ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಇನಿ ಅಂತಾರಾಷ್ಟ್ರೀಯ ಅಮಲ್ ಸೊತ್ತು ಸೇವನೆ ಬೊಕ್ಕ ಕಲ್ವ ತಾದಿಡ್ ಕೊನೊಪುನೆನ್ ತಡೆಪುನ ದಿನತ್ತ ಬಗೆಟ್ ಇಸೇಸ ಪೊಲಬು ಲೇಸ್ ಇನಿ ಲ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಮನೋವೈದ್ಯೆರ್, ಲೇಖಕೆರ್ ಆಯಿನ ಡಾ. ವಿರೂಪಾಕ್ಷ ದೇವರಮನೆ ಮೇರ್ ಪಾಲ್ ಪಡೆಯೆರೆ ಉಲ್ಲೆರ್. ಜೂನ್ 27 ಅಂಗಾರೆ ಮಧ್ಯಾಹ್ನ 1.30ಕ್ಕ್ ಕುಡೊರ ಪ್ರಸಾರ ಆಪುಂಡು.
ಇಂಚರ ಸೇವಾ ಕೂಟದ ಸುರುತ್ತ ವರ್ಷದ ಸಂಬುರ್ಮೊ ಭಾರೀ ಗೌಜಿಡ್ ನಡತ್ಂಡ್.
ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಬತ್ತಿನ ಸರ್ವಜ್ಞ ತಂತ್ರಿ, ಜಯಂತಿ ಶೆಟ್ಟಿ, ಶಂಕರ್ ಕುಂದರ್, ಸರಿತಾ ರವೀಂದ್ರ ಶೆಟ್ಟಿ ಮೊಕುಲು ಮಾತ ಕೂಟದ ಬಗ್ಗೆ ಪೆರ್ಮೆದ ಪಾತೆರನ್ ಪಾತೆರಿಯೆರ್.
ರಾಜೇಶ್ ಮುಡಿಪು ಪದ ಪಂಡಿನ ಕುಸಮ್ಯ ಕಾರ್ಲ ಮೆರೆನ ಸಾಹಿತ್ಯದ ಈ ಕೂಟದ ಪದ್ಯನ್ ಮಲ್ಲ ಬಿನ್ನೆರೆನ ಎದುರುಡ್ ಬುಡುಗಡೆ ಮಲ್ತೆರ್. ಬೊಕ್ಕ ಕೂಟದ ಟಿಶರ್ಟ್ ಬೊಕ್ಕ ಐಡಿ ಕಾರ್ಡ್ ನ್ ಸದಸ್ಯೆರೆಗ್ ಪಟ್ಟಿಯೆರ್.
ಈ ಕೂಟಗ್ ಬೆಂದಿನ ದಾನಿಲೆಗ್ ಕೂಟದ ಪರವಾದ್ ತಮ್ಮನ, ಮಾನಾದಿಗೆ ಮಲ್ತೆರ್. ನೃತ್ಯ ಲೇಸ್ ಬೊಕ್ಕ ವನಸ್ ದೊಟ್ಟಿಗೆ ಲೇಸ್ ಮುಗಿಂಡ್.
ಅಂಚೆನೆ ಈ ಲೇಸ್ ಗ್ ಬತ್ತಿನ ಛಾಯಾ ಚಿತ್ರಣನ್ ಮಲ್ತಿನ ಮಂಜುನಾಥ್ ನಂದಳಿಕೆ ಮೆರೆಗ್ ಕೂಟದ ಪರವಾದ್ ಸೊಲ್ಮೆ ಸಂದಾದ್, ಬೊಕ್ಕ ಈ ಲೇಸ್ ಗ್ ಸಹಕಾರ ಮಲ್ತಿನ ಮಾತೆರೆಗ್ಲಾ ಸೊಲ್ಮೆ ಸಂದಾಯೆರ್.
