ಕುಡ್ಲ: ಆಟಡ್ ತನ್ನನೇ ಅಭಿಮಾನಿ ಬಳಗನ್ ಸಂಪಾದನೆ ಮಲ್ದಿನ ಪುಗರ್ತೆದ ಭಾಗವತೆರ್ ಕೀರ್ತನ್ ಶೆಟ್ಟಿ ವಗೆನಾಡು ಮೇರ್ ಮೂಳೂರು ಬಾಡಿಗೆ ಇಲ್ಲಲ್ ಬಲ್ಲ್ ದೆತ್ತೊಂದು ತೀರ್ ಪೋಯಿನ ಘಟನೆ ನಡತ್ಂಡ್.
ಬಪ್ಪನಾಡ್ ಬೊಕ್ಕ ಬೇತೆ ಮೇಳಲೆಡ್ ಭಾಗವತೆರಾದ್ ಸೇವೆ ಮಲ್ತೊಂದು ಇತ್ತಿನ ಮೇರ್, ಕೊರೊನಾ ಪೊರ್ತುಡು ಚಿಕ್ಕಮೇಳಡ್ ಭಾಗವತಿಕೆ ಮಲ್ತೊಂದು ಇತ್ತೆರ್. ಆತ್ಮಹತ್ಯೆ ಗ್ ಕಾರಣ ತೆರಿದ್ ಬೈದಿಜಿ.
ಸುಬ್ರಹ್ಮಣ್ಯ: ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಚಂಪಾ ಷಷ್ಠಿ ಉಚ್ಚಯಗ್ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಮೆರೆಗ್ ಲೆಪ್ಪೋಲೆಡ್ ಕೊರ್ದು ಲೆತ್ತೆರ್.
ಮುಖ್ಯಮಂತ್ರಿ ಮೆರೆನ್ ಗುರುವಾರ ಬೆಂಗ್ಲೂರ್ ಡ್ ಮೀನುಗಾರಿಕೆ, ಬಂದರ್ ಬೊಕ್ಕ ಒಳನಾಡು ಜಲಸಾರಿಗೆ ಸಚಿವೆರ್ ಎಸ್. ಅಂಗಾರೆ ಮೆರೆನ ಮುತಾಲಿಕೆಡ್ ದೇವಲ್ಯದ ಆಡಳಿತ ಭೇಟಿ ಮಲ್ತ್ ದ್ ಲೆಪ್ಪೋಲೆನ್ ಕೊರಿಯೆರ್. ಈ ಪೊರ್ತುಡು ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷೆರ್ ಮೋಹನ್ ರಾಂ ಸುಳ್ಳಿ, ಸದಸ್ಯೆರ್ ಪ್ರಸನ್ನ ದರ್ಬೆ, ಮನೋಹರ ರೈ, ಮಾಸ್ಟರ್ ಪ್ಲಾನ್ ಸದಸ್ಯೆರ್ ಕಿಶೋರ್ ಕುಮಾರ್ ಕೂಜುಗೋಡು, ಚಂದ್ರಶೇಖರ ನಲ್ಲೂರಾಯ, ಮನೋಜ್ ಸುಬ್ರಹ್ಮಣ್ಯ, ದೇವಲ್ಯದ ಕಾರ್ಯನಿರ್ವಹಣಾಧಿಕಾರಿ ಡಾ.ನಿಂಗಯ್ಯ ಇತ್ತೆರ್.
ಇಂಧೋರ್: ಭಾರತ್ ಜೋಡೋ ಯಾತ್ರೆ ಮಧ್ಯಪ್ರದೇಶಗ್ ಎತ್ತುನ ದುಂಬೇ ಇಂದೋರ್ಡ್ ರಾಹುಲ್ ಗಾಂಧಿ ಮೆರೆಗ್ ಕೊಲೆ ಬೆದರಿಕೆ ಪತ್ರ ಬೈದ್ಂಡ್.
ಶುಕ್ರಾರ ಬೊಲ್ಪುಗು ಚೀಪೆ ತಿಂಡಿದ ಅಂಗಡಿಯೊಂಜೆತ ಪಿದಯಿ ಗುರ್ತ ಇಜ್ಜಂದಿನ ವ್ಯಕ್ತಿಯೊರಿ ಈ ಬೆದರಿಕೆ ಪತ್ರನ್ ಬುಡ್ದ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಕೈತಲ್ ಪಾಡಿನ ಸಿಸಿಟಿವಿ ಕ್ಯಾಮರಾದ ಆಧಾರದ ಮಿತ್ತ್ ಪೊಲೀಸೆರ್ ಆರೋಪಿನ್ ನಾಡಿಯೆರೆ ಸುರು ಮಲ್ದೆರ್.
ಕುಡ್ಲ: ಶೇಡಿಗುರಿ ದಂಬೆಲ್ ಶ್ರೀ ನಾಗ ದೇವೆರೆನ ಸನ್ನಿಧಿ, ಶ್ರೀ ಬಬ್ಬರ್ಯ-ಬಂಟ ದೈವೊಲ್ಯಡ್ ನ.30 ರ್ದ್ ಡಿ.4 ಮುಟ್ಟ ಪುನರ್ ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶ ಉಚ್ಚಯ ನಡಪರೆ ಉಂಡು.
ನ.30 ಬುಧಾರದಾನಿ ಹಸಿರು ಹೊರಕಾಣಿಕೆ ಬಯ್ಯ 4 ಗಂಟೆಗ್ ಉರ್ವ ಮಾರಿಗುಡಿ ದೇವಲ್ಯದ ಎದುರುಭಾಗರ್ದ್ ಪಿದಾಡ್ದ್ , ಉರ್ವ ಮಾರ್ಕೆಟ್ ಸರ್ಕಲ್ ಅಶೋಕನಗರ, ಶೇಡಿಗುರಿ, ದಂಬೆಲ್ ಆದ್, ಕ್ಷೇತ್ರಗ್ ಬರ್ಪುಂಡು. ಡಿಸೆಂಬರ್ 2 ಶುಕ್ರಾರ ಶ್ರೀ ಕ್ಷೇತ್ರಡ್ ಪೊಸ ಶಿಲಾಮಯ ಪೀಠೊಡು ಶ್ರೀ ನಾಗ ಪ್ರತಿಷ್ಠೆ, ಬ್ರಹ್ಮಕಲಶಾಭಿಷೇಕ ಪೂಜೆ, ಬಬ್ಬರ್ಯ-ಬಂಟ ಕಲಶ ಪ್ರತಿಷ್ಠೆ, ನವಕ ಪ್ರಧಾನ ಹೋಮ, ಕಲಶ ಪ್ರಾಯಶ್ಚಿತ ಹೋಮ ನಡಪುಂಡು. ಬೊಕ್ಕ ಶ್ರೀ ಕ್ಷೇತ್ರದ ಪೊಸ ಶಿಲಾಮಯ ಗರ್ಭಗುಡಿಟ್ ಶ್ರೀ ಬಬ್ಬರ್ಯ-ಬಂಟ ದೈವಲೆನ ಸಾನಿಧ್ಯದ ಪ್ರತಿಷ್ಠೆ ಉಚ್ಚಯ ಬೊಕ್ಕ ಬ್ರಹ್ಮ ಕಲಶಾಭಿಷೇಕ ಲೇಸ್ ಕೋಡಿಕಲ್ ಶ್ರೀ ವಿಶ್ವಕುಮಾರ್ ಜೋಯಿಸ್ ಮೆರೆನ ಮುತಾಲಿಕೆಡ್ ನಡಪರೆ ಉಂಡು. ಬೊಕ್ಕ ನಾಗ ಸಾನಿಧ್ಯಡ್ ಕಕ್ಕುಂಜೆದ ನಾಗಪಾತ್ರಿ ನಾಗನಂದ ವಾಸುದೇವಾಚಾರ್ಯ ಮೆರೆನ ನೇತೃತ್ವಡ್ ತಂಬಿಲ ಸೇವೆ ಬೊಕ್ಕ ನಾಗದರ್ಶನ ಸೇವೆ ನಡಪುಂಡು. ಬೊಕ್ಕ “ಮಣಿಕಂಠ ಮಹಿಮೆ” ಪನ್ಪಿನ ಮನೋರಂಜನೆ ಲೇಸ್ ನಡಪುಂಡು. ಡಿ. 3 ಶನಿಯಾರದಾನಿ ಮಹಿಳಾ ಮಂಡಳಿರ್ದ್ ಸಾಂಸ್ಕೃತಿಕ ಲೇಸ್ ಬೊಕ್ಕ ತಮ್ಮನ ಲೇಸ್, ಬೊಕ್ಕ ಬಬ್ಬರ್ಯ-ಬಂಟ ದೈವಲೆನ ನೇಮ ನಡಪುಂಡು. ದಿನೊಲ ಮಧ್ಯಾಹ್ನ ಬೊಕ್ಕ ರಾತ್ರೆ ಅನ್ನಸಂತರ್ಪಣೆ ಉಂಡು. ಈ ಲೇಸ್ ಮಾತೆರ್ಲ ಬತ್ತ್ ದ್, ತನು ಮನ ಧನರ್ದ್ ಸಹಕಾರ ಮಲ್ತ್ ದ್, ಶ್ರೀ ನಾಗದೇವೆರೆನ ಬೊಕ್ಕ ಬಬ್ಬರ್ಯ-ಬಂಟ ದೈವಲೆನ ಗಂಧ ಪ್ರಸಾದನ್ ಸ್ವೀಕಾರ ಮಲ್ತ್ ದ್, ದೈವ ದೇವೆರೆನ ಕೃಪೆಗ್ ಪಾತ್ರರಾವೋಡು ಪಂದ್ ಅಧ್ಯಕ್ಷೆರ್, ಸದಸ್ಯೆರ್, ಆಡಳಿತ ಮಂಡಳಿ, ಜೀರ್ಣೋದ್ಧಾರ ಸಮಿತಿ ಬೊಕ್ಕ ಅರ್ಚಕೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಸುಬ್ರಹ್ಮಣ್ಯ: ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ನ.20ದಾನಿ ಚಂಪಾಷಷ್ಠಿದ ವಾರ್ಷಿಕ ಜಾತ್ರೆ ಉಚ್ಚಯ ಇಪ್ಪುನ ಲೆಕ್ಕೊಡು ಮೂಲಮೃತ್ತಿಕಾ ಪ್ರಸಾದ ದೆಪ್ಪುನ ಲೇಸ್ ನಡಪರೆ ಉಂಡು.
ಅಂಚಾದ್ ಆನಿ ಬೊಲ್ಪುರ್ದ್ ಮಧ್ಯಾಹ್ನ 2 ಗಂಟೆ ಮುಟ್ಟ ಭಕ್ತೆರೆಗ್ ದೇವೆರೆನ ದರ್ಶನ ಪಡೆಯೆರೆ ಭಕ್ತೆರೆಗ್ ಅವಕಾಶ ಇಜ್ಜಿ. 2 ಗಂಟೆರ್ದ್ ಬೊಕ್ಕ ದೇವೆರೆನ ದರ್ಶನ ಮಲ್ಪೊಲಿ ಪಂದ್ ದೇವಲ್ಯದ ಪ್ರಕಟಣೆಡ್ ತೆರಿಪಾದೆರ್.
ಪಣಂಬೂರು ಬೋರ್ಮಾಡಿ ಶ್ರೀ ಕೋಡ್ದಬ್ಬು ದೈವಸ್ಥಾನ, ಕಾಟಿಪಳ್ಳ ಮೂಲು ಡಿಸೆಂಬರ್ 3 ಬೊಕ್ಕ 4 ಕ್ಕ್ ವಾರ್ಷಿಕ ನೇಮೋಚ್ಚಯ ನಡಪರೆ ಉಂಡು.
ಡಿ.2 ತಾರೀಕ್ ಕಾಂಡೆ 10.30 ಗ್ ನವಕ ಕಲಶಾಭಿಷೇಕ ಶುದ್ಧೀಕರಣ ನಡಪರೆ ಉಂಡು. ರಾತ್ರೆ 9 ಗಂಟೆಗ್ ಲಯನ್ ಕಿಶೋರ್ ಡಿ. ಶೆಟ್ಟಿ ಕೂಟದ ಕಲಾವಿದೆರ್ ಅಭಿನಯ ಮಲ್ತಿನ ‘ಕಟೀಲ್ದಪ್ಪೆ ಉಳ್ಳಾಲ್ದಿ ‘ ತುಳು ಪೌರಾಣಿಕ ನಾಟಕ ನಡಪರೆ ಉಂಡು. ಡಿ.3 ತಾರೀಕ್ಗ್ ರಾತ್ರೆ 10.30 ಗ್ ಶ್ರೀ ಕೋಡ್ದಬ್ಬು ತನ್ನಿಮಾನಿಗ ದೈವದ ನೇಮೋಚ್ಚಯ, ಡಿ. 4 ಕ್ಕ್ ಜೋಡುಗುಳಿಗ, ಮಯೋಲಜ್ಜಿ ಬೊಕ್ಕ ಚಾಮುಂಡೇಶ್ವರ ಗುಳಿಗ, ಪಂಜುರ್ಲಿ ಅಂಚನೆ ಬಂಟ ದೈವದ ನೇಮೋಚ್ಚಯ ಆದ್ ಭಂಡಾರ ಜಪ್ಡಾಯರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ವೆಲ್ಲಿಂಗ್ಟನ್: ಭಾರತ ಅಂಚನೆ ನ್ಯೂಜಿಲೆಂಡ್ ನಡುತ್ತ 3 ಪಂತದ ಟಿ20 ಸರಣಿದ ಸುರುತ್ತ ಪಂತ ಬರ್ಸ ಬತ್ತಿನೆಡ್ದಾವರ ಕ್ಯಾನ್ಸಲ್ ಆತ್ಂಡ್.
ಬರ್ಸರ್ದಾವರ ಟಾಸ್ ಪಾಡಿಯರಲ ಸಾಧ್ಯ ಆವಂದಿನ ಪರಿಸ್ಥಿತಿ ನಿರ್ಮಾಣ ಆಯಿನ ಕಾರಣ ಪಂತೊನ್ ಕ್ಯಾನ್ಸಲ್ ಮಲ್ತೆರ್.
ಮುಲ್ಕಿ: ಮಾರ್ಗದ ನಡುಟ್ಟು ಇತ್ತಿನ ಮಾಮಲ್ಲ ಗುಂಡಿನ್ ಕಾಂಕ್ರಿಟ್ ಗಲಸ್ ದ್ ಮುಚ್ಚಿದಿನ ಮುಲ್ಕಿ ಪುನರೂರ್ದ ಯುವ ಪಡೆತ್ತ ಸೇವೆನ್ ಆ ಕೂಟದಕ್ಲೆಗ್ ಮೆಚ್ಚಿದ್ ಆಮ್ ಆದ್ಮಿ ಪಕ್ಷದ ದ.ಕ. ಜಿಲ್ಲಾ ಸಮಿತಿದಕುಲು ಗುರುವಾರ ಬಯ್ಯ ಮುಲ್ಕಿಡ್ ಮಾನಾದಿಗೆ ಮಲ್ತೆರ್.
ಮುಲ್ಕಿದ ಸುರಭಿ ಎಲೆಕ್ಟ್ರಾನಿಕ್ಸ್ ಉದ್ಯೋಗಿ ಸುಪ್ರೀತಾ ಪುನರೂರು ಏಪಲ ಇಲ್ಲಗ್ ಪೋಪಿನ ಮಾರ್ಗಡ್ ತೋಜಿದ್ ಬತ್ತಿನ ಮಾಮಲ್ಲ ಗುಂಡಿಲೆನ್ ಗುರ್ತಿಸಾದ್ ತನ್ನ ಯುವ ಪಡೆತ್ತ ಸದಸ್ಯೆರೆಗ್ ಒಟ್ಟು ಸೇರ್ಸಾದ್ ರಾತ್ರೆದ ಪೊರ್ತುಡು ಗುಂಡಿನ್ ಸಿಮೆಂಟ್ ಕಾಂಕ್ರೀಟ್ ಪಾಡ್ದ್ ಮುಚ್ಚಿದ್ ಜನಕ್ಲೆರ್ದ್ ಮೆಚ್ಚಿಗೆ ಪಡೆತೆರ್. ಮೊಕುಲು ಮಲ್ತಿನ ಬೇಲೆನ್ ಗುರ್ತಿಸಾದ್ ಆಮ್ ಆದ್ಮಿ ಪಕ್ಷದ ಮುಖಂಡೆರ್ ಸುಪ್ರೀತಾ ಬೊಕ್ಕ ಅರೆನ ಕೂಟದ ಸದಸ್ಯೆರಾಯಿನ ಸಚಿನ್, ನರೇಶ್, ರಮೇಶ್, ಐಸನ್ ಡಿಸೋಜ, ಸಂಪತ್ ಉಚ್ಚಿಲ, ಪೊಲೀಸ್ ವೀರೇಶ್ ಅಂಚನೆ ಯುವ ಪಡೆನ್ ಪ್ರೋತ್ಸಾಹ ಮಲ್ಪುನ ಜಾನ್ ಕ್ವಾಡ್ರಸ್ ಮೆರೆನ್ ಮಾನಾದಿಗೆ ಮಲ್ತ್ದ್ ಎಡ್ಡೆಪ್ಪುನು ಬಯಕಿಯೆರ್.
ಭುವನೇಶ್ವರ: ಒಡಿಶಾದ ಬೌದ್ ಜಿಲ್ಲೆದ ಬಿಲಾಸ್ಪುರ್ ಪಂಚಾಯಿತಿದ ಬದರಾಹಜುರ್ ಗ್ರಾಮದ ಪೂರ್ಣಬಾಷಿ ದೇವಲ್ಯ ತನ್ನ ಪವಾಡರ್ದೇ ಮಸ್ತ್ ಪುದರ್ ಪಡೆತ್ಂಡ್.
ಪ್ರತಿ ವರ್ಷ ಕಾರ್ತಿಕ ತಿಂಗೊಲುಡ್ ಮಸ್ತ್ ಭಕ್ತೆರ್ ಈ ದೇವಲ್ಯಗ್ ಬನ್ನಗ ದೇವರೆಗ್ ತಾರಾಯಿ ಕನಪೆರ್. ಮುಲ್ಪ ಅಚ್ಚಿರ ದಾದ ಪಂಡ ಈ ದೇವಲ್ಯಡ್ ಭಕ್ತೆರ್ ಕನತಿನ ತಾರಾಯಿ ತನ್ನಾತಿಗೆ ಪುಡಾವುಂಡು. ಸಾಮಾನ್ಯವಾದ್ ದೇವಲ್ಯಡ್ ತಾರಾಯಿನ್ ಪೂಜೆದಕುಲು ಕಲ್ಲ್ ಗ್ ಹಾಕ್ ದ್, ರಡ್ಡ್ ಭಾಗ ಮಲ್ಪುವೆರ್. ಬೊಕ್ಕ ದೇವೆರೆನ ಎದುರು ದೀದ್, ವಾಪಸ್ ಕೊರ್ಪೆರ್. ಆಂಡ, ಈ ದೇವಲ್ಯಡ್ ಇಡೀ ತಾರಾಯಿನ್ ದೇವೆರೆನ ಎದುರು ದುಂಬೇ ದೀಪೆರ್. ವಾಪಸ್ ಕೊರ್ನಗ ತಾರಾಯಿ ತನ್ನಾತಿಗೆ ಪುಡಾದ್ ಇಪ್ಪುಂಡು. ಈ ದೇವಲ್ಯಡ್ ಪೇರ್ ಅಭಿಷೇಕ, ನೀರ್ ಅಭಿಷೇಕ ಮಸ್ತ್ ಪುದರ್ ಪಡೆತ್ತ್ ಡ್, ಕರಿನ 40 ವರ್ಷಲೆರ್ದ್ ಮಸ್ತ್ ಸಂಖ್ಯೆಡ್ ಭಕ್ತೆರ್ ಇಡೆಗ್ ಭೇಟಿ ಕೊರೊಂದು ಉಲ್ಲೆರ್. ತನ್ನ ಮನಸ್ ಡ್ ಎನ್ನಿನೆನ್ ದೇವೆರ್ ಮಲ್ತ್ ಕೊರ್ಪಾವೆರ್ ಪನ್ಪುನವು ಜನಕುಲೆನ ನಂಬಿಕೆ.
ಪುತ್ತೂರ್: ಇತಿಹಾಸ ಪುಗರ್ತೆದ ಮಹತೋಭಾರ ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ನ.23ದಾನಿ ನಡಪರೆ ಇಪ್ಪುನ ಲಕ್ಷದೀಪ ಉಚ್ಚಯದ ಅಂಗವಾದ್ ನ.20ಕ್ ದೇವಲ್ಯದ ಜಾವಡಿಡ್ ಸ್ವಚ್ಛತೆದ ಕಜ್ಜ ನಡಪರೆ ಉಂಡು.
ಬೊಲ್ಪುಗು 7 ಗಂಟೆರ್ದ್ 8.30 ಮುಟ್ಟ ಸ್ವಚ್ಛತಾ ಕಜ್ಜ ನಡಪುಂಡು. ಬೊಕ್ಕ ಉಪಾಹಾರ ಆದ್, ಅರ್ಧ ಗಂಟೆದ ಕಾಲ ಲಕ್ಷ ದೀಪೋತ್ಸವದ ವ್ಯವಸ್ಥೆ ಬೊಕ್ಕ ಅಟ್ಟಣೆದ ತಯಾರಿದ ಬಗೆಟ್ ಇಚಾರ ವಿನಿಮಯ ಸಭೆ ನಡಪರೆ ಉಂಡು. ಈ ಕಜ್ಜೊಡು ಭಕ್ತೆರ್ ಹೆಚ್ಚದ ಸಂಖ್ಯೆಡ್ ಪಾಲ್ ಪಡೆವೊಡು ಪಂದ್ ದೇವಲ್ಯದ ವ್ಯವಸ್ಥಾಪನಾ ಸಮಿತಿ ಪ್ರಕಟಣೆ ತೆರಿಪಾದ್ಂಡ್.
