February 28, 2023

ಜೈ ತುಳುನಾಡ್(ರಿ) ಸಂಘಟನೆರ್ದ್ ONLINE ತುಲು ಬಾಸೆ ಕಲ್ಪಾವುನ ಕಜ್ಜಕೊಟ್ಯ

ಪಂಚ ದ್ರಾವಿಡ ಭಾಷೆಲೆಡ್ ಒಂಜಾಯಿನ ತುಳು ಭಾಷೆನ್ ಇನಿತ ದಿನೊಟು ನಿತ್ಯೊದ ಬದುಕ್ ಡ್ ಬೊಕ್ಕ ವ್ಯವಹಾರಲೆಡ್ ಬಾರಿ ಬುಲೆಚ್ಚಿಲ್ನ್ ತೂವೊಂದುಲ್ಲ. ಕರ್ನಾಟಕ ರಡ್ಡನೇ ಅಧಿಕೃತ ತಾನಮಾನದ ಬಾಕಿಲ್ಡ್ ತುಳು ಬಾಸೆ ಕಾತೊಂದುಂಡು. ಸರಕಾರದ ಆದೇಶೊಗು ಸರ್ವ ತುಳುವೆರ್ ಕಾತೊಂದುಲ್ಲೆರ್.

ಕರ್ನಾಟಕ ಬೊಕ್ಕ ಕೇರಳ ರಾಜ್ಯದ ಅಧಿಕೃತ ಭಾಷಾ ತಾನಮಾನ ಬೊಕ್ಕ ಸಂವಿಧಾನದ ಎಡ್ಮನೇ ಪರಿಚ್ಛೇದದ ಮಾನ್ಯತೆ ತಿಕ್ಕೊಡು ಪನ್ಪುನವು ತುಳುವೆರೆನ ಸುಮಾರ್ ವರ್ಷೊಲೆನ ಕನವಾದೆ ಒರಿದ್ಂಡ್. ಅಂಚೆನೆ ತುಳುಕ್ ಯುನಿಕೋಡ್ ತಿಕ್ಕೊಡು, ಶೈಕ್ಷಣಿಕವಾದ್ ಅವಕಾಶ ಒದಗೊಡು ಪನ್ಪುನ ಒತ್ತಾಯ ಕೂಡ ತುಳುವೆರೆನ ಆದುಂಡು. ಸುಮಾರ್ ತುಳು ಸಂಘಟನೆಲು ಅಕಲ್ನನವೇ ರೀತಿಡ್ ಪೊರ್ಂಬಾಟಲೆನ್ ಮಲ್ತೊಂದುಲ್ಲೆರ್. ರಡ್ಡ್ ಸರಕಾರಲ ಈ ದಿಟ್ಟಿಡ್ ಕಣ್ಣ್ ಬುಲವೊಡಾತ್ಂಡ್.

ತುಳು ಭಾಷೆದ ಬಗ್ಗೆ ಸುಮಾರ್ ಪೊರ್ಂರ್ಬಾಟೊನು ಮಲ್ತೊಂದುಪ್ಪುನ, ಜೈ ತುಳುನಾಡ್(ರಿ) ಸಂಘಟನೆ ನಿರಂತರ ಪೊರ್ಂಬಾಟ, ಜನ ಜಾಗೃತಿಲೆನ್ ಮಲ್ತೊಂದು ತುಲು ಲಿಪಿ ಕಲ್ಪಾವುನ ಕಜ್ಜಕೊಟ್ಯ, ತುಳು ಲಿಪಿ ಪುದರ್ ಪಲವೆ ಪಟ್ಟುನು, ತುಳು ಡಿಕ್ಸನರಿ, ತುಳು ಫಾಂಟ್, ತುಳು ಲಿಪಿ ಲಿಪ್ಯಾಂತರ ತಂತ್ರಾಂಶ, ತುಳು ಲಿಪಿಟ್ಟೇ ಮಸ್ತರೆ ಬುಡುಗಡೆ, ಇಂಚ ಸುಮಾರ್ ತುಳು ಪರ ಕೆಲಸೊಲೆನ್ ಮಲ್ತೊಂದುಂಡು.

