ಬಂಟ್ವಾಳ: ಕಾಂಗ್ರೆಸ್ ಪಕ್ಷದ ಮುತಾಲಿಕೆಡ್ ಬಂಟ್ವಾಳ ಕ್ಷೇತ್ರಲೆಡ್ ಇಪ್ಪುನ ಗ್ರಾಮಲೆಗ್ ಪೋಯರೆ ಬಂಟ್ವಾಳ ಪ್ರಜಾಧ್ವನಿ ಯಾತ್ರೆ ಮಾಚ್ 10 ಕ್ಕ್ ಸುರು ಆಯರೆ ಉಂಡು. 14 ದಿನತ್ತ ಕಾಲ ಕ್ಷೇತ್ರಲೆಗ್ ಗ್ರಾಮ ಗ್ರಾಮಲೆಗ್ ಪೋಯರೆ ಉಂಡು ಪಂದ್ ಮಾಜಿ ಸಚಿವೆರ್ ಬಿ. ರಮಾನಾಥ ರೈ ಪಂಡೆರ್.
ಪಾಣೆಮಂಗಳೂರು ಬ್ಲಾಕ್ ಕಾಂಗ್ರೆಸ್ ಕಚೇರಿಯಲ್ಲಿ ಸುದ್ದಿಗೋಷ್ಠಿಡ್ ಪಾತೆರಿನ ಆರ್, ತನ್ನ 5 ವರ್ಷದ ಅವಧಿಡ್ ಸಿದ್ದರಾಮಯ್ಯ ಸರ್ಕಾರದ ಮುಕೇನ ಮಲ್ತಿನ 5 ಸಾರ ಕೋಟಿ ರೂಪಾಯಿದ ಪ್ರಗತಿ ಕಾರ್ಯನ್ ಜನಕ್ಲೆಗ್ ಯಾತ್ರೆದ ಮುಖಾಂತರ ತೆರಿಪಾಯೆರ ಉಂಡು. ಒಂಜಿ ದಿನ ಮೂಜಿ ಗ್ರಾಮಲೆಗ್ ಯಾತ್ರೆ ಮಲ್ಪರೆ ಉಂಡು. ಪ್ರತಿ ದಿನಲ ಬಯ್ಯಗ್ ಸಭೆ ನಡಪಾಯರೆ ಉಂಡು. ಪುರಲ್ ಶ್ರೀ ರಾಜರಾಜೇಶ್ವರಿ ದೇವಲ್ಯಡ್ ಪೂಜೆ ಸಂದಾದ್ ಯಾತ್ರೆ ಸುರು ಆಯರೆ ಉಂಡು. ಪ್ರಮುಖ ಮುಖಂಡೆರ್ ಪ್ರತಿದಿನಲ ಯಾತ್ರೆದ ಪೊರ್ತುಡು ಭಾಷಣಕಾರೆರಾದ್ ಬರಿಯರೆ ಉಲ್ಲೆರ್ ಪಂದ್ ಪಂಡೆರ್.
ನನೋರಿ ಮಲ್ತಿನ ಬೇಲೆನ್ ಯಾನ್ ಮಲ್ತೆ ಪಂದ್ ಏಪಲ ಪನ್ಪುಜಿ ಪಂದ್ ಪಂಡಿನ ರಮಾನಾಥ ರೈ, ಬಂಟ್ವಾಳದ ಒಳಚರಂಡಿ ಯೋಜನೆ ಮಂಜೂರಾತಿನ್ 2017ತ್ತ ಅಕ್ಟೋಬರ್ 10 ಕ್ಕ್ ಯಾನ್ ಮಲ್ಪಾದೆ. ಉಂದೆನ್ ದಾಖಲಾತಿಲ ಉಂಡು. ಮಸ್ತ್ ಗ್ರಾಮಡ್ ಪರ್ಪಿನ ನೀರ್ದ ಯೋಜನೆಲ ಯನ್ನ ಅವಧಿಡೇ ಆತಿನವು. ಬಂಟ್ವಾಳ ತಾಲೂಕ್ದ ಪೆರ್ಮೆ ಎನ್ನಿನ ಪಂಜೆ ಮಂಗೇಶರಾಯೆರ್ನ ಸ್ಮಾರಕ ಭವನ ನಿರ್ಮಾಣಗ್ 8 ಕೋಟಿ ಮಂಜೂರು ಮಲ್ತ್ದ್ ಬೇಲೆ ಸುರು ಮಲ್ತ್ದಿತ್ತ. ಈಡೇ ಮುಟ್ಟಲ ಇತ್ತೆದ ಶಾಸಕೆರ್ನ ಅವಧಿಡ್ ಆ ಬೇಲೆ ನನಲ ಆತಿಜಿ ಪಂದ್ ಪಂಡೆರ್.
ಯಾತ್ರೆದ ಬಗೆಟ್ ಮುಖಂಡೆರ್ ಪಿಯೂಸ್ ಎಲ್. ರೋಡ್ರಿಗಸ್ ಮಾಹಿತಿ ಕೊರಿಯೆರ್. ಸುದ್ದಿಗೋಷ್ಠಿಡ್ ಚಂದ್ರಪ್ರಕಾಶ್ ಶೆಟ್ಟಿ, ಸುದೀಪ್ ಕುಮಾರ್ ಶೆಟ್ಟಿ, ಬೇಬಿ ಕುಂದರ್, ಪದ್ಮಪ್ರಸಾದ್ ಜೈನ್, ಸುದರ್ಶನ ಜೈನ್, ಮಧುಸೂಧನ ಶೆಣೈ, ಅಬ್ಬಾಸ್ ಆಲಿ ಬಿ.ಎಂ., ಮಾಯಿಲಪ್ಪ ಸಾಲಿಯಾನ್. ಸುರೇಶ್ ಜೋರ, ಚಂದ್ರಶೇಖರ ಪೂಜಾರಿ, ಚಂದ್ರಶೇಖರ ಭಂಡಾರಿ, ಸುಧಾಕರ ಶೆಣೈ ಖಂಡಿಗ ಇತ್ತೆರ್.
pallavi shetty