ನೇತಾಜಿ ಬ್ರಿಗೇಡ್ (ರಿ.) ಬೆದ್ರ ಜವನೆರೆರ್ದ್ ಸ್ವಚ್ಛತೆ ಮಲ್ಪುನ ಕಜ್ಜ

ನೇತಾಜಿ ಬ್ರಿಗೇಡ್ (ರಿ.) ಬೆದ್ರದ ಜವನೆರೆನ ಸಂಘಟನೆ ಶುರುವಾದ್ 3 ವರ್ಷ ಕರಿದ್ಂಡ್.
ಬೆದ್ರಡ್ ಪ್ರಚಾರ ಬಯಕಂದೆ ಸ್ವಚ್ಛತೆದ ಬೇಲೆನ್ ಈ ಸಂಘಟನೆ ಮಲ್ತೊಂದುಂಡು.

2019 ನೇ ಜೂನ್ 23 ಕ್ಕ್ ಉಂದು ಸ್ಥಾಪನೆ ಆತ್ಂಡ್. ಸುಮಾರ್ 103 ವಾರ ಬೆದ್ರ ಪರಿಸರಡ್ ಕ್ಲೀನ್ ಮಲ್ತೊಂದು ಸರಕಾರದ ಮಾದರಿ ಕ್ಲೀನ್ ಬೆದ್ರ ಪರಿಕಲ್ಪನೆಡ್ ಈ ಸಂಘಟನೆದ ಪಾತ್ರ ಉಂಡು ಪಂದ್ ಪನಿಯೆರೆ ಪೆರ್ಮೆ ಆಪುಂಡು. ಈತ್ ಮಾತ್ರ ಅತ್ತಂದೆ ಈ ಸಂಘಟನೆ ಅವೆತ್ತೋ ಬಡವೆರೆನ ಪಾಲ್ ಗ್ ಬೊಲ್ಪು ಆತೆರ್. ಬೆದ್ರ ಕಂಬುಲ, ಬಪ್ಪನಾಡು ದೇವಲ್ಯ, ಉಚ್ಚಿಲ ಮಹಾಲಕ್ಷ್ಮಿ ದೇವಲ್ಯ, ಇಂಚ ಸುಮಾರ್ ಜಾತ್ರೆದ ಪೊರ್ತುಡು ನೆತ್ತ ಜವನೆರ್ ಇಸೇಸ ಏಸ ಪಾಡ್ದ್, ಆಯಿಟ್ ದುಡ್ಡು ಸಂಗ್ರಹ ಮಲ್ತ್ ದ್ ಸುಮಾರ್ 41 ಕುಟುಂಬಗ್ 11,77,727 ಬಿಲೆತ ಪಣವುದ ಸಕಾಯ ಮಲ್ದೆರ್. ನೆತ್ತ ಸಂಚಾಲಕೆರ್ ರಾಹುಲ್ ಕುಲಾಲ್ ನ ಒಟ್ಟುಸೇರಿಗೆಡ್ 10 ಜನ ಇತ್ತಿನ ಸದಸ್ಯೆರ್ ಇತ್ತೆ 70 ರ್ದ್ ಲ ಹೆಚ್ಚ ಸದಸ್ಯೆರ್ ಇಪ್ಪುನ ದಕ್ಷಿಣ ಕನ್ನಡ ಜಿಲ್ಲೆದ ಮಾದರಿ ಸಂಘಟನೆ ಆತ್ಂಡ್ ಪಂದ್ ಮುಲ್ಕಿ-ಬೆದ್ರದ ಪೆರ್ಮೆದ ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಪಂಡೆರ್.

ಈ ಸಂಘಟನೆಗ್ ಇಂಚಿಪ್ಪ 3 ನೇ ವರ್ಷದ ವಾರ್ಷಿಕೋತ್ಸವ ಆಚರಣೆ ಮಲ್ತ್ ದ್, ಸುಮಾರ್ ಸೇವಾ ಸಂಘಟನೆಲೆನ್ ಗುರುತಿಸದ್ ಅಕುಲೆಗ್ ಗೌರವಾರ್ಪಣೆ ಮಲ್ದೆರ್. ಬೆದ್ರ ಸ್ವರಾಜ್ಯ ಮೈದಾನದ ಚಿಣ್ಣರ ಕಿರು ಉದ್ಯಾನಡ್ 3 ನೇ ವರ್ಷದ ತುಡರ್ ಉಚ್ಚಯ ಆಚರಣೆ ಮಲ್ತ್ ದ್, ನಲಿಕೆ ಭಜನೆ ಲೇಸ್, ಬೊಕ್ಕ ತುಳುನಾಡ ಕೊಡಿ ಧ್ವಜಕಟ್ಟೆನ್ ಉದಿಪನ ಮಲ್ತೆರ್. ಉಂದು ಈತ್ ಮಟ್ಟಡ್ ಬುಲೆಯೆರೆ ಸಂಚಾಲಕೆರ್ ಬೊಕ್ಕ ಸದಸ್ಯೆರೆನ ನಡುತ ಹೊಂದಾಣಿಕೆ ಕಾರಣ. ನನಾತ್ ಸಮಾಜ ಸೇವೆದ ಬೇಲೆನ್ ಮಲ್ಪೆರೆ ಈ ಸಂಘಟನೆ ಮಾತೆರ್ನಲ ಸಕಾಯ ಕೇನ್ ದ್ಂಡ್‌.