ಬೆಂಗ್ಲೂರ್: ವೇತನ ಪರಿಷ್ಕರಣೆ ಸೇರಿನಂಚನೆ ಸಾರಿಗೆ ನೌಕರೆರ್ನ ಮಾತ ಬೇಡಿಕೆನ್ ಈಡೇರಿಸಾಯಿಜಿಂಡ ಮಾ.21 ಕ್ಕ್ ನಡಪುನ ಪೊರ್ಂಬಾಟರ್ದ್ ಪಿರ ಜಾರುನ ಪ್ರಶ್ನೆನೇ ಇಜ್ಜಿ ಪಂದ್ ಸಾರಿಗೆ ನೌಕರೆರ್ನ ಸಂಘದ ಅಧ್ಯಕ್ಷೆರ್ ಎಚ್.ವಿ.ಅನಂತ ಸುಬ್ಬರಾವ್ ಪಂಡೆರ್.
ಮಾ.21 ಕ್ಕ್ 23 ಸಾರ ಬಸ್ಸ್ಲು ಸವಾರಿ ಮಲ್ಪುಜಿ. ಸಿಎಂ ನಮ್ಮೊಟ್ಟುಗು ಚರ್ಚೆಗ್ ಬರೋಡು. ಈ ಪೊರ್ಂಬಾಟಗ್ ನಾಲ್ ನಿಗಮದ ನೌಕರೆರ್ ಬೆಂಬಲ ಕೊರ್ತೆರ್ ಪಂದ್ ಪಂಡೆರ್.
ಬೆಂಗ್ಲೂರು: ಜಗತ್ತ್ಡೇ ಸುದ್ದಿ ಮಲ್ತಿನ ಕಾಂತಾರ ಪಿಚ್ಚರ್ ಇನಿ ಸ್ವಿಡ್ಚರ್ಲೆಂಡ್ದ ಜಿನೇವಾಡ್ ಪ್ರದರ್ಶನ ಆಯರೆ ಉಂಡು.
ಇನಿ ಬಯ್ಯ 6.30 ಗಂಟೆಗ್ ಹಾಲ್ ಸಂಖ್ಯೆ 13 ತ್ತ ಪಾಥೆ ಬಾಲೆಕ್ಸರ್ಟ್ಡ್ ಕಾಂತಾರ ಪಿಚ್ಚರ್ ಪ್ರದರ್ಶನ ಆಯರೆ ಉಂಡು. ಪಿಚ್ಚರ್ ಪ್ರದರ್ಶನ ಆಯಿಬೊಕ್ಕ ರಿಷಬ್ ಶೆಟ್ಟಿ ಈ ಬಗೆಟ್ ಪಾತೆರಿಯರೆ ಉಲ್ಲೆರ್.
ಕಾರ್ಲ ತಾಲೂಕ್ದ ಅತ್ತೂರು ಬೆರಂದೊಟ್ಟು ಶ್ರೀ ಧರ್ಮರಸು ಕೊಡಮಣಿತ್ತಾಯ, ಕುಕ್ಕಿನಂತಾಯ ದೈವಸ್ಥಾನ, ಶ್ರೀ ಬ್ರಹ್ಮ ಬೈದರ್ಕಳ ಗರಡಿಡ್ ಮಾ.20-25 ಮುಟ್ಟ ವಾರ್ಷಿಕ ನೇಮೋಚ್ಚಯ ನಡಪರೆ ಉಂಡು.
