ಕುಡ್ಲ: ಲೋಕದ ಸುಭಿಕ್ಷೆ ಬೊಕ್ಕ ಎಡ್ಡೆಗ್ ಬೋಡಾದ್ ಬರ್ಸ ಬರಿಯರೆ ಬೋಡಾದ್ ಸುಕ್ರಾರ ಕಾಂಗ್ರೆಸ್ ಪಕ್ಷದ ವತಿರ್ದ್ ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ನೂದು ಬೊಂಡದ ಅಭಿಷೇಕ, ಇಸೇಸ ಪ್ರಾರ್ತನೆ ನಡತ್ಂಡ್.
ಬರ್ಸ ದಾಂತೆ ತುಳುನಾಡ್ ಡ್ ಸುಮಾರ್ ತುದೆ, ಗುವೆಲ್, ಕೆದು, ಬೋರ್ವೆಲ್ ನೀರ್ ಆಜಿದ್ಂಡ್. ಕೃಷಿ ಚಟುವಟಿಕೆದೊಟ್ಟಿಗೆ ಪರ್ಪಿನ ನೀರ್ ಗ್ ತೊಂದರೆ ಆತ್ಂಡ್. ಆಯಿನಾತ್ ಬೇಗ ಬರ್ಸ ಬರೊಡು ಪಂದ್ ದೇವೆರೆಗ್ ಪ್ರಾರ್ತನೆ ಸಂದಾಯೆರ್.
ಈ ಪೊರ್ತುಡು ಕುದ್ರೋಳಿ ಕ್ಷೇತ್ರದ ಅಧ್ಯಕ್ಷೆರ್ ಎಚ್.ಎಸ್. ಸಾಯಿರಾಂ, ದ.ಕ. ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರ್ ಹರೀಶ್ ಕುಮಾರ್, ಕ್ಷೇತ್ರದ ಕೋಶಾಧಿಕಾರಿ, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಪದ್ಮರಾಜ್ ಆರ್., ಕುಡ್ಲ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಪ್ರಕಾಶ್ ಸಾಲ್ಯಾನ್, ಮಹಿಳಾ ಘಟಕದ ನಾಯಕಿ ಶಾಲೆಟ್ ಪಿಂಟೋ, ಕಾರ್ಪೊರೇಟರ್ ಭಾಸರ್ ಮೊಯ್ಲಿ, ಶಶಿಧರ ಹೆಗ್ಡೆ, ಮಾಜಿ ಕಾರ್ಪೊರೇಟರ್ ಡಿ.ಕೆ.ಅಶೋಕ್, ಅಪ್ಪಿ, ಕಾಂಗ್ರೆಸ್ ಮುಖಂಡೆರ್ ಸತೀಶ್ ಪ್ರಭು, ಗೆಜ್ಜೆಗಿರಿ ಕ್ಷೇತ್ರದ ಉಪಾಧ್ಯಕ್ಷೆರ್ ರವಿ ಚಿಲಿಂಬಿ, ವಕ್ತಾರೆರ್ ರಾಜೇಂದ್ರ ಚಿಲಿಂಬಿ ಇತ್ತೆರ್.
pallavi shetty