ಮೀಯಪದವು ಬ್ರಹ್ಮಶ್ರೀ ಮೊಗೇರ ಮಹಾಂಕಾಳಿ ದೈವೊಲ್ಯಡ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ ಬೊಕ್ಕ ನೇಮ ಮೇ 2-5 ಮುಟ್ಟ ನಡಪರೆ ಉಂಡು.
ಮೇ 2 ಅಂಗಾರೆ ಬಯ್ಯಗ್ ಪುದೆಕಾಣಿಕೆ ಕೊನೊಯೆರೆ, ತಂತ್ರಿಲು ಬರಿಯೆರೆ, ಸಾಮೂಹಿಕ ಪ್ರಾರ್ತನೆ, ರಕ್ಷೋಘ್ನ ಹೋಮ, ವಾಸ್ತು ಹೋಮ, ವಾಸ್ತುಪೂಜೆ, ಪ್ರಕಾರ ಬಲಿ, ನೃತ್ಯ ವೈಭವ, ರಾತ್ರೆ ಸಭಾ ಲೇಸ್ ಬೊಕ್ಕ ಗೀತ್ ಸಂಗೀತ್ ಉಪ್ಪಳ ಮೊಕ್ಲೆನ, ರಂಜಿತ್ ಬಾಬಾ ಕೋಡಿಬೈಲ್ ಬೊಕ್ಕ ಕೂಟದಕ್ಲೆರ್ದ್ ಮ್ಯೂಸಿಕಲ್ ನೈಟ್ಸ್ 2023 ನಡಪರೆ ಉಂಡು.
ಮೇ 3 ಬುಧಾರ ಬೊಲ್ಪುಗು ಗಣಹೋಮ, ಕಲಶಪೂಜೆ, ಪ್ರತಿಷ್ಠಾ ಪ್ರಧಾನ ಹೋಮ, ಶ್ರೀ ದೈವೊಲೆನ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ, ಧಾರ್ಮಿಕ ಸಭಾ ಲೇಸ್, ಮಧ್ಯಾಹ್ನ ತಂಬಿಲ, ಮಹಾಪೂಜೆ, ಬಯ್ಯಗ್ ಭಂಡಾರ ಏರಿಯೆರೆ, ಶ್ರೀ ಗುಳಿಗ ದೈವೊದ ನೇಮ, ರಾತ್ರೆ ಅಭಿನಯ ಕಲಾವಿದೆರ್ ಒಡಿಪು ಮೊಕ್ಲೆರ್ದ್ ಶಾಂಭವಿ ತುಳು ನಾಟಕ, ಶ್ರೀ ಮಹಾಂಕಾಳಿ ದೈವೊದ ನೇಮ ನಡಪರೆ ಉಂಡು.
ಮೇ 4 ಗುರುವಾರ ಬೊಲ್ಪುಗು ಶ್ರೀ ಮಹಾಂಕಾಳಿ ದೇವಿಡ ತನ್ನ ಅನಿಸಿಕೆದ ಬಗೆಟ್ ಪರಕೆ ಮಲ್ತೊಂದು ಶ್ರೀ ದೇವಿನ ಗಂಧ ಪ್ರಸಾದ ದೆತೊನಿಯೆರ್. ಬೊಕ್ಕ ಧೂಪಾರಾಧನೆ, ಬಯ್ಯಗ್ ಭಂಡಾರ ಏರುಂಡು. ರಾತ್ರೆ ಶ್ರೀ ಕೊರಗತನಿಯ ದೈವೊದ ನೇಮ, ಕೈತಲ್ ದ ಪ್ರತಿಭೆಲೆರ್ದ್ ನೃತ್ಯ ವೈಭವ, ಬ್ರಹ್ಮಶ್ರೀ ಮೊಗೇರ ದೈವೊದ ನೇಮ, ಶ್ರೀ ತನ್ನಿಮಾನಿಗ ದೈವೊದ ಅಂಗಣ ಪ್ರವೇಶ ಅವೆರೆ ಉಂಡು.
ಮೇ 5 ಸುಕ್ರಾರ ಬೊಲ್ಪುಗು ಶ್ರೀ ದೈವೊಲೆಡ ಭಕ್ತಾದಿಲೆನ ಪರಕೆ ಬೊಕ್ಕ ದೈವೊದ ಗಂಧ ಪ್ರಸಾದ ದೆತೊನಿಯೆರೆ, ಶ್ರೀ ದೈವೊದ ಭಂಡಾರ ಜಪ್ಪೆರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಬತ್ತ್ ದ್ ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ರಘುನಾಥ ಶೆಟ್ಟಿ ಕೊಮ್ಮಂಗಳ, ಗೌರವಾಧ್ಯಕ್ಷೆರ್ ಡಾ.ಚಂದ್ರಶೇಖರ ಚೌಟ, ಆಡಳಿತ ಸಮಿತಿದ ಅಧ್ಯಕ್ಷೆರ್ ಸಂಜೀವ ಮೀಯಾಪದವು ಲೆಪ್ಪೋಲೆಡ್ ತೆರಿಪಾದೆರ್.
pallavi shetty