ಮಾ.20 ಗ್ ಕೋರಿಗುಂಟ ಆದ್, 21 ಕ್ಕ್ ಚೆಂಡು, 22 ಕ್ಕ್ ಬಯ್ಯ 5.30 ಗಂಟೆಗ್ ಭಂಡಾರ ಪಿದಡ್ದ್ ರಾತ್ರೆ ಕೊಡಿ ಏರ್ದ್ ಧರ್ಮ ಅರಸುರಾಯ ನೇಮ ಸುರು ಆಯರೆ ಉಂಡು. ಮಾ.23 ಕ್ಕ್ ಬಯ್ಯ 6 ಗಂಟೆಗ್ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ನಡಪರೆ ಉಂಡು. ಅವ್ವೆ ದಿನ ರಾತ್ರೆ ಕೊಡಮಣಿತ್ತಾಯ, ಕುಕ್ಕಿನಂತ್ತಾಯ, ಕಲ್ಕುಡ, ತುಕತ್ತರಿ, ವರ್ತೆ ದೈವದ ನೇಮ, ಗೋಂದುಲ ನೇಮ ನಡಪರೆ ಉಂಡು. ಮಾ. 24 ಕ್ಕ್ ರಾತ್ರೆ ಬೈರ್ದೆಲ್ನ ನೇಮ ನಡತ್ತ್ದ್ 25 ಕ್ಕ್ ಕಾಂಡೆ 10.30 ಗಂಟೆಗ್ ಮಾಯಿಂದಲೆ ದೈವದ ನೇಮ ನಡಪರೆ ಉಂಡು.
ಬೈಂದೂರ್ ತಾಲೂಕ್ದ ಹೇರೂರು ಗ್ರಾಮದ ಶ್ರೀ ಬ್ರಹ್ಮಬೈದರ್ಕಳ ಕೋಟಿ ಚೆನ್ನಯ್ಯ ಬೊಕ್ಕ ಶ್ರೀ ಪಂಜುರ್ಲಿ ಸಪರಿವಾರ ಗರೋಡಿಡ್ ನವೀಕೃತ ದಾರಯಮಯ ಗರೋಡಿ ಲೋಕಾರ್ಪಣೆ ಬೊಕ್ಕ ಪುನಃ ಪ್ರತಿಷ್ಠಾ ಬ್ರಹ್ಮಕಲಶೋಚ್ಚಯ ಮಾ.22-23 ಮುಟ್ಟ ನಡಪರೆ ಉಂಡು.
ಪುದೆಕಾಣಿಕೆನ್ ಕೊರ್ಪುನಕುಲು ಮಾ.19 ಬೊಕ್ಕ 20 ತಾರೀಕ್ಗ್ ಕೊರೊಲಿ. ಈ ಪುಣ್ಯ ಕಾರ್ಯಗ್ ಮಾತ ಭಕ್ತೆರ್ ಬತ್ತ್ದ್ ದೇವೆರೆನ ಗಂಧ ಪ್ರಸಾದನ್ ಸ್ವೀಕಾರ ಮಲ್ಪೊಡು ಪಂದ್ ಸಮಿತಿದ ಸರ್ವ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಸುಳ್ಯ ತಾಲೂಕ್ದ ಶ್ರೀ ದುಗ್ಗಲಾಯ ದೈವಸ್ಥಾನ (ರಿ.) ದುಗ್ಗಲಡ್ಕಡ್ ಮಾ.19 ಬೊಕ್ಕ 20 ತಾರೀಕ್ಗ್ ಶ್ರೀ ದುಗ್ಗಲಾಯ, ಶ್ರೀ ರುಧಿರ ಚಾಮುಂಡಿ, ಶ್ರೀ ನಾಗದೇವೆರ್ ಅಂಚನೆ ಪರಿವಾರ ದೈವಲೆಗ್ ಪ್ರತಿಷ್ಠಾ ವಾರ್ಷಿಕೋಚ್ಚಯ ಬೊಕ್ಕ ನೇಮೋಚ್ಚಯ ನಡಪರೆ ಉಂಡು.