ತುಳು ಭಾಷೆನ್ ನನಲಾತ್ ಬುಲೆಪಾವುನ ದಿಟ್ಟಿದೊಟ್ಟುಗು, ಸಂಘಟನೆ “ತುಳು ಭಾಷಾ ಕಲ್ಪಾದಿ ಸಮಿತಿ”ನ್ ಕಟ್ಟೊಂದು, ತುಳು ಭಾಷೆನ್ ಕಲ್ಪಾವುನ ಪ್ರಯತ್ನೊನು ಮಲ್ಪೆರೆ ತಯಾರಾತ್ಂಡ್. ಕಡೀರಾದ್ ಕನ್ನಡ ಬೊಕ್ಕ ಇಂಗ್ಲಿಷ್ ತೆರಿನಕಲೆಗ್ ತುಳು ಭಾಷೆನ್ ಕಲ್ಪಾವುನ ದಿಟ್ಟಿಡ್ ತರಗತಿಲು ಉಂದುವೇ ಮಾರ್ಚ್ ತಿಂಗೊಲ್ದ ಒಂಜಿನೇ ತಾರೀಕ್ ರ್ದ್ ಸುರುವಾಯೆರೆ ಉಂಡು. ಈ ಕ್ಲಾಸ್ ಆನ್ಲೈನ್ ಗೂಗಲ್ ಮೀಟ್ ಮುಕೇನ ನಡಪುಂಡು. ಉಮೇದ್ ಇತ್ತಿನಕುಲು QR code ಗಲಸದ್ ಅಕಲೆನ ಪುದರ್ ನ್ ತೆರಿಪಾವೊಲಿ. ದುಂಬುದ ದಿನೊಟು ಹಿಂದಿ ಭಾಷೆಡ್ಲ ಈ ಕಜ್ಜಕೊಟ್ಯನ್ ನಡಪಾವುನ ಯೋಚನೆಡ್ ಉಲ್ಲ ಪಂದ್ ಸಂಘಟನೆದ ಬೆಂಗಳೂರು ವಿಭಾಗದ ಗುರ್ಕಾರ್ಲಾಯಿನ ವಿಶಾಲ್ ಕೊಡಿಯಾಲ್ ತೆರಿಪಾದೆರ್.

ಏರ್ ಬೋಡಾಂಡಲ ತುಳು ಕಲ್ಪೊಲಿ

ತುಳುನಾಡ್ ದ ಸುಮಾರ್ ಜನ ಬೆಂಗಳೂರು, ಬೊಂಬೈ ಅಂಚೆನೆ ಪಿದಯಿ ದೇಸೊಡು ಬೇಲೆ ನಾಡೊಂದು ಪೋದು ಅಲ್ಪನೇ ನೆಲೆ ಊರುದೆರ್. ಅಪ್ಪೆ ಅಮ್ಮಗ್ ತುಳು ಬತ್ತ್ಂಡ ಲ, ಜೋಕುಲೆಗ್ ತುಳು ಪಾತೆರ್ಯೆರೆ ಬರಂದಿನ ಸಾಧ್ಯತೆಲೆನ್ ಎಂಕುಲು ತೆರಿಯೊಂದು ಈ ಒಂಜಿ ಕಜ್ಜಕೊಟ್ಯದ ಬಗೆಟ್ಟ್ ಯೋಚನೆ ಮಲ್ತ್ ದ. ತುಳುವೆರ್ ಮಾತ್ರ ಅತ್ತ್ ತುಳು ಭಾಷೆನ್ ಪಾತೆರಿಯರೆ ಉಮೇದ್ ಇತ್ತಿನ ಏರ್ ಬೋಡಾಂಡಲ ಪುದರ್ ತೆರಿಪಾವೊಲಿ
– ಅನುಷಾ ಸಾಲ್ಯಾನ್
ನಿದಯೆಂತೆರ್,ಜೈ ತುಳುನಾಡ್(ರಿ).
ತುಳು ಭಾಷಾ ಕಲ್ಪಾದಿ ಸಮಿತಿ

ಪರಭಾಷೆದಕ್ಲೆಗ್ ಲ ತುಳು ಕಲ್ಪರೆ ಉಮೇದ್

ತುಳು ಭಾಷೆನ್ ಸುಲಭವಾದ್ ಪಾತೆರ್ರೆ ಕಲ್ಪೊಲಿ. ಪರ ಭಾಷೆದ ಸುಮಾರ್ ಜನ ಎಂಕುಲೆಡ ತುಳು ಭಾಷೆನ್ ಕಲ್ಪಾಯೆರೆ ಕೇನೊಂದಿತ್ತೆರ್. ಸದ್ಯೊಗು ಕನ್ನಡ, ಇಂಗ್ಲಿಷ್ ಡ್ ಕಜ್ಜಕೊಟ್ಯನ್ ಸುರುಮಲ್ತೊಂದುಲ್ಲ. ಬಾರಿ ಎಡ್ಡೆ ಉಮೇದು ಎಂಕಲೆಗ್ ತಿಕ್ಕೊಂದುಂಡು. ಭಾಷೆದ ಬಗ್ಗೆ ತೆರಿಯೊನೆರೆ ಉಂದು ಎಡ್ಡೆ ಅವಕಾಶ ಆದುಂಡು ಮಾತೆರೆಗ್ಲ. ತುಳು ಭಾಷೆದ ಒರಿಪುಗು ಸರ್ವ ಪ್ರಯತ್ನನ್ ಜೈ ತುಳುನಾಡ್ ಸಂಘಟನೆ ಬರೊಂದುಂಡು.
—ಜಯಪ್ರಸಾದ್ ತುಳುನಾಡ್
ನಿದಯಂತೆರ್,
ಜೈ ತುಳುನಾಡ್(ರಿ)
ತುಳು ಭಾಷಾ ಕಲ್ಪಾದಿ ಸಮಿತಿ

