ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿ ಮೊಕ್ಲೆರ್ದ್ ಎ.8 ಸನಿಯಾರ ಬಯ್ಯಗ್ 5:30 ಕ್ಕ್ ಪಚ್ಚನಾಡಿ ಬೆಟ್ಟು ಇಲ್ಲದ ಕೈತಲ್ ಪಾಡ್ದಿನ ರಂಗಸ್ಥಳಡ್ 54 ನೇ ವರ್ಷೊದ ಸೇವೆದಾಟ ಶ್ರೀ ದೇವಿ ಮಹಾತ್ಮೆ ನಡಪರೆ ಉಂಡು.
ಈ ಲೇಸ್ ಗ್ ಕಲಾಭಿಮಾನಿಲು ಬತ್ತ್ ದ್, ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಕೀರ್ತಿಶೇಷ ದಿ. ಲೋಲಮ್ಮ ಪಚ್ಚನಾಡಿ ಸ್ಮರಣಾರ್ಥ ಜೋಕುಲು, ಪುಲ್ಲಿನಕುಲು, ಬೊಕ್ಕ ಕುಡ್ಲ ಲೋಲಮ್ಮ ಪಚ್ಚನಾಡಿ ಸೇವಾ ಪ್ರತಿಷ್ಠಾನದ ಅಧ್ಯಕ್ಷೆರ್ ರಾಮ ಅಮೀನ್ ಪಚ್ಚನಾಡಿ ಲೆಪ್ಪೋಲೆಡ್ ತೆರಿಪಾದೆರ್.
ಲೋಲಮ್ಮ ಪಚ್ಚನಾಡಿ ಮೆರೆನ ಪೊಲಬು
ಯಕ್ಷಗಾನ ಸೇವೆಡ್ ಲೋಲಮ್ಮ ಪಚ್ಚನಾಡಿ ಮೆರೆನ ಪುದರ್ ಅಮರ. ಕಾರಣ ಏತೇ ಬಡಪತ್ತ್ ಡ್ ಇತ್ತ್ಂಡಲ ಮೇರ್ ಏಪಲ 40 ವರ್ಷೊ ಮುಟ್ಟ ಕಟೀಲ್ ಮೇಳದ ಶ್ರೀದೇವಿ ಮಹಾತ್ಮೆ ಆಟನ್ ಗೊಬ್ಬಾವೊಂದು ಇತ್ತೆರ್.
ಕುಡ್ಲದ ಮರೋಳಿ ಗ್ರಾಮಡ್ ದಿ.ತೋಮ ಪೂಜಾರಿ ಬೊಕ್ಕ ದಿ.ಪೂವಪ್ಪೆ ಪೂಜಾರ್ತಿ ದಂಪತಿಲೆನ ಮಗಲಾದ್ ಪುಟ್ಟಿನ ಲೋಲಮ್ಮ ಪಚ್ಚನಾಡಿ ಶ್ರೀದೇವಿನ ಬಗೆಟ್ ಮಸ್ತ್ ಭಕ್ತಿ ಇತ್ತಿನಾರ್.
1968 ಟ್ಟ್ ಪದವಿನಂಗಡಿದ ಸ್ವಸ್ತಿ ಗೇರುಬೀಜ ಕಾರ್ಖಾನೆ ಮುಚ್ಚಿನಗ ಅಲ್ಪ ಉದ್ಯೋಗಿ ಆದಿತ್ತಿನ ಮೇರ್ ಅರೆನೊಟ್ಟಿಗೆ ಬೇಲೆ ಮಲ್ತೊಂದಿನಕ್ಲೆನ ಒಟ್ಟುಗು ಸೇರ್ದ್ ಮುಚ್ಚಿದಿತ್ತಿನ ಕಾರ್ಖಾನೆ ಕುಡ ಸುರು ಆಂಡ ಕಟೀಲ್ ಮೇಳದ ಆಟ ಗೊಬ್ಬಾವೆ ಪಂದ್ ಪರಕೆ ಪಂಡೊಂಡೆರ್. ಪರಕೆ ಪಂಡಿನ ಫಲ ಪನ್ಪಿನಂಚನೆ ಗೇರ್ ಬೀಜ ಕಾರ್ಖಾನೆ ಕುಡ ಸುರು ಆಂಡ್. ಪರಕೆ ಸಂದಾಯ ಮಲ್ಪೆರೆ ಒರಿಯೊರಿಯೇ ಒಂಜೊಂಜಿ ಕಾರಣ ಪಂದ್ ಪಿರ ಜಾರ್ ನಗ ಲೋಲಮ್ಮನೇ ದುಂಬು ಉಂತುದು ಪರಕೆದ ಆಟ ಗೊಬ್ಬಾಯೆರ್. ಬೊಕ್ಕ ಪ್ರತಿವರ್ಷ ನಡಪುಲೆಕ್ಕ ಒಟ್ಟು 39 ಪರಕೆದ ಆಟನ್ ಗೊಬ್ಬಾಯಿನ ಲೋಲಮ್ಮ 40ನೇ ಆಟದ ಪೊರ್ತುಡು ಕಟೀಲಮ್ಮನ ಪಾದ ಸೇರಿಯೆರ್.
ಕಡು ಬಡಪತ್ತ್ ದ ನಡುಟ್ಲಾ ಪದವಿನಂಗಡಿಡ್ ಆಟ ಗೊಬ್ಬಾದಿನಾರ್ ಲೋಲಮ್ಮ. 1983 ಟ್ಟ್ ಕಟೀಲ್ ಕ್ಷೇತ್ರದ ಪ್ರಧಾನ ಅರ್ಚಕೆರಾದಿತ್ತಿನ ಗೋಪಾಲಕೃಷ್ಣ ಅಸ್ರಣ್ಣೆರೆನ್ ಲೆತ್ತ್ ದ್ ಪದವಿನಂಗಡಿಗ್ ‘ದೇವಿನಗರ’ ಪನ್ಪುನ ಪುದರ್ ನ್ ದೀಯೆರ್. ಉಂದು ಸಾಮಾನ್ಯ ಪೊಂಜೋವ್ ಒರ್ತಿ ಮಲ್ದಿನ ಭಾರಿ ಮಲ್ಲ ಸಾಧನೆದ ಕತೆ.