ಮುಲ್ಕಿ : ಒರ್ಂಬ ಮಾಗಣೆದ ಒಡತಿ ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯದ ಜಾತ್ರೆಗ್ ಏ.5 ಬುಧಾರ ಕಾಂಡೆ ಭಾರಿ ಗೌಜಿಡ್ ಕೊಡಿ ಏರ್ಂಡ್.
“ಅಕ್ಕಾ ಈರ್ ಎನ್ನಡೆ ಬರಂದೆ ಎಂಕ್ ಕೊಡಿ ಏರುಜಿ, ಈರ್ ಉಪ್ಪಂದೆ ಏರಿ ಕೊಡಿ ಜಾವುಜಿ” ಪಂದ್ ಬಪ್ಪನಾಡ್ ದ ಅಪ್ಪೆ ಶ್ರೀ ದುರ್ಗಾಪರಮೇಶ್ವರಿ ತನ್ನ ಪಲಿ ಆಯಿನ ಸಸಿಬಿತ್ತ್ ಲ್ದ ಶ್ರೀ ಭಗವತಿ ದೇವಿಗ್ ಕೊರ್ತಿನ ಪಾತೆರದಂಚ ಇನಿ ಸಸಿಹಿತ್ಲು ಭಂಡಾರದ ಮಂದಿರರ್ದ್ ಭಗವತಿ ಬೊಕ್ಕ ಪರಿವಾರ ದೇವೆರ್ನಕಲು ಬತ್ತ್ ದ್ ಅವ್ವೇತೋ ವರ್ಷೊರ್ದಿಂಚಿ ನಡಪುನ ಸಂಪ್ರದಾಯದಂಚೆನೆ ಇನಿಲ ಕೊಡಿ ಏರ್ಂಡ್.
ಕ್ಷೇತ್ರದ ತಂತ್ರಿಲಾಯಿನ ಶಿಬರೂರು ಗೋಪಾಲಕೃಷ್ಣ ತಂತ್ರಿಲು, ಅರ್ಚಕೆರಾಯಿನ ಶ್ರೀಪತಿ ಉಪಾಧ್ಯಾಯೆರ್ ಬೊಕ್ಕ ನರಸಿಂಹ ಭಟ್ ಮುತಾಲಿಕೆಡ್ ವಿಶೇಷ ಪ್ರಾರ್ತನೆ ಮಲ್ತ್ ದ್ ದೇವೆರ್ನ ಬಲಿ ಪಿದಾಡ್ದ್ ಭಗವತಿ ದೇವಿ ಬೊಕ್ಕ ದುರ್ಗಾ ದೇವಿನ ಭೇಟಿ ಆದ್ ಕೊಡಿ ಏರ್ಂಡ್.
ದೇವಲ್ಯದ ಎದುರು ಭಗವತಿ ಪರಿವಾರದ ನರ್ತನ ಸೇವೆ ನಡತ್ಂಡ್. ಅವೆರ್ದ್ ಬೊಕ್ಕ ಭಕ್ತೆರೆಗ್ ಸರ್ಬತ್ ಬೊಕ್ಕ ಅನ್ನಸಂತರ್ಪಣೆ ನಡತ್ಂಡ್.
ಈ ಪೊರ್ತುಡು ಬಪ್ಪನಾಡ್ ದೇವಸ್ಥಾನದ ಅನುವಂಶಿಕ ಮೊಕ್ತೇಸರೆರ್ ದುಗ್ಗಣ್ಣ ಸಾವಂತೆರ್, ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ಟಿ, ಕಾರ್ಯನಿರ್ವಹಣಾಧಿಕಾರಿ ಜಯಮ್ಮ, ಅಧಿಕಾರಿ ಶಿವಶಂಕರ್, ವೇ.ಮೂ. ವಾದಿರಾಜ ಉಪಾಧ್ಯಾಯ, ಗೋಪಾಲಕೃಷ್ಣ ಭಟ್, ಡಾ.ಹರಿಶ್ಚಂದ್ರ ಪಿ. ಸಾಲ್ಯಾನ್, ಅತುಲ್ ಕುಡ್ವ, ನಾಗೇಶ್ ಬಪ್ಪನಾಡ್ , ಎಎಸ್ ಐ ಚಂದ್ರ ಶೇಖರ್, ಎಸ್ ಐ ಮಾರುತಿ, ಜೀವನ್ ಶೆಟ್ಟಿ, ಬಪ್ಪನಾಡು ಯುವ ವೃಂದದ ಅಧ್ಯಕ್ಷೆರ್ ಪುರಂದರ ಶೆಟ್ಟಿ, ಮೊಕುಲು ಮಾತ ಇತ್ತೆರ್.
niriksha