Request to include Mulki development Schemes in the election Manifesto ಪಕ್ಷದ ಪ್ರಣಾಳಿಕೆಡ್ ಮುಲ್ಕಿ ಅಭಿವೃದ್ಧಿ ಯೋಜನೆನ್ ಸೇರ್ಸಾವರೆ ಬಿನ್ನಾಪು

ಮುಲ್ಕಿ : ನನ ಬರ್ಪಿನ ವಿಧಾನಸಭೆತ್ತ ವೋಟುಡು ನಿಕಲೆನ ಪಕ್ಷದ ಪ್ರಣಾಳಿಕೆಡ್ ಮುಲ್ಕಿ ತಾಲೂಕ್ ಡ್ ಅವೊಡಾಯಿನ ಕೆಲವೊಂಜಿ ಅಭಿವೃದ್ಧಿ ಯೋಜನೆಲೆನ್ ಸೇರ್ಸಾವೊಡು ಪಂದ್ ಸಮಾಜಸೇವಕೆರ್, ಉದ್ಯಮಿ ಜೀವನ್ ಕೆ. ಶೆಟ್ಟಿ ಮೇರ್ ಮುಲ್ಕಿ ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್, ಮಾಜಿ ಶಾಸಕೆರ್ ಕೆ. ಅಭಯಚಂದ್ರ ಜೈನ್, ಯುವ ನಾಯಕೆರ್ ಮಿಥುನ್ ರೈ, ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ, ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ, ಹೆಚ್ ಡಿ ಕೆ ಕುಮಾರಸ್ವಾಮಿ, ಜೆಡಿಎಸ್ ಮುಖಂಡೆರ್ ಆಮರಶ್ರೀ ಶೆಟ್ಟಿ, ಬಿಜೆಪಿ ರಾಜಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್, ಕೆಪಿಸಿಸಿ ರಾಜ್ಯಾಧ್ಯಕ್ಷೆರ್ ಡಿ.ಕೆ ಶಿವಕುಮಾರ್ ಮೆರೆಗ್ ಪ್ರಣಾಳಿಕೆಡ್ ಬಿನ್ನಾಪು ಮಲ್ತೆರ್.

*ಪ್ರಣಾಳಿಕೆಡ್ ಸೇರ್ಸಾವೊಡಾಯಿನ ಯೋಜನೆ :
ಕೃಷಿ ಸಿರಿ 2022- ಕೊಲ್ನಾಡ್ ಡ್ ನಡತಿನ ರಾಜ್ಯಮಟ್ಟದ ಕೃಷಿ ಮೇಳಡ್ ಠರಾವು ಮಂಡನೆ ಮಲ್ತಿನ ಪ್ರಕಾರ ಮುಲ್ಕಿಡ್ ಕೃಷಿ ವಿಶ್ವವಿದ್ಯಾನಿಲಯ ಸ್ಥಾಪನೆ ಮಲ್ಪೊಡು.
ಮುಲ್ಕಿ ಗಿಡಮೂಲಿಕೆಡ್ ಪುದರ್ ಪಡೆಯಿರ್ನೆದಾವೆರ ಆಯುರ್ವೇದ ಮೆಡಿಕಲ್ ಕಾಲೇಜ್ ಸ್ಥಾಪನೆ ಮಲ್ಪೊಡು.
*ಟೂರಿಸಂ ಕಾರಿಡಾರ್: ಸಸಿಹಿತ್ಲು ಬೀಚ್, ಭಗವತೀ ಕ್ಷೇತ್ರ, ಉಮಾಮಹೇಶ್ವರಿ ದೇವಲ್ಯ, ಚಿತ್ರಾಪು, ಕಲ್ಲ ಸಂಕ, ಪಡುಬೈಲ್ ಕೋರ್ದಬ್ಬು ದೈವೊಲ್ಯ, ಕೊಳಚಿಕಂಬುಲ ಮಂತ್ರ ಸರ್ಫಿಂಗ್ ಬೊಕ್ಕ ಬಪ್ಪನಾಡ್ ದೇವಲ್ಯ ಮುಟ್ಟ ಒಂಜಿ ಟೂರಿಸಂ ಕಾರಿಡಾರ್ ನ್ ಅಭಿವೃದ್ಧಿ ಮಲ್ಪೊಡು.
*ಜಗತ್ತ್ ಡೇ ಪುಗರ್ತೆದ ಪಿರಾಕ್ ದ ದೇವಲ್ಯ ಬೊಕ್ಕ ಬಸದಿಲೆನ್ ಆಧುನಿಕ ಸೌಕರ್ಯದೊಟ್ಟಿಗೆ ಅಭಿವೃದ್ಧಿ ಮಲ್ಪೊಡು.
*ಮಿತ್ತ್ ದ ಈ ನಾಲ್ ಇಸಯಲೆನ್ ಒಟ್ಟು ಮಲ್ತ್ಂಡ Agro tourism, Medical tourism, Temple tourism ಪೂರ ಒಂಜೇ ಕಡೆಟ್ ಆಪುಲೆಕ್ಕ ಮಲ್ಪೊಡು.
*ಇಂಚಿಪ್ಪ ಸುದ್ಧಿ ಮಲ್ತಿನ ಟಾಟಾ ಕನ್ಸಲ್ಟೆನ್ಸಿ ಮೆರೆನ ಐಟಿ ಪಾರ್ಕ್ ಅನುಷ್ಠಾನ ಮಲ್ತ್ ದ್, ತಾಲೂಕ್ ಡ್ ಬೇಲೆ ತಿಕ್ಕುಂಡು.
*ಸರಕಾರಿ ಪಾಲಿಟೆಕ್ನಿಕ್ ಸ್ಥಾಪನೆ ಮಲ್ಪೊಡು ಇಂಚಿನ ಬೇಡಿಕೆಲೆನ್ ಆರ್ ಎದುರು ದೀತೆರ್.

