ತಡ ಪಾಡೊಡು ಪಂದ್ ಕಟ್ಲ ಬಾಳಿಕೆ ಅಗೊಳಿ ಮಂಜಣ್ಣನ ಜಾಗೆದ ಧರ್ಮ ದೈವೊಲೆನ ದೈವೊಲ್ಯದ ಆಡಳಿತ ಮೊಕ್ತೇಸರೆರ್ ವಿಶ್ವನಾಥ ಶೆಟ್ಟಿ ಕಟ್ಲ ಬಾಳಿಕೆ ತೆರಿಪಾಯೆರ್.

ಆರ್ ಸುರತ್ಕಲ್ ಬಂಟರ ಭವನಡ್ ನಡತಿನ ಇಡ್ಯಾ ಗ್ರಾಮದ ಪ್ರತಿಭಾ ಪುರಸ್ಕಾರ ಲೇಸ್ ಡ್ ಗುರ್ಕಾರ್ಮೆ ಒಯಿಸೊಂದು ಪಾತೆರಿಯೆರ್.

ಕಲ್ಪಾರ್ಥಿಲು ಅಕ್ಲೆನ ಎಡ್ಡೆ ಭವಿಷ್ಯದ ಬಗೆಟ್ಟ್ ಮಲ್ಲ ಕನ ಕಟ್ಟ್ ದ್ ವಿದ್ಯೆ ಕಲ್ಪುವೆರ್. ಎಚ್ಚ ಮಾರ್ಕ್ ದೆಪ್ಪುವೆರ್. ಆಂಡ ಅಕ್ಲೆನ ಇಚ್ಛೆಗ್ ತಕ್ಕಂತಿನ ಮೆಡಿಕಲ್, ಇಂಜಿನಿಯರಿಂಗ್ ಸೀಟ್ ತಿಕ್ಕುಜಿ. ಕಾಸ್ ಕೊರ್ದು ಸೀಟ್ ಪಡೆಯೆರೆ ಆವಂದಿನಪಗ ಬೇತೆ ಕೋರ್ಸ್ ಗ್ ಆಸಕ್ತಿ ಕೊರ್ಪೆರ್. ನೆಕ್ಕ್ ಜಿಲ್ಲೆಡ್ ಇಪ್ಪುನ ಬಂಟರ ಸಂಘದಕುಲು ಬಂಟರ ಮೆಡಿಕಲ್ ಕಾಲೇಜ್ ಡ್ ಸೀಟ್ ಕೊರ್ಪಿನ ಪ್ರಯತ್ನ ಮಲ್ತ್ಂಡ ಕಲ್ಪಾರ್ಥಿಲೆನ ಭವಿಷ್ಯ ಉಜ್ವಲ ಆಪುಂಡು ಪಂದ್ ಪಂಡೆರ್.

ಲೇಸ್ ಡ್ ಎಸ್ ಎಸ್ ಎಲ್ ಸಿ ಬೊಕ್ಕ ಪಿಯುಸಿಡ್ ಎಚ್ಚ ಮಾರ್ಕ್ ಪಡೆಯಿನ ಕಲ್ಪಾರ್ಥಿಲೆನ್ ಮಾನಾದಿಗೆ ಮಲ್ತೆರ್. ಅಂಚೆನೆ ಸುರತ್ಕಲ್ ಬಂಟರ ಸಂಘ ಆಯೋಜನೆ ಮಲ್ತಿನ ನಲಿಪುದ ಪಂತೊಡು ಸುರುತ್ತ ತಾನ ಗೆಂದಿನ ಇಡ್ಯಾ ಗ್ರಾಮದ ಕಲಾವಿದೆರೆನ್ ಬೊಕ್ಕ ನಿರ್ದೇಶಕೆ ರಜತ್ ಸಸಿಹಿತ್ಲು ಮೆರೆನ್ ತಮ್ಮನ ಮಲ್ತೆರ್.

ಈ ಪೊರ್ತುಡು ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಲೋಕಯ್ಯ ಶೆಟ್ಟಿ ಮುಂಚೂರು, ಮಾಜಿ ಅಧ್ಯಕ್ಷೆರಾಯಿನ ಸುಧಾಕರ ಎಸ್ ಪೂಂಜ, ಉಲ್ಲಾಸ್ ಶೆಟ್ಟಿ ಪೆರ್ಮುದೆ, ಉಪಾಧ್ಯಕ್ಷೆರ್ ಪುಷ್ಪರಾಜ ಶೆಟ್ಟಿ ಕುಡುಂಬೂರು, ಪ್ರಧಾನ ಕಾರ್ಯದರ್ಶಿ ಲೀಲಾಧರ ಶೆಟ್ಟಿ ಕಟ್ಲ, ಕೋಶಾಧಿಕಾರಿ ಅವಿನಾಶ್ ಶೆಟ್ಟಿ, ಮಹಿಳಾ ವೇದಿಕೆ ಅಧ್ಯಕ್ಷೆರ್ ಭವ್ಯಾ ಶೆಟ್ಟಿ, ಕಾರ್ಯಕಾರಿ ಸಮಿತಿ ಸದಸ್ಯೆರ್ ಹರೀಶ್ ಶೆಟ್ಟಿ, ವೇದಾವತಿ ಶೆಟ್ಟಿ ಇತ್ತೆರ್. ದೇವೇಂದ್ರ ಶೆಟ್ಟಿ, ಪ್ರವೀಣ್ ಶೆಟ್ಟಿ, ಯಶ್ ರಾಜ್, ಅನೂಪ್, ಬಿಂದಿಯಾ ಮೊಕುಲು ತನ್ನ ಅನಿಸಿಕೆನ್ ಪಂಡೆರ್.‌ ರಾಜೇಶ್ವರಿ ಡಿ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್.

Bantara Sangha has to meet the aspirations of students : Vishwanath Shetty

Suratkal: ” We will try to fulfill the aspirations of the students. The Bantara Matru Sangha and the Global Bunts association has put forward a demand to keep 5 percent of the medical seats in the college run by members of the community for talented students from the community” said Vishwanath Shetty Katla Balike managing trustee Agoli Manjanna Divastana at a program to honour talented students of Idiya grama.