ಕುಂಟಾರು ವೇದಮೂರ್ತಿ ವಾಸುದೇವ ತಂತ್ರಿವರ್ಯ ಮೆರೆನ ಆಶೀರ್ವಾದಡ್ ಶ್ರೀ ರವೀಶ ತಂತ್ರಿಲೆನ ಮಾರ್ಗದರ್ಶನಡ್ ಬೊಕ್ಕ ಜೋಗಿಯಡ್ಕ ರಾಧಾಕೃಷ್ಣ ಭಟ್ ಮೆರೆನ ಮುತಾಲಿಕೆಡ್ ಬೇತೆ ಬೇತೆ ಧಾರ್ಮಿಕ ಕಾರ್ಯಕ್ರಮದೊಟ್ಟುಗು ಈ ಲೇಸ್ ನಡಪರೆ ಉಂಡು. ಈ ಪುಣ್ಯ ಕಾರ್ಯಗ್ ಮಾತ ಭಕ್ತೆರ್ ಬತ್ತ್ದ್ ಶ್ರೀ ದೈವದ ಅನುಗ್ರಹಗ್ ಪಾತ್ರರಾವೊಡು ಪಂದ್ ದೇವಲ್ಯದ ಅಧ್ಯಕ್ಷೆರ್ ಕೆ. ಸುಂದರ ರಾವ್, ಅನುವಂಶಿಕ ಮೊಕ್ತೇಸರೆರ್ ರಾಘವೇಂದ್ರ ಭಟ್, ಪ್ರಧಾನ ಕಾರ್ಯದರ್ಶಿ ಕಜೆ ಕುಶಾಲಪ್ಪ ಗೌಡ ಅಂಚನೆ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಸುಳ್ಯ: ವಿಷ್ಣುನಗರದ ಶ್ರೀ ವಿಷ್ಣುಮೂರ್ತಿ ಸೇವಾ ಟ್ರಸ್ಟ್ (ರಿ) ಕಳಂಜಡ್ ಶ್ರೀ ವಿಷ್ಣುಮೂರ್ತಿ ದೈವದ ಒತ್ತೆಕೋಲ ನಡಾವಳಿ ಮಾ.19 ಬೊಕ್ಕ 20 ತಾರೀಕ್ಗ್ ನಡಪರೆ ಉಂಡು.
ಈ ಲೇಸ್ಗ್ ಮಾತ ಭಕ್ತೆರ್ ಬತ್ತ್ದ್ ಶ್ರೀ ದೈವದ ಗಂಧಪ್ರಸಾದನ್ ದೆತೊಂದು ದೈವದ ಕೃಪೆಗ್ ಪಾತ್ರರಾವೊಡು ಪಂದ್ ಅಧ್ಯಕ್ಷೆರ್ ಲಕ್ಷೀಶ ರೈ ಕಳಂಜ, ಗೌರವಾಧ್ಯಕ್ಷೆರ್ ರಘುನಾಥ ರೈ ಕಳಂಜ, ಕಾರ್ಯದರ್ಶಿ ಶೇಷಪ್ಪ ಗೌಡ ಕುಕ್ಕುತ್ತಡಿ, ಜೊತೆ ಕಾರ್ಯದರ್ಶಿ ನಾರಾಯಣ ಕಳಂಜ, ಉಪಾಧ್ಯಕ್ಷೆರ್ ದಯಾನಂದ ಕಳಂಜ, ಖಜಾಂಚಿ ರಾಜೇಶ್ ಅಮೀನ್ ಪಟ್ಟೆ ಅಂಚನೆ ಸಮಿತಿದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಒಡಿಪು: ಕಾರ್ಲ ತಾಲೂಕ್ದ ಅಡಪಾಡಿ ಪಳ್ಳಿ ಗ್ರಾಮದ ಶ್ರೀ ಉಮಾಮಹೇಶ್ವರ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಮಾ.22-28 ಮುಟ್ಟ ಶ್ರೀ ಕ್ಷೇತ್ರಡ್ ಬ್ರಹ್ಮಕಲಶೋಚ್ಚಯ ಅಂಚನೆ ಸಹಸ್ರ ಚಂಡಿಕಾ ಮಹಾಯಾಗ ನಡಪರೆ ಉಂಡು.
