ಕೈಕಂಬ : ವಾಮಂಜೂರು ಶ್ರೀ ಅಮೃತೇಶ್ವರ ದೇವಸ್ಥಾನದ ಎದುರು ಕಂಡೊಡು ಫೆ. ೧೯ ಬೊಕ್ಕ ೨೦ ತಾರಿಕ್ ಗ್ ನಡತಿನ ತಿರುವೈಲುಗುತ್ತು ‘ತಿರುವೈಲೋತ್ಸವ’ ಸಂಕುಪೂಂಜ-ದೇವುಪೂಂಜ ಜೋಡುಕರೆ ಕಂಬುಲ ಅವ್ವೆತೂ ವಿಶಿಷ್ಟ ದಾಖಲೆಗ್ ಸಾಕ್ಷಿಯಾದ್ ಉಂಡು , ಆತೆ ಅತ್ತoದೆ ಕಂಬುಲ ಆಯೋಜಕೆರ್ ಬೊಕ್ಕ ಎರುತ ಗುರ್ಕಾರಲಾಯಿನ ತಿರುವೈಲುಗುತ್ತು ನವೀನ್ಚಂದ್ರ ಆಳ್ವೆರ್ ತೋಜಾಯಿನ ಕ್ರೀಡಾಸ್ಪೂರ್ತಿದ ಗಳಿಗೆ ಒಂಜಿ ಜಿಲ್ಲೆದ ಕಂಬುಲ ಇತಿಹಾಸೊಡೇ ಅಪೂರ್ವ ಅವಿಸ್ಮರಣೀಯವಾಯಿನ ದಾಖಲೆ ಸೃಷ್ಟಿ ಮಲ್ದುಂಡು.
ಆಳ್ವೆರ್ ತೋಜಾಯಿನ ಕ್ರೀಡಾಸ್ಪೂರ್ತಿ ಭವಿಷ್ಯೊಡು ಪೇಂಟೆದ ಬೇತೆ ಕಡೆತ್ತ ಕಂಬುಲ ಮಲ್ಪುನಕ್ಲೆಗ್ಲಾ ಸ್ಪೂರ್ತಿ, ಪ್ರೇರಕಲಾ ಆವು ಪಂದ್ ಕಂಬುಲ ತೂಯೆರೆ ಬತ್ತಿನ ಜನಕುಲು ಪಂಡೆರ್.
ಘಟನೆದ ವಿವರ :ಫೆ. ೧೯ರ್ದ್ ಮನದಾನಿ ಮುಟಲಾ ಕಂಬಳ ಆವೊಂದು ಇತ್ತುಂಡು , ಫೆ. ೨೦ ತಾರಿಕ್ ಗ್ ಕಾಂಡೆ ಸಂಕುಪೂಂಜ ಕರೆಟ್ ತಿರುವೈಲುಗುತ್ತು ನವೀನ್ಚಂದ್ರ ಆಳ್ವೆರ್ನ ಗುತ್ತುದ ಗತ್ತ್ ದ ಎರುಕುಲು ಬೊಕ್ಕ ದೇವುಪೂಂಜ ಕರೆಟ್ ಪುತ್ತಿಗೆ ಜಲಗೋಳಿ ಭಾಸ್ಕರ್ ಸುಂದರ ಕೋಟ್ಯಾನ್ರೆನ ಎರುಕುಲು ಬಲಿಪರೆ ಸುರು ಮಲ್ತುಂಡು . ಎರುಕುಲು ಬಲಿಪುನೆನ್ ಉಂತಾಯಿ ಕೂಡ್ಲೆ , ತೀರ್ಪುಗಾರೆರ್ನ ಜಾಗೆರ್ದ್ ಸಂಕುಪೂoಜ ಕರೆಟ್ ಬಲ್ತಿನ ನವೀನ್ಚಂದ್ರ ಆಳ್ವೆರ್ನ ಎರುಕುಲು ಸುರುತ ತಾನೋ ಪಡೆತುಂಡು ಪಂದ್ ಮೂಜಿ ಸಲ ಪಂಡೆರ್ ಕೋಣಗಳು ಆಂಡ ದೇವುಪೂಂಜ ಕರೆಟ್ ಬಲ್ತಿನ ಪುತ್ತಿಗೆದ ಎರುಕುಲು ನವೀನ್ ಆಳ್ವೆರ್ನ ಎರುಕುಲೆರ್ದ್ ಒಂಜಿ ಪಜ್ಜೆ `ದುಂಬು ಇತ್ತ್oಡಲ ರಡ್ಡನೇ ತಾನೋ ಪಡೆಂಡ್ ಪನ್ಪಿನ ಸಂಶಯೋ ಬೊಕ್ಕ ನಿರಾಸೆದ ಪಾತೆರ ಅಕ್ಲೆನ ಕೂಟೊರ್ದು ಕೇಂದ್ ಬನ್ನಗ ಅಕುಲು ಅಕುಲೇ ಉಲಯಿಡ್ ಪಾತೆರುನ ಕೇಂದ್ ಬತ್ತ್oಡ್ .ಕಂಬುಲದ ಕರೆಟ್ ಗೆಂದ್ ಡ ಅತ್ತ್ ಸೋತುಂಡ `ಸರಿ’ ಪಂದ್ ಒರ ಪಂಡ ಕಂಬುಲಡ್ ಅವ್ವೆ ಕಡೆತ ಪಾತೆರ .
ಈ ಪೊರ್ತುಡು , ಮತ್ತರ್ಮೆಡ್ ಕುಲ್ದಿತ್ತಿನ ನವೀನ್ಚಂದ್ರ ಆಳ್ವೆರ್ , `ತಿರುವೈಲು ಕಂಬುಲಗ್ ಬರ್ಪಿನ ಎರುಕ್ಲೆನ ಗುರ್ಕಾರ್ಲು ಅಸಮಾಧಾನಡ್ ಪೋಪಿನ ಅವಶ್ಯಕತೆ ಇಜ್ಜಿ ಪಂದ್ ಮತ್ತರ್ಮೆರ್ದ್ ತಿರ್ತ್ ಬತ್ತ್ ದ್ ಪುತ್ತಿಗೆ ಎರುಕ್ಲೆನ ಕೈತಲ್ ಪೋದು ‘ಕ್ವಾರ್ಟರ್ ಫೈನಲ್ಡ್ (೮ನೇ ಸುತ್ತು) ನಿಕ್ಲೆನ ಎರುಕುಲೆ ಸುರುತ ಇನಾಮು ಪಂದ್ ಪಂಡೆರ್.
ಇಂಚ ಕ್ವಾರ್ಟರ್ ಫೈನಲ್ಡ್ ರಡ್ಡನೇ ತಾನೋ ಪಡೆಯಿನ ನೇಗಿಲು ವಿಭಾಗದ ಪುತ್ತಿಗೆ ಎರುಕ್ಲೆಗ್ ಸುರುತ ತಾನೋ ಬತ್ತ್oಡ್.
ನವೀನ್ ಆಳ್ವೆರ್ ತೋಜಾಯಿನ ಕ್ರೀಡಾಸ್ಫೂರ್ತಿದ ಆ ಕ್ಷಣ ಮಾತೆರ್ನ ಪ್ರಶಂಸೆ ಗ್ ಪಾತ್ರ ಆಂಡ್ . ನಿಜ ಪನೊಡು ಪಂದ್ ಆಂಡ , ಪಂಥಡ್ ಒರ ಎರುಕ್ಲೆನ ಬಗ್ಗೆ ತೀರ್ಪುಗಾರೆರ್ ಪ್ರಕಟಣೆ ಕೊರಿ ಬೊಕ್ಕ ತೀರ್ಪು ಬದಲ್ ಮಲ್ಪರೆ ಇಜ್ಜಿ . ಆಂಡ , ತಿರುವೈಲುಗುತ್ತು ಕಂಬುಲಡ್ ನವೀನ್ಚಂದ್ರ ಆಳ್ವೆರ್ ತೀರ್ಪು ಬದಲಾವಣೆಗ್ ಅವಕಾಶ ಮಲ್ತ್ ಕೊರ್ದು , ಬೇತಕ್ಲೆಗ್ ಮಾದರಿ ಆಯೆರ್.
,