Request to include Mulki development Schemes in the election Manifesto

Mulki: In the forthcoming Vidhana Sabha elections enterpreneur and social worker Jeevan K Shetty has requested that certain development schemes of Mulki taluk be included in the election manifesto.

March 13 th – 14 th: Shri Mayandal Sannidhi, Karkala – Nema and Agal seva rituals ಮಾ‌.13-14: ಕಾರ್ಲದ ನಕ್ರೆ ಪೆತ್ತಾಜೆದ ಶ್ರೀ ಮಾಯಂದಾಲ್ ಸನ್ನಿಧಿಡ್ ಕಾಲಾಧಿದ ನೇಮ, ಅಗೆಲ್ ಸೇವೆ

ಕಾರ್ಲದ ನಕ್ರೆ ಪೆತ್ತಾಜೆದ ಶ್ರೀ ಮಾಯದ ಮಾಣಿಬಾಲೆ ಮಾಯಂದಾಲ್ ಸನ್ನಿಧಿಡ್ ಕಾಲಾಧಿದ ನೇಮ ಬೊಕ್ಕ ಅಗೆಲ್ ಸೇವೆ ಮಾ‌.13 ಬೊಕ್ಕ 14ಕ್ ನಡಪರೆ ಉಂಡು.

ಮಾ‌.13 ಸೋಮಾರ ರಾತ್ರೆ ಅಗೆಲ್ ಸೇವೆ ನಡಪರೆ ಉಂಡು. ಮಾ.14 ಅಂಗಾರೆ ಮಧ್ಯಾಹ್ನ ಶ್ರೀ ಮಾಯಂದಾಲ್ ನೇಮ ಬೊಕ್ಕ ಅನ್ನಸಂತರ್ಪಣೆ ನಡಪರೆ ಉಂಡು. ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಗಂಧ ಪ್ರಸಾದ ದೆತೊಂದು ಶ್ರೀ ಮಾಯಂದಾದಲೆ ದೈವದ ಕೃಪೆಗ್ ಪಾತ್ರರಾವೊಡು ಪೆತ್ತಾಜೆ ಬರ್ಕೆ ಕುಟುಂಬಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್. ಅಂಚೆನೆ ಉಂದು ಸ್ತ್ರೀ ವರಪ್ರದಾನ ಜಾಗೆ ಆಯಿನೆರ್ದಾದವರ ಎಚ್ಚದ ಸಂಖ್ಯೆಡ್ ಪೊಂಜೋವ್ ನಕುಲು ಬತ್ತ್ ದ್ ಪರಕೆ ಸಂದಾವುನವು ಮುಲ್ಪದ ಇಸೇಸ. ಇಡೆಗ್ ಬರ್ಪುನ ಭಕ್ತೆರೆಗ್ ಪೆತ್ತಾಜೆ ಪರಿವಾರರ್ದ್ ಮಧ್ಯಾಹ್ನ ಅನ್ನಸಂತರ್ಪಣೆ ಉಂಡು. ಅಂಚನೆ ಪರಕೆ ರೂಪಡ್ ಪಟ್ಟೆ ಸೀರೆ ಕೊರ್ಪುನಕುಲು ಜಾಗೆಡೇ ದೆತೊಂದು ಕೊರೊಲಿ ಪಂದ್ ಪಂತೆರ್. ಅಂಚನೆ ಎಚ್ಚದ ಪೊಲಬುಗಾದ್ ಡಾ. ಹರೀಶ್ ಪೂಜಾರಿ ಮೆರೆನ್ ಸಂರ್ಪಕ ಮಲ್ಪೊಲಿ ಪಂದ್ ತೆರಿಪಾದೆರ್.