ಬೇತೆ ಬೇತೆ ಧಾರ್ಮಿಕ ಕಾರ್ಯಕ್ರಮದೊಟ್ಟುಗು ಅಂಚನೆ ಶ್ರೀ ಸಂಸ್ಥಾನ ಗೌಡಪಾದಾಚಾರ್ಯ ಕೈವಲ್ಯ ಮಠಾಧೀಶ ಶ್ರೀಮದ್ ಶಿವಾನಂದ ಸರಸ್ವತೀ ಸ್ವಾಮೀಜಿ ಮೆರೆನ ಉಪಸ್ಥಿತಿಡ್ ಅಂಚನೆ ವೇದಮೂರ್ತಿ ಶ್ರೀ ಮೃಗೇಶ್ ಭಟ್, ಲಕ್ಷ್ಮೀಪುರ ಹಿರ್ಗಾನ ಬೊಕ್ಕ ವೇದಮೂರ್ತಿ ಶ್ರೀ ದಯಾನಂದ್ ಭಟ್, ಕಲ್ಲಡ್ಕ ಮೆರೆನ ಮುತಾಲಿಕೆಡ್ ನಡಪರೆ ಉಂಡು. ಈ ಲೇಸ್ಗ್ ಮಾತ ಭಕ್ತೆರ್ ಬತ್ತ್ದ್ ದೇವೆರೆನ ಅನುಗ್ರಹಗ್ ಪಾತ್ರರಾವೊಡು ಪಂದ್ ದೇವಲ್ಯದ ಅರ್ಚಕೆರ್ ಅಂಚನೆ ಅಡಪಾಡಿ ಕೋಡಿಮನೆ ಕುಟುಂಬಸ್ಥೆರ್, ಧರ್ಮದರ್ಶಿಲು ಪುಂಡಲೀಕ ನಾಯಕ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಪುಗರ್ತೆದ ಮುಲ್ಕಿ ಸೀಮೆ ಅರಸು ಕಂಬುಲಗ್ ಕರ್ನಾಟಕ ಸರಕಾರದ ಪ್ರವಾಸೋದ್ಯಮ ಇಲಾಖೆರ್ದ್ ಮಂಜೂರಾಯಿನ ರೂ. 5 ಲಕ್ಷನ್ ಮುಲ್ಕಿ ಅರಮನೆದ ಗೌತಮ್ ಜೈನ್ ಮೇರ್ ರಾಜ್ಯದ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಮೆರೆರ್ದ್ ಪಡೆಯೊಂಡೆರ್.
ಈ ಪೊರ್ತುಡು ಉಸ್ತುವಾರಿ ಸಚಿವೆರ್ ಆಯಿನ ಸುನಿಲ್ ಕುಮಾರ್, ಶಾಸಕೆರ್ ವೇದವ್ಯಾಸ ಕಾಮತ್, ಪ್ರತಾಪ್ ಸಿಂಹ ನಾಯಕ್, ನಗರ ಪಾಲಿಕೆದ ಮೇಯರ್ ಲೇಸ್ಡ್ ಇತ್ತೆರ್.
ದಕ್ಷಿಣ ಕನ್ನಡ ಜಿಲ್ಲಾ ಚುಟುಕು ಸಾಹಿತ್ಯ ಪರಿಷತ್ದ ಮೂಲ್ಕಿ ತಾಲೂಕು ಘಟಕ, ಕಿನ್ನಿಗೋಳಿದ ಯುಗಪುರುಷ ಅಂಚನೆ ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ ಮೊಕ್ಲೆನ ಒಟ್ಟು ಸೇರಿಗೆಡ್ ನಡಪರೆ ಇಪ್ಪುನ ಮೂಲ್ಕಿ ತಾಲೂಕ್ ಸಾಹಿತ್ಯ ಉಚ್ಚಯ ಪ್ರಶಸ್ತಿ-ಪುರಸ್ಕಾರಗ್ ಸಾಧಕೆರೆನ್ ಆಯ್ಕೆ ಮಲ್ತ್ದೆರ್.
