ಕುಂದಾಪುರ : ಬಸ್ರೂರ್ ಗ್ರಾಮ ಪಂಚಾಯತ್ ದ ಪಿರವುದ ಅಶೋಕ ಪಾರ್ಕ್ ದ ಜಾಗೆಡ್ ಅಙದಾಜಿ 400 ವರ್ಷ ಪಿರಾಕ್ ದ ಲಿಂಗಮುದ್ರೆ ಕಲ್ಲ್ ಪತ್ತೆ ಆತ್ಂಡ್.
ಈ ಕಲ್ಲ್ ದ ಬಗೆಟ್, ಭಾರತೀಯ ಇತಿಹಾಸ ಸಂಕಲನ ಸಮಿತಿ, ಕರ್ನಾಟಕ ಒಡಿಪು ಜಿಲ್ಲೆದ ಜಿಲ್ಲಾ ಸಂಚಾಲಕೆರ್ ಪ್ರದೀಪ ಕುಮಾರ್ ಬಸ್ರೂರು ಮೆರೆಡ ತೆರಿಪಾದ್ಂಡ್. ಈ ಕಲ್ಲ್ ಡ್ ಸೂರ್ಯೆ, ಚಂದ್ರೆ, ಶಿವಲಿಂಗ, ನಂದಿ ವಿಗ್ರಹ ಉಂಡು. ಕೆಳದಿದ ಸ.ಸೂ 400 ವರ್ಷೊದ ಪಿರವುದ ಲಿಂಗ ಮುದ್ರಿಕೆದ ಕಲ್ಲ್ ಉಂದಾತ್ಂಡ್. ಈ ಕಲ್ಲ್ ಸೂರ್ಯೆ, ಚಂದ್ರೆ ಇಪ್ಪುನ ಮುಟ್ಟ ಅಜರಾಮರವಾದ್ ಉಪ್ಪಡ್ ಪನ್ಪುನ ಸಂದೇಶನ್ ಕೊರ್ಪುಲೆಕ್ಕ ಉಂಡು.
ಶೈವೆರ್ ಶಿವನ್, ವೈಷ್ಣವೆರ್ ವಿಷ್ಣುನು, ಜೈನೆರ್ ತೀರ್ಥಂಕರೆರೆನ್ ಆರಾಧನೆ ಮಲ್ಪುನವು ಸಾಮಾನ್ಯ. ಆಂಡ ಶೈವೆರ್ ಗಡುಕ್ಕು ಲಿಂಗ ಮುದ್ರೆ ಕಲ್ಲ್, ವೈಷ್ಣವೆರ್ ವಾಮನ ಮುದ್ರೆ ಕಲ್ಲ್, ಜೈನೆರ್ ಮುಕ್ಕೊಡೆ ಕಲ್ಲ್ ನ್ ಪಾಡೊಂದು ಇತ್ತೆರ್. ಆ ಮುಖೇನ ಅಕ್ಲೆನ ಗಡು ಜಾಗೆನ್ ಗುರ್ತ ಮಲ್ತೊಂದಿತ್ತೆರ್. ಅಂಚೆನೆ ಲಿಂಗ ಮುದ್ರೆ ಕಲ್ಲ್ ಲೆನ್ ಗಡುಕ್ಕ್ ಸಂಬಂಧ ಪಟ್ಟಿನ ಗಡುತ್ತ ಕಲ್ಲ್ ಲೆನ್ ಪಾಡುವೆರ್. ನೆರ್ದ್ ದುಂಬು ಶಾಂತಾವರ ವೀರಾಂಜನೇಯ ದೇವಲ್ಯದ ಒಂತೆ ದೂರಡ್ ವಾಮನ ಮುದ್ರೆ ಕಲ್ಲ್, ರಮಾನಂದ ಶೆಟ್ಟಿಗಾರ್ರೆನ ಇಲ್ಲ್ ದ ಕೈತಲ್ ಲಿಂಗ ಮುದ್ರೆ ಕಲ್ಲ್ ಪತ್ತೆ ಆದಿತ್ತ್ಂಡ್.
“ಇತಿಹಾಸಗ್ ಸಂಬಂಧಪಟ್ಟಿನ ಶಾಸನ, ವೀರಗಲ್ಲ್, ವಕೈ ಮಾಸ್ತಿ ಕಲ್ಲ್, ಲಿಂಗ ಮುದ್ರೆ ಕಲ್ಲ್ ಒರಿಪಾಯೆರೆ ಸಾರ್ವಜನಿಕೆರೆನ ಸಹಕಾರ ಬೊಕ್ಕ ಸೇವೆ ಅಗತ್ಯ ಉಂಡು. ನಮ್ಮ ನಮ್ಮ ಊರುದ ಇತಿಹಾಸದ ದಾಖಲೆ ಒರಿಪಾವೊಡು” ಪಂದ್ ಇತಿಹಾಸ ಸಂಶೋಧಕೆರ್ ಪ್ರೊ.ಟಿ. ಮುರುಗೇಶ್ ಪಂಡೆರ್. ಈ ಲಿಂಗ ಮುದ್ರೆ ಕಲ್ಲ್ ಪತ್ತೆ ಮಲ್ಪರೆ ಪಾರ್ಕ್ ಸಮಿತಿದ ಕಾರ್ಯದರ್ಶಿ ನಿತೇಶ್ ಶೆಟ್ಟಿ ಬಸ್ರೂರು, ಮಧುಸೂಧನ್ ಭಟ್ ಸಹಕಾರ ಮಲ್ತೆರ್.
400 years old year old stone inscription in linga mudra found
Kundapura: A stone inscription about nearly 400 years old has been discovered at Basrur grama panchayat limits near here.
pallavi shetty