Invitation release of Attur Shri Arasu Kunjiraya Daiva Kalashabisheka and annual Jatra ಅತ್ತೂರು ಶ್ರೀ ಅರಸು ಕುಂಜಿರಾಯ ದೈವೊಲ್ಯದ ಕಲಶಾಭಿಷೇಕ ಬೊಕ್ಕ ಜಾತ್ರೆದ ಲೆಪ್ಪೋಲೆ ಬುಡುಗಡೆ

ಕಿನ್ನಿಗೋಳಿ : ದೈವ ದೇವಲ್ಯದ ಅಭಿವೃದ್ದಿರ್ದ್ ಜೀವನಡ್ ಶಾಂತಿ ಸುಖ ನೆಮ್ಮದಿ ಸಾಧ್ಯ ಪಂದ್ ಕಟೀಲ್ ದೇವಲ್ಯದ ಪ್ರಧಾನ ಅರ್ಚಕೆರ್ ಲಕ್ಷ್ಮೀನಾರಾಯಣ ಅಸ್ರಣ್ಣೆರ್ ಪಂಡೆರ್.

ಮೇರ್ ಫೆ.26 ಕ್ ಕಿನ್ನಿಗೋಳಿ ಕೈತಲ್ ದ ಅತ್ತೂರು ಶ್ರೀ ಅರಸು ಕುಂಜಿರಾಯ ದೈವೊಲ್ಯಡ್  ಮಾ.24-31 ಮುಟ್ಟ ನಡಪುನ ಕಲಶಾಭಿಷೇಕ ಬೊಕ್ಕ ಜಾತ್ರೆ ಉಚ್ಚಯದ ಲೆಪ್ಪೋಲೆನ್ ಬುಡುಗಡೆ ಮಲ್ತ್ ದ್ ಪಾತೆರಿಯೆರ್.

ಗ್ರಾಮಡ್ ದೈವೊಲ್ಯದ ಅಭಿವೃದ್ಧಿರ್ದ್ ಗ್ರಾಮದ ಅಭಿವೃದ್ಧಿ ಸಾಧ್ಯ ಉಂಡು. ಮುಲ್ಪದ ಕಾರಣಿಕ ಶಕ್ತಿಲೆನ ಅನುಗ್ರಹೊಡು ಭಕ್ತೆರೆನ, ದಾನಿಲೆನ ಸಕಾಯಡ್ ಜೀರ್ಣೋದ್ಧಾರ ಕಜ್ಜೋ ನಡತೊಂದು ಉಂಡು. ಗ್ರಾಮೀಣ ಪ್ರದೇಶದ ಈ ದೈವೊಲ್ಯ ನನಾತ್ ಬೆಳಗೊಡು ಪಂದ್ ಪಂಡೆರ್.