ಮೂಲ್ಕಿ ತಾಲೂಕು ಕಲಾಶ್ರೀ ಪ್ರಶಸ್ತಿಗ್ ಕಟೀಲು ಶ್ರೀ ದುರ್ಗಾಪರಮೇಶ್ವರೀ ಪದವಿ ಪೂರ್ವ ಕಾಲೇಜಿದ ಫ್ರೌಢಶಾಲಾ ವಿಭಾಗದ ಶಿಕ್ಷಕೆರ್ ಆಯಿನ ಸಾಯಿನಾಥ ಶೆಟ್ಟಿ, ಯುವ ರಂಗಕರ್ಮಿ ಕಲಾ ಪ್ರಕಾರಡ್ ಪ್ರಾಮಾಣಿಕವಾದ್ ಸೇವೆ ಮಲ್ತೊಂದಿಪ್ಪುನ ರಜತ್ಕುಮಾರ್ ಸಸಿಹಿತ್ಲು, ಕಲ್ಪುನ ಪ್ರಾಯೊಡೇ ಕಲೆತ್ತ ಮಿತ್ತ್ ಆಸಕ್ತಿ ತೋಜಾಯಿನ ಪ್ರತಿಭೆ ಕು. ಸಿಂಚನ ಕಿನ್ನಿಗೋಳಿ ಅಂಚನೆ ಸೇವಾಶ್ರೀ ಪುರಸ್ಕಾರಗ್ ಪಡುಪಣಂಬೂರು ಗ್ರಾಮ ಪಂಚಾಯತ್ದ ಅಧ್ಯಕ್ಷೆರಾದ್ ರಾಷ್ಟ್ರಮಟ್ಟಡ್ ಗುರ್ತಿಸಾಯಿನ ಪಂಚಾಯತ್ದ ಮುಕೇನ ಸಮಾಜ ಸೇವೆಡ್ ಇಪ್ಪುನ ಮಂಜುಳಾ ಪಡುಪಣಂಬೂರು, ಹಳೆಯಂಗಡಿಡ್ ಆಂಬ್ಯುಲೆನ್ಸ್ ಸೇವೆದೊಟ್ಟುಗು ಕ್ರೀಡೆ, ಸಾಮಾಜಿಕ ಸೇವೆಡ್ ಇಪ್ಪುನ ಜೈಕೃಷ್ಣ ಕೋಟ್ಯಾನ್ ಅರೆನ್ ಆಯ್ಕೆ ಮಲ್ತ್ದೆರ್.
ಮಾರ್ಚ್ 26 ಕ್ಕ್ ಕಿನ್ನಿಗೋಳಿದ ಯುಗಪುರುಷಡ್ ನಡಪುನ ಲೇಸ್ಡ್ ಬಿನ್ನೆರ್ನ ಸಮ್ಮುಖಡ್ ಈ ಪ್ರಶಸ್ತಿ, ಪುರಸ್ಕಾರನ್ ಕೊರ್ದು ಮಾನಾದಿಗೆ ಮಲ್ಪರೆ ಉಂಡು ಪಂದ್ ಕಿನ್ನಿಗೋಳಿ ಯುಗಪುರುಷದ ಪ್ರಧಾನ ಸಂಪಾದಕೆರ್ ಕೆ.ಭುವನಾಭಿರಾಮ ಉಡುಪ, ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ದ ಅಧ್ಯಕ್ಷೆರ್ ಸಂತೋಷ್ ದೇವಾಡಿಗ ಬೊಕ್ಕ ಮೂಲ್ಕಿ ತಾಲೂಕು ಚುಟುಕು ಸಾಹಿತ್ಯ ಪರಿಷತ್ದ ಅಧ್ಯಕ್ಷೆರ್ ನರೇಂದ್ರ ಕೆರೆಕಾಡು ತೆರಿಪಾದೆರ್.
ವೇಣೂರು ಕೈತಲ್ದ ಪೆರಿಂಜೆ ಪಡ್ಯಾರಬೆಟ್ಟು ಮೂಲ ಕೊಡಮಣಿತ್ತಾಯ ದೈವಸ್ಥಾನಗ್ ದೈವಲೆಗ್ ಪಾಡುನ ಪೂತ್ತ ಮಾಲೆ ದೀಪಿನ “ಪುರ್ಪ ದಂಡಿಗೆ” ನ್ ಪಡ್ಯಾರಬೆಟ್ಟು ದೈವಸ್ಥಾನದ ವಾರ್ಷಿಕ ಉಚ್ಚಯದ ಪೊರ್ತುಡು ಪಡ್ಯಾರಬೆಟ್ಟು ದೈವಸ್ಥಾನದ ಅನುವಂಶಿಕ ಪ್ರಧಾನ ಅರ್ಚಕೆರ್ ಮಾರೂರು ಖಂಡಿಗ ರಾಮದಾಸ ಅಸ್ರಣ್ಣೆರ್ ದೈವಸ್ಥಾನಗ್ ಸೇವಾರೂಪವಾದ್ ಕೊರಿಯೆರ್.