ಬೆಂಗ್ಲೂರ್: ಚಿತ್ರನಟೆ, ನಿರ್ದೇಶಕೆ ಮಾಸ್ಟರ್ ಆನಂದ್ ಮೆರೆರ್ದ್ ನಿವೇಶನ ಪುದರ್ ಡ್ 18.50 ಲಕ್ಷ ರೂ.ಮುಂಗಡ ಕಾಸ್ ದೆತೊಂದು ವಂಚನೆ ಮಲ್ದಿನ ಬಗೆಟ್ಟ್ ಚಂದ್ರಾ ಲೇಔಟ್ ಠಾಣೆಡ್ ಎಫ್ಐಆರ್ ದಾಖಲ್ ಆತ್ಂಡ್.
‘ಕೆಂಗೇರಿ ಉಪನಗರ ಅರುಣಾಚಲ ಬಡಾವಣೆದ ನಿವಾಸಿ ಎಚ್. ಆನಂದ್ ಉರುಫ್, ಮಾಸ್ಟರ್ ಆನಂದ್ (39) ವಂಚನೆ ಬಗ್ಗೆ ದೂರು ಕೊರ್ತೆರ್. ಚಂದ್ರಾಲೇಔಟ್ದ ಇನ್ಕಮ್ ಟ್ಯಾಕ್ಸ್ ಬಡಾವಣೆಡ್ ಇಪ್ಪುನ ಮಲ್ಟಿ ಲೀಪ್ ವೆಂಚರ್ಸ್ ಕಂಪನಿದ ಮಾಲೀಕೆ ಎಸ್. ಸುಧೀರ್, ಆಪ್ತ ಸಹಾಯಕಿ ಮನಿಕಾ ಕೆ.ಎಂ ಬೊಕ್ಕ ಬೇತೆ ಅಕ್ಲೆನ ಮಿತ್ತ್ ಕೇಸ್ ದಾಖಲ್ ಮಲ್ದ್ಂಡ್ ಪಂದ್ ಪೊಲೀಸ್ ದಕುಲು ತೆರಿಪಾದೆರ್.
‘2020 ನೇ ಇಸವಿ ಸೆಪ್ಟೆಂಬರ್ 23 ರ್ದ್ 2021 ನೇ ಇಸವಿ ಅಕ್ಟೋಬರ್ 7 ತ್ತ ನಡುಟ್ ಆತಿನ ವಂಚನೆ ಉಂದಾತ್ಂಡ್. ನೆತ್ತ ಆರೋಪಿಲು ದೆಂಗ್ ದ್ ಕುಲ್ಲುದೆರ್ ಪಂದ್ ತೆರಿದ್ ಬೈದ್ಂಡ್.
ಕುಡ್ಲದ ಕುದ್ರೋಳಿ ಬೆಂಗ್ರೆ ಪರಿಸರದ ಕೂಟವಾಯಿನ ಗಂಗಾಂಜನೇಯ ಕ್ರಿಕೆಟರ್ಸ್ ಶ್ರೀ ರಾಮ್ ಕ್ರಿಕೆಟರ್ಸ್ ಕೂಟ 2022 -23 ನೇ ಸಾಲ್ ಡ್ ಮಸ್ತ್ ಪಂದ್ಯಕೂಟಡ್ ಗೆಂದಿನ ಕೂಟ ಆದಿತ್ತ್ಂಡ್.
ಪಂದ್ಯಕೂಟಡ್ ಗೆಂದಿನ ಕಾಸ್ ನ್ ಉಳಿತಾಯ ಮಲ್ತ್ ದ್ ಜೂನ್ 24 ಕ್ಕ್ ದ. ಕ. ಜಿ. ಪಂ. ಹಿ. ಪ್ರಾ. ಶಾಲೆ ತೋಟ ಬೆಂಗ್ರೆದ ಶಾಲೆಗ್ ಕಪಾಟ್ ನ್ ಬೊಕ್ಕ ದ. ಕ. ಜಿ. ಪಂ. ಹಿ. ಪ್ರಾ. ಶಾಲೆ ಕೆಂಜಾರು ಶಾಲೆದ ಜೋಕುಲೆಗ್ ನೋಟ್ ಬೂಕುನ್ ಗಂಗಾಂಜನೇಯ ಕ್ರಿಕೆಟರ್ಸ್ ಬೊಕ್ಕ ಶ್ರೀರಾಮ್ ಕ್ರಿಕೆಟರ್ಸ್ ಕುದ್ರೋಳಿ ಬೆಂಗ್ರೆ ವತಿರ್ದ್ ಪಟ್ಟಿಯೆರ್.
