ಜೈ ತುಳುನಾಡ್(ರಿ) ಸಂಘಟನೆರ್ದ್ ONLINE ತುಲು ಬಾಸೆ ಕಲ್ಪಾವುನ ಕಜ್ಜಕೊಟ್ಯ

ಪಂಚ ದ್ರಾವಿಡ ಭಾಷೆಲೆಡ್ ಒಂಜಾಯಿನ ತುಳು ಭಾಷೆನ್ ಇನಿತ ದಿನೊಟು ನಿತ್ಯೊದ ಬದುಕ್ ಡ್ ಬೊಕ್ಕ ವ್ಯವಹಾರಲೆಡ್ ಬಾರಿ ಬುಲೆಚ್ಚಿಲ್ನ್ ತೂವೊಂದುಲ್ಲ. ಕರ್ನಾಟಕ ರಡ್ಡನೇ ಅಧಿಕೃತ ತಾನಮಾನದ ಬಾಕಿಲ್ಡ್ ತುಳು ಬಾಸೆ ಕಾತೊಂದುಂಡು. ಸರಕಾರದ ಆದೇಶೊಗು ಸರ್ವ ತುಳುವೆರ್ ಕಾತೊಂದುಲ್ಲೆರ್.

ಕರ್ನಾಟಕ ಬೊಕ್ಕ ಕೇರಳ ರಾಜ್ಯದ ಅಧಿಕೃತ ಭಾಷಾ ತಾನಮಾನ ಬೊಕ್ಕ ಸಂವಿಧಾನದ ಎಡ್ಮನೇ ಪರಿಚ್ಛೇದದ ಮಾನ್ಯತೆ ತಿಕ್ಕೊಡು ಪನ್ಪುನವು ತುಳುವೆರೆನ ಸುಮಾರ್ ವರ್ಷೊಲೆನ ಕನವಾದೆ ಒರಿದ್ಂಡ್. ಅಂಚೆನೆ ತುಳುಕ್ ಯುನಿಕೋಡ್ ತಿಕ್ಕೊಡು, ಶೈಕ್ಷಣಿಕವಾದ್ ಅವಕಾಶ ಒದಗೊಡು ಪನ್ಪುನ ಒತ್ತಾಯ ಕೂಡ ತುಳುವೆರೆನ ಆದುಂಡು. ಸುಮಾರ್ ತುಳು ಸಂಘಟನೆಲು ಅಕಲ್ನನವೇ ರೀತಿಡ್ ಪೊರ್ಂಬಾಟಲೆನ್ ಮಲ್ತೊಂದುಲ್ಲೆರ್. ರಡ್ಡ್ ಸರಕಾರಲ ಈ ದಿಟ್ಟಿಡ್ ಕಣ್ಣ್ ಬುಲವೊಡಾತ್ಂಡ್.

ತುಳು ಭಾಷೆದ ಬಗ್ಗೆ ಸುಮಾರ್ ಪೊರ್ಂರ್ಬಾಟೊನು ಮಲ್ತೊಂದುಪ್ಪುನ, ಜೈ ತುಳುನಾಡ್(ರಿ) ಸಂಘಟನೆ ನಿರಂತರ ಪೊರ್ಂಬಾಟ, ಜನ ಜಾಗೃತಿಲೆನ್ ಮಲ್ತೊಂದು ತುಲು ಲಿಪಿ ಕಲ್ಪಾವುನ ಕಜ್ಜಕೊಟ್ಯ, ತುಳು ಲಿಪಿ ಪುದರ್ ಪಲವೆ ಪಟ್ಟುನು, ತುಳು ಡಿಕ್ಸನರಿ, ತುಳು ಫಾಂಟ್, ತುಳು ಲಿಪಿ ಲಿಪ್ಯಾಂತರ ತಂತ್ರಾಂಶ, ತುಳು ಲಿಪಿಟ್ಟೇ ಮಸ್ತರೆ ಬುಡುಗಡೆ, ಇಂಚ ಸುಮಾರ್ ತುಳು ಪರ ಕೆಲಸೊಲೆನ್ ಮಲ್ತೊಂದುಂಡು.

