ಬಿರುವೆರ್ ಕುಡ್ಲ (ರಿ) ಮುಲ್ಕಿ ಎಗ್ಗೆದ 5 ನೇ ವರ್ಷದ ದೋಸ್ತಿ ಕೂಟ
ಮುಲ್ಕಿ : ನಮ ದೇವೆರೆಗ್ ಬೇತೆ ಬೇತೆ ಪೂಜೆ ಪರಕೆ ಕೊರ್ಪಿನೆರ್ದ್ ಲ ಸಮಾಜಸೇವೆ ಮಲ್ಪುನೆಟ್ಟ್ ಮಸ್ತ್ ಕುಷಿ ತಿಕ್ಕುಂಡು. ಸಮಾಜಸೇವೆ ಮಲ್ಪುನು ಪಂಡ ದೇವೆರ್ನ ಕೆಲಸ ಮಲ್ತಿಲೆಕ.ಅಯಿಕ್ ದೈವ ದೇವೆರ್ನ ಅನುಗ್ರಹ ಉಂಡು. ಅಂಚಾದ್ ನಮ ಮಾತೆರ್ಲ ಒಟ್ಟು ಸೇರ್ದ್ ಬಿರುವೆರ್ ಕುಡ್ಲ ಸಂಘಟನೆದ ಸಮಾಜಸೇವೆದ ಬೇಲೆನ್ ಮಲ್ಪುಗ ಪಂದ್ ಬಿರುವೆರ್ ಕುಡ್ಲ (ರಿ) ಮುಲ್ಕಿ ಘಟಕದ ಅಧ್ಯಕ್ಷೆರ್ ಕಿಶೋರ್ ಜೆ. ಸಾಲ್ಯಾನ್ ಪಂಡೆರ್.
ಆರ್ ಕೊಳಚಿಕಂಬಳ ಬಪ್ಪತೋಟದ ಮೆರೈನ್ ವ್ಯೂತ್ತ ಜಾಲ್ ಡ್ ಫೆ.26 ಐತಾರ ಬಯ್ಯಡ್ ನಡತಿನ ಬಿರುವೆರ್ ಕುಡ್ಲ (ರಿ) ಮುಲ್ಕಿ ಎಗ್ಗೆದ 5 ನೇ ವರ್ಷದ ಸ್ನೇಹ ಮಿಲನ ಕಾರ್ಯಕ್ರಮೊಡು ಪಾಲ್ ಪಡೆದ್ ಪಾತೆರಿಯೆರ್.
ಈ ಪೊರ್ತುಡು ಬಿರುವೆರ್ ಕುಡ್ಲ ಮುಲ್ಕಿ ಘಟಕದ ಗುರ್ಕಾರೆಯಾದ್ ಯಶಸ್ವಿ 6 ನೇ ವರ್ಷೊಗು ಪಜ್ಜೆ ದೀಯಿನ ಕಿಶೋರ್ ಜೆ.ಸಾಲ್ಯಾನ್ ಮೆರೆಗ್ ಮಾನಾದಿಗೆ ನಡತ್ಂಡ್. ಅವೆರ್ದ್ ಬೊಕ್ಕ ಕೆಲವು ಗೊಬ್ಬುದ ಪಂತೊಡ್ ಗೆಂದಿನಕ್ಲೆಗ್ ಇನಾಮು ಪಟ್ಟುನ ಲೇಸ್ ನಡತ್ಂಡ್. ಅಂಚೆನೆ ಸೇವಾ ಯೋಜನೆದ ಲಕ್ಕಿಡಿಪ್ ದ ಡ್ರಾ ಮಲ್ಪುನ ಕಜ್ಜ ನಡತ್ಂಡ್. ಕೆಲವು ಸದಸ್ಯೆರ್ ಅಕ್ಲೆನ ಅಭಿಪ್ರಾಯೊನು ಪಟ್ಟೊಂದು ಸಂಘಟನೆನ್ ಗಟ್ಟಿ ಮಲ್ಪೊಡು ಪಂಡೆರ್.
ಶಾಂಭವಿ ತುದೆ ಬರಿತ್ತ ಪೊರ್ಲು ಪಸಂತ್ರೊಡು ನಡತಿನ ಈ ಲೇಸ್ ದ ಮಿತ್ತರ್ಮೆಡ್ ಕಾರ್ಯದರ್ಶಿ ಗಿರಿಧರ ಅಮೀನ್ ಬೊಕ್ಕ ಕೋಶಾಧಿಕಾರಿ ಅಶೋಕ್ ಸುವರ್ಣ ಇತ್ತೆರ್. ನೆರ್ದ್ ದುಂಬು ಘಟಕದ ಸದಸ್ಯೆರೆಗ್ ಕೆಲವು ಗೊಬ್ಬುದ ಪಂತೊಲೆನ್ ಮೋಹನ್ ಸುವರ್ಣ ಬೊಕ್ಕ ಸತೀಶ್ ಕಿಲ್ಪಾಡಿ ನಡಪಾದ್ ಕೊರಿಯೆರ್.
ಈ ಲೇಸ್ ಡ್ ಉಪಾಧ್ಯಕ್ಷೆರ್ ಉಮೇಶ್ ಮಾನಂಪಾಡಿ, ಕಿಶೋರ್ ಅಂಚನ್, ಕೇಶವ ಸುವರ್ಣ, ದೀಪಕ್ ಪಡುಬೈಲ್, ಶಂಕರ್ ಪಡುಬೈಲು, ಸುರೇಶ್ ಜನನಿ, ಅಶೋಕ್ ಜನನಿ, ನರಸಿಂಹ ಪೂಜಾರಿ, ರಮಾನಾಥ್ ಸುವರ್ಣ, ತಾರಾನಾಥ್, ಮಾಧವ ಕಿಲ್ಪಾಡಿ, ವಿಶ್ವನಾಥ್, ಕಿರಣ್ ಬರ್ಕೆ, ಕಾರ್ತಿಕ್, ಕೀರ್ತನ್ ಮೊಕುಲು ಮಾತಾ ಇತ್ತೆರ್.
ಮೋಹನ್ ಸುವರ್ಣ ಸಭೆ ಸುಧಾರಿಕೆ ಮಲ್ತೆರ್. ಗಿರಿಧರ ಅಮೀನ್ ಸೊಲ್ಮೆ ಸಂದಾಯೆರ್. ಅವೆರ್ದ್ ಬೊಕ್ಕ ವನಸ್ ತೆನಸ್ ದ ವ್ಯವಸ್ಥೆ ಇತ್ತ್ಂಡ್.
pallavi shetty