ಈ ಪೊರ್ತುಡು ಕೂಟದ ಪ್ರಮುಖೆರ್ ನವೀನ್ ಪುತ್ರನ್, ಸುಮನ್ ಕೋಟ್ಯಾನ್, ಅಕಿಲ್ ರಾಜ್, ಸೌರವ್, ವಿಕ್ರಂ, ಶಿಥಿಲ್ ಇತ್ತೆರ್.
ಬೆಂಗ್ಲೂರ್: ದಿನಲ ಗಲಸುನ ಸೊತ್ತುಲೆನ ಬಿಲೆ ದಿನರ್ದ್ ದಿನ ಎಚ್ಚಾವೊಂದು ಉಂಡು. ಈ ನಡುಟ್ಟು ಸರಿಯಾಯಿನ ಪೊರ್ತುಡು ಬರ್ಸ ಬರಂದಿನೆರ್ದಾವೆರ ತರಕಾರಿಲೆನ ಬಿಲೆ, ಆಯಿಟ್ಲಾ ಟೊಮೊಟದ ಬಿಲೆ ದಿನರ್ದ್ ದಿನ ಎಚ್ಚಾವೊಂದು ಉಂಡು.
ಟೊಮೆಟೊ ಕಿಲೊಕ್ಕು 22-30 ರೂ. ಮಾರಾಟ ಆವೊಂದಿತ್ತ್ಂಡ್. ಅವ್ವೇ ಇತ್ತೆ ಒಂಜಿ ಕಿಲೊಕ್ಕು 80-100 ರೂ. ಆತ್ಂಡ್. ಬಿಲೆ ಎಚ್ಚಾಯಿನೆರ್ದ್ ರೈತೆರೆಗ್ ಕುಸಿ ಆತ್ಂಡ್. ಆಂಡ ಗಿರಾಕಿಲೆಗ್ ಶಾಕ್ ಆತ್ಂಡ್.
ತಿರುಚ್ಚಿ: ಕಾರ್ ಸರ್ಕಾರಿ ಬಸ್ ಕ್ಕ್ ಗುದ್ದುದು 5 ಜನ ತೀರ್ ಪೋಯಿನ ಘಟನೆ ತಮಿಳ್ ನಾಡ್ ದ ತಿರುಚ್ಚಿ ಜಿಲ್ಲೆದ ವಯಂಬಟ್ಟಿ ಕೈತಲ್ ದ ರಾಷ್ಟ್ರೀಯ ಮಾರ್ಗಡ್ ನಡತ್ಂಡ್.
ಕಾರ್ ದ ಟಯರ್ ಪುಡಾದ್ ಈ ಘಟನೆ ನಡತ್ಂಡ್. ಕಾರ್ ಡ್ ಇತ್ತಿನ 5 ಜನ ಅಲ್ಪನೇ ತೀರ್ ಪೋತೆರ್. ಬಸ್ಸ್ ಟ್ಟ್ ಇತ್ತಿನ 35 ಜನಕ್ಲಾ ಪೆಟ್ಟಾತ್ಂಡ್. ಮೊಕ್ಲೆನ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ನೆಟ್ಟ್ ಮೂಜಿ ಜನತ್ತ ಸ್ಥಿತಿ ಗಂಭೀರ ಉಂಡು ಪಂದ್ ವೈದ್ಯೆರ್ ತೆರಿಪಾದೆರ್.
ಯಕ್ಷಗಾನ ಭಾಗವತೆರಾದ್, ಸುಮಾರ್ ಯಕ್ಷಗಾನ ಸಂಘ ಬೊಕ್ಕ ಒಡಿಪು ಯಕ್ಷ ಶಿಕ್ಷಣ ಟಸ್ಟ್ ಡ್ ಗುರುಕುಲಾದ್ ಸಾರರ್ದ್ ಎಚ್ಚ ಕಲಾವಿದೆರೆನ್ ತಯಾರ್ ಮಲ್ತಿನ ತೋನ್ಸೆ ಜಯಂತ ಕುಮಾರ್ (77) ಇನಿ (ಜೂ.26) ಬೊಲ್ಪುಗು ತೀರ್ ಪೋಯೆರ್.