ತುಳು ಭಾಷೆನ್ ನನಲಾತ್ ಬುಲೆಪಾವುನ ದಿಟ್ಟಿದೊಟ್ಟುಗು, ಸಂಘಟನೆ “ತುಳು ಭಾಷಾ ಕಲ್ಪಾದಿ ಸಮಿತಿ”ನ್ ಕಟ್ಟೊಂದು, ತುಳು ಭಾಷೆನ್ ಕಲ್ಪಾವುನ ಪ್ರಯತ್ನೊನು ಮಲ್ಪೆರೆ ತಯಾರಾತ್ಂಡ್. ಕಡೀರಾದ್ ಕನ್ನಡ ಬೊಕ್ಕ ಇಂಗ್ಲಿಷ್ ತೆರಿನಕಲೆಗ್ ತುಳು ಭಾಷೆನ್ ಕಲ್ಪಾವುನ ದಿಟ್ಟಿಡ್ ತರಗತಿಲು ಉಂದುವೇ ಮಾರ್ಚ್ ತಿಂಗೊಲ್ದ ಒಂಜಿನೇ ತಾರೀಕ್ ರ್ದ್ ಸುರುವಾಯೆರೆ ಉಂಡು. ಈ ಕ್ಲಾಸ್ ಆನ್ಲೈನ್ ಗೂಗಲ್ ಮೀಟ್ ಮುಕೇನ ನಡಪುಂಡು. ಉಮೇದ್ ಇತ್ತಿನಕುಲು QR code ಗಲಸದ್ ಅಕಲೆನ ಪುದರ್ ನ್ ತೆರಿಪಾವೊಲಿ. ದುಂಬುದ ದಿನೊಟು ಹಿಂದಿ ಭಾಷೆಡ್ಲ ಈ ಕಜ್ಜಕೊಟ್ಯನ್ ನಡಪಾವುನ ಯೋಚನೆಡ್ ಉಲ್ಲ ಪಂದ್ ಸಂಘಟನೆದ ಬೆಂಗಳೂರು ವಿಭಾಗದ ಗುರ್ಕಾರ್ಲಾಯಿನ ವಿಶಾಲ್ ಕೊಡಿಯಾಲ್ ತೆರಿಪಾದೆರ್.

ಏರ್ ಬೋಡಾಂಡಲ ತುಳು ಕಲ್ಪೊಲಿ

ತುಳುನಾಡ್ ದ ಸುಮಾರ್ ಜನ ಬೆಂಗಳೂರು, ಬೊಂಬೈ ಅಂಚೆನೆ ಪಿದಯಿ ದೇಸೊಡು ಬೇಲೆ ನಾಡೊಂದು ಪೋದು ಅಲ್ಪನೇ ನೆಲೆ ಊರುದೆರ್. ಅಪ್ಪೆ ಅಮ್ಮಗ್ ತುಳು ಬತ್ತ್ಂಡ ಲ, ಜೋಕುಲೆಗ್ ತುಳು ಪಾತೆರ್ಯೆರೆ ಬರಂದಿನ ಸಾಧ್ಯತೆಲೆನ್ ಎಂಕುಲು ತೆರಿಯೊಂದು ಈ ಒಂಜಿ ಕಜ್ಜಕೊಟ್ಯದ ಬಗೆಟ್ಟ್ ಯೋಚನೆ ಮಲ್ತ್ ದ. ತುಳುವೆರ್ ಮಾತ್ರ ಅತ್ತ್ ತುಳು ಭಾಷೆನ್ ಪಾತೆರಿಯರೆ ಉಮೇದ್ ಇತ್ತಿನ ಏರ್ ಬೋಡಾಂಡಲ ಪುದರ್ ತೆರಿಪಾವೊಲಿ
– ಅನುಷಾ ಸಾಲ್ಯಾನ್
ನಿದಯೆಂತೆರ್,ಜೈ ತುಳುನಾಡ್(ರಿ).
ತುಳು ಭಾಷಾ ಕಲ್ಪಾದಿ ಸಮಿತಿ

ಪರಭಾಷೆದಕ್ಲೆಗ್ ಲ ತುಳು ಕಲ್ಪರೆ ಉಮೇದ್

ತುಳು ಭಾಷೆನ್ ಸುಲಭವಾದ್ ಪಾತೆರ್ರೆ ಕಲ್ಪೊಲಿ. ಪರ ಭಾಷೆದ ಸುಮಾರ್ ಜನ ಎಂಕುಲೆಡ ತುಳು ಭಾಷೆನ್ ಕಲ್ಪಾಯೆರೆ ಕೇನೊಂದಿತ್ತೆರ್. ಸದ್ಯೊಗು ಕನ್ನಡ, ಇಂಗ್ಲಿಷ್ ಡ್ ಕಜ್ಜಕೊಟ್ಯನ್ ಸುರುಮಲ್ತೊಂದುಲ್ಲ. ಬಾರಿ ಎಡ್ಡೆ ಉಮೇದು ಎಂಕಲೆಗ್ ತಿಕ್ಕೊಂದುಂಡು. ಭಾಷೆದ ಬಗ್ಗೆ ತೆರಿಯೊನೆರೆ ಉಂದು ಎಡ್ಡೆ ಅವಕಾಶ ಆದುಂಡು ಮಾತೆರೆಗ್ಲ. ತುಳು ಭಾಷೆದ ಒರಿಪುಗು ಸರ್ವ ಪ್ರಯತ್ನನ್ ಜೈ ತುಳುನಾಡ್ ಸಂಘಟನೆ ಬರೊಂದುಂಡು.
—ಜಯಪ್ರಸಾದ್ ತುಳುನಾಡ್
ನಿದಯಂತೆರ್,
ಜೈ ತುಳುನಾಡ್(ರಿ)
ತುಳು ಭಾಷಾ ಕಲ್ಪಾದಿ ಸಮಿತಿ