ಕುಂಜಿರಾಯ ದೈವೊಲ್ಯದ ಆಡಳಿತ ಮಂಡಳಿದ ಟ್ರಸ್ಟ್ ಅಧ್ಯಕ್ಷೆರ್ ರಾಜೇಂದ್ರ ಕೆ. ಶೆಟ್ಟಿ ಕುಡ್ತಿಮಾರುಗುತ್ತು ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್. ಈ ಪೊರ್ತುಡು ಅತ್ತೂರ್ ಬೈಲ್ ವೆಂಕಟರಾಜ ಉಡುಪೆರ್, ಯುಗಪುರುಷದ ಭುವನಾಭಿರಾಮ ಉಡುಪೆರ್, ಆಡಳಿತ ಮಂಡಳಿ ಅಧ್ಯಕ್ಷೆರ್ ಚರಣ್ ಶೆಟ್ಟಿ ಕೊಜಪಾಡಿ ಬಾಳಿಕೆ, ಸುರಗಿರಿ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಕೆ. ಸೀತಾರಾಮ ಶೆಟ್ಟಿ, ಧನಂಜಯ ಶೆಟ್ಟಿಗಾರ್ ಸಾಗರಿಕಾ, ಶಂಭು ಮುಕ್ಕಾಲ್ದಿ ಭಂಡಾರ ಮನೆ, ಸುಧಾಕರ ಗುತ್ತಿನಾರ್ ಮೂಡ್ರಗುತ್ತು, ಪ್ರಸನ್ನ ಶೆಟ್ಟಿ ಅತ್ತೂರು ಗುತ್ತು, ಮಹಾಬಲ ಶೆಟ್ಟಿ ಪಡುಮನೆ, ಗಿರೀಶ್ ಶೆಟ್ಟಿ ಕುಡ್ತಿಮಾರುಗುತ್ತು, ಬೇಬಿ ಸುಂದರ್ ಕೋಟ್ಯಾನ್, ಲೀಲಾ ಸುವರ್ಣ, ಜಯಂತಿ ಶೆಟ್ಟಿ, ಲಕ್ಷೀ ಭಂಡಾರಿ, ಶಾಮಲಾ ಆಚಾರ್ಯ, ಸುರಗಿರಿ ಯುವಕ ಮಂಡಲದ ಅಧ್ಯಕ್ಷೆರ್ ಅಜೇಯ್ ಶೆಟ್ಟಿ, ವಿಜಯ ಕೋಟ್ಯಾನ್, ಜಗನ್ನಾಥ ಶೆಟ್ಟಿ ಮಮ್ಮೆಟ್ಟು, ಶಂಭು ಶೆಟ್ಟಿ ಮೂಡ್ರಗುತ್ತು, ಗಂಗಾಧರ ಶೆಟ್ಟಿ ಮೂಡ್ರಗುತ್ತು, ಸತೀಶ್ ಶೆಟ್ಟಿ ಮೂಡ್ರಗುತ್ತು, ಶಶಿಧರ ಶೆಟ್ಟಿ ಕಿಲೆಂಜೂರು, ರಾಜೇಶ್ ಶೆಟ್ಟಿ ಕೊಡೆತ್ತೂರು, ರಂಜನ್ ಶೆಟ್ಟಿ ಕೊಜಪಾಡಿ, ಸಂದೀಪ್ ಶೆಟ್ಟಿ, ದುರ್ಗಾಪ್ರಸಾದ್ ಭಂಡಾರಮನೆ, ತಿಮ್ಮಪ್ಪ ಶೆಟ್ಟಿ ಅತ್ತೂರಗುತ್ತು, ಕೃಷ್ಣರಾಜ ಭಟ್, ಸುರೇಶ್ ರಾಜ್ ಭಟ್, ಅಮರ್ ಶೆಟ್ಟಿ, ಹರಿಶ್ಚಂದ್ರ ಶೆಟ್ಟಿ ಪಡುಬಾಳಿಕೆ, ಅಮರ್ ಶೆಟ್ಟಿ ಹೊಸಲೊಟ್ಟು, ಸುಖಿರಾಜ್ ಶೆಟ್ಟಿ ಕುಡ್ತಿಮಾರಗುತ್ತು, ಜಗ್ಗು ಶೆಟ್ಟಿ ಪಡುಮನೆ, ಬಾಬು ಶೆಟ್ಟಿ ಭಂಡಾರ ಮನೆ, ಕಟೀಲ್ ಕಾಲೇಜ್ ಉಪಾನ್ಯಾಸಕೆರ್ ಗಣಪತಿ ಭಟ್, ಪರಮೇಶ್ವರ್, ಗುತ್ತಿಗೆದಾರೆ ಉಮೇಶ್ ಕಾಮತ್ ಇತ್ತೆರ್. ಕಿರಣ್ ಶೆಟ್ಟಿ ಭಂಡಾರಮನೆ ಸೊಲ್ಮೆ ಸಂದಾಯೆರ್.

ಹಳೆಯಂಗಡಿ ಪಂಚಾಯತ್ ವ್ಯಾಪ್ತಿದ ಕಾಂಗ್ರೆಸ್ ಪ್ರಜಾಪ್ರತಿನಿಧಿ ಸಮಿತಿದ ಅಧ್ಯಕ್ಷೆರಾದ್ ಅನಿಲ್ ಪೂಜಾರಿ ಸಸಿಹಿತ್ಲು ನೇಮಕ

ಹಳೆಯಂಗಡಿ ಗ್ರಾಮ ಪಂಚಾಯತ್ ವ್ಯಾಪ್ತಿಗ್ ಬರ್ಪಿನ ಹಳೆಯಂಗಡಿ , ಪಾವಂಜೆ, ಸಸಿಹಿತ್ಲು ಗ್ರಾಮದ ಕಾಂಗ್ರೆಸ್ ಪ್ರಜಾಪ್ರತಿನಿಧಿ ಸಮಿತಿದ ಅಧ್ಯಕ್ಷೆರಾದ್ ಬಿಲ್ಲವ ಸಮಾಜದ ಯುವ ನಾಯಕೆ, ಸಸಿಹಿತ್ಲು ಶ್ರೀ ಸಾರಂತಾಯ ಗರೊಡಿ ಸಮಿತಿದ ಉಪಾಧ್ಯಕ್ಷೆರ್, ಹಳೆಯಂಗಡಿ ಪಂಚಾಯತ್ ಸದಸ್ಯೆರ್ ಅನಿಲ್ ಪೂಜಾರಿ ಸಸಿಹಿತ್ಲು ಮೇರ್ ನೇಮಕ ಆತೆರ್.