ಹಂಗಾರಕಟ್ಟೆ ಚೇತನಾ ಪ್ರೌಢ ಶಾಲೆದ ಕಚೇರಿ ಅಧೀಕ್ಷಕೆರಾದ್ ನಿವೃತ್ತೆರಾಯಿನ ತೋನ್ಸೆ ಮೆರೆಗ್ ಯಕ್ಷಗಾನ ಪ್ರವೃತ್ತಿ ಆತ್ಂಡ್. ಸಂಚಾರಿ ಯಕ್ಷಗಾನ ಭಂಡಾರ ಪಂದೇ ಪುಗರ್ತೆ ಪಡೆಯಿನ ತೋನ್ಸೆ ಕಾಂತಪ್ಪ ಮಾಸ್ತರೆನ ಮಗೆ ಆಯಿನ ಮೆರೆಗ್ ಪೊಪ್ಪನೇ ಯಕ್ಷಗಾನ ಗುರು.
ಸುರುಟ್ಟ್ ಯಕ್ಷಗಾನ ವೇಷಧಾರಿಯಾದ್ ಬೊಕ್ಕ ಯಕ್ಷಗಾನ ಗುರು ಆದ್ ಈ ಕ್ಷೇತ್ರಗ್ ಮಾಸ್ತ್ ಕೊಡುಗೆ ಕೊರಿಯೆರ್. ಒಡಿಪು ಶಾಸಕೆರೆನ ಮುತಾಲಿಕೆದ ಯಕ್ಷಶಿಕ್ಷಣ ಟಸ್ಟ್ ಡ್ ಸುರುರ್ದಿಂಚ ಗುರು ಆದ್ ಆಯಿತ್ತ ಯಶಸ್ಸ್ ಗ್ ಕಾರಣರಾದಿತ್ತೆರ್. ಮೇರ್ ಯಕ್ಷಗಾನ ಅಕಾಡೆಮಿ ಪ್ರಶಸ್ತಿ, ಶ್ರೀರಾಮ ವಿಠಲ ಪ್ರಶಸ್ತಿ, ಯಕ್ಷಗಾನ ಕಲಾರಂಗ ಪ್ರಶಸ್ತಿ ಸೇರಿನಂಚೆನೆ ನೂದೆರ್ದ್ ಎಚ್ಚ ಪ್ರಶಸ್ತಿನ್ ಪಡೆತೆರ್. ಮೆರೆಗ್ ಬೊಡೆದಿ ಬೊಕ್ಕ ಮೂಜಿ ಮಗೆ ಉಲ್ಲೆರ್. ಮೆರೆನ ಸಾವುಗ್ ಯಕ್ಷಗಾನ ಕಲಾರಂಗದ ಅಧ್ಯಕ್ಷೆರ್ ಎಂ.ಗಂಗಾಧರ ರಾವ್, ಕಾರ್ಯದರ್ಶಿ ಮುರಳಿ ಕಡೆಕಾರ್ ಗಾಢ ಸಂತಾಪ ತೆರಿಪಾದೆರ್.
ಎಲ್ಲೆ ಬೊಲ್ಪುಗು 9 ಗಂಟೆಗ್ ಮೆರೆನ ಇಲ್ಲಡ್ ಪಾರ್ಥಿವ ಶರೀರದ ಅಕೇರಿದ ದರ್ಶನಗ್ ಅವಕಾಶ ಉಂಡು. 10.30 ಗ್ ಬೂಡುದ ಗುಡ್ಡೆಡ್ ಅಕೇರಿದ ಕ್ರಿಯೆ ನಡಪರೆ ಉಂಡು.
Yakshagana Guru, Bhagavatar Tonse Jayanth Kumar(77) no more
He was Yakshagana Bhagavatar Guru at Udupi Yaksha Shikshana Trust and had prepared more than a thousand artists for Yakshagana.He was a member of many Yakshagana organizations .He expired on June 26 th.
ಬೊಲ್ತೇರ್: ವೇಣೂರು ಬಾಹುಬಲಿ ಸ್ವಾಮಿಗ್ ಮಹಾಮಸ್ತಕಾಭಿಷೇಕ 2024ನೇ ಇಸವಿಡ್ ಫೆ.22 ರ್ದ್ ಮಾರ್ಚ್ 1 ಮುಟ್ಟ ನಡಪರೆ ಉಂಡು.
