ದುಬೈ: ಓವರ್ ಸೀಸ್ ಮೂವೀಸ್, ಗಲ್ಫ್ ಮುತಾಲಿಕೆಡ್ ಫೆ.4 ಕ್ ದುಬೈಡ್ ನಡತಿನ ಪಿಲಿ ತುಳು ಪಿಕ್ಚರ್ ದ ಪ್ರೀಮಿಯರ್ ಷೋ ಯುಎಇ ತುಳುವೆರೆನ ಮನಸ್ ಗೆಂದ್ ದ್ಂಡ್.
ಪೇಂಟೆದ ದೇರಾ ಗ್ಯಾಲರಿದ ಹಯಾತ್ ಪಿಕ್ಚರ್ ಟಾಕೀಸ್ ಡ್ ನಡತಿನ ಪ್ರೀಮಿಯರ್ ಷೋ ಟ್ಟ್ ಜನ ಫುಲ್ ಆದಿತ್ತ್ಂಡ್. ಬಿಗ್ ಬಾಸ್ ವಿನ್ನರ್ ರೂಪೇಶ್ ಶೆಟ್ಟಿ, ಭಾರತ ಕಬಡ್ಡಿ ತಂಡದ ನಾಯಕೆ ಪ್ರಶಾಂತ್ ರೈ, ಅಬುಧಾಬಿ ಕರ್ನಾಟಕ ಸಂಘದ ಅಧ್ಯಕ್ಷೆರ್ ಸರ್ವೋತ್ತಮ ಶೆಟ್ಟಿ, ಉದ್ಯಮಿಲಾಯಿನ ಪ್ರವೀಣ್ ಕುಮಾರ್ ಶೆಟ್ಟಿ ವಕ್ವಾಡಿ, ಹರೀಶ್ ಬಂಗೇರ, ದಿನೇಶ್ ಶೆಟ್ಟಿ ಕೊಟಿಂಜ, ತಾರಾನಾಥ ರೈ, ಓವರ್ಸೀಸ್ ಮೂವೀಸ್ ಗಲ್ಫ್ ದ ಸೆಂಥಿಲ್ ಬೆಂಗ್ಲೂರ್, ಈಶ್ವರಿದಾಸ್ ಶೆಟ್ಟಿ ಬೊಕ್ಕ ಮಲ್ಲಿಕಾರ್ಜುನ ಗೌಡ ತುಡರ್ ಅರ್ಲಾದ್ ಪಿಕ್ಚರ್ ಗ್ ಎಡ್ಡೆಪ್ಪು ಬಯಕಿಯೆರ್.
ಸಹ ನಿರ್ಮಾಪಕೆರ್ ಭರತ್ ರಾಮ್ ರೈ ಎದ್ಕೊನಿಯೆರ್. ರಾಜೇಶ್ ಕುತ್ತಾರ್ ಲೇಸ್ ದ ಸುಧಾರಿಕೆ ಮಲ್ತೆರ್. ನಿರ್ಮಾಪಕೆರಾಯಿನ ಆತ್ಮಾನಂದ ರೈ ಸೊಲ್ಮೆ ಸಂದಾಯೆರ್. ಪಿಲಿ ನಲಿಕೆ ಕೇವಲ ಮನರಂಜನೆಗ್ ಮಾತ್ರ ಅತ್ತ್, ಅವು ದೈವದತ್ತವಾದ್ ಬತ್ತಿನ ಪ್ರಸಾದ. ಪಿಲಿ ನಲಿಕೆಡ್ ದೈವ ಶಕ್ತಿ ಉಂಡು.
ಈ ಪಿಲಿ ನಲಿಕೆನ್ ಏರ್ಲಾ ಚಲ್ಲ್ ಮಲ್ಪರೆ ಬಲ್ಲಿ, ಅಂಚ ಮಲ್ತ್ಂಡ ದಾದ ಆಪುಂಡು ಪನ್ಪಿನನೇ ಈ ಪಿಕ್ಚರ್ ದ ಕಥೆ ಆದುಂಡು. ನಿರ್ದೇಶಕೆ ಮಯೂರ್ ಆರ್. ಶೆಟ್ಟಿ ನಿರ್ದೇಶನದ ಈ ಪಿಕ್ಚರ್ ಡ್ ನಾಯಕೆ ಭರತ್ ಭಂಡಾರಿ ನಾಯಕಿಯಾದ್ ಸ್ವಾತಿ ಶೆಟ್ಟಿ ಅಭಿನಯ ಮಲ್ದೆರ್.
ಅತ್ತಂದೆ ಕಾಂತಾರ ಪಿಕ್ಚರ್ ದ ಗುರುವ ಪುದರ್ ದ ಸ್ವರಾಜ್ ಶೆಟ್ಟಿಲ ಅಭಿನಯ ಮಲ್ದೆರ್. ಬೊಕ್ಕ ವಿಜಯಕುಮಾರ್ ಕೊಡಿಯಲ್ ಬೈಲ್ ನ ಪಾತ್ರ ಮಾತೆರ್ನಾಲ ಮನಸ್ ಗೆಂದ್ ದ್ಂಡ್. ಬೊಕ್ಕ ನವೀನ್ ಡಿ. ಪಡೀಲ್, ಅರವಿಂದ ಬೋಳಾರ್, ಭೋಜರಾಜ ವಾಮಂಜೂರು, ಉಮೇಶ್ ಮಿಜಾರ್, ದೀಪಕ್ ರೈ ಪಾಣಾಜೆ, ಪ್ರಸನ್ನ ಶೆಟ್ಟಿ ಬೈಲೂರು, ಸಂದೀಪ್ ಶೆಟ್ಟಿ ಮಾಣಿಬೆಟ್ಟು, ಪಿಂಕಿ ರಾಣಿ, ವಿಸ್ಮಯ ವಿನಾಯಕ ಮೊಕ್ಲೆನ ಕಾಮಿಡಿಲ ಉಂಡು. ತ್ರಿಷಾ ಶೆಟ್ಟಿ, ಕೃತಿ ಶೆಟ್ಟಿ, ಸಂತೋಷ್ ಶೆಟ್ಟಿ, ರೂಪ ಡಿ ಶೆಟ್ಟಿ, ನಮಿತಾ ಕುಳೂರು, ಚೇತನ್ ರೈ ಮಾಣಿ ಮೊಕುಲು ಅಭಿನಯ ಮಲ್ದೆರ್. ಮಣಿಕಾಂತ್ ಕದ್ರಿ ಮೆರೆನ ಸಂಗೀತ ನಿರ್ದೇಶನದ ನಾಲ್ ಪದ್ಯಲೆನ್ ಪಟ್ಲ ಸತೀಶ್ ಶೆಟ್ಟಿ, ನಿಹಾಲ್ ತಾವ್ರೊ, ಅನುರಾಧ ಭಟ್, ಉಜ್ವಲ ಆಚಾರ್, ಕಲಾವತಿ ಪಂತೆರ್. ತುಳುನಾಡ್ ಡ್ ಫೆಬ್ರವರಿ 10 ಕ್ ಈ ಪಿಕ್ಚರ್ ಬುಡುಗಡೆ ಆಪುಂಡು.
ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)
pallavi shetty