ಬಾಗಲಕೋಟೆ: ದ್ಯಾಮಪ್ಪ ಪನ್ಪುನರೆನ ಬಂಜಿರ್ದ್ ಸುಮಾರ್ 187 ಕಾಯಿನ್ ಲೆನ್ ಡಾಕ್ಟರ್ ನಕುಲು ಆಪರೇಶನ್ ಮಲ್ತ್ ದೆತ್ತಿನ ಘಟನೆ ಬಾಗಲಕೋಟೆದ ಲಿಂಗಸೂರುಡ್ ನಡತ್ಂಡ್.
ಮೇರ್ ಸುಮಾರ್ 187 ನಾಣ್ಯಲೆನ್ ನಿಂಗ್ ದ್ ಹುಷಾರ್ ಇಜ್ಜಂದೆ ಆದ್, ಬಾಗಲಕೋಟೆದ ಕುಮಾರೇಶ್ವರ ಆಸ್ಪತ್ರೆಗ್ ದಾಖಲ್ ಆದಿತ್ತೆರ್. ಅಲ್ಪ ಡಾಕ್ಟರ್ ನಕುಲು ಎಕ್ಸರೇ ಮಲ್ತ್ ದ್ ತೂನಗ ಬಂಜಿದ ಉಲಯಿ ನಾಣ್ಯ ಇಪ್ಪುನವು ಗೊತ್ತಾದ್, ಕೂಡ್ಲೆ ಎಂಡೊಸ್ಕೋಪಿ ಮುಖೇನ ಮಾತ ನಾಣ್ಯಲೆನ್ ಪಿದಯಿ ದೆಯಿದೆರ್.
ಸುಬ್ರಹ್ಮಣ್ಯ: ಮಹಾತೋಭಾರ ಕುಕ್ಕೆಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಚಂಪಾ ಷಷ್ಠಿ ಜಾತ್ರೆದ ಕಾರ್ತಿಕ ಶುದ್ಧ ಪಂಚಮಿದ ದಿನವಾಯಿನ ಸೋಮಾರ ಶ್ರೀ ದೇವಲ್ಯಡ್ ನುಪ್ಪು ಪುರ್ಸಾದದ ಪಲ್ಲಪೂಜೆ ನಡತ್ಂಡ್.
ಮಲ್ಲ ಅರ್ಚಕೆರ್ ವೇದಮೂರ್ತಿ ಸೀತಾರಾಮ ಎಡಪಡಿತ್ತಾಯೆರ್ ಪಲ್ಲಪೂಜೆ ಮಲ್ತೆರ್. ಬೊಕ್ಕ ಅಕ್ಷಯ ಪಾತ್ರೆಗ್ ಪೂಜೆ ಆಂಡ್. ಪುರೋಹಿತೆರ್ ಪ್ರಸನ್ನ ಹೊಳ್ಳ ಆದಿಸುಬ್ರಹ್ಮಣ್ಯ ಭೋಜನ ಶಾಲೆಡ್ ಅನ್ನಬ್ರಹ್ಮಗ್ ಪೂಜೆ ಸಂದಾಯೆರ್. ಬೊಕ್ಕ ಪ್ರಸಾದ ಕೊರಿಯೆರ್. ಕುಕ್ಕೆಸುಬ್ರಹ್ಮಣ್ಯ ಕ್ಷೇತ್ರ ನಿರಂತರ ಅನ್ನದಾನ ಕೊರ್ಪುನ ಕ್ಷೇತ್ರ ಆಯಿರ್ನೆದಾವೆರ ಪಂಚಮಿದ ದಿನ ಅನ್ನಪ್ರಸಾದಗ್ ಪೂಜೆ ಆಂಡ್. ಈ ಪೊರ್ತುಡು ಶ್ರೀ ದೇವಲ್ಯದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷೆರ್ ಮೋಹನರಾಂ ಸುಳ್ಳಿ, ಕಾರ್ಯನಿರ್ವಹಣಾಧಿಕಾರಿ ಡಾ.ನಿಂಗಯ್ಯ, ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್ ಪ್ರಸನ್ನ ದರ್ಬೆ, ಶ್ರೀವತ್ಸ ಬೆಂಗ್ಲೂರ್, ವನಜಾ.