ಸುರತ್ಕಲ್: ಚೇಳಾಯರು ಕಂಡಿಗೆ ಶ್ರೀ ಧರ್ಮರಸು ಉಳ್ಳಾಯ ಕ್ಷೇತ್ರದ ಗಡಿಪ್ರಧಾನೆರಾಯಿನ ಆದಿತ್ಯ ಮುಕ್ಕಾಲ್ದಿ ಮೆರೆನ ಸಾರ್ವಜನಿಕ ಅಭಿನಂದನಾ ಲೇಸ್ ಬೊಕ್ಕ ವಾರ್ಷಿಕ ಜಾತ್ರೆದ ಲೆಪ್ಪೋಲೆ ಬುಡುಗಡೆ ಲೇಸ್ ಶ್ರೀ ಕ್ಷೇತ್ರ ಕಂಡಿಗೆಡ್ ನಡತ್ಂಡ್.
ಲೆಪ್ಪೋಲೆನ್ ಬುಡುಗಡೆ ಮಲ್ತ್ ದ್, ಆಶೀರ್ವಚನ ಕೊರ್ದು, ಗುರುಪುರ ವಜ್ರದೇಹಿ ಮಠತ್ತ ಶ್ರೀ ರಾಜಶೇಖರಾನಂದ ಸ್ವಾಮೀಜಿ ಪಾತೆರ್ದ್, “ಎರ್ಮಾಳ್ ಜಪ್ಪು ಕಂಡೇವು ಅಡೆಪು ಪನ್ಪುನ ಜಗತ್ತ್ ಪುಗರ್ತೆದ ಪಾತೆರ. ಕಂಡೇವು ಕ್ಷೇತ್ರಡ್ ನಡಪರೆ ಇಪ್ಪುನ ಗಡಿ ಪ್ರಧಾನೆರಾಯಿನ ಆದಿತ್ಯ ಮುಕ್ಕಾಲ್ದಿ ಮೆರೆನ ಸಾರ್ವಜನಿಕ ಅಭಿನಂದನಾ ಲೇಸ್ ಆರೆನ ಆದರ್ಶ ವ್ಯಕ್ತಿತ್ವ, ಸತ್ಯ ಧರ್ಮದ ನಡವಳಿಕೆಗ್ ತಿಕಿನ ಗೌರವ. ಮೆರೆನ ಕಾಲಡ್ ನಮ ಮತ ಉಲ್ಲ ಪನ್ಪುನವೇ ನಮ್ಮ ಮತೆರ್ನಾಲ ಯೋಗ್ಯತೆ. ದೈವಾರಾಧನೆ ತುಳುನಾಡ್ ಡ್ ಉಂಡು. ಮುಲ್ಪದ ಸುಮಾರ್ ಜನ ಪೆರಿಯೆರ್ ದೈವಾಂಶ ಸಂಭೂತೆರಾಯಿನ ಉದಾಹರಣೆಲ ಉಂಡು. ಇಂಚ ಇಪ್ಪುನಗ ಧರ್ಮರಸು ಕ್ಷೇತ್ರಡ್ ಗಡಿಪ್ರಧಾನೆರೆಗ್ ಅಭಿನಂದನೆ ಸಂದಾಯೆರೆ ಉಳ್ಳಾಯಗ್ ಅಭಿನಂದನೆ ಸಂದಾಯಿಲೆಕ್ಕ ಆಪುಂಡು. ಈ ಲೇಸ್ ಪೊರ್ಲುಡೇ ನಡಪಾಡ್” ಪಂದ್ ಪಂಡೆರ್.
ಬೊಕ್ಕ ಪಾಂಡುರಂಗ ಪ್ರಭು ಪಾತೆರ್ದ್, “ಗಡಿಪ್ರಧಾನೆರೆನ ಅಭಿನಂದನಾ ಲೇಸ್ ಶ್ರೀ ಕ್ಷೇತ್ರದ ವಾರ್ಷಿಕ ಉಚ್ಚಯಡ್ ಕ್ಷೇತ್ರದ ಭಕ್ತೆರ್, ಊರುದಕುಲು ಪಾಲ್ ಪಡೆದ್ ಲೇಸ್ ನ್ ಕಾರ್ಯಕ್ರಮವನ್ನು ಯಶಸ್ವಿ ಮಲ್ಪೊಡು” ಪಂದ್ ಪಂಡೆರ್.
