ತೊಕ್ಕೊಟ್ಟು : ಭಗತ್ ಸಿಂಗ್ ಸೇವಾ ಪ್ರತಿಷ್ಠಾನದ ಗೂಡುದೀಪ ಕೂಟ ಸಮಿತಿದ ವತಿರ್ದ್ ನಡತಿನ ಗೂಡುದೀಪ ಸಂಗಮ-ದೀಪಾವಳಿ ಸಂಭ್ರಮ, ಗೂಡುದೀಪ ಕೂಟ, ಭಗತ್ ಸಿಂಗ್ ಸಾಧಕೆರ್ ಪ್ರಶಸ್ತಿ ಬೊಕ್ಕ ಕರುನಾಡ ರತ್ನ ಅಪ್ಪು ಸೇವಾ ಪ್ರಶಸ್ತಿ ಪಟ್ಟುನ ಲೇಸ್ ಕುತ್ತಾರ್ ಶ್ರೀ ರಾಜರಾಜೇಶ್ವರಿ ಕ್ಷೇತ್ರಡ್ ನಡತ್ಂಡ್.
ಈ ಲೇಸ್ ನ್ ದೀಪ ಪೊತ್ತ್ ದ್ ಉದಿಪನ ಮಲ್ತಿನ ರಾಜ್ಯ ಹಿಂದುಳಿದ ವರ್ಗದ ಆಯೋಗದ ನಿರ್ದೇಶೆಕೆರ್ ಕೆ.ಟಿ.ಸುವರ್ಣ ಮೇರ್ ಪಾತೆರ್ದ್, ದೀಪ ಮಾತೆರೆಗ್ಲಾ ಬೊಲ್ಪು ಕೊರ್ಪುನ ರೀತಿಡ್, ಭಗತ್ ಸಿಂಗ್ ಸೇವಾ ಪ್ರತಿಷ್ಠಾನ ಸಮಾಜಡ್ ಬೇತೆ ಬೇತೆ ಲೇಸ್ ದ ಮುಖೇನ ಬೊಲ್ಪು ಆಪುನ ಕಜ್ಜ ಮಲ್ತೊಂದು ಉಂಡು. ಗೂಡುದೀಪ ಲೇಸ್ ದ ಒಟ್ಟೊಟ್ಟಿಗೆ ಪರಿಸರ ಸ್ನೇಹಿ, ರಾಷ್ಟ್ರ ಚಿಂತನೆದ ಕಜ್ಜನ್ ನಡಪಾದ್ ಯುವ ಸಮುದಾಯಗ್ ಮಾದರಿ ಆತೆರ್ ಪಂದ್ ಪಂಡೆರ್. ಅಧ್ಯಕ್ಷತೆ ವಹಿಸೊನ್ನ ರಾಜ್ಯ ಅಲೆಮಾರಿ/ಅರೆ ಅಲೆಮಾರಿ ಅಭಿವೃದ್ಧಿ ನಿಗಮದ ನಿಕಟಪೂರ್ವ ಅಧ್ಯಕ್ಷೆರ್ ರವೀಂದ್ರ ಶೆಟ್ಟಿ ಉಳಿದೊಟ್ಟು, ಹಿರಿಯೆರೆನ್ ಬೊಕ್ಕ ಸಮಾಜ ಕಾರ್ಯಗಾದ್ ನಿಸ್ವಾರ್ಥವಾದ್ ಬೆಂದಿನಕಲೆನ್ ಗುರುತಿಸಾದ್ ಗೌರವಿಸವೊನೆ ಎಡ್ಡೆ ಕಜ್ಜ ಪಂದ್ ಪಂಡೆರ್. ಭಗತ್ ಸಿಂಗ್ ಸಾಧಕ ಪ್ರಶಸ್ತಿನ್ ಹಿರಿಯ ಸಮಾಜ ಸೇವಕೆರ್, ಕಬಡ್ಡಿ ಕ್ರೀಡಾ ಪಟು, ಪಿಲಿ ಏಸದ ಪೋಷಕೆರ್, ಕುಡ್ಲ ಮಹಾನಗರ ಪಾಲಿಕೆದ ಸದಸ್ಯರಾದ್ ಜನಸೇವೆ ಮಲ್ದಿತ್ತಿನ ಬಜಿಲಕೇರಿ ಕಮಲಾಕ್ಷ ಮೇರೆಗ್ ಬೊಕ್ಕ ಕರುನಾಡ ರತ್ನ ಅಪ್ಪು ಸೇವಾ ಪ್ರಶಸ್ತಿನ್ ಕುಡ್ಲ ಗಣೇಶ್ ಅಂಬ್ಯುಲೆನ್ಸ್ ದ ಮಾಲಕೆರ್, ಚಾಲಕೆರ್ ಆಯಿನ ಅನಾಥ ಶವಗ್ ಮುಕ್ತಿ ಕೊರೊಂದು ಇತ್ತಿನ, ಬಡ ರೋಗಿಲೆಗ್ ಧರ್ಮೊಗ್ ಬೊಕ್ಕ ಒವ್ವೇ ಪೊರ್ತುಡು ಕೂಡ್ಲೆ ಸ್ಪಂದಿಸಾವೊಂದು ಇತ್ತಿನ, ಕೋವಿಡ್ ಪೊರ್ತುಡುಲ ಪೋಡ್ಯಂದೆ ತನ್ನ ಅಂಬ್ಯುಲೆನ್ಸ್ ಸೇವೆನ್ ಕೊರೊಂದು ಇತ್ತಿನ ದಿ. ಕೆ. ಗಂಗಾಧರ್ ಮೇರೆಗ್ ಮರಣೋತ್ತರವಾದ್ ಕೊರಿಯೆರ್. ನೆನ್ ಮೇರೆನ ಧರ್ಮಪತ್ನಿ ಚಿತ್ರಾ ಸ್ವೀಕಾರ ಮಲ್ತೆರ್. ಈ ಪೊರ್ತುಡು ಬಿನ್ನೆರಾದ್ ಮೈಸೂರ್ ಇಲೆಕ್ಟ್ರಿಕಲ್ ಇಂಡಸ್ಟ್ರೀಸ್ ಲಿಮಿಟೆಡ್ ದ ನಿಕಟಪೂರ್ವ ಅಧ್ಯಕ್ಷೆರ್ ಸಂತೋಷ್ ಕುಮಾರ್ ರೈ ಬೋಳಿಯಾರ್, ಗೆಜ್ಜೆಗಿರಿ ನಂದನ ಬಿತ್ತಿಲ್ ಕ್ಷೇತ್ರದ ಟ್ರಸ್ಟೀ ಚಂದ್ರಶೇಖರ ಉಚ್ಚಿಲ, ಬಾಲಕೃಷ್ಣ ಮಂದಿರ ಕುಂಪಲ ಅಧ್ಯಕ್ಷೆರ್ ಸತೀಶ್ ಕುಂಪಲ, ಕುತ್ತಾರು ಶ್ರೀ ರಾಜರಾಜೇಶ್ವರಿ ದೇವಲ್ಯದ ಅಧ್ಯಕ್ಷೆರ್ ವಿವೇಕಾನಂದ ಎಲ್.ಸನಿಲ್, ಕಾಪಿಕಾಡ್ ಶ್ರೀ ಉಮಾಮಹೇಶ್ವರಿ ದೇವಲ್ಯದ ಮೊಕ್ತೇಸರೆರ್ ದಿನೇಶ್ ಕೆ.ಅತ್ತಾವರ, ಜಿಲ್ಲಾ ಪಂ.ಮಾಜಿ ಸದಸ್ಯೆರ್ ಧನಲಕ್ಷ್ಮೀ ಗಟ್ಟಿ, ದ.ಕ. ಮೂಲ್ಯರ ಯಾನೆ ಕುಲಾಲರ ಮಾತೃ ಸಂಘದ ಪ್ರಧಾನ ಕಾರ್ಯದರ್ಶಿ ಸದಾಶಿವ ಕುಲಾಲ್, ಮಾಜಿ ಸೇನಾನಿ ಸಂದೀಪ್ ಶೆಟ್ಟಿ ಕೊಲ್ಯ, ಬಜರಂಗದಳ ಜಿಲ್ಲಾ ಸಂಚಾಲಕೆರ್ ಭರತ್ ಕುಮ್ಡೇಲು, ಯುವ ಉದ್ಯಮಿ ಪ್ರಸಾದ್ ಮಡ್ಯಾರು, ಹೊಟೇಲ್ ಶಿವಸಾಗರ್ ಮಾಲಕೆರ್ ಸುಚೀವೃತ ಶೆಟ್ಟಿ ಇತ್ತೆರ್. ಜಿಲ್ಲೆದ ಬೇತೆ ಬೇತೆ ಕಡೆರ್ದ್ ಬತ್ತಿನ ನೂದೆರ್ದ್ಲಾ ಹೆಚ್ಚ ಗೂಡುದೀಪಲು ಲೇಸ್ ಡ್ ಪೊರ್ಲು ಕೊರ್ಯ. ಪ್ರತಿಷ್ಠಾನದ ಅಧ್ಯಕ್ಷೆರ್ ಜೀವನ್ ಕುಮಾರ್ ತೊಕ್ಕೊಟು ಪ್ರಸ್ತಾವಿಕವಾದ್ ಪಾತೆರ್ದ್, ಎದ್ಕೊನಿಯೆರೆ. ಭಗತ್ ಸಿಂಗ್ ಸಾಧಕ ಪ್ರಶಸ್ತಿದ ಅಭಿನಂದನಾ ಪಾತೆರನ್ ಪ್ರಧಾನ ಕಾರ್ಯದರ್ಶಿ ಗಣೇಶ್ ಕಾಪಿಕಾಡ್ ಪಂಡೆರ್. ಕರುನಾಡ ರತ್ನ ಅಪ್ಪು ಸೇವಾ ಪ್ರಶಸ್ತಿದ ಅಭಿನಂದನಾ ಪಾತೆರನ್ ಆನಂದ ಕೆ.ಅಸೈಗೋಳಿ ಪಂಡೆರ್. ಕೂಟ ಸಮಿತಿದ ಅಧ್ಯಕ್ಷೆರ್ ಕಿರಣ್ ಕೊಲ್ಯ ಸೊಲ್ಮೆ ಸಂದಾಯೆರ್. ಪ್ರತಿಷ್ಠಾನದ ಉಪಾಧ್ಯೆಕ್ಷೆರ್ ಪ್ರವೀಣ್ ಬಸ್ತಿ ಲೇಸ್ ನ್ ನಿರೂಪಣೆ ಮಲ್ತೆರ್. ಸಾಂಸ್ಕೃತಿಕ ಲೇಸ್ ಸ್ಪರ್ಧಾ ಸಮಿತಿ ಸಂಚಾಲಕೆರ್ ಕೃಷ್ಣ ಪೊನ್ನೊತ್ತೋಡು ನಿರ್ವಹಣೆ ಮಲ್ತೆರ್. ಮನೋರಂಜನಾ ಲೇಸ್ ಆದ್ D2D ಕೂಟರ್ದ್ ನೃತ್ಯ ಬೊಕ್ಕ ಶಾರದಾ ಆರ್ಟ್ಸ್ ಮಂಜೇಶ್ವರ ಮೊಕಲೆರ್ದ್ “ಯಾನ್ ಉಲ್ಲೆತ್ತ ‘ ನಾಟಕ ಪ್ರದರ್ಶನ ನಡತ್ಂಡ್.
Editorial