ಕೋಡಿಕಲ್ ಮಾರ್ಗೊಲೆಡ್ ತುಳು, ಕನ್ನಡ ಪಲವೆ ಉದಿಪನ
ಕುಡ್ಲ: ತುಳುನಾಡ್ ದ ಬಾಸೆ ತುಳು ಆದುಂಡು. ಆಂಡಲ ಮುಲ್ಪದಕುಲು ಬೆಂಗ್ಲೂರ್ ದ ಜನಕ್ಲೆಕ ಕನ್ನಡನ್ ಲ ಶುದ್ಧವಾದ್ ಪಾತೆರುವೆರ್. ಒವ್ವೇ ಕಾರಣಗ್ ಲ ನಮ ಕನ್ನಡನ್ ವಿರೋಧ ಮಲ್ಪುಜ. ತುಳುವೆರ್ ಕನ್ನಡನ್ ವಿರೋಧ ಮಲ್ಪುವೆರ್ ಪನ್ಪಿನ ತಪ್ಪು ಕಲ್ಪನೆರ್ದ್ ಪಿದಯಿ ಬರೊಡು ಪಂದ್ ಬಡಕಾಯಿ ಕುಡ್ಲದ ಶಾಸಕೆರ್ ಡಾ. ವೈ ಭರತ್ ಶೆಟ್ಟಿ ಪಂಡೆರ್.
ಕೋಡಿಕಲ್ ದ ಪತ್ತ್ ಅಡ್ಡ ರಸ್ತೆ, ಮೂಜಿ ಮುಖ್ಯ ರಸ್ತೆಗ್ ಕಾರ್ಪೊರೇಟರ್ ಕಿರಣ್ ಕುಮಾರ್ ಕೋಡಿಕಲ್ ಮೇರ್ ತನ್ನ ಅನುದಾನರ್ದ್ ಪಾಲಿಕೆ ವ್ಯಾಪ್ತಿಡ್ ಸುರುತ್ತ ಸರ್ತಿ ಕನ್ನಡದೊಟ್ಟುಗು ತುಳು ಪುದರ್ ಪಲವೆನ್ ಪಾಡ್ದಿನೆನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ತುಳು ಲಿಪಿತ್ತ ಮಾನ್ಯತೆಗ್ ಸಚಿವೆರ್, ಶಾಸಕೆರ್ , ಸಂಸದೆರ್ ನ ಪ್ರಯತ್ನ ನಿರಂತರವಾದುಂಡು. ತಾಂತ್ರಿಕ ಸಮಸ್ಯೆಲೆನ್ ಪರಿಹಾರ ಮಲ್ಪರೆ ಬೇಲೆಲ ನಡತೊಂದು ಉಂಡು. ಕೆಲವೊಂಜಿ ವಿಚಾರಲು ಸಮಯ ದೆತೊಂಡಲ ಯಶಸ್ಸ್ ತಿಕ್ಕುಂಡು ಪನ್ಪಿನ ವಿಶ್ವಾಸ ಉಂಡು ಪಂಡೆರ್.
ತುಳು ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆರ್ ದಯಾನಂದ ಕತ್ತಲ್ ಸಾರ್ ಪಾತೆರ್ದ್, ತುಳು ಅಕಾಡೆಮಿದ ಭವನ ನಿರ್ಮಾಣಗ್ 9 ಕೋಟಿ ಅನುದಾನನ್ ಬೇತೆ ಬೇತೆ ಮೂಲರ್ದ್ ಶಾಸಕೆರ್, ಪ್ರಾಧಿಕಾರದ ಅಧ್ಯಕ್ಷೆರ್ ಒದಗಾದ್ ಕೊರ್ತೆರ್. ಕನ್ನಡನ್ ತುಳುವೆರ್ ವಿರೋಧ ಮಲ್ಪುವೆರ್ ಪನ್ಪಿನ ಭಾವನೆಡ್ ಸತ್ಯಾಂಶ ಇಜ್ಜಿ. ನಮ ಕನ್ನಡನ್ ಅಭಿಮಾನರ್ದ್ ಗೌರವಿಸಾದೇ ತುಳುನ್ ನಮ ಪಾತೆರುನ ಭಾಷೆದ ಮಾನ್ಯತೆಗ್ ಪ್ರಯತ್ನ ಮಲ್ತೊಂದು ಉಲ್ಲ ಪಂಡೆರ್.
ಈ ಪೊರ್ತುಡು ಕಾರ್ಪೊರೇಟರ್ ಆಯಿನ ಕಿರಣ್ ಕುಮಾರ್ ಕೋಡಿಕಲ್ ಮನೋಜ್ ಕುಮಾರ್, ನಿಕಟ ಪೂರ್ವ ಉಪಮೇಯರ್ ಸುಮಂಗಳ, ಗೋಪಾಲ್ ಕೋಟ್ಯಾನ್, ತುಳುನಾಡು ರಕ್ಷಣಾ ವೇದಿಕೆದ ಸ್ಥಾಪಕಾಧ್ಯಕ್ಷೆರ್ ಯೋಗೀಶ್ ಶೆಟ್ಟಿ ಜೆಪ್ಪು, ಜೈ ತುಳುನಾಡು ಕುಡ್ಲ ಅಧ್ಯಕ್ಷೆರ್ ಅಶ್ವಥ್ ತುಳುವೆ, ತುಳುವೆರ್ ಕುಡ್ಲ ಅಧ್ಯಕ್ಷೆರ್ ಪ್ರತೀಕ್ ಪೂಜಾರಿ, ಪ್ರಮುಖರಾಯಿನ ಉಮೇಶ್ ಮಲರಾಯಸಾನ, ಹರಿಪ್ರಸಾದ್ ಶೆಟ್ಟಿ, ಸೀತಾರಾಮ್ ದಂಬೆಲ್, ಬೂತ್ ಅಧ್ಯಕ್ಷೆರ್, ತುಳು ಸಂಘಟನೆದ ಪದಾಧಿಕಾರಿಲು, ಸದಸ್ಯೆರ್, ಕೈತಲ್ ದ ಜನಕುಲು ಲೇಸ್ ಡ್ ಪಾಲ್ ಪಡೆದಿತ್ತೆರ್.
Editorial