ಬಂಟ್ವಾಳ ತಾಲೂಕುದ ಕಳ್ಳಿಗೆ ಗ್ರಾಮದ ದೇವಂದಬೆಟ್ಟು ಶ್ರೀ ಲಕ್ಷ್ಮೀ ವಿಷ್ಣುಮೂರ್ತಿ ದೇವಲ್ಯದ ಅಷ್ಟಬಂಧ ಬ್ರಹ್ಮಕಲಶಾಭಿಷೇಕ ಬೊಕ್ಕ ವರ್ಷಾಧಿದ ಜಾತ್ರಾ ಉಚ್ಚಯದ ನಿಲೆಟ್ಟ್ ಪುದೆ ಕಾಣಿಕೆ ಕೊರ್ಪಿನ ಮೆರವಣಿಗೆ ಅಂಗಾರದಾನಿ ಮಧ್ಯಾಹ್ನ ಬಿ.ಸಿ.ರೋಡ್ ಡ್ ಬಾರಿ ಗೌಜಿಡ್ ನಡತ್ಂಡ್.
ಬ್ರಹ್ಮಶ್ರೀ ನಾರಾಯಣ ಗುರು ಸರ್ಕಲ್ ದ ಕೈತಲ್ ಪುದೆ ಕಾಣಿಕೆದ ಮೆರವಣಿಗೆಗ್ ಚಾಲನೆ ಕೊರಿಯೆರ್. ಭಜನೆ, ಗೊಂಬೆದ ನಲಿಕೆ, ಬಣ್ಣ ಬಣ್ಣದ ಕೊಡೆಕುಲು, ಕಲಶನ್ ಪತ್ತೊಂದಿನ ಪೊಂಜೊವ್ ನಕ್ಲೆನ ಕೂಟ ಮೆರವಣಿಗೆಡ್ ವಿಶೇಷವಾದ್ ತೋಜಿದ್ ಬತ್ತ್ಂಡ್.
ಬಿ.ಸಿ ರೋಡ್ ರ್ದ್ ದೇವಂದಬೆಟ್ಟು ದೇವಲ್ಯ ಮುಟ್ಟ ಸುಮಾರ್ 8 ಕಿ.ಮೀ ದೂರಗ್ ಭಕ್ತೆರ್ ಪಾದಯಾತ್ರೆದ ಮುಖೇನ ಪೋಯೆರ್. 3 ಸಾರರ್ದ್ಲ ಎಚ್ಚ ಜನಕುಲು ಮೆರವಣಿಗೆಡ್ ಪಾಲ್ ಪಡೆದಿತ್ತೆರ್.
ಜಿಲ್ಲಾ ಧಾರ್ಮಿಕ ಪರಿಷತ್ ಸದಸ್ಯೆರ್ ಪೊಳಲಿ ಗಿರಿಪ್ರಕಾಶ್ ತಂತ್ರಿಲು, ದೇವಲ್ಯದ ವ್ಯವಸ್ಥಾಪನ ಸಮಿತಿದ ಅಧ್ಯಕ್ಷೆರ್ ಕೆ. ರಮೇಶ್ ಉಪಾಧ್ಯಾಯ ನೆತ್ತರಕೆರೆ, ಪ್ರಧಾನ ಕಾರ್ಯದರ್ಶಿಲು ದಾಮೋದರ ನೆತ್ತರಕೆರೆ, ಮಾಜಿ ಸಚಿವೆರ್ ಬಿ.ರಮಾನಾಥ ರೈ, ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸದಾನಂದ ಶೆಟ್ಟಿ, ಗೌರವಾಧ್ಯಕ್ಷೆರ್ ನವೀನ್ ಚಂದ್ರ ಶೆಟ್ಟಿ ಮುಂಡಾಜೆಗುತ್ತು, ಪ್ರಧಾನ ಕಾರ್ಯದರ್ಶಿಲು ಗಣೇಶ್ ಸುವರ್ಣ ತುಂಬೆ, ಸಂಚಾಲಕೆರ್ ತಾರಾನಾಥ ಕೊಟ್ಟಾರಿ, ಕೋಶಾಧಿಕಾರಿ ಕವಿರಾಜ್ ಚಂದ್ರಿಗೆ, ಬೂಡಾ ಅಧ್ಯಕ್ಷೆರ್ ದೇವದಾಸ್ ಶೆಟ್ಟಿ, ಬ್ರಹ್ಮ ಕಲಶೋತ್ಸವ ಸಮಿತಿದ ಉಪಾಧ್ಯಕ್ಷೆರ್ ರಾಮಕೃಷ್ಣ ಆಳ್ವ ಪೊನ್ನೋಡಿ, ದೇವಲ್ಯದ ಅರ್ಚಕೆರ್ ರಾಮಕೃಷ್ಣ ಕಡಂಬಳಿತ್ತಾಯ ಸೇರಿನಂಚನೆ ಬೇತೆ ಬೇತೆ ಸಮಿತಿದ ಪ್ರಮುಖೆರ್ ಲೇಸ್ ಡ್ ಪಾಲ್ ಪಡೆದಿತ್ತೆರ್.
Editorial