ಮಾಜಿ ಸಚಿವೆರಾಯಿನ ಕೆ. ಅಭಯಚಂದ್ರ ಜೈನ್, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ ಮೆರೆನ ನಿರ್ದೇಶನ ಪ್ರಕಾರ, ಕೆಪಿಸಿಸಿ ಕೋ ಆರ್ಡಿನೇಟರ್ ವಸಂತ ಬರ್ನಾಡ್ ಮೆರೆನ ಶಿಫಾರಸ್ ದಂಚ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್ ಮೇರ್ ಅನಿಲ್ ಪೂಜಾರಿ ಮೆರೆನ್ ಆಯ್ಕೆ ಮಲ್ತ್ ದ್ ಆದೇಶ ಕೊರ್ತೆರ್.

Tulunadu Porlu Charitable Trust (R); Mijar – 25,000 rupees aid rendered ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ವತಿರ್ದ್ 25 ಸಾರ ರೂ. ಪಣವುದ ಸಕಾಯ

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ನೆತ್ತ ವತಿರ್ದ್ ಬಂಟ್ವಾಳ ತಾಲೂಕ್ ದ ಕೆದ್ದಳಿಕೆ ನಿವಾಸಿ ಗೋಪಾಲ ಮೆರೆಗ್ 25 ಸಾರ ರೂ. ದ ಪಣವುದ ಸಕಾಯನ್ ಮಲ್ತೆರ್.

ಗೋಪಾಲ ಮೇರ್ ರಡ್ಡ್ ತಿಂಗೊಲೊರ್ದಿಂಚಿ ಹೃದಯ ಬೊಕ್ಕ ಕಿಡ್ನಿ ಸಮಸ್ಯೆಡ್ ಉಲ್ಲೆರ್. ಮೆರೆಗ್ ರಡ್ಡ್ ಸಲ ಹಾರ್ಟ್ ಅಟ್ಯಾಕ್ ಆತ್ಂಡ್ ಪಂದ್ ವೈದ್ಯೆರ್ ತೆರಿಪಾದೆರ್. ಇತ್ತೆನೇ ಮಸ್ತ್ ಖರ್ಚಾತ್ಂಡ್, ಉಜಿರೆದ ಎಸ್ ಡಿ ಎಂ ಆಸ್ಪತ್ರೆಡ್ ಡಯಾಲಿಸಿಸ್ ನಡತೊಂದು ಉಂಡು. ನನದ ಒಂಜಿ ಶಸ್ತ್ರ ಚಿಕಿತ್ಸೆಗ್ 20 ಸಾರ ಅಗತ್ಯ ಉಂಡು. ಸಂಘ ಸಂಸ್ಥೆಡ್ಲಾ ಸಾಲ ಬಾಕಿ ಉಂಡು. ಬೆನಿಯೆರೆ ಅವಂದೆ ನನದ ಚಿಕಿತ್ಸೆಗ್ ಕಾಸ್ ಮಲ್ಪೆರೆ ಸಾಧ್ಯ ಇಜ್ಜಿ. ಮೆರೆನ ಚಿಕಿತ್ಸೆಗ್ 5 ಲಕ್ಷ ಮುಟ್ಟ ಕಾಸ್ ದ ಅವಶ್ಯಕತೆ ಉಂಡು. ಅಂಚಾದ್ ಮೆರೆನ ಬಿನ್ನಾಪುಗ್ ಸ್ಪಂದಿಸಾದ್ ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ಕೂಟರ್ದ್ 25 ಸಾರ ರೂ. ದ ಚೆಕ್ಕ್ ನ್ ಚಂದ್ರಶೇಖರ್ ಪೂಜಾರಿ ಸರಪಾಡಿ ಮೆರೆನ ಕೈರ್ದ್ ಕೊರಿಯೆರ್. ಈ ಪೊರ್ತುಡು ಕೂಟದ ಪದಾಧಿಕಾರಿಲು ಬೊಕ್ಕ ತುಡರ್ ಸೇವಾ ಟ್ರಸ್ಟ್ ದ ಸದಸ್ಯೆರ್ ಇತ್ತೆರ್.

