ರಾಜ್ಯಡ್ ಕಾಂಗ್ರೆಸ್ ಸರ್ಕಾರ ಜಾರಿ ಮಲ್ತಿನ 5 ಗ್ಯಾರಂಟಿಲೆಡ್ ಧರ್ಮೊಗು ಕರೆಂಟ್ ಪನ್ಪಿನ ಗೃಹಜ್ಯೋತಿ ಯೋಜನೆದ ಬಗೆಟ್ಟ್ ಜನಕ್ಲೆಗ್ ಕೆಲವೊಂಜಿ ಗೊಂದಲ ಉಂಡು. ಅವೆನ್ ಸಿಎಂ ಬೊಕ್ಕ ಡಿಸಿಎಂ ಸರಿ ಮಲ್ದೆರ್.
ಅಂಚೆನೆ ಈ ಯೋಜನೆದ ಬಗೆಟ್ಟ್ ತಪ್ಪು ಮಾಹಿತಿಗ್ ಸಾರ್ವಜನಿಕೆರ್ ಬಲಿ ಆವೊರ್ಚಿ. ಬಾಡಿಗೆ ಇಲ್ಲ್ ದಕ್ಲ ಮಾರ್ಗಸೂಚಿನ್ ಅನುಸರಿಸಾದ್ ಈ ಯೋಜನೆದ ಪ್ರಯೋಜನನ್ ಪಡೆವೊಲಿ ಪಂದ್ ಸಿಎಂ ಸಿದ್ದರಾಮಯ್ಯ, ಉಪಮುಖ್ಯಮಂತ್ರಿ ಡಿ.ಕೆ ಶಿವಕುಮಾರ್ ಪಂತೆರ್.
ಅತ್ತಂದೆ ಈ ಬಗೆಟ್ ಇಂಧನ ಮಂತ್ರಿಲು ಕೆ.ಜೆ ಜಾರ್ಜ್ ಮೇರ್ ಸರಿಯಾಯಿನ ಪೊಲಬು ಕೊರ್ದು, ಮಾತ ಸಂಶಯನ್ ಸರಿ ಮಲ್ದೆರ್.
ಈ ಯೋಜನೆ ಪಡೆಯೆರೆ ದಾದ ಮಲ್ಪೊಡು?
ಪ್ರತಿ ಇಲ್ಲಡ್ ಕರೆಂಟ್ ಗಲಸುನ ಗ್ರಾಹಕೆರ್ ಸೇವಾ ಸಿಂಧು ವೆಬ್ಸೈಟ್ ಡ್ ನೊಂದಣಿ ಮಲ್ಪೊಡು. ನೆತ್ತ ಲಿಂಕ್ ಆಯಿನಾತ್ ಬೇಗ ಶೇರ್ ಆಪುಂಡು.
ಅರ್ಜಿನ್ ಒಲ್ಪ, ಏಪ ಸಂದಾವೊಡು?
ಆನ್ ಲೈನ್ ಡ್ ಆಂಡ ರಾಜ್ಯ ಸರ್ಕಾರದ ಸೇವಾ ಸಿಂಧು ವೆಬ್ಸೈಟ್ ಡ್ ಜೂ.15 ರ್ದ್ ಬೊಕ್ಕ ಅರ್ಜಿ ಸಂದಾವೊಲಿ. ಅಂಚೆನೆ ಆಫ್ ಲೈನ್ ಡ್ ಸಂದಾವೊನಕುಲು ಗ್ರಾಮ ಒನ್, ಕರ್ನಾಟಕ ಒನ್ ಬೊಕ್ಕ ಬೆಂಗ್ಲೂರ್ ಒನ್ ದ ಮುಖೇನ ಅರ್ಜಿ ಸಂದಾವೊಲಿ.
ಅರ್ಜಿ ಸಂದಾಯೆರೆ ದಾದ ದಾಖಲೆ ಬೋಡು?
ಅರ್ಜಿ ಪಾಡುನಕುಲು ಆಧಾರ್ ಸಂಖ್ಯೆ, ಬಿಲ್ ಡ್ ಉಪ್ಪುನ ಗ್ರಾಹಕೆರೆನ ಆರ್ ಆರ್ ಸಂಖ್ಯೆ, ಅಕೌಂಟ್ ನಂಬರ್, ಬಾಡಿಗೆ ಅತ್ತಂಡ ಭೋಗ್ಯದ ಕರಾರುಪತ್ರ, ಇಜ್ಜಿಂಡ ಇಲ್ಲದ ಪೊಲಬು ಇಪ್ಪುನ ವೋಟರ್ ಐಡಿನ್ ಗುರುತ್ತದ ಪತ್ರ ಪಂದ್ ಕೊರೊಡು.
ಅರ್ಜಿ ಸಂದಾಯೆರೆ ಕಾಸ್ ಕಟ್ಟೊಡ?