ಬೆದ್ರದ ದೇವಕೀ ಲಕ್ಷ್ಮಿ ಸಾ ಮಿಲ್ ನ ಮಾಲಕೆರ್ ಆಯಿನ ಪ್ರೇಮನಾಥ ಮಾರ್ಲೆರ್ , ಅರೆನ ಮಿಲ್ಡ್ ನಿರ್ಮಾಣ ಮಲ್ತಿನ ಈ ಪುರ್ಪ ದಂಡಿಗೆನ್ ಭಾರೀ ಪೊರ್ಲುಡು ಕೆತ್ತನೆ ಮಲ್ತ್ದೆರ್. ಮರರ್ದ್ ನಿರ್ಮಾಣ ಆಯಿನ ಈ ಮಾಲೆ ದಂಡಿಗೆಡ್ ಆನೆದ ಕಾರ್ ದ ಚಿತ್ರಣ ಉಂಡು. ಸೊಂಡಿಲ್ಡ್ ಪೊತ್ತ ಮಾಲೆ ದೀಪಿಲೆಕ್ಕ ನಿರ್ಮಾಣ ಮಲ್ತ್ದೆರ್. ಪ್ರೇಮನಾಥ ಮಾರ್ಲೆರ್ ಮೂಜಿ ತಿಂಗೊಲ್ದ ಪಿರವು, ಅರೆನ ಮಿಲ್ಡ್ ಉಂದುವೇ ರೀತಿದ ಮಾಲೆ ದಂಡಿಗೆನ್ ನಿರ್ಮಾಣ ಮಲ್ತ್ದ್ ತೋಡಾರ್ದ ಕೊಡಮಣಿತ್ತಾಯ ದೈವಸ್ಥಾನಗ್ ಸರ್ಮಪಣೆ ಮಲ್ತ್ದಿತ್ತೆರ್.
ಈ ಪುರ್ಪ ಮಾಲೆ ದಂಡಿಗೆನ್ ಸರ್ಮಪಣೆ ಮಲ್ಪುನ ಪೊರ್ತುಡು ಸೇವಾಕರ್ತೆರಾಯಿನ ಮಾರೂರು ಖಂಡಿಗ ರಾಮದಾಸ ಅಸ್ರಣ್ಣ, ಪ್ರಸನ್ನ ಅಸ್ರಣ್ಣ, ಶ್ರೀಶ ಅಸ್ರಣ್ಣ, ಪಡ್ಯಾರಬೆಟ್ಟು ದೈವಸ್ಥಾನದ ಅನುವಂಶೀಯ ಆಡಳಿತದಾರೆರ್ ಜೀವಂಧರ ಬಲ್ಲಾಳ್ ಯಾನೆ ಕಂಚಿಪೂವಣಿ, ಉದ್ಯಮಿ ಕಾರಮೊಗರಗುತ್ತು ಪ್ರೇಮನಾಥ ಮಾರ್ಲ, ವಿಕಾಸ್ ಜೈನ್, ವಿಶ್ವಾಸ್ ಜೈನ್, ಯಕ್ಷಗಾನ ವಿಮರ್ಶಕೆರ್ ಎಂ.ಶಾಂತರಾಮ ಕುಡ್ವ, ಪುನೀತ್ ಕುಮಾರ್ ಕಂಬಳಿ ಕಟ್ಟೆಮಾರ್, ಹಾನ್ಯಗುತ್ತು ಮನೋಜ್ ಶೆಟ್ಟಿ, ಹಾನ್ಯಗುತ್ತು ರಿತೇಶ್ ಶೆಟ್ಟಿ, ಕಾರಮೊಗರಗುತ್ತು ಕಿರಣ್ ಕುಮಾರ್ ಮಾರ್ಲ, ಹಾನ್ಯಗುತ್ತು ಭುವನ್ ವೈಷ್ಣವ ಮಾರ್ಲ, ಕ್ಷೇತ್ರದ ಮುಕ್ಕಾಲ್ದಿ ಮಂಜದಡೆಗುತ್ತು ಸುನೀಲ್ ಶೆಟ್ಟಿ ಇತ್ತೆರ್.