ಗಡಿಪ್ರಧಾನೆರಾಯಿನ ಆದಿತ್ಯ ಮುಕ್ಕಾಲ್ದಿ ಮೇರ್ ಪಾತೆರ್ದ್, “ಎಂಕ್ ತಮ್ಮನ ಮುಖ್ಯ ಅತ್ತ್. ಜನಕುಲು ತೂಪಾವೊಂದು ಇಪ್ಪುನ ಪ್ರೀತಿ ವಿಶ್ವಾಸನೇ ನಿಜವಾಯಿನ ತಮ್ಮನ. ನೆಕ್ಕಾದ್ ಯಾನ್ ಅಭಾರಿ ಅತೆ. 30 ವರ್ಷೊದಿಂಚ ಶ್ರೀ ಕ್ಷೇತ್ರಡ್ ಸೇವೆ ಸಂದಾವೊಂದು ಉಲ್ಲೆ. ನನ ನಡಪರೆ ಇಪ್ಪುನ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಸಹಕಾರ ಮಲ್ಪೊಡು ಪಂದ್ ಪಂಡೆರ್.
ಅಭಿನಂದನಾ ಸಮಿತಿದ ಅಧ್ಯಕ್ಷೆರ್ ಪಣಿಯೂರುಗುತ್ತು ಕರುಣಾಕರ ಶೆಟ್ಟಿ ಸಭಾಧ್ಯಕ್ಷತೆನ್ ಒಯಿಸೊಂದು ಪಾತೆರ್ದ್, “ಶ್ರೀ ಕ್ಷೇತ್ರಡ್ ನಡಪುನ ಲೇಸ್ ಲೆಗ್ ಅಧ್ಯಕ್ಷೆರೆ ತಾನಡ್ ಯಾನ್ ಇತ್ಂಡಲ, ಭಕ್ತೆರ್, ಊರುದಕುಲು ಸಹಕಾರ ಕೊರ್ಂಡ ಮಾತ್ರ ಸಂಪೂರ್ಣ ಯಶಸ್ಸ್ ಅಪುಂಡು. ನಮ ಮತ ಮೇ 12 ಕ್ಕ್ ನಡಪುನ ಲೇಸ್ ಡ್ ಒಗ್ಗಟ್ಟಾದ್ ಪಾಲ್ ಪಡೆಕ್ಕ” ಪಂದ್ ಪಂಡೆರ್.
ಈ ಪೊರ್ತುಡು ಚಾವಡಿಡ್ ಆಡಳಿತ ಮಂಡಳಿ ಅಧ್ಯಕ್ಷೆರ್ ದಯಾನಂದ ಶೆಟ್ಟಿ ಕಂಡೆವು ಬೂಡು, ವೇದಮೂರ್ತಿ ರಂಗನಾಥ ಭಟ್ ಹಳೆಯಂಗಡಿ, ಸತ್ಯನಾರಾಯಣ ಭಟ್, ನಡಿಬೊಟ್ಟು ಗುತ್ತಿನಾರ್ ಸುಧಾಕರ್ ಶೆಟ್ಟಿ, ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಸುಧಾಕರ ಪೂಂಜ, ಕಾಂತು ಲಕ್ಕಣ ಗುರಿಕಾರೆರ್ ಇತ್ತೆರ್.
ಉದಯ್ ಕುಮಾರ್ ಶೆಟ್ಟಿ ಪ್ರಾಸ್ತಾವಿಕ ಪಾತೆರ್ದ್, ಬಿನ್ನೆರೆನ್ ಎದ್ಕೊನಿಯೆರ್. ಸುರೇಶ್ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್. ಸುಧಾಕರ್ ಶೆಟ್ಟಿ ಖಂಡಿಗೆ ಸೊಲ್ಮೆ ಸಂದಾಯೆರ್.