A Techie who quit his IT job and is into organic farming – Nischal J Shetty ಐಟಿ ಕಂಪೆನಿದ ಬೇಲೆ ಬುಡ್ದು ಸಾವಯವ ಕೃಷಿಟ್ಟ್ ಸಾಧನೆ ಮಲ್ತಿನ ನಿಶ್ಚಲ್ ಜಿ. ಶೆಟ್ಟಿ

ಸಾವಯವ ಕೃಷಿತ್ತ ಕನ ದೀವೊಂದು ತನ್ನ ಐಟಿ ಕಂಪೆನಿದ ಬೇಲೆ ಬುಡ್ದ್ ಊರುಡ್ ಸಾವಯವ ಕೃಷಿ ಬೊಕ್ಕ ಹೈನುಗಾರಿಕೆದ ಬೇಲೆ ಮಲ್ತೊಂದು ಇಪ್ಪುನ ಉಳ್ಳಾಲ ತಾಲೂಕ್ ದ ಇರಾ ಗ್ರಾಮದ ಪುಗರ್ತೆದ ಕಲ್ಲಾಡಿ ಬಂಟ ಮನೆತನದ ಒರಿ ಕೃಷಿ ಸಾಧಕೆ 50 ವರ್ಷದ ನಿಶ್ಚಲ್ ಜಿ. ಶೆಟ್ಟಿ.

ಕಂಪ್ಯೂಟರ್ ಸೈನ್ಸ್ ಡಿಪ್ಲೊಮಾ ಮಲ್ತ್ ದ್ ಐಟಿ ಕಂಪೆನಿಡ್ ಬೆನೊಂದು ಇತ್ತಿನ ಮೇರ್ ವಿದೇಶಡ್ ಬೆನ್ಪುನ ತನ್ನ ಅವಕಾಶನ್ ತನ್ನ ಸಹೋದ್ಯೋಗಿಗ್ ಕೊರ್ದು, ತನ್ನ ಪೆರಿಯೆರ್ನ, ಕೃಷಿಕೆರ್ನ ಒಡನಾಟೊರ್ದು ಹೈನುಗಾರಿಕೆ ಬೊಕ್ಕ ಸಾವಯವ ಕೃಷಿಟ್ಟ್ ಯಶಸ್ಸ್ ಪಡೆಯೆರ್.

ಪೆರಿಯೆರೆರ್ದ್ ಉಂಬೊ ಲಿಯಾದ್ ಬತ್ತಿನ ಜಾಗೆಡ್ ಪೆತ್ತ ಕಂಜಿ ತಾಂಕುನೆತ್ತ ಒಟ್ಟಿಗೆ ಬಜ್ಜೆಯಿ, ತಾರಾಯಿ, ಕೊಕ್ಕೊ, ಎಡ್ಡೆಮುಂಚಿ ಕೃಷಿ ಮಲ್ತ್ ದ್ ತನ್ನ ಸಾವಯವ ಕೃಷಿ ತ್ತ ಕನತೊಟ್ಟಿಗೆ ಸುಮಾರ್ ರೈತೆರೆಗ್ ಮಾರ್ಗದರ್ಶಕೆರಾದ್, ಧರ್ಮಾರ್ಥ ತರಬೇತಿ ಕೊರ್ದು ಅಕುಲು ತನ್ನಲೆಕ್ಕನೇ ಸಾವಯವ ಕೃಷಿ ಮಲ್ಪುಲೆಕ್ಕ ಮಲ್ತಿನ ಮೆರೆನ ಸಾಧನೆ ಮೆಚ್ಚೊಡಾಯಿನವು.‌

ಮೆರೆಗ್ ದಕ್ಷಿಣ ಕನ್ನಡ ಹಾಲು ಉತ್ಪಾದಕರ ಒಕ್ಕೂಟ ಕುಡ್ಲ ಮೊಕ್ಲೆರ್ದ್ ಕೃಷಿ ಸಾಧನೆಗ್ ಸಮಗ್ರ ಪ್ರಶಸ್ತಿ, ಶಿಶಿಲ ಹಾಲು ಉತ್ಪಾದಕರ ಸಹಕಾರಿ ಸಂಘರ್ದ್ ಶ್ರೇಷ್ಠ ಕೃಷಿಕೆ ಪ್ರಶಸ್ತಿ, ಕರ್ನಾಟಕ ರಾಜ್ಯ ಬರವುಗಾರೆರೆನ ಸಂಘರ್ದ್ ಅನ್ನದಾತ-2021 ಪ್ರಶಸ್ತಿ, ಕೃಷಿ ಇಲಾಖೆ ದಕ್ಷಿಣ ಕನ್ನಡ ಜಿಲ್ಲೆ ಮೊಕ್ಲೆರ್ದ್ ಶ್ರೇಷ್ಠ ಕೃಷಿಕ ಪ್ರಶಸ್ತಿ, ವಿಜಯ ಕರ್ನಾಟಕರ್ದ್ 2 ನೇ ಸರ್ತಿ ಸೂಪರ್ ಸ್ಟಾರ್ ರೈತ ಪ್ರಶಸ್ತಿ ಈ ಪ್ರಶಸ್ತಿಲು ಮೆರೆನ ಸಾಧನೆಗ್ ಸಾಕ್ಷಿ ಆತ್ಂಡ್.