ಸನಿಯಾರ ನಡತಿನ ಶ್ರೀದಿಗಂಬರ ತೀರ್ಥಕ್ಷೇತ್ರ ಸಮಿತಿ ವತಿರ್ದ್ ವೇಣೂರು ಬಾಹುಬಲಿ ಭವನಡ್ ಭಗವಾನ್ ಬಾಹುಬಲಿ ಸ್ವಾಮಿನ ಮಹಾಮಸ್ತಕಾಭಿಷೇಕದ ಅಟ್ಟಣೆದ ಶ್ರಾವಕರ ಸಮಾಲೋಚನಾ ಸಭೆಟ್ಟ್ ಧರ್ಮಸ್ಥಳದ ಧರ್ಮಾಧಿಕಾರಿ ಬೊಕ್ಕ ವೇಣೂರುದ ಶ್ರೀ ದಿಗಂಬರ ಜೈನ ತೀರ್ಥಕ್ಷೇತ್ರ ಸಮಿತಿ ಅಧ್ಯಕ್ಷೆರ್ ವೀರೇಂದ್ರ ಹೆಗ್ಗಡೆ ಮೇರ್ ತಾರೀಕ್ ನ್ ಘೋಷಣೆ ಮಲ್ತೆರ್.
ವೇಣೂರು ಭಗವಾನ್ ಶ್ರೀ ಬಾಹುಬಲಿ ಸ್ವಾಮಿ ಮಹಾಮಸ್ತಕಾಭಿಷೇಕ ಮಹಾ ಉಚ್ಚಯ ಸಮಿತಿದ ಅಧ್ಯಕ್ಷೆರಾದ್ ವೀರೇಂದ್ರ ಹೆಗ್ಗಡೆ, ಕಾರ್ಯಾಧ್ಯಕ್ಷೆರಾದ್ ಅಳದಂಗಡಿ ಅರಮನೆತ್ತ ತಿಮ್ಮಣ್ಣರಸ ಪದ್ಮಪ್ರಸಾದ್ ಅಜಿಲ, ಪ್ರಧಾನ ಕಾರ್ಯದರ್ಶಿಯಾದ್ ವಿ. ಪ್ರವೀಣ್ಕುಮಾರ್ ಇಂದ್ರ ಬೊಕ್ಕ ಕೋಶಾಧಿಕಾರಿಯಾದ್ ಪಿ.ಜಯರಾಜ್ ಕಂಬ್ಳಿ ಮೆರೆನ್ ಆಯ್ಕೆ ಮಲ್ತೆರ್.
ಅಸ್ಸಾಂಡ್ ಭಾರೀ ಬರ್ಸಗ್ 15 ಜಿಲ್ಲೆದ 1118 ಗ್ರಾಮ ಮುರ್ಕುದುಂಡು.
ಈ ಬರ್ಸಗ್ 4 ಲಕ್ಷರ್ದ್ ಎಚ್ಚ ಜನಕುಲು ಸಂತ್ರಸ್ತೆರಾತೆರ್. 3 ಜನ ತೀರ್ ಪೋತೆರ್. ಅಸ್ಸಾಂ ಸರ್ಕಾರ ನಿರಾಶ್ರಿತೆರೆಗ್ 101 ಪರಿಹಾರ ಶಿಬಿರನ್ ಸ್ಥಾಪನೆ ಮಲ್ದ್ಂಡ್. 119 ಪರಿಹಾರ ಕೊರ್ಪಿನ ಕೇಂದ್ರನ್ ಓಪನ್ ಮಲ್ದ್ಂಡ್. ಈ ಬರ್ಸರ್ದ್ ಇಲ್ಲ್ ಕಳೆವೊನ್ನ 81,352 ಜನ ಪರಿಹಾರ ಶಿಬಿರಡ್ ವಾಸ ಮತ್ತೊಂದು ಉಲ್ಲೆರ್.
1118 villages flooded due to heavy rains in Assam
3 persons are dead and more than 4 lakh persons have been rendered homeless .Assam government has opened 101 rehabilitation camps to help those who have lost home and property