ಸೇವಾ ಸಿಂಧು ಪೋರ್ಟಲ್ ಡ್ ಅರ್ಜಿ ಪಾಡರೆ ಒವ್ವೇ ಕಾಸ್ ಕಟ್ಟಿಯೆರೆ ಇಜ್ಜಿ.
ಅರ್ಜಿ ಸಂದಾಯಿನ ಬೊಕ್ಕ ಸ್ವೀಕೃತಿ ತಿಕ್ಕುಂಡ?
ಸೇವಾ ಸಿಂಧುಡ್ ಅರ್ಜಿ ಪಾಡಿನಕಲೆಗ್ ಸ್ವೀಕೃತಿ ಸಂದೇಶನ್ ನೊಂದಣಿ ಮಲ್ತಿನ ಗ್ರಾಹಕೆರೆಗ್ ಇಮೇಲ್ ಅತ್ತ್ಂಡ ಮೆಸೇಜ್ ಬರ್ಪುಂಡು.
ಅಪಾರ್ಟ್ಮೆಂಟ್, ಅಂಗಡಿ ಮಾಲೀಕೆರ್ ಈ ಯೋಜನೆಗ್ ಅರ್ಜಿ ಸಂದಾವೊಲಿಯಾ?
ಅಪಾರ್ಟ್ಮೆಂಟ್ ಡ್ ಇಪ್ಪುನಕ್ಲೆಗ್ ಬೇತೆ ಮೀಟರ್ ಇತ್ತ್ಂಡ ಅರ್ಜಿ ಸಂದಾವೊಲಿ. ಆಂಡ ಅಂಗಡಿ ಮಾಲೀಕೆರೆಗ್ ಈ ಯೋಜನೆ ಅನ್ವಯ ಆಪುಜಿ.
200 ಯೂನಿಟ್ ಫ್ರೀ ಕರೆಂಟ್ ದ ಲಾಭನ್ ಎಂಚ ಲೆಕ್ಕ ಮಲ್ಪುನು?
2022-23 ತ್ತ ಸರಾಸರಿ ಕರೆಂಟ್ ಗಲಸಿನ, ಶೇ. 10 ದಾತ್ ಎಚ್ಚ (ರಡ್ಡ್ ಸೇರ್ಂಡ 200 ಯೂನಿಟ್ ರ್ದ್ ಉಲಯಿ) ಸರಾಸರಿ ಗಲಸಿನ ಆಧಾರದ ಮಿತ್ತ್ ಲೆಕ್ಕ ಮಲ್ಪೊಲಿ.
ಕರೆಂಟ್ ಬಿಲ್ ಬಾಕಿ ಇತ್ಂಡ ಈ ಯೋಜನೆ ಅನ್ವಯ ಆಪುಂಡಾ?
ಆಪುಂಡು. ಆಂಡ ಜೂನ್ 30 ಮುಟ್ಟದ ಬಾಕಿನ್ ಮೂಜಿ ತಿಂಗೊಲ್ದೊಲಯಿ ಕಟ್ಟೊಡು. ಇಜ್ಜಿಂಡ ಕರೆಂಟ್ ಸಂಪರ್ಕ ಇಪ್ಪುಜಿ.
ಯೋಜನೆದ ಫಲಾನುಭವಿ ನಿಗದಿತ ಫ್ರೀ ಕರೆಂಟ್ ರ್ದ್ ಎಚ್ಚ ಕರೆಂಟ್ ಗಲಸ್ ದ್ ಬಿಲ್ಲ್ ಕಟ್ಟಿಜಿಂಡ ದಾದ ಆಪುಂಡು?
ಫಲಾನುಭವಿ ಬಾಕಿ ಕರೆಂಟ್ ಬಿಲ್ ಕಟ್ಟಿಜಿಂಡ ಕರೆಂಟ್ ಬಿಲ್ ಕಟ್ಟುನ ಮುಟ್ಟ ಕರೆಂಟ್ ಸಂಪರ್ಕ ಇಪ್ಪುಜಿ.
ಕರೆಂಟ್ ಬಿಲ್ ತೀರ್ ಪೋಯಿನಕ್ಲೆನ ಪುದರ್ ಡ್ ಇತ್ಂಡ ಅರ್ಜಿ ಸಂದಾವುನ ಎಂಚ?
ಫಲಾನುಭವಿನ ಪುದರ್ ನ್ ಚೇಂಜ್ ಮಲ್ತಿ ಬೊಕ್ಕ ಈ ಯೋಜನೆಗ್ ಅರ್ಜಿ ಸಂದಾವೊಲಿ.
ತಿಂಗೊಲ್ 200 ಯೂನಿಟ್ ರ್ದ್ ಎಚ್ಚ ಗಲಸ್ಂಡ ಬಿಲ್ ಕಟ್ಟೊಡ
ಆಂದ್. ತಿಂಗೊಲ್ದ ಪೂರ ಬಿಲ್ ನ್ ಕಟ್ಟೊಡಾಪುಂಡು.
pallavi shetty