ರೇಡಿಯೋ ಮಣಿಪಾಲ್ 90.4mhz ಸಮುದಾಯ ಬಾನುಲಿಡ್ ಪುರಾಣಾಮೃತ ಪೌರಾಣಿಕ ಪಾತ್ರ ಜೀವನ ಸೂತ್ರ ಸರಣಿ ಲೇಸ್ ದ 69 ನೇ ಸಂಚಿಕೆ ನ. 12 ಶನಿಯಾರ ಬಯ್ಯಗ್ 4:15 ಪ್ರಸಾರ ಆಪುಂಡು.
ಈ ಲೇಸ್ ನ್ ಉಪನ್ಯಾಸಕೆರ್ ಮುಂಡಾಜೆ ಕುಮಾರೇಶ್ವರ ಭಟ್ ನಡಪಾದ್ ಕೊರ್ಪೆರ್. ಉಂದು ನ.13 ಕ್ ಮಧ್ಯಾಹ್ನ ಕೂಡ ಪ್ರಸಾರ ಆಪುಂಡು.
ಅಹಮದಾಬಾದ್: ಗುಜರಾತ್ ಡ್ ಕಾಂಗ್ರೆಸ್ ಅಧಿಕಾರಗ್ ಬತ್ತ್ಂಡ ಅಹಮದಾಬಾದ್ದ ನರೇಂದ್ರ ಮೋದಿ ಸ್ಟೇಡಿಯಂಗ್ ಸರ್ದಾರ್ ಪಟೇಲ್ ಸ್ಟೇಡಿಯಂ ಪಂದ್ ಪುದರ್ ದೀಪ ಪಂದ್ ಕಾಂಗ್ರೆಸ್ ಘೋಷಣೆ ಮಲ್ದ್ಂಡ್.
ನನ ಬರ್ಪುನ ವಿಧಾನಸಭೆ ಚುನಾವಣೆಗ್ ಪಕ್ಷದ ಪ್ರಣಾಳಿಕೆನ್ ಬುಡುಗಡೆ ಮಲ್ತಿನ ಕಾಂಗ್ರೆಸ್ ಹಿರಿಯ ನಾಯಕೆ ಬೊಕ್ಕ ರಾಜಸ್ಥಾನ ಮುಖ್ಯಮಂತ್ರಿ ಅಶೋಕ್ ಗೆಹ್ಲೋಟ್, ಪಕ್ಷ ಸರ್ಕಾರ ರಚನೆ ಮಲ್ದ್ಂಡ ಸುರುತ ಕ್ಯಾಬಿನೆಟ್ ಸಭೆಟ್ ಚುನಾವಣಾ ಪ್ರಣಾಳಿಕೆನ್ ಅಧಿಕೃತ ದಾಖಲೆಯಾದ್ ಕಾಂಗ್ರೆಸ್ ಸ್ವೀಕಾರ ಮಲ್ಪುಂಡು ಪಂದ್ ಪಂಡೆರ್. ರಡ್ಡ್ ಹಂತಡ್ ಗುಜರಾತ್ ಡ್ ವಿಧಾನಸಭೆ ಚುನಾವಣೆ ನಡಪರೆ ಉಂಡು. ಡಿ. 1 ಬೊಕ್ಕ 5 ದಾನಿ ವೋಟ್ ನಡಪುಂಡು. ಡಿ. 8 ದಾನಿ ವೋಟ್ ದ ಲೆಕ್ಕ ನಡಪುಂಡು.
ಬೆಂಗ್ಲೂರ್: ವಿದ್ಯಾರ್ಥಿಲೆನ ಬಿಎಂಟಿಸಿ ಪಾಸ್ ಬಯ್ಯಗ್ 7.30 ರ್ದ್ ಬೊಕ್ಕ ಆಪುಜಿ ಪಂದ್ ಕಂಡಕ್ಟರ್ ಟಿಕೆಟ್ ಕೊರ್ಯೆರೆ ಬಲ್ಲಿ ಪಂದ್ ಬಿಎಂಟಿಸಿ ಸೂಚನೆ ಕೊರ್ತುಂಡು.
ವಿದ್ಯಾರ್ಥಿಲು ಬಯ್ಯಗ್ 7.30ರ್ದ್ ಬೊಕ್ಕ ಬಿಎಂಟಿಸಿ ಬಸ್ಸ್ ಟ್ ಪೋಯೆರೆ ಇಜ್ಜಿ ಪಂದ್ ಬಸ್ ಕಂಡಕ್ಟರ್ ಟಿಕೆಟ್ ಕೊರೊಂದು ಇತ್ತೆರ್. ನೇರ್ದಾವೆರ ವಿದ್ಯಾರ್ಥಿಲೆಗ್ ತೊಂದರೆ ಆವೊಂದು ಇತ್ತ್ಂಡ್. ಇಂಚಾದ್ ವಿದ್ಯಾರ್ಥಿಲು ಬಿಎಂಟಿಸಿ ಕಚೇರಿಗ್ ದೂರು ಸಂದಾಯೆರ್. ವಿದ್ಯಾರ್ಥಿಲೆನ ಈ ದೂರು ಪರಿಶೀಲನೆ ಮಲ್ತಿನ ಬಿಎಂಟಿಸಿ, ವಿದ್ಯಾರ್ಥಿಲು ಪಾಸ್ ಪತೊಂದು, ವಾ ಸಮಯಡ್ ಬೋಡಾಂಡಲ ಪೋವೊಲಿ ಪಂದ್ ಆದೇಶ ಕೊರ್ತುಂಡು.
ಬೆಂಗ್ಲೂರ್: ವೇದ ಅಧ್ಯಯನ ಕ್ಷೇತ್ರಡ್ ಸೇವೆ ಸಂದಾಯಿನ, ಪದ್ಮಶ್ರೀ ಪುರಸ್ಕೃತೆರ್ ಗಣಿತಜ್ಞೆ ಆರ್.ಎಲ್. ಕಶ್ಯಪ್ (ರಂಗಸ್ವಾಮಿ ಲಕ್ಷ್ಮೀನಾರಾಯಣ ಕಶ್ಯಪ್) ತೀರ್ ಪೋಯೆರ್.
ಮೇರೆಗ್ 85 ವರ್ಷ ಆದಿತ್ತ್ಂಡ್. ಅಧ್ಯಾತ್ಮಿಕ ಸಂಘಟನೆ ಸಾಕ್ಷಿ ಟ್ರಸ್ಟ್ದ ಸ್ಥಾಪಕೆರಾದಿತ್ತಿನ ಮೆರೆಗ್ 2021ಟ್ ಕೇಂದ್ರ ಸರ್ಕಾರ ಪದ್ಮಶ್ರೀ ಪುರಸ್ಕಾರ ಕೊರ್ದು ಗೌರವಿಸಾದ್ಂಡ್. ಗಣಿತಶಾಸ್ತ್ರಜ್ಞೆರ್ ಆದಿತ್ತಿನ ಮೇರ್, ಎಲೆಕ್ಟ್ರಿಕಲ್ ಎಂಜಿನಿಯರಿಂಗ್ ಓದುದೆರ್. 1982ಟ್ ಗಣಿತಶಾಸ್ತ್ರಗ್ ಸಂಬಂಧ ಪಟ್ಟಿನಂಚಿನ, ಕಶ್ಯಪ್ ಇನ್ಫಾರ್ಮೇಶನ್ ಕ್ರಿಯೇಷನ್ (ಕೆಐಸಿ) ಮಂಡನೆ ಮಲ್ತ್ ದ್, ಅಂತಾರಾಷ್ಟ್ರೀಯ ಮಟ್ಟಡ್ ಪುದರ್ ಪಡೆತೆರ್.
ಸೌದಿ : ಸೌದಿ ಅರೇಬಿಯಾಡ್ ಒಂಟೆಗ್ ಒಂಟೆಗ್ ಗುದ್ದಿನ ಕಾರಣ 5 ಜವನೆರ್ ತೀರ್ ಪೋಯಿನ ಘಟನೆ ಅಲ್ ಅಹ್ಮರ್ ಲೈಲಾ ಸಾದಿದ ಆಫ್ಲಾಜ್ನಿoದ 30 ಕಿ. ಮೀ ದೂರಡ್ ನಡತ್oಡ್.
ಈ ಜಾಗೆಡ್ ಮಸ್ತ್ ಸರ್ತಿ ಇಂಚಿನ ಘಟನೆಲು ನಡತ್oಡ್. ಅತ್ತoದೆ ಈ ಜಾಗೆಡ್ ಮಸ್ತ್ ಜನ ತೀರ್ ಪೋತೆರ್.
ಕಾಂತಾರ ಪಿಚ್ಚರ್ ದ ವರಾಹ ರೂಪo ಪದನ್ ಯೂಟ್ಯೂಬ್ ಬೊಕ್ಕ ಮ್ಯೂಸಿಕ್ ಆಪ್ ರ್ದ್ ಡಿಲೀಟ್ ಮಲ್ತ್ ದೆರ್.
ಮಲಯಾಲಂ ನವರಸಂ ಆಲ್ಬಮ್ ರ್ದ್ ಟ್ಯೂನ್ ಕಂಡಿನ ಆರೋಪ ಕೇಂದ್ ಬತ್ತಿತ್oಡ್. ಉಂದೆಕ್ಕ್ ಸಂಬಂದಿಸಾದ್ ತೈಕ್ಕುಡಂ ಬ್ರಿಡ್ಜ್ ಕೇಸ್ ದಾಖಲ್ ಮಲ್ತಿತ್ತ್oಡ್. ವಿಚಾರಣೆ ಮಲ್ತಿನ ಕೇರಳದ ಕೋರ್ಟ್, ಒಪ್ಪಿಗೆ ಇಜ್ಜಂದೆ ಪದನ್ ಪ್ರಸಾರ ಮಲ್ಪರೆ ಇಜ್ಜಿ ಪಂದ್ ಪ್ರಸಾರಗ್ ತಡೆ ಪಾಡ್ ದಿತ್ತ್oಡ್. ಇತ್ತೆ ಕೋರ್ಟ್ ಆದೇಶಗ್ ತರೆ ತಗ್ಗಾಯಿನ ಪಿಚ್ಚರ್ ದ ತಂಡ ಪದನ್ ಡಿಲೀಟ್ ಮಲ್ತ್ ದ್oಡ್.
ದಿಲ್ಲಿ: ಜಗತ್ತ್ದ ಮಲ್ಲ ಇ-ಕಾಮರ್ಸ್ ಕಂಪೆನಿ ಅಮೆಜಾನ್ ಲ, ಸಿಬ್ಬಂದಿಲೆನ್ ಬೇಲೆರ್ದ್ ದೆಪ್ಪರೆ ದುಂಬಾತ್ಂಡ್. ಕಂಪೆನಿಗ್ ಲಾಭ ಕನವಂದಿನ ವಿಭಾಗಲೆಡ್ ಬೇಲೆ ಮಲ್ಪುನಕ್ಲೆನ್ ದೆಪ್ಪರೆ ನಿರ್ಧಾರ ಮಲ್ತ್ದ್ಂಡ್.
ರೋಬೋಟಿಕ್ಸ್ ವಿಭಾಗಡ್ ಬೇಲೆ ಮಲ್ಪುನ ಮಾತರೆನ್ಲಾ ಬೇಲೆರ್ದ್ ದೆಪ್ಪರೆ ಉಂಡು ಪಂದ್ ಜೆಮೀ ಝಾಂಗ್ ಪನ್ಪಿನಾರ್ ಜಾಲತಾಣ ವೊಂಜೆಟ್ಟ್ ಬರೆದ್ ಪಾಡ್ದೆರ್.
ತುಮಕೂರು: ಇಲ್ಲಲ್ ಇತ್ತಿನ ಫ್ರಿಡ್ಜ್ ದ ಪಿರವು ದೆಂಗ್ ದ್ ಕುಲ್ಲುದ್ ಇತ್ತಿನ ಸುಮಾರ್ ಆಜಿ ಅಡಿ ಉದ್ದದ ಉಚ್ಚುನು ರಕ್ಷಣೆ ಮಲ್ದಿನ ಘಟನೆ ನಡತ್ಂಡ್.
ಕುಣಿಗಲ್ ತಾಲೂಕ್ ದ ಕೊತ್ತಗೆರೆ ಗ್ರಾಮದ ಮಹೇಶ್ ಪನ್ಪುನರೆನ ಇಲ್ಲದ ಫ್ರಿಡ್ಜ್ ದ ಪಿರವು ಈ ಉಚ್ಚು ಇತ್ತ್ಂಡ್. ಇಚಾರ ತೆರಿದ್ ಜಾಗೆಗ್ ಬತ್ತಿನ ಉರಗ ತಜ್ಞೆ ಮಹಾಂತೇಶ್ ಉಚ್ಚುನ್ ಪತ್ತ್ ದ್ ಕಾಡ್ ಗ್ ಬುಡ್ತೆರ್.
ಸವದತ್ತಿ: ಸವದತ್ತಿದ ಕುಮಾರೇಶ್ವರ ಶಾಲೆಗ್ ಬರೊಂದು ಇತ್ತಿನ ಶಾಲೆದ ಗಾಡಿ ಪಲ್ಟಿಯಾದ್ 12 ವಿದ್ಯಾರ್ಥಿಲೆಗ್ ಪೆಟ್ಟಾಯಿನ ಘಟನೆ ನಡತ್ಂಡ್.
ಈ ಘಟನೆಡ್ ಪೆಟ್ಟಾಯಿನಕಲೆನ್ ಸವದತ್ತಿ ಸರ್ಕಾರಿ ಆಸ್ಪತ್ರೆ ಬೊಕ್ಕ ಒರಿಯನ್ ಧಾರವಾಡ ಜಿಲ್ಲಾಸ್ಪತ್ರೆಗ್ ದಾಖಲ್ ಮಲ್ದೆರ್.
ಕುಡ್ಲ: ದಕ್ಷಿಣ ಕನ್ನಡ ಜಿಲ್ಲೆದ 8 ವಿಧಾನ ಸಭಾ ಕ್ಷೇತ್ರದ ಮತದಾರೆರ್ನ ಕರಡು ಪಟ್ಟಿ ಬುಧಾರ ನ.9 ಗ್ ಪ್ರಕಟಿಸಾದೆರ್. ಇಂಚಾದ್ ಜಿಲ್ಲೆಡ್ ಒಟ್ಟು 17,08,955 ಮತದಾರೆರ್ ಪಟ್ಟಿಡ್ ಉಲ್ಲೆರ್. ಕರಿನ ವರ್ಷ ಮತದಾರೆರ್ನ ಪಟ್ಟಿನ್ ತೂಂಡಾ ಜಿಲ್ಲೆಡ್ ಮತದಾರೆರ್ನ ಸಂಖ್ಯೆ 44,373 ದಾತ್ ಕಮ್ಮಿ ಆತ್ಂಡ್.
ಈ ಬಗೆಟ್ ಸುದ್ದಿಗೋಷ್ಠಿಡ್ ಸುಕ್ರಾರ ಮಾಹಿತಿ ಕೊರಿನ ಜಿಲ್ಲಾಧಿಕಾರಿ ಎಂ.ಆರ್.ರವಿಕುಮಾರ್, “ಕರಿನ ವರ್ಷ ಮತೆದಾರೆರ್ನ ಪಟ್ಟಿಡ್ 17,53,328 ಜನಕ್ಲೆನ ಪುದರ್ ಇತ್ತ್ಂಡ್. 8 ವಿಧಾನಸಭಾ ಕ್ಷೇತ್ರದ ಮತದಾರೆರ್ನ ಪಟ್ಟಿನ್ ಪರಿಷ್ಕರಣೆ ಮಲ್ಪುನಗ ಮಸ್ತ್ ಮತದಾರೆರ್ ಬೇತೆ ಕಡೆಟ್ಟ್ ಕ್ಷೇತ್ರರ್ದ್ ಪಿದಯಿ ಪೋದು ಇಪ್ಪುನವು ತೋಜಿದ್ ಬೈದ್ಂಡ್. ನನ ಕೆಲವೆರ್ ತೀರ್ ಪೋತೆರ್. ಇಂಚಿನ 73,783 ಮತದಾರೆರ್ನ ಪುದರ್ನ್ ಪಟ್ಟಿರ್ದ್ ಕೈ ಬುಡ್ತ. ಈ ವರ್ಷ ಪೊಸತ್ತಾದ್ 29,410 ಮತದಾರೆರೆನ್ ಸೇರ್ಪಡೆ ಮಲ್ತ್ದ. ಒಟ್ಟಾರೆಯಾದ್ ಕರಿನ ವರ್ಷಗ್ ತೂಂಡ ಈ ಸರ್ತಿ ಮತದಾರೆರ್ನ ಸಂಖ್ಯೆ 44,373 ದಾತು ಕಮ್ಮಿ ಆತೆರ್. ಮತದಾರೆರ್ ಕರಡು ಪಟ್ಟಿಗ್ ಸೇರಿಯರೆ ಇತ್ತ್ಂಡ ಡಿ.8 ಕಡೆತ್ತ ತೇದಿ ಪಂದ್ ತೆರಿಪಾಯೆರ್.
ಪೊಸ ಸೇರ್ಪಡೆಗ್ ಅಭಿಯಾನ್:
18 ವರ್ಷ ದಿಂಜಿನ ಮತದಾರೆರ್ನ ಸೇರ್ಪಡೆಗ್ ನ.12, ನ.20, ಡಿ.3 ಅಂಚನೆ ಡಿ.4 ಕ್ಕ್ 8 ವಿಧಾನಸಭಾ ಕ್ಷೇತ್ರಡ್ಲ ವಿಶೇಷ ಅಭಿಯಾನ ಮಲ್ಪರೆ ಉಂಡು. ಪಟ್ಟಿಗ್ ಪೊಸತ್ತಾದ್ ಸೇರ್ಪಡೆ ಆಪಿನ ಪುದರ್ಗ್ ಡಿ.26 ತ್ತ ಉಲಯಿ ಸೇರಿಸಾವೊಲಿ. ಪರಿಷ್ಕೃತ ಪಟ್ಟಿನ್ 2023 ತ್ತ ಜ.1 ಕ್ಕ್ ಕಡೆ ಮಲ್ತ್ದ್, ಜ.3 ಕ್ಕ್ ಪ್ರಿಂಟ್ಗ್ ಕಡಪಾಯರೆ ಉಂಡು. ಜ.5 ಕ್ಕ್ ಪರಿಷ್ಕೃತ ಪಟ್ಟಿ ತಿಕ್ಕುಂಡು. ಜಿಲ್ಲೆಡ್ 8 ಕ್ಷೇತ್ರಡ್ ಒಟ್ಟು 1860 ಮತಗಟ್ಟೆಲು ಉಲ್ಲ ಪಂದ್ ಮಾಹಿತಿ ಕೊರಿಯೆರ್.
ನನ ದುಂಬುಗು ಪುದರ್ ಸೇರ್ಸಾವರೆ ಕಾಪೊಡು ಪಂದ್ ಇಜ್ಜಿ. ವರ್ಷಡ್ ನಾಲ್ ತಾರೀಕ್ಡ್ ಪುದರ್ ಸೇರ್ಸಾವೊಲಿ. ಜನವರಿ 1, ಏಪ್ರಿಲ್ 1, ಜುಲೈ 1 ಬೊಕ್ಕ ಅಕ್ಟೋಬರ್ 1 ಕ್ಕ್ ಪುದರ್ ಸೇರ್ಪಡೆ ಮಲ್ಪೊಲಿ. ಅಡೆ ಮುಟ್ಟ 18 ವರ್ಷ ದಿಂಜಿನಕ್ಲೆನ ಪುದರ್ನ್ ಮತದಾರೆರ್ನ ಪಟ್ಟಿಗ್ ಸೇರಿಸಾಯರೆ ಅವಕಾಶ ಉಂದು ಪಂದ್ ಜಿಲ್ಲಾಧಿಕಾರಿ ಮಾಹಿತಿ ಕೊರಿಯೆರ್.