ವಿ.ಭಟ್, ಮನೋಹರ ರೈ, ಎಸ್ ಎಸ್ಪಿಯು ಕಾಲೇಜ್ ದ ಪ್ರಾಚಾರ್ಯ ಸೋಮಶೇಖರ ನಾಯಕ್, ಮಾಸ್ಟರ್ ಪ್ಲಾನ್ ಸಮಿತಿ ಸದಸ್ಯೆರ್ ಚಂದ್ರಶೇಖರ್ ಮರ್ದಾಳ, ಮನೋಜ್ ಸುಬ್ರಹ್ಮಣ್ಯ, ಅಧೀಕ್ಷಕ ಪದ್ಮನಾಭ ಶೆಟ್ಟಿಗಾರ್, ಶ್ರೀ ದೇವಲ್ಯದ ದೇವಣ್ಣ ಗೌಡ, ಮಹಾಬಲೇಶ್ವರ ದೋಳ, ಬಾಲಸುಬ್ರಹ್ಮಣ್ಯ ಮಾರರ್, ಲೋಕೇಶ್ ಎ.ಆರ್, ರವೀಂದ್ರ ಎನ್.ಎಸ್, ನಿರಂಜನ ಭಟ್, ದೇವಲ್ಯದ ಸಿಬ್ಬಂದಿಲು ಬೊಕ್ಕ ಭಕ್ತೆರ್ ಇತ್ತೆರ್.
ಬೊಲ್ತೇರ್: ಬೊಲ್ತೇರ್ ತಾಲೂಕ್ ದ ಅಳದಂಗಡಿ ಗ್ರಾಮದ ಹಂಬಳ ಫಲ್ಕೆ ನಿವಾಸಿ ಸುಕೇಶ್ ಮೆರೆನ ಇಲ್ಲಲ್ ಅಟಿಲ್ದ ಕೋಣೆಗ್ ಸುಮಾರ್ 12 ಆಡಿತ ಕಾಳಿಂಗ ಸರ್ಪ ಒಂಜಿ ದೆಂಗ್ ದ್ ಕುಲ್ಲುದು ಇತ್ತ್ಂಡ್.
ಈ ಸರ್ಪನ್ ಉರಗಪ್ರೇಮಿ ಅಶೋಕ್ ಮೇರ್ ರಕ್ಷಣೆ ಮಲ್ತ್ ದ್ ಕಾಡ್ ಗ್ ಬುಡಿಯೆರ್.
ಗದಗ: ರಾಜ್ಯದ ಗದಗ ಜಿಲ್ಲೆದ ರೈತ ಒರಿ 415 ಕಿಲೋ ಮೀಟರ್ ಪ್ರಯಾಣ ಮಲ್ತ್ ದ್ ಬೆಂಗ್ಲೂರ್ ದ ಯಶವಂತಪುರ ಮಾರ್ಕೆಟ್ ಡ್ 205 ಕಿಲೋ ನೀರುಳ್ಳಿ ಮಾರ್ದೆರ್. ಆಂಡ ಅರೆಗ್ ಈತ್ ದೂರ ಬತ್ತ್ ದ್ ಮಾರಿನೆಕ್ಕ್ ಖಾಲಿ 8.36 ರೂಪಾಯಿ ಮಾತ್ರ ತಿಕ್ಕ್ ದ್ಂಡ್.
ನೆತ್ತ ಮಾರಿನ ರಶೀದಿದ ಪ್ರತಿನ್ ಮೇರ್ ಸಾಮಾಜಿಕ ಜಾಲ ತಾಣಡ್ ಪಾಡ್ದೆರ್.
ಸುಳ್ಯ: ಬೈತಡ್ಕ ನಿವಾಸಿ ದಿ. ಶಿವರಾಯ ಮೆರೆನ ಬೊಡೆದಿ ಕಮಲ (64 ) ಒರ್ತಿಯೇ ಇಲ್ಲಲ್ ಇತ್ತಿನ ಪೊರ್ತುಡು ಅಡ್ರೆಸ್ ಕೇನುನ ನೆಪಟ್ ಬೈಕ್ಡ್ ಬತ್ತಿನ ವ್ಯಕ್ತಿಯೊರಿ ಬಂಗಾರ್ ದ ಸರೊನು ಕಂಟೆಲ್ ರ್ದ್ ಒಯಿತೊಂದು ಬಲಿತಿನ ಘಟನೆ ಕೋಡೆ (ನ.28) ಬೊಲ್ಪುಗು ಸುಳ್ಯ ಜಾಲ್ಸೂರು ಗ್ರಾಮದ ಅಡ್ಕಾರ್ ಬೈತಡ್ಕ ವೈಲ್ಡ್ ಕೆಫೆತ ಕೈತಲ್ ನಡತ್ಂಡ್.
ಈ ಬಗೆಟ್ ಕಮಲ ಮೇರ್ ದೂರು ಕೊರ್ತೆರ್. ಸುಳ್ಯ ಪೊಲೀಸೆರ್ ಕಲ್ವನ ಪತ್ತೆಗಾದ್ ತನಿಖೆ ಮಲ್ತೊಂದು ಉಲ್ಲೆರ್.
ರಡ್ಡ್ ತಿಂಗೊಲ್ದ ಆನ್ ಬಾಲೆ ತನ್ನ ಅಜ್ಜೆರ್ ನೊಟ್ಟಿಗೆ ಪದ್ಯ ಪನ್ಪುನ ವಿಡಿಯೋ ವೈರಲ್ ಆತ್ಂಡ್.
ಈ ವೀಡಿಯೊನ್ ಗುಡ್ನ್ಯೂಸ್ ಮೂವ್ಮೆಂಟ್ದ Instagram ಹ್ಯಾಂಡಲ್ಡ್ ಪಾಡ್ದೆರ್. ನೆನ್ ಸಾರ ಸಾರ ತೂದು ಜನಕುಲು ಪ್ರತಿಕ್ರಿಯೆ ಕೊರ್ತೆರ್.
ಧರ್ಮಸ್ಥಳ: ಭಾರತದ ರಕ್ಷಣಾ ಸಚಿವಾಲಯರ್ದ್ ಪೂನಾದ ಕೇಂದ್ರೀಯ ರಕ್ಷಣಾ ಡಿಪೋದ ಮುಖೇನ ಅಂಗಾರೆ ಧರ್ಮಸ್ಥಳದ ಮಂಜೂಷಾ ಸಂಗ್ರಹಾಲಯಗ್ ಟಿ-565 ಟ್ಯಾಂಕ್ ಕೊಡುಗೆಯಾದ್ ಕೊರಿಯೆರ್.
ದೇಶದ ರಕ್ಷಣಾ ಕಾರ್ಯಡ್ ಸುಮಾರ್ 40 ವರ್ಷದ ಕಾಲ ಉಂದು ಬಳಕೆ ಆತ್ಂಡ್. 1971ತ ಇಂಡೋ ಪಾಕ್ ಯುದ್ಧಡ್ ಬೊಕ್ಕ ಬಾಂಗ್ಲಾದೇಶ ವಿಮೋಚನಾ ಲಡಾಯಿದ ಉಂದೆನ್ ಗಲಸ್ ದಿತ್ತೆರ್. ನನ 40 ಟನ್ ದಾತ್ ತೂಕ ಇಪ್ಪುನ ಟ್ಯಾಂಕ್ 9 ಅಡಿ ಎತ್ತರ, 27. 6ಅಡಿ ಉದ್ದ ಬೊಕ್ಕ 10.8 ಅಗಲ ಉಂಡು. ನೆತ್ತ ಗರಿಷ್ಠ ವೇಗ ಗಂಟೆಗ್ 51 ಕಿ.ಮೀ. ಸಾಮರ್ಥ್ಯ ಉಂಡು. 1968ಟ್ ಭಾರತೀಯ ಸೇನೆಗ್ ನೆನ್ ಸೇರ್ಸಾದಿತ್ತೆರ್. ಸೋವಿಯತ್ ಒಕ್ಕೂಟ ಸಿಬ್ಬಂದಿ ನೆನ್ ತಯಾರ್ ಮಲ್ದೆರ್.
ವಿಟ್ಲ: ಕರೆಂಟ್ ಶಾಕ್ ಹಾಕ್ ದ್ ನಾರಾಯಣ ನಾಯ್ಕ ಮೆರೆನ ಮಗೆ ಜಿತೇಶ್ (17) ತೀರ್ ಪೋಯಿನ ಘಟನೆ ಮಂಜೇಶ್ವರ ತಾಲೂಕ್ ದ ಎಣ್ಮಕಜೆ ಗ್ರಾಮ ಪಂಚಾಯತ್ ವ್ಯಾಪ್ತಿದ ಅಡ್ಯನಡ್ಕದ ಸಾಯ ಪನ್ಪುನಲ್ಪ ನಡತ್ಂಡ್.
ಒಂಜಿ ಜನ ಪಂಜಿ ಪತ್ತೆರೆ ಕಂಡಡ್ ಕರೆಂಟ್ ಪಾಡ್ದ್ ಇತ್ತಿನವೇ ಈ ಘಟನೆಗ್ ಕಾರಣ ಪಂದ್ ಆರೋಪ ಮಲ್ತಿನ ಮೆಸೇಜ್ ಲು ಸಾಮಾಜಿಕ ಜಾಲತಾಣಡ್ ವೈರಲ್ ಆತ್ಂಡ್. ಈ ಬಗೆಟ್ ಪೊಲೀಸೆರ್ ಸರಿಯಾಯಿನ ಕ್ರಮ ದೆತೊನೊಡು ಪಂದ್ ನಾಗರಿಕೆರ್ ಒತ್ತಾಯ ಮಲ್ದೆರ್. ಈ ಜವನನ ಪುನನ್ ವಿಟ್ಲ ಸಮುದಾಯ ಆರೋಗ್ಯ ಕೇಂದ್ರದ ಶವಗಾರಡ್ ದೀತೆರ್. ಬದಿಯಡ್ಕ ಠಾಣೆ ಪೊಲೀಸೆರ್ ಜಾಗೆಗ್ ಬತ್ ದ್, ಮಾಹಿತಿ ಸಂಗ್ರಹ ಮಲ್ದೆರ್.
ವೇಣೂರ್ದ ಪೆರ್ಮುಡಡ್ 30ನೇ ವರ್ಷದ ಸೂರ್ಯ-ಚಂದ್ರ ಜೋಡು ಕರೆ ಕಂಬುಲ ಡಿ.3 ತಾರೀಕ್ ಸನಿವಾರದಾನಿ ನಡಪರೆ ಉಂಡು.
ಅಳದಂಗಡಿ ಅರಮನೆತ್ತ ತಿಮ್ಮಣ್ಣರಸೆರ್ ಡಾ| ಪದ್ಮಪ್ರಸಾದ್ ಅಜಿಲೆರ್ ಲೇಸ್ನ್ ಉದಿಪನ ಮಲ್ಪರೆ ಉಲ್ಲೆರ್. ಅಂಚನೆ ವೇಣೂರು ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಯನ್. ಪುರುಷೋತ್ತಮ ರಾವ್ ಲೇಸ್ದ ಗುರ್ಕಾರ್ಮೆ ವಹಿಸೊನರೆ ಉಲ್ಲೆರ್. ಅಂಚನೆ ಈ ಲೇಸ್ಗ್ ಮಸ್ತ್ ಮಾಮಲ್ಲ ಬಿನ್ನೆರ್ ಪಾಲ್ ಪಡೆಯರೆ ಉಲ್ಲೆರ್.
ಬೆಂಗ್ಳೂರ್: 2023 ತ್ತ ಮಾರ್ಚ್ 9 ರ್ದ್ 29 ಮುಟ್ಟ ದ್ವಿತೀಯ ಪಿಯುಸಿ ವಾರ್ಷಿಕ ಪರೀಕ್ಷೆ ನಡಪರೆ ಉಂಡು ಪಂದ್ ಶಿಕ್ಷಣ ಸಚಿವೆರ್ ಬಿ.ಸಿ. ನಾಗೇಶ್ ತೆರಿಪಾದೆರ್.
ಈ ಬಗೆಟ್ ಟ್ವೀಟ್ ಮಲ್ತಿನ ಆರ್, ದ್ವಿತೀಯ ಪಿಯುಸಿ ವಾರ್ಷಿಕ ಪರೀಕ್ಷೆದ ಟೈಮ್ ಟೇಬಲ್ ಪ್ರಕಟಣೆ ಆತ್ಂಡ್. 2023 ತ್ತ ಮಾರ್ಚ್ 9 ರ್ದ್ ಮಾರ್ಚ್ 29 ಮುಟ್ಟ ಪರೀಕ್ಷೆ ನಡೆಪರೆ ಉಂಡು ಪಂದ್ ತೆರಿಪಾದೆರ್.
