ಕಾಸ್ರೋಡು: ಸಮಾಜದ ಎಡ್ಡೆಪ್ಪಗಾದ್ ಬೆನ್ಪುನ ಕಲಾವಿದೆರೆಗ್ ಪರಿಹಾರ ಕೊರ್ಪುನ ಪಿಂಚಣಿ ಯೋಜನೆನ್ ಎಚ್ಚ ಮಲ್ಪೆರೆ ಸರ್ಕಾರದೊಟ್ಟಿಗೆ ಚರ್ಚೆ ಮಲ್ಪುವ ಪಂದ್ ಉದುಮ ಶಾಸಕೆರ್ ಸಿ.ಎಚ್. ಕುಂಞಂಬು ಪಂಡೆರ್.
ಮೇರ್ ಕಲಾವಿದೆರೆನ ಸಂಘಟನೆ ಆಯಿನ ಸ್ಟೇಜ್ ಆರ್ಟಿಸ್ಟ್ ಆಂಡ್ ವರ್ಕರ್ಸ್ ಅಸೋಸಿಯೇಶನ್ ಆಫ್ ಕೇರಳ (ಸವಾಕ್) ಕಾಸ್ರೋಡು ಜಿಲ್ಲಾ ಸಮಿತಿದ ಮುತಾಲಿಕೆಡ್ ಪಳ್ಳಿಕ್ಕೆರೆ ಬೀಚ್ ಸಭಾಂಗಣಡ್ ಐತಾರ ನಡತಿನ ಸವಾಕ್ ಕುಟುಂಬ ಸಂಗಮನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಮಾತ ಕಲೆನ್ಲಾ ಸಮನ್ವಯ ಮಲ್ಪುನ ಸವಾಕ್ ಸಂಸ್ಥೆದ ಬೇಲೆ್ ಬಗೆಟ್ಟ್ ಮಾಜಿ ಶಾಸಕೆರ್, ಜಾನಪದ ಅಕಾಡೆಮಿ ಸದಸ್ಯೆರ್ ಕೆ.ವಿ. ಕುಂಞ ರಾಮನ್ ಮೆಚ್ಚಿಯೆರ್. ಬೊಕ್ಕ ಸವಾಕ್ ಜಿಲ್ಲಾ ಕಲಾ ಉಚ್ಚಯಡ್ ಗೆಂದಿನ ಕಲಾವಿದೆರೆಗ್ ಇನಾಮು ಪಟ್ಟಿಯೆರ್. ಬೊಕ್ಕ ಸವಾಕ್ ರಾಜ್ಯ ಕಾರ್ಯದರ್ಶಿ ಸುದರ್ಶನನ್ ವರ್ಣಂ ಪಾತೆರ್ದ್, ಸುಮಾರ್ ವರ್ಷೊರ್ದಿಂಚ ಸಾಮಾಜಿಕ ಪ್ರಗತಿಗಾದ್ ಬೆನ್ಪುನ ಕಲಾವಿದೆರೆಗ್ ಎಚ್ಚ ಎಚ್ಚ ಸವಲತ್ತು ಕೊರ್ದು, ಅಕ್ಲೆನ ಸಮಸ್ಯೆಲೆನ ಅಧ್ಯಯನಗ್ ಸರ್ಕಾರ ದುಂಬಾವೊಡು ಪಂದ್ ಪಂಡೆರ್.
ಕರ್ನಾಟಕ ನಾಟಕ ಅಕಾಡೆಮಿದ ಮಾಜಿ ಸದಸ್ಯೆರ್ ಮಲ್ಲಿಕಾರ್ಜುನ ಸ್ವಾಮಿ ಮಹಾಮನೆ ಪಾತೆರ್ದ್, ಕೈತಲ್ ದ ಕರ್ನಾಟಕ ರಾಜ್ಯಡ್ಲಾ ಸವಾಕ್ ಕಾರ್ಯ ಸುರು ಆತ್ಂಡ್ ಪಂದ್ ಪಂಡೆರ್. ಬೊಕ್ಕ ತಿಡಂಬು ನೃತ್ಯ ಕಲಾವಿದೆರ್ ಉಪೇಂದ್ರ ಭಟ್, ಗಾಯಕೆರ್ ಮಾಧವ ಕಾಸ್ರೋಡು, ತೆಯ್ಯಂ ಕಲಾವಿದೆರ್ ರಾಜನ್ ಪಣಿಕ್ಕರ್, ಸಂಘಟಕೆರ್ ಬಾಲಕೃಷ್ಣ ಪೊಸಳಿಗೆ ಮೊಕುಲೆಗ್ ಸವಾಕ್ ಕಲಾರತ್ನ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್. ಈ ಲೇಸ್ ದ ಗುರ್ಕಾರ್ಮೆನ್ ಸವಾಕ್ ರಾಜ್ಯ ಕೋಶಾಧಿಕಾರಿ ಬೊಕ್ಕ ಜಿಲ್ಲಾಧ್ಯಕ್ಷೆರ್ ಉಮೇಶ್ ಎಂ ಸಾಲಿಯಾನ್ ಒಯಿಸೊಂದಿತ್ತೆರ್.
ಈ ಪೊರ್ತುಡು ಮಂಜೇಶ್ವರ ಪಂಚಾಯತ್ ಅಧ್ಯಕ್ಷೆರ್ ಜೀನ್ ಲೆವಿನೋ ಮೊಂತೆರೊ, ಟಿ.ವಿ. ಗಂಗಾಧರನ್, ದಿವಾಕರ ಅಶೋಕನಗರ, ಅಪ್ಪುಕುಂಞ ಮಣಿಯಾಣಿ, ರವೀಂದ್ರನ್ ನಾಯರ್, ದಯಾ ಪ್ರಸಾದ್, ಭಾರತಿ ಬಾಬು, ಜಯಂತಿ ಸುವರ್ಣ, ನರಸಿಂಹ ಬಲ್ಲಾಳ್ ಪಾತೆರಿಯೆರ್. ಜಿಲ್ಲಾ ಕಾರ್ಯದರ್ಶಿ ಸನ್ನಿ ಆಗಸ್ಟಿನ್ ಎದ್ಕೊನಿಯೆರ್. ಚಂದ್ರಹಾಸ ಕಯ್ಯಾರ್ ಸೊಲ್ಮೆ ಸಂದಾಯೆರ್